أنا أكبر من ظنونك ..

لا تعاملني خطا وبكبرياء وعنجهية
أنا أكبر من ظنونك نجم في العليا مكاني


لو تطاوعني حروفي ما تهون الأبجدية
عن هجاءك اتنزه واكرم كبار المعاني


والله إن الحرف طايع تمسك زمامه يديه
بس تكرم أذن تسمعني ويطربها بياني


لو أجاوب كل حاسد اختصم نصف البرية
لو تطاوعني حروفي مايكفيني زماني


قول مهما قلت فيني ما يهم وما عليه
والمذمة من صغار القوم ما تاصل أذاني


شوفني للي أعزه عزوته لا قال هيَّه
يبشر بعزه ورب البيت ما يشناه شاني


الفخر ماهو كلام أفعالنا بيضا نقية
تنطق أفعالي فخر لو كان ما ينطق لساني


ما تكَلَّفْنا الشهامة .. الكرم فينا سجية
فضل من ربي عليّ إنه على العليا هداني


الشجاعة قاتله والجود يبغى مقدرية
وأنا من هذا وذاك الله من فضله كساني


حتى أنته يا صغيِّر رغم الافعال الردية
بطيبنا نجزى رداك ونجبرك لا جيت عاني


وإن تعاملنا معاك بطيبنا وبطيب نيَّه
ذا شكر للواحد اللي جاد لي باللي كفاني


أشهد إن أعظم مكاسبنا هي النفس الأبية
والتواضع رغم كل اللي به الخالق حباني


نعطي ولا ننتظر للي عطيناهم جزيَّة
الفِعال الطيبة للي فعلها عمر ثاني


والكريم يعيش ذكره لو توافيه المنية
عزتي لك في وجودك في عيون الناس فاني






سُهيل