يامدلعة لا تدعين الضيق وإنتي في سعة

يامدلعة لا تدعين الضيق وإنتي في سعة
الضيق للي ما اتسع له صدر محبوبة لضاق


القلب نفسه عند متبهذل وعند مدلعه
الفرق في صدق المشاعر والأحاسيس الرقاق


الله ياكم لي وانا منك الوفاق استطلعه
والحين لاإنتي ولاقلبك ولا حتى الوفاق


آخر حكاية حب واول جرح كنت اتوقعه
اللي برواق تحبني تقدر تفارقني برواق


احساسك أصلا" ما يناسبني وانا ما انفعه
مادام لي مبدأ ولك نية تبيعين الرفاق


الناس قالت من يبيعك واشترى غيرك بعه
لاتلحق اللي منك مايستاهل أسباب اللحاق


أخترت اموت ولا يقولون الخلايق:إمعه
واخترت أفارق والصدق ياكره كرهي للفراق


أصبحت مثل اللي يدور للجهات الأربعه
راح الجهات الاربع ومازلت في نفس النطاق


المشكلة وده يفضفض مير كل يصفعه
من حيث ما واجه بوجهه للأسف يلقى طراق


الحزن يجتاحه وشكل في حياتي زوبعه
وإحساس بإهمال الجميع يضاهي إحساس المعاق


الظاهر إن الناس في قلب المواجع مبدعه
والظاهر إني صرت ممن لايطيق ولايطاق


الحب من ذا اللي يقول الحب دنيا ممتعه
في ذمتي مايقولها لوكان مما ذقت ذاق


إن شاف نفس اللي أشوف وماسمعته يسمعه
يختار له نار الفراق ولايجي جنة عناق


العاشق اللي ما معه غير إنتفاضة مدمعه
الله يكون بعون قلبه وإحتراقه إحتراق


إن جيت تلقى حالته حاله وشبه مضيعه
أحيان يتنفس ولكن اغلب الحال إختناق


إنهد حيله وإنجرح وإحتاس في هالمعمعه
محتار مايدري على ويش الزعل والإنشقاق


إنصب تفكيره على (ماذا وراء الأقنعه)
مسكين كان آخر ضحيه للخيانه والنفاق


الحين ياضده تكون الناس وإلا يا معه
ما يعترف بالأوسطيه والثقه والإتفاق


أرثي لحاله عندما يكتب على الرمل إصبعه
(هذي نهاية ما يسمونه محبه وإشتياق)


مجنون ليلى يتبع أهواءه وحنا نتبعه
يعني انا وآلآف غيري..نندرج ضمن السياق


الصدق لوهم الرجال في كلمتين تقلعه
ما تمنعه أحيان كلمة (يبغض الله الطلاق)


السالفة اكبر من إنه يمتنع أوتمنعه
ما دامت الدعوه مصير إنسان مربوط بوثاق


إن حب حب الله يعينه والحشى متولعه
من وين ما قلبه يسوقه من ورى خشمه يساق

الود ودك ولا وصل للوضع هذا تقنعه
(مهما استمر الحب يبقى آخر الحب إفتراق)


أكبر غلط لو شخص متبهذل يحب مدلعه
والأخت ما تقدر توسع خاطره لو يوم ضاق