يا واقفه

شفتيني ابّعد من طموح العين واكبر من جبل
ياللي رميتني بسهمك من تحت رمش العيون

ما خفتي الله يوم شفتي شايبا وعلى عجل
عينه على بوابة الممشى يبي ربعه يجون

ضنيتي اني واقف اتميلّح وفي عيني غزل
ما تدري اني صمت عن درباً يظم العاشقون

اكبرطموحي كيف اصيف الساق عن درب الزلل
والنفس انزها عن اللي فالمعاصي ياقعون

لي فالحياة المقبله نظره ويحذاها الامل
اني اقدم ما يوصلني خلود المؤمنون

عندي قناعة ذات بان اللي من الماضي رحل
ماعاد يرجع غير في مسرح خيال النائمون

ياواقفه على الباب صدّي عن مشاهيب المقل
ان كان عندك نزعة الإيمان وحبالك متون

نار الهواء لسعاتها يابنت ما تبري العلل
لاكنها قد تمنحك ساعة شعور الشاربون

لا تغمزي بعيونك اللي في ملامحها خجل
خلي عباد الله لا تستنطقين العابرون

هذه نصيحه قلتها وان كان عارضها خلل
فانا بشر ماني من اللي ع الخطايا منزهون

لكن يبقى احساسي الصادق قبل وقع الجلل
وانتي خذي ما طاب لك ف الكل منا راحلون

لا تجعلي لبليس مدخل في حياتك وان حصل
عودي لربك قبل ما يرحل قطار التائبون

بقلم:
فواز المالكي

منقول