رواية سحابة لو حملت جبال وحلوة لو شّربت المُر! / البارت 31

البارت 31❤❤.


سند رفع جوّاله ورد بهدوء : هلا ذكرى!
ذكرى بصوت مذعور : سند تعال ، في حرامي بالبيت
سند بصدمة : صادقه ولا حاسه ؟
ذكرى : صادقه ، قبل شوي لما رجعنا انا وجواهر سمعنا صوت حركه بالبيت وفجأه باب السطح تسكّر ، قلنا يمكن من الهواء ، وبعدها سمعنا اصوات بالسطح وكأنه الحرامي يسحب شيء
سند ماقدر يخفي ضحكته اللي صدمت ذكرى : الو سند ،شفيك؟
سند : لا مافي شيء ، يتهيألك، بس لاتقربين صوب السطح
ذكرى بحده : عادي عندك ؟ حرامي يدخل بيتك وينتهك حرمته عادي ؟ لا وبعد شكله مسوي شاي بالمطبخ اشوف اوراق الليبتون ع الطاولة !
سند : عاد لاتدققين واجد يمكن المسكين بردان ولا شيء ، عالعموم انا في بيت عمي اذا حسيتي بشيء كلميني
قفّل منها وكانت ورد مبتسمه مردود لضحكته : وش فيك ، وش تبي ذكرى ؟
سند : مسكينه سمعت إزعاجنا وتحسب في حرامي بالبيت
ورد سكتت شوي لما طرى في بالها سؤال ولا ترددت فيه : معليش على اللقافه بس وين ابوكم ؟
سند وهو يرجع ويرتكي على الجدار : عادي ياورد اسألي اللي تبينه ، بس وش جاب ابوي على بالك الحين
ورد ارتكت بيمينها جنبه وقالت بتفكير : أنا يوم أخاف من شيء او يصير لي شيء اكلمك انت ، ليش ؟ لإن ماعندي احد غيرك ، لكن ذكرى عندها ابوها ليش تكلمك إنت؟
سند إلتفت لها بكدر خاطر : فاهمك، ابوي متزوج من خمس سنوات ، و مايجينا ولا يعرف أخبارنا ، ويتذكرنا بالسنه حسنه
طلّع من مخبى ثوبه دخّان وولاعته ، شغل سيجاره ومز منها مزّه وقال بسرحان : انا ماهمني ولا ضرني ، انا رجّال شايل نفسي به وبدونه ، لكن خواتي ! سبب لهن عقده وعيّشهن بنقص ، عليه من الله مايستحقّ !
ورد بضيق : لا تقول كذا ، انت ماحاولت تسأله ؟
سند ألتفت لها بشبه إبتسامه طافيه وهمس : لا ماهو بزر يوم أني احقق معاه ، عقله براسه ويعرف خلاصه !
ورد : يارب انك تهديه ، ماش هالشيبان الواحد لاكبر ينهبل
سند : وش دراك بالشيبان ؟
ورد رفعت حاجب وهي تمشي عنّه : أنت اكبر مثال ، يوم كبرت استخفيت بحركاتك اللي قبل شوي !
سند ضحك وهو يسند ظهره وراه وعينه عليها لين وصلت الباب قال بخبث : بس حبيت إنك مسويه حالك غبيّه ومو فاهمتني .
فتحت الباب وطلّعت بهدوء وحذر تراقب المكان ، وظل سند واقف وسرحان بمكانها ، إنهد حيله من ساعه مرّت بقربها
ياما مشى على خطه رسمها لنفسه ، ومنع نفسه عن أشياء كثير وإختار أشياء ماترضيه ولاتريّحه ولايبيها مقابل إنه يحافظ عليها وعلى نفسيتها وتفكيرها ، حسّ ايدينه مربّطه وعاجـز أمام نفسه وإختياراته ، خرجت تنهيده من عمق ذاته وتبعها بهمس مُنهـك : ماخسرت اي معركة ولا سبق وأن استسلمت امام أي فارس، كيف كذا بكل سهولة تهزميني؟
•