10-24-2012
|
#11
|
سرد منصور السالفه كلها لحسن من اولها لآخرها لين وصل للحظه لما اخذها سامي من البيت وهي مغمى عليها وتعكر مزاج منصور وقال : والله انا مافيني خير ولا عندي نخوه الي خليتها بين يدين واحد مايقل عنها شراسه وحقد وسلمتها له والله ياحسن خايف يسوي فيها شي ويقتلني احساسي بالذنب اني كنت شريك له وسلمتها بيده وهو يبيها من زمان
حسن : والله انت غريب بعد هاللي سوته فيك وبعد تحس لها هالاحساس انا لو منك احمد ربي اني افتكيت منها قبل تخرب حياتي بس انت تقدر تعرف مصيرها
منصور : وشلون ؟
حسن : من الأدله الي عندك قول له بسلمك الادله الي عندي بس اعرف مصيرها وهل اذاها ولا لا ؟
منصور : وادخل مره ثانيه بالصراع بينهم وانا ماصدقت اخلص منه ؟
حسن : وش اسوي فيك طيب اجل خلاص فوض امرها لله وانساها وحاول تستعيد حياتك وترجعها مثل قبل وهالبنت بس عندك فضول تعرف وش آخرت قصتها لاحب ولاشي
سكت منصور من بعد كلام حسن وبعد فتره قضوها مع بعض بعد العشا راح حسن وجلس منصور بروحه وهو يفكر بعهود واخذ جواله وارسل لها مسج
عهود انتي بخير ؟
انتظر فتره وماجاه رد وقرر يدق عليها جوالها يدق بس محد يرد وبعد محاولات متكرره ردت عليه وحده
الو
منصور : هلا هذا جوال عهود صح ؟
ايه صح
منصور : وينها ؟
وش تبي فيها ؟
منصور : ابي اكلمها ضروري ؟
ماتقدر تكلمك
منصور : ليه فيها شي ؟ تعبانه ؟
لابس مشغوله
منصور : طيب من انتي ؟
انا امها
منصور : امها ! اكيد ؟
الام : ايه اكيد وشكرا لك يا استاذ منصور وعلى تعاونك معنا جميلك ماراح ننساه لك طول العمر
منصور ماهو مرتاح لالصوت امها ولا بالطريقه الي تكلمه فيها عنده احساس مريب
: طيب انا ابي اكلم عهود ضروري حتى لو دقيقه
الام : قلت لك ماتقدر ومره ثانيه شكرا لك وياليت تنسى هالرقم وصاحبته مع السلامه
قفلت بوجهه وكانت نبرتها الاخيره في الكلام معه فيها حده منصور ماعجبه الحال ودق مره ثانيه
منصور : من الآخر عطيني عهود ولا ترا موب احسن لك
الام ؛ موب احسن لك انت واعرف حجمك عدل قبل تتكلم معاي بهالطريقه
وقفلت بوجهه مره ثانيه ومنصور تنرفز وظل يكرر اتصالاته فيها وهي ماترد تجاهلها له حرق اعصابه بعدها ارسل لها مسج شوفي انا مابي ادخل نفسي بينكم واصير طرف بلعبكم القذر بس انتي تظطريني اسوي كذا خليها تكلمني ولا ترا كل الامانات الي هي حطتها عندي بتطلع للناس وساعتها بكون انا خصمكم انا مابي شي بس ابي اتطمن عليها عندك خمس دقايق لو ماكلمتها لاتلومين الا نفسك
انتظر منصور ردها وبعد شوي دقت عليه
الام : اسمع يا اخ منصور حنا كل ماقلنا خلصنا من الموضوع يرجع احد يفتحه حاليا هي ماتقدر تكلمك انا مابيك تعصب وتتخذ قرارات او تتصرف تحت انفعال معين بعده تندم انت الحين متنرفز وماتدري وش تقول اقترح عليك تريح وتفكر صح انا امها لو هي عليها خطر انا اول من يدافع عنها انت تبي تطمن عليها انا اطمنك هي بخير بس حاليا ماتقدر تتواصل معك اصبر كم يوم وانا اخليها تدق عليك وش تبي بعد ؟
منصور ما رتاح من كلامها ولا من سرعة تغير نبرتها الحاده معه الى اسلوب لطيف وهادي وتحاول تمتص عصبيته
منصور : مافيه ايام عندك ساعه وتتصلين علي وتخليني اسمع صوتها ولا تحملي نتيجة مماطلتك هاذي
وقفل بوجها وهو متنرفز ويحاتي عهود وعنده احساس ان رفض امها انها تكلمه ان فعلا مسوين فيها شي وهو ينتظر الساعه تعدي وقبل تعدي وصله مسج تقول فيه
اتمنى ماتتهور واتمنى انك تتفهم وضعنا بعد كم يوم انا وعدك انها بتتصل فيك ارجوك تنتظر مابي منك الا الصبر والانتظار بس ومره ثانيه اقولك لاتتهور
عصب منصور عليها وكانها تلعب فيه ودق عليها وصار الجوال مغلق تنرفز و عصب من حركة امها وهو يقول الله يرفع ضغطك ياعجوز النار والله ما اخليك استسلم منصور ورضخ للوضع وبدا رحلته مع الانتظار لليوم الي بتدق فيه عهود عليه مثل ماوعدته امها
وبين الهواجيس والتفكير فيها غلبه النوم وماصحى الا على اتصال حسن : انت وينك للحين نايم ؟
منصور يشوف الساعه : اوف اوف وش هالتأخير علي
حسن : انا ادري عنك شوف وش انت سهران عليه وخلاك تتأخر لهالحزه
منصور : والله ياحسن انا الظاهر باخذ اجازه احس مالي نفس شي ابد
حسن : يعني منت جاي اليوم
منصور : الا بجي بس متأخر شوي
قفل من حسن وهو يشوف بجواله اذا واصلته رسايل او اتصالات من رقم عهود بس ماحصل شي دق على جوالها ولقاه لازال مغلق
راح منصور يقدم على اجازه وبعد ماخلص الاجراءات طلع لأحد المقاهي وجلس يضيع فيها وقت وكل شوي يتفقد جواله اذا وصله شي منها وهو جالس يتقهوى وصله مسج فز قلبه وفتح جواله وكان المسج يقول أنا أعتذر عن اسلوبي المستفز معك و اعترف اني غلطانه
كانت المرسله هي ساره منصور حس ان توقيتها سيء وماهو جاهز بهالوقت لموضوع ساره دخل في حيره يرد على رسالتها ولا يطنشها ولا يشرح لها انه محتاج وقت مع نفسه وخايف لايجرحها بهالتصرف وبعد تردد وحيره وصل لصيغة رساله تجنبه احراجها وتجنبه انه يخوض بمثل هالموضوع بمثل هالوقت الي هو مشغول فيه بعهود و ارسل لها
حصل خير . واعتقد ان انا وياك محتاجين وقت أطول نفكر فيه بهدور ونبتعد فيه عن أي نوع تواصل مع بعض علشان نوصل لحل وقرار مناسب ومانندم عليه
وبعد دقايق ارسلت له تقول
انا حبيت بس اقول لك اني مستعده ارجع لك خذ وقتك بس انا اتخذت قراري ومتى ماشفت نفسك مستعد انا انتظرك وآسفه مره ثانيه
نهآيةة البارت ،
|
|
|
|
|
10-24-2012
|
#12
|
'"
البآرت . .
