جاني بهمس الليل

جاني بهمس الليل عبر المسافات
في ليلة من طولها سرمديه
يسري الصدى فيها بذكر المعانات
شادٍ بالحان البيوت الشجيه

يتساءل ان كانت دخيلة على الذات
أو هي بها من بعضها داخليّه
أو انها اصوات تعلا وصرخات
أو ونة مكتومة باطنيّه

فني وفنك يا رفيجي خويات
روح وجسد هذي بهاذيك حيّه
لاتكون ندمان على كل ما فات
لي فات مات ولا بقاله بقيه

للوقت ساعات وللعمر لحظات
تشقي بها والا تجي لك هنيّه
انسى وجودي في وجودي وما فات
واللي مضى بالامس واللي قفيّه

اصور المعنى حروف بأبيات
جزله ولوحات لها جاذبيّه
وارسم بحرف وينطق الحرف كلمات
ابلغ من آلاف البيوت القويّه

لاهل الولع سجلت في الشعر آيات
تبقى على الأيام ذكراه حيّه
لوحات شعر مصورات بأبيات
أوزانها أنامل عبقريّه

عشاق أنغام بها حلو الاصوات
اللي بها سحر وهوى وجاذبيّه
وراعي الولع يشكر ويهدي تحيّات
ويا ليت تقبل يا أمير الهديّه