من يقول الزين

من يقول الزين ما يكمل حلاه
كل شيٍ في حبيبي إكتمل
الله اللي كمله و الله عطاه
ما بقى للزين في خلّي محل

العيون أحلى من عيون المهاه
شافها قلبي و صفّق و احتفل
نظرته من فتنته شعلة حياه
و الجفون من الحيا فيها كسل

ساهمٍ رمشه على الخد و سناه
كن لمعة وجنته وردٍ و طل
و الشفايا كنها جمر الغضاه
تحرس الريق المحلّى بالعسل

و الشعر ليلٍ نقل حمرة مساه
أجعدٍ حوّل على صدره همل
مايجٍ من فوق متنه ما طواه
لون شلالٍ مع المغرب نزل

و انطلق جيده يماري في بهاه
فوق مياسٍ تعزّل و اعتدل
بالرشاقه فيه من ظبي الفلاه
لى مشى كنّه على الريح انتقل

ريحته من كل زهرٍ منتقاه
و الزياده للخزامى و النفل
صافيٍ مثل المطر فوق الصفاه
باسمٍ مثل البشاير بالأمل

جامعٍ من كل زين منتهاه
مستحيل الوصف في خلي سهل
كايدٍ ما هو يلين لمن بغاه
يرتفع عن كل سقطات الزلل

شعر / خالد الفيصل ...