منصور حس بضغط كبير من بعد رسالتها هاذي وكأنها تحطه تحت الأمر الواقع وهو انها راجعه وتنتظره يجيها وانها بس مسألة وقت حاول يرد ومالقى أي رد مناسب سكت وما ارسل لها أي شي
منصور حاس ان حياته قبل عهود شي وبعدها شي ثاني تغيرت كليا رغم قصر الفتره الي دخلت فيها حياته حس انها ملئتها بشكل كبير ايام الانتظار هاذي حس ان اليوم بسنه كل يوم ينتظرها تتصل او ترسل مسج جوالها مغلق وخايف ان امها تكذب عليه وتصرفه
مرت الايام وهو ينتظر ام عهود توفي بوعدها وتخلي عهود تدق عليه بس كل مادق وحصل جوالها مغلق زادت عصبيته الى ان استشاط من الغضب وارسل على جوال سامي
قول لعمتك توفي بوعدها واخر مهله لها اليوم وهي تعرف انا وش اقصد
ثواني ودق سامي على منصور ،
سامي : خير وش تبي من ورا هالرساله ؟
منصور : هي تعرف وش ابي
سامي : انت ليش مصر تتدخل باللي مايعنيك انت ماكنت قبل كم يوم تتمنى تطلع من الكابوس وش تبي الحين تنبش بأمور خلاص انتهت ومعاد لك صالح فيها
منصور : سامي وانت بعد لاتتدخل بأمور مالك صالح فيها الكلام بيني وبين امها وصل لها الرساله وبس فاهم ؟
منصور مانتظر أي رد من سامي وقفل
سامي راح لعمته وهو معصب ويوريها الرساله وقال لها
سامي : انا الي بفهمه وش وصله لك ؟
العمة : انا الغلطانه ياسامي انا الي رديت عليه من جوال عهود وماحسبت ان الموضوع بيتطور كذا على كلامك انه كان بس يبي يفتك من سالفتها لاتشوه سمعته ماهقيت انه بيتبع نفس اسلوبها ويهدد انا مدري لايكون هو على علاقه معها وحنا ماندري ؟
سامي : الله يلعنك انتي وبنتك انا كل مابنيت من مكان تجين انتي او هي تهدمونه بس يالله المهم عرفنا هي وين مخبيه باقي التسجيلات عند هالمنصور الحقير
العمة : طيب الحين وش بسوي على حسب رسالته هو اليوم يبيها تتصل
سامي : ماعليه انا عندي الحل .
.
ومر الوقت ولا دقت ولا ارسلت وهو جالس على اعصابه و ينتظر وقطع هالانتظار مكالمه من سامي
سامي : الو انت في بيتك ؟
منصور : ايه
سامي : طيب افتح لنا الباب
نقز منصور من مكانه بسرعه وراح يفتح الباب ولقى بوجهه سامي ومعه وحده دخلهم
وعيونه على المره الي معاه هو عرف انها ام عهود لسبب ان كل تفاصيلها تشبه عهود بإختلاف العمر بس
جلسو بالصاله وبدا سامي الكلام
سامي : في البدايه احب اعرفك هاذي ام عهود و حنا جايينك نبي نتفاهم بكل هدوء ونبي نخلص من هالسالفه للأبد جبتها معي علشان تعرف وتسألها الي تبيه عن بنتها وتقتنع من كلامها مو من كلامي ونوصل لحل ان شاء الله وتسلمنا كل تسجيل عندك وننتهي من هالأزمه العائليه
منصور : انا مابي امها ولا ابيك انا ابي اعرف عهود وش سويت فيها من اخر مره كانت معك ؟ ليش ماتبونها تكلمني ؟ انتو مسوين فيها شي والله واجزم انكم سويتوا فيها شي ياحثاله
سامي يقاطعه بعصبيه : انت هييه تأدب لاتنسى انك تكلم اهلها وهم ادرى بمصلحتها ومو انت يالغريب الي بتكون خايف عليها اكثر منا
ام عهود : منصور اسمع انا امها واعرف الناس في بنتي كل محاولاتنا معها ماجابت نتيجه بالعكس خلتها تتمادى وتحس ان احنا مو قادرين عليها وكبرت الموضوع ولجأت لك ودخلتك بالموضوع بينا ويقولون آخر العلاج الكي يعني تقدر تقول ان احنا لقينا علاجها وكويناها فيه
منصور : يعني تعترفين انك سويتي فيها شي ؟
ام عهود : هذا مو موضوعنا سويت او ماسويت المهم النتيجه قدرنا نروضها ونسيطر عليها باقي انت تسلمنا الي عندك ونخلص ونعيش بسلام
منصور : طيب وش رايك ان ماراح تشوفين مني أي دليل لين اشوفها اول كنت مكتفي اني اسمع صوتها الحين اذا ماشفتها والله ماتشوفون أي تسجيل وببتدي اضربكم اعلاميا
سامي ينقز ويلقط منصور بحلقه : اسمع انت والله لاتحدني اقضي عليك ترا انا اعصابي تلفت من هالسالفه هات الي عندك باللتي هي احسن
ام عهود تفرقهم قبل تكبر بينهم وتقول لسامي : اطلع برا انت مامنك فايده وجودك بيعقد السالفه ومابيفيدنا بشي اطلع خلني اتفاهم معه . اطلع روح للسياره اقولك
طلع سامي وام عهود تتأسف منه وتقول له : والله ماجينا الا علشان ندفن هالقصه ونخلص مابي اضرك ولا اضر بنتي ولا عيال اخوي لذلك اتمنى تعطيني الي عندك ويادار مادخلك شر
منصور : شوفي والله مستعد اعطيك التسجيلات وانا مالي مصلحه فيها انا صرت متورط معكم واسمي بيجي بينكم بس والله لو تطمنيني عليها اسلمها لك الحين
ام عهود : اسمع يامنصور تعقد الموقف من يوم اخذها سامي من بيتك مغمى عليها كلمني وقال هي مغمى عليها معاي وانا باخذها للاستراحه لين تجين ونقدر نتعامل معها ونشوف وش نسوي فيها هي بعد مافاقت دبت خناقه بينها وبينه ووصلت للطق بينهم طبعا هو بحكم انه رجل تغلب عليها وطقها لين عضت الأرض بس المشكله انه ماكتفى بالطق ووقع المحظور بينهم
منصور : وش قصدك ؟
ام عهود : قصدي واضح يامنصور تمكن منها وكان من منظوره انه بيكسر عينها ويروضها
وانا على ماوصلت لقيتها بحاله عمري ماشفتها فيها
منصور لازال بحالة صدمه وذهول ويقاطع امها : يعني الكلب كان ناوي عليها وانا مكنته منها هي حافظت على نفسها من كشفته وهو يتآمر مع اخوانه عليها وكان يبيها ولا قدر عليها واجي انا وامكنه منها بكل سهوله ! ،
ويقوم من مكانه وهو الشر بعيونه ويقول : والله ما اخليه بن الكلب
قام منصور ولحقته وهي تقول له : تعال اصبر يامنصور امسكته قبل يروح لسامي وهي تقول له : خلاص يامنصور لمينا الموقف بينهم وزوجناهم وماتصدق يامنصور شلون البنت تغيرت من بعد هالموقف لو دارين زوجناها من زمان
منصور بنظرات احتقار يقول لها : تلعبين على من بهالكلام ؟ وبعدين انا ماني مصدق ان ام ترضى بهالمصير لبنتها وتتكلم بشكل عادي وكأن بنتها ماتعرضت لموقف كبير مثل هذا من واحد حقير هي بالاساس ماتطيقه انتي ام انتي ؟ والله ما الوم عهود لما قالت عنك انانيه شوفي شلون فرحانه ان البنت تغيرت من بعد هالموقف
اهم شي انك تتخلصين من مشاكلها ولافكرتي بوحشية التجربه الي عاشتها أي ام بمكانك تبكي دم من القهر والحسره على بنتها وانتي شوفي شكلك ولا كأنها تعنيك !
ام عهود : وليش ابكي قهر ودم الولد صلح الغلط وتزوجها والحمد لله رب ضاره نافعه البنت صارت هاديه وعايشه طبيعي وخلت عنها الطيش الي قبل
منصور : طيب دقي عليها خليها تكلمني موتقولين البنت عايشه طبيعي وعقلت خلاص انا ابي اسمع صوتها
ارتبكت وماعرفت ترد عليه
منصور : وش فيك ليش ارتبكتي اذا انتي واثقه من كلامك ليه ماتخلينها تكلمني ؟
ام عهود تغير الموضوع وتقول انت الحين متنرفز بيوم ثاني نتكلم يالله استأذن انا وجت تطلع من البيت ومسكها بيدها وهو يقول لها :اذا خايفه من الكلب الي برا قولي لي وانا اعرف اتصرف معه واحميك منه انتي وبنتك بس اهم شي اعرف ليش ماتبينها تكلمني ؟ واضح ان فيه شي وماتبوني اكشفه !
ام عهود تتأثر من كلام منصور ومن خوفه وحرصه على بنتها وتقول له :
خوفك عليها وملاحقتك لنا وعرضك انك تحميني انا وبنتي من سامي علشان بس تعرف مصيرها مو مقنعني ان بس من منطلق خوف انت بينك وبينها شي ؟ انت على علاقه فيها ؟
منصور : ماعرفها الا من وقت قريب وهو لما طلبت مساعدتي وخوفي هذا وحرصي من منطلق انساني بحت ومن منطلق اخلاقي ماحب الظلم والاستبداد لامنكم ولا منها بس تعاطفي معها انها وحده مقابل مجموعه والمحزن ان الام بصف هالمجموعه على بنتها وماتبيني اوقف معها واحرص على سلامتها ؟
ام عهود : الله يعيني انا بين نارين عموما اشكرك على مشاعرك واتمنى بس تمهلني وتعطيني وقت بدون ملاحقه ولا ضغط وبتعرف كل شي ماطلب منك الا الصبر بس ، عن اذنك
طلعت الام وراحت لسامي واول ماركبت السياره قال لها : هاه جبتي منه التسجيلات
ام عهود : حاولت فيه ومارضى الا يشوف عهود قدامه علشان يسلمنا الي عنده
سامي : يستهبل ذا
ام عهود : لا مايستهبل والرجال ماخذ المسأله جد الحين وش بنسوي ؟
سامي : ماعرضتي عليه فلوس
ام عهود : عرضت عليه ورفض ،
كان واضح من الام انها تحاول تخفي عن سامي الحديث الي دار بينها وبين منصور لحاجه في نفسها
سامي يعصب ويقول لها : انتي خليك هنا ، وينزل من السياره ويدخل على منصور ويتهجم عليه وهو يقول : انت ماتتوب يعني قبل كم يوم بتموت من الرعب والخوف على سمعتك والحين جاي تحشر نفسك بينا وش تبي بالضبط والله ثم والله اول من بيتضرر انت لاتخليني احطك براسي واشتغل عليك وساعتها مابيفيدك شي هات الي عندك
منصور : منيب جايبه واعلى مافي خيلك اركبه وبشوف انا ولا انت وتوهم مشتبكين ببعض ويتكافخون
دخلت عليهم ام عهود وتصارخ عليهم وتفرقهم وماسلمت من خناقتهم حصلت لها على كم كف وكم رفسه
وبعد جهد جهيد قدرت تفرقهم عن بعض ومسكت سامي وهي تحاول تطلعه برا بالغصب وواقفه بينه وبين منصور وكل واحد بصوب وكل واحد يشتم الثاني ويهدده
طلعت مع سامي وهي عينها على منصور ومن اشاراتها تقول له اهدا واصبر شوي
ركبو سيارتهم وانتقل الهواش بينهم ،
ام عهود : انت وبعدين معك واسلوبك الصبياني هذا ومن متى مثل هالامور الحساسه تتعالج بالطق والشتايم والتهديد حنا الي محتاجينه مو هو المفروض نسايسه مو نتهجم عليه
سامي : اقول ياليتك تنطمين وتسكتين مو ناقصك بعد لو انك موليتني على كلبتك من زمان ماكان هذا حالنا بس ماعليه انا اوريه
الام ساكته وتمسك نفسها ماتبي ترد عليه وهو بهالحاله
منصور يبدل التي شيرت الي تقطع من خناقتهم مع بعض وهو يبدل ملابسه ويتمتم مع نفسه : الواطي والله لأستقعد له
مرت الأيام ومنصور ينتظر على احر من الجمر اتصال او رساله من ام اعهود وكل ما نوى يرسل لها او يدق عليها يتذكر كلامها له عن الصبر وانه مايلاحقها ويضغط عليها ويقول لنفسه بصبر واشوف وش تاليتها اهم شي اعرف مصير البنت
وبعد مامر اكثر من اسبوعين بدون لا حس ولاخبر من ام عهود وبعد يأس انها ممكن تتصل فيه ارسلت له مسج يقابلها بمكان عام ومعروف بعد ساعتين منصور يطير من الفرحه بالرساله وراح يلبس ويستعد للقاء بالأول كان مبسوط ومع قرب الوقت من الموعد كان يجيه شعور مريب وان ممكن انهم ناوين له على شي المهم ان منصور راح للموعد وهو مو مرتاح وحاس بشي من الخوف
وصل للمكان واول مانزل من سيارته دق جواله وكانت ام عهود
ام عهود : مرحبا منصور انا اشوفك وانت نازل من سيارتك تعال تشوف السياره الي تولع وتطفي انوارها الاماميه تعال لها انا فيها
منصور : ايه شفتها ياالله جاي
وصل منصور افتحت له الباب وركب وراء وكانت ام عهود بس مع السايق وقالت للسايق : يالله تحرك
منصور : لحظه لحظه لاتتحرك وين بتاخذيني
ام عهود : ماتبي تشوف عهود
منصور : طبعا ابي اشوفها وينها فيه
ام عهود : الحين تعرف ،
وتحرك السايق وجلس منصور يسولف مع امها ويقول لها كنت الأيام الي فاتت انتظر منك أي رساله او اتصال وكل مره بدق عليك اتذكر وعدك لي واني لازم اصبر واتراجع لدرجه حسيت انك تلعبين علي وتماطلين فيني لأجل شي معين
الام تبتسم وتناظره بنص عين : انت تحبها ؟
منصور : لا انا بس متعاطف معها
ام عهود : اهاا متعاطف بس مادري لهفتك هاذي تقول غير شي وكأنك بتموت عليها
منصور : لا لا يروح فكرك بعيد انا بس مجرد اتطمن عليها واسلمكم امانتكم بينتهي كل شي يربطني فيكم
ام عهود : اها مشكور عموما والله يكثر من امثالك حقيقه شخصيتك جميله ونادره ان شخص يعرض نفسه وسمعته للخطر علشان يساعد وحده مايعرفها هذا بحد ذاته بطوله وعاد لاتنسى يابطل الوعد الي بينا بس تشوف عهود وتطمن عليها تسلمنا امانتنا الي عندك وكل واحد يروح بحال سبيله
منصور : طبعا ولايهمك انتي وعدتيني وهذا انتي توفين بوعدك وانا وعدتك ولازم اوفي بوعدي لك
بعد فتره وصلو لمستشفى الصحه النفسيه على طول منصور يلتفت عليها : مستشفى ونفسي بعد وش سويتو فيها ياعيال الكلب اكيد الكلب سامي اجرم فيها
ام عهود : اصبر يامنصور بالأول شوف واسمعني عدل هالمكان مايحتمل أي شوشره او انفعال اضبط نفسك الوضع مايحتمل أي غلطه لأنك بتضرنا و عهود اولنا فاهم ؟ سامي مايدري اني جايبتك هنا ولو يدري الله اعلم وش بيصير فينا
منصور : طيب لما اشوف وش تاليتها معكم
دخلو المستشفى وهي تمشي وهو يتبعها وبعد مسافه وصلت لباب كبير مكتوب عليه العزل الطبي ودخلت منه وهو معها وورا هالباب ممر طويل
وهم يمشون منصور يتلفت بزوايا الممر الطويل الضيق المظلم والي انواره نصها خربان وبنهاية الممر الطويل في ممر ثاني بالعرض وكله غرف صغيره ومن بين هالغرف غرفة عهود بس كانت هي الغرفه الوحيده المقفله عليها التفت ام عهود عليه وقالت : وصلنا هاذي غرفتها بس اصبر اكلم المسؤوله عن حالتها منصور يمسك الام من يدها وهو معصب وينفضها عهود شفيها تكلمي ووش هالمكان هذا
الام تفلت يدها منه وتقول له : مافيها شي انا برجع للسياره وبس تخلص زيارتك لها بينا كلام انتظر هنا ولما تجيك جيهان قول لها انك من طرفي او طرف سامي وعموما انا بكلمها الحين
راحت الام وعيونه عليها وآلاف الاسئله براسه عن هالوضع ظل واقف بهالممر الفاضي من أي مظاهر للحياه لا اهتمام ولا اضواء ولا ناس وكأنه مكان مهجور ويشوف ام عهود وهي تبتعد وتكلم بالجوال
ام عهود : الو جيهان وينك
جيهان : ايوه يام عهود انا في الطريق دلوئتي حوصل
ام عهود : اسمعي عهود جايها زائر اسمه منصور دخليه عندها وخليك قريبه منهم اذا شفتي منه أي تصرف او كلام ممكن يسبب مشاكل كلميني فورا فاهمه
جيهان : ايوه طبعا فاهمه حضرتك ماتخفيش
ومنصور عند الباب رايح جاي ينتظر وشوي طلعت له من اخر الممر ممرضه تتدربى ماتمشي من سمنتها الزايده وطولها الفارع وصلت لعند منصور وهي تقول : سلامو عليكو انا حخسر 20 كيلو بس من المشي ده يالهوي اتأطع نفسي متأسفه اوي عالتأخير
منصور يقول لها : طيب طيب خلصي افتحي لي الباب
افتحت له الباب وقالت : انا حكون ئريبه من هنا وسكرت عليهم الباب وقفلته
دخل بشويش ونبضات قلبه وكل مالها تطق اسرع واقوى يتلفت بالغرفه فاضيه السرير فاضي مافيه احد فيه باب صغير بزاوية الغرفه يسمع منه صوت طرطشة ماء وعرف انها ورا هذاك الباب وقف يناظر الغرفه رغم حرارتها بس كانت نظيفه وريحتها حلوه ومرتبه عكس الممر القذر الي مشى فيه والي مفروض تكون الغرف فيه اكثر قذاره منه
طلعت عهود من الحمام وكانت لابسه شورت وتي شيرت خفيف و بيدها فوطه صغيره تنشف وجها انصدمت لما شافت منصور قدامها وهو كانت صدمته اكبر لما شاف عهود كان شعرها عالزيرو وفيه اثار كدمات بجسمها وشاش ولصقات طبيه صرخت عهود وحطت الفوطه على راسها ومو مصدقه انه قدامه : منصور !!
|
|
|
|
|
10-24-2012
|
#13
|
ركضت له وكانت تبي تضمه من الفرحه بس هو صدها قبل تلمسه وقال لها : انا ماني مصدق الي اشوفه وش فيك ؟ وش قصه العزل الطبي وليه حالك كذا ؟
عهود : خايف لا أكون مريضه واعديك عموما ضيعت على نفسك فرصه تضمني فيها انا اصلا مادري شلون تصرفت بهالطريقه آسفه فرحت بشوفتك بعد مافقدت الأمل ان فيه احد بيفكر فيني آسفه
منصور : خلي عنك الآسف يعني انتي مافيك مرض نفسي ولا مرض معدي اجل ليش عازلينك ؟ ووين شعرك وليش كل هالكدمات في جسمك ؟
عهود : لحظه بس عن اذنك ، راحت عهود ولبست لها روب يستر المكشوف من جسمها
رجعت وجلست على سريرها وقالت له : يجلس عالكرسي القريب من السرير جلس منصور وقال : لها ابي اعرف وش صار لك وليش حالتك كذا ؟
عهود : اول شي يامنصور مافيني مرض ولاشي وكل الي تشوفه فيني من آثار سامي الكلب وراها سامي لعب لعبه قذره ونجح فيها ودخلني هالمستشفى بعد ماحلق شعري وجرحني بأماكن متفرقه بجسمي وشربني شي خلاني اهلوس طار فيني على هالمستشفى النفسي واثبت لهم بطريقه ماعرفت تفاصيلها الا من وقت قريب اني مجنونه رسمي ! تخيل وما اكتفى انه يحطني بس بهالمستشفى لا عزلني على اني حاله خطره تستوجب العزل علشان يكون الي واقف على حالتي شخص واحد وهي دكتوره جيهان الي واضح انه دفع لها شي وشويات
بس انا لها الحقيره مخلصه له مثل الكلب بين كل كم يوم تدخل علي وتضربني ووتعمد تترك اثار علي علشان تكتب ان حالتي تستوجب العزل لأني أئذي نفسي وخطر على المرضى
منصور يكلمها وعيونه تتفحصها : انا ماني مصدق هالحقير سامي لوين يبي يوصل معك وامك وينها من الموضوع ليش ماتتدخلك
عهود : امي ! امي هاذي الي ماهان عليها بنتها تطلع برا وتعيش حياتها بس هان عليها ان بنتها ينقال عنها مجنونه وتندفن وهي حيه وتقول لي امك أي ام هاذي بالله عليك ؟
منصور : بس ياعهود امك الظاهر انها حاسه بالذنب او خايفه من سامي لأن لولاها انا ماوصلت لك
عهود : منصور لحظه قبل تكمل بسألك سؤال
منصور : تفضلي
عهود : امي وسامي يدرون ان التسجيلات عندك صح ؟
منصور : ايه واكثر من مره طلبوها مني وانا رفضت اعطيهم لين اعرف مصيرك
عهود :
اهاا يعني الي وصلك لي ااصرارك انك تعرف مصيري مو ان امي حاسه بالذنب لو مالهم مصلحه معاك كان انا حالي من سيء لأسوء والله اعلم على المدى الطويل وش راسمين لي يمكن تذبحني هالجيهان وتقول انتحرت ! سبحان الله يامنصور انا لازلت اقول ان الله يحبني والدليل بعد كل الي صار بينا للحين ماتخليت عني انا ماستحق كرم الاخلاق هذا منك بس بعد ما استحق اني اعيش هالعيشه وانتهي هالنهايه من كل قلبي اشكرك لوقفتك هاذي معاي تدري يامنصور والله كان عندي صوت داخلي يقول لي اذا بيتغير مصيري الي انا شبه متأكده منه لوين بيوصل وانا بهالمكان مابيغيره الا منصور وطبعا بدا هالصوت الداخلي يخف ويتلاشى مع مرور الايام
يقاطعها منصور وهو يقول : وهذا انا عندك وجالس قريب منك وبكون قريب منك لين تحصلين على الي تبينه وانا معك للنهايه ياانتي ياهم
عهود دموعها بعيونها ومتأثره من كلام منصور تتغطى بلحافها وتبكي بحسر
منصور يشوف حالة عهود وصوتها وهي تبكي بحسره عرف حجم القهر والألم الي تعرضت له وقف منصور وقرب منها ويحاول يفتح اللحاف عنها ويكلمها يبي يخفف عنها شوي بس هي متشبثه باللحاف ومتغطيه منصور يفتح عنها اللحاف بقوه وهو يقول لها : مافيه وقت للبكي قومي غسلي وجهك وتعالي عندي بعض الاسئله وابي لها اجابات ونبي نشوف وش الخطوه الجايه
قامت من فراشها وراحت تغسل وجها ورجعت وجلست بمكانها ،
عهود : قول شنو الاسئله الي عندك
منصور : أمك يوم جتني مع سامي يبون التسجيلات كانت تقول ان سامي غلط معك يوم خذاك من بيتي وانه مصلحو الغلط وزوجوكم هالكلام صحيح ؟
عهود : شهالتأليف الغبي لهالقصه السخيفه وانت صدقت ؟
منصور : كنت بصدق لو هي قالت القصه مثل ما انا قلتها وبس لكن امك تقول انك صرتي حبوبه وهاديه ولو هي داريه زوجتك من زمان علشان تعقلين
عهود : لا لا ماني مصدقه هالكلام امي هاذي فاشله بكل شي حتى بإختلاق القصص والكذب
منصور : يعني ماصار بينكم شي ماقرب صوبك ابد ؟
عهود : لا ماصار شي من هالنوع هو صار بينا طق متوحش وهو اجرم فيني بالطق الي يقصد من وراه يترك أثر لأنه مبيت النيه لي يدخلني للمستشفى بس انه غلط وزوجونا لبعض لا هاذي كذبه فاشله بس هي ليش قالتها لك ؟
منصور : والله ياعهود اعتقد انها تبيني اعطيها التسجيلات بأبسط السبل وبدون مشاكل لأني كنت اقول لها ابي اتطمن عليك او اسمع صوتك وهي الظاهر عندها لما تقول لي انك تزوجتي وصرتي هاديه اني بكذا بتطمن عليك وبعطيها الي تبيه ومادرت اني ماكتفيت اسمع صوتك بس ابي اشوفك وهنا خربت جوهم وصار بينا طق
عهود : طق بينك انت وامي ؟
منصور : لا وش دعوه الطق بيني وبين الكلب سامي
عهود : اهاا طيب وش غير رأي امي وخلاها تجيبك لي هنا ؟
منصور : شوفي امك هاذي وحده من ثنتين ياانها تبي الموقف كله ينتهي بدون محد يتضرر اكثر او هي تبي توصل للتسجيلات قبل سامي وخايفه من شي ماعرفه بينهم لأنها تقول لي اليوم انها جابتني لك وهو مايدري واكدت على اني اوفي بوعدي واعطيها التسجيلات بعد ماأتطمن عليك فيه شي بينهم يمكن
عهود : والحين وش الحل يامنصور انا شلون بطلع من هنا ؟
منصور : خليني اتفاهم مع امك واشوف وين بنوصل بس المشكله انا وعدتها ان بعد ما اشوفك اسلمها الي عندي وش اسوي الحين ؟
عهود : لاتعطيها كل الي عندك عطها واحد او اثنين والباقي احتفظ فيهم لين يطلعوني من هنا
منصور : خلاص انا لازم امشي الحين واتفاهم مع امك وهي الحين تنتظرني بالسياره علشان نرجع مع بعض ويتم التسليم
وقبل يطلع منصور تمسك يده عهود وتشد عليها وهي تقول : منصور تكفى لاتخليني وارجع بأسرع وقت وطلعني من هنا : (
منصور يمسك يدها ويبوسها : لاتخافين انا بحاول اطلعك اليوم وان ماحصل خلال هاليومين طالعه بإذن الله بس لما نشوف وش هم ناوين عليه
منصور يتجه لباب الغرفه ويطق طقتين بعدها بثواني تفتح له جيهان ويطلع وتقفل على عهود
منصور يقول لها اسمعي لو مديتي يدك عليها بكسرها لك وقد اعذر من انذر
طلع من المستشفى وهو يدق على جوال ام عهود ردت عليه وهو يستفسر عن مكان السياره وهي توصف له المكان قال لها دقي على جيهان وفهميها لاتمد يدها على عهود وحذريها بعد لاتعلم سامي عن زيارتي لها
ام عهود : لامن هالناحيه ماراح تقول له عموما انا بالسياره تعال فيه بينا كلام واتفاق ولازم نخلصه
منصور : يالله جاي
وصل للسياره وأول ماركب فيها سألته عن عهود : شخبارها ؟
منصور بنظرات احتقار يقول لها : كنتي واقفه عند بابها ومابين وبينها الا خطوات ليش مادخلتي عليها وشفتيها وعرفتي اخبارها بنفسك
ام عهود : خلاص مولازم هالسؤال لاترد عليه بس ممكن ترد على سؤالي الي هو متى بتسلمني الي عندك ؟
منصور : الحين نروح للبيت واعطيك
انتهى الكلام بينهم وطول الطريق ومنصور سارح بأفكاره وملامحه كانت كلها غضب في غضب
ام عهود : واضح انك موراضي عن هالزياره
منصور يلتفت عليها ويسألها : انتي راضيه عن هالوضع لبنتك ؟
ام عهود : بنتي تستاهل قلنا لها لاتتحدينا ولاتوقفين بوجيهنا بس مالها الا رايها وشوف وين جرتنا يقولك يا اخ منصور الجزاء من جنس العمل لما بنت تتبع هواها وشياطينها علشان توصل لهدفها لازم تتحمل النتيجه
منصور : فيه ام تتكلم عن بنتها كذا انتي شفتيها شفتي وش مسوي فيها انتي ماعندك قلب
ام عهود : انا لأن عندي قلب مادخلت عليها ولا ابي اشوفها لما وحده تحاول تشوه سمعة واسم رجل تعب وهو يبني هالأسم رجل حضنها من هي صغيره واعتبرها وحده من بناته وماقصر عليها بشيء اخوي من بدت السالفه وهو مثل الميت مافيه روح ولا حياه كل ماجلست اتناقش معاه يقول انا وين الغلط في تربيتي لها ولهم الي طلعهم كذا كل واحد اشرس من الثاني تقدر تقول لي يامنصور شنو الذنب الي اذنبه اخوي علشان يستحق منها هالتمرد وسحق الجميع علشان نفسها انا ما اقول لك انهم ملائكه بس من الي اعتدى عالثاني هي يامنصور هي حسرتي على اخوي تخليني اتعاون مع شياطين الأرض عليها خلاص ماقدرت تحصل على الي تبيه تدمر كل الي حواليها ليش ؟
ليش ماتقتنع وترضى وتشيل هالفكره من راسها انت تشوف ان مثل هذا التطلع منها يستحق انها تنسفنا كلنا ؟
جاوب معاي حق ولا لا ؟
منصور يسكت لفتره وبعدها يقول لها : انا ادري من الاول انها غلطانه بس الوضع تفاهم بينكم ووصل لمرحله فيها اجرام انتي لو تشوفين شكلها وجسمـ ...
ام عهود تقاطعه : لالاتقولي عنها أي شي وجودها بهالمكان افضل لها ولنا واحنا مانبي نأذيها اكيد بس نبيها تستسلم وتعرف ان الي سوته من البدايه غلط وغلط كبير وصعب يغتفر يعني لو هي تعاملت مع صحفي غيرك ماعنده ضمير تقدر تقول لي وش كان بيسوي ممكن يشهر فينا وممكن يتكسب من ورانا ويمكن ويمكن ويمكن السيناريوهات كثيره بس لأن الله يحب اخوي كنت انت هذا الصحفي عندك مبدأ ورجل منت انتهازي والدليل انك قد كلمتك وبتسلمني الي عندك
منصور : طيب ممكن اعرف عهود لمتى بتجلس بهالمستشفى ؟
ام عهود : هي الي تحدد مدة جلوسها بهالمستشفى لما ترجع لعقلها وتثبت انها تغيرت نطلعها
منصور : انتي تقدرين تطلعينها ولا لازم سامي يكون بالموضوع ؟
ام عهود : انا وسامي كلنا نقدر نطلعها
منصور : طيب لو عطيتك كل التسجيلات اليوم وطلبت منك تطلعينها وش بيكون جوابك ؟
ام عهود : مستحيل طبعا وبعدين حنا بينا اتفاق اطمنك عليها وتعطيني الي عندك اما مسألة نطلعها ولا لا هاذي مسأله عائليه محد بيعاني منها غيرنا حنا عايلتها واول ناس بتتضرر منها لذلك خلك بعيد انا وفيت بوعدي لك اوفي بوعدك لي
منصور : طيب واذا صرت انا عايلتها ؟
ام عهود : كيف ؟
منصور : اتزوجها !
ام عهود : تتزوجها !
منصور : ايه ولاتقولين انها متزوجه علشان كذبتك هاذي نفتها عهود بلسانها
ام عهود : طيب وعهود بتوافق عليك ؟
منصور : مالها حل الا انها توافق
ام عهود : يعني انا لما قلت انك تحبها وان بينكم علاقه ماكنت اكذب وكانت عندي نظره
منصور : لا ماهو حب
ام عهود : امممم للحين تنكر انك تحبها لاتقول لي بعد بتتزوجها علشان متعاطف معها
منصور : اشوفك طلعتي عن صلب الموضوع وخلينا نرجع له السؤال لو انا تزوجتها بتطلعونها ؟
ام عهود : انا ماعندي مانع وودي انها تتزوج واحد مثلك يقدر يحتويها ويشكمها بنفس الوقت
منصور : يعني اعتبر هاذي موافقه منك ؟
ام عهود : طبعا موافقه بس باقي نشوف عهود توافق ولا لا
منصور : عهود انا متأكد انها بتوافق لأن مالها خيار الا انها توافق
ام عهود : يعني افهم من كلامك يامنصور ان عندك مساومه ؟ بتساومها على حريتها ؟
منصور : لا طبعا هذا مو اسلوبي بس انا ابي انقذها منكم انتم عائله ماتستاهلون مثل هالبنت الذهبه
الام مستغربه من كلامه عن عهود وكأنها احسن البنات
ام عهود : خلاص روح بكرى زياره لها وشوف وش بيكون ردها وبينا اتصال بس هاا سامي لايدري بأي شي لين اجس نبظه عن فكرة زواجك منها
منصور : ان شاء الله
وكملو الطريق وهم يسولفون لين
وصلو للمكان الي ركن منصور فيه سيارته وراح وسياره ام عهود تتبعه لين وصلو بيته
نزل وأشر لها تجلس بالسياره وهو بيجيب لها الامانه
راح منصور واخذ التسجيلات كلها بإستثناء واحد خباه وراح لأم عهود واعطاها الأمانه وقال
لها : بينا اتصال بخصوص الموضوع الي قلت لك عنه
ام عهود : ok
راحت ام عهود ورجع منصور لبيته وجلس مع نفسه جلسه مطوله وهو يتذكر كل تفاصيل زيارته لعهود كيف انه منجرف بمشاعره ناحيتها بزياده رغم انها كانت في حاله مزريه الا انه ماقدر يقاوم عاطفته اتجاها كان عنده كلامها شعر وصوتها لحن وبكائها وتر حزين يعزف على قلبه أحلى نغم
نظراته ولمساته لها والي وان كان ظاهرها بريء الا ان في باطنها مشاعر حب جارف وعاطفه قويه تتغذى وتتأجج مع كل دمعه و ضحكه وحركه
منصور سارح بأفكاره وتخطيطه لحياته مع عهود
صوت مسج على جواله
منصور اذا انت فاضي بدق عليك واذا مشغول آسفه على ازعاجك بس ابيك تتصل فيني ضروري
رساله من ساره عكرت مزاج منصور وخلته يحس بالذنب بعد ماكان مبسوط وفرحان بأنه تطمن على عهود ومفكر يتزوجها منصور محتار ويفكر يرسل لساره رساله يوضح فيها انه خلاص معاد فيه شي يجمعهم ببعض ويفكها من الاحراج والانتظار ويتخلص من رسايلها واحساسه بالذنب اخذ وقت وهو يفكر بصيغه ماتجرح كبريائها وبعد وقت طويل من الحيره
ارسل لها
ساره انتي عزيزه وغاليه بس الي بيني وبينك انتهى بنت عمي وعلى راسي بس حياتنا مع بعض انتهت آسف
ثواني ويدق جواله وهي المتصله تردد منصور مايبي يرد عليها بس قال بنفسه خلاص هالمسأله لازم تنتهي
منصور : الو
سارة : منصور انت بوعيك وانت تكتب هالرساله ؟
منصور : ايه يابنت عمي بوعيي وياليت تعفيني وتعفين نفسك من الاحراج
سارة : نعم ! ولما انت جاد ان تنهي الي بينا ليش لما ارسلت لك اني وافقت ارجع لك واني انتظرك سكت ومارديت ليش ماقلت ماتبيني وخلصنا ليش تخليني انتظر هالمده تنتظرني ياحقير أرسل علشان ترسل لي مثل رسالتك التافهه هاذي وأكون كأني اذل نفسي لك ياخسيس
منصور : ساره ساره هدي ولاتنفعلين انا ماقصدي اهينك ولا شي وتفكيرك هذا اعوج والله وقسم بالله مافكرت فيها بهالطريقه كل مافي الموضوع اني وصلت لحل وشفت ان حياتنا مع بعض مو مكتوب لها النجاح وبس
سارة :'ماعليه ياالزفت وربي بتندم
انهت المكالمه قبل يرد عليها منصور وهي تقريبا بتنفجر من الغيض والعصبيه
منصور ماعجبه اسلوبها وطريقة تفكيرها وانها تبي تحطه بصورة الي يبي يهينها ويجرحها
ويقول في نفسه ألحين اعلمك كيف الإهانه بأسلوب راقي
ويرسل لها
انتي بنت عمي وقدرك غالي بس اتمنى ماتزعلين مني اذا سمعتي اني قريب جدا بتزوج
ومره ثانيه آسف اذا فهمتي كلامي غلط
|
|
|
|
|
10-24-2012
|
#14
|
ساره شافت الرساله وانصدمت وتقول لنفسها اكيد هي اكيد هي عصبيتها وصدمتها ماخلتها تسيطر على اعصابها ودقت عليه
سارة : بتتزوجها ياحقير وتقول لي مابينكم شي ؟ يعني طول هالفتره تكذب علي وتقولي مساعده انسانيه وانت عينك عليها ياواطي
منصور : مهوب شغلك هي ولا غيرها واحترمي نفسك وماله داعي الغلط
سارة : يعني هي ؟
منصور : ايه هي عندك مانع ؟
ساره مالقت أي رد ترد فيه عليه من الصدمه قفلت بوجهه وصارت تبكي بحسره وقهر وندم تتذكر لما جا يرجعها وهي استكبرت عليه وتتحسر أكثر انها ماطاوعت قلبها وطاوعت الشيطان تفكر بأبوها واخوانها الي لاموها على استقبالها الجاف له لما جا يرجعها
تفكر بكبريائها بين اهلها وجماعتها لما يعرفون السالفه وانه تركها علشان وحده تتفوق عليها بكل بمواصفاتها بجمالها ورشاقتها وكشختها ومستواها الاجتماعي ساره كل ماتعمقت بالتفاصيل والمقارنه كانت تشوف نفسها خسرانه اكثر
منصور على فراشه ويفكر شوي بحياته واحلامه ومشاعره مع عهود وشوي تقاطع تفكيره بعهود تعاطفه مع ساره ومكالمتها له وكيف كانت عصبيه ومقهوره منه وعليه حيرة التفكير والمشاعر خلته يعاني طول الليل من الأرق ومانام الا لما طلع الصبح
:
ساره مانامت وعلى اعصابها من اخر مكالمه بينهم ومع الضغط والعصبيه فكرت تنتقم لكبريائها وتقلب السالفه على راس منصور واخذت جوالها ودقت على منيره اخت منصور
سارة : الو صباح الخير
منيره : ياهلا والله صباح النور والسرور اهلييييين ياسوير كيفك يالقاطعه
سارة : الحمد لله انا بخير بس ابيك بموضوع مهم اذا مو مشغوله
منيره : لا ابد مو مشغوله تفضلي قولي وش الموضوع
سارة : اسمعي يامنيره اخوك عزيز وغالي علي صح اني رفضت ارجع له لما جاء بيرجعني بس مايرضيني انه ينتقم مني على حساب نفسه
منيره : كيف يعني ياساره مافهمت ؟
ساره : انا افهمك انتي تدرين ان اخوك ناوي يتزوج وحده استغفرالله العظيم ياربي لاتعاقبني على هالكلام وحده سمعتها اعوذ بالله مو زينه لدرجة تخيلي انها تعرض نفسها لأخوك انا اسفه يامنيره بس اخوك بالنهايه ولد عمي وكان بينا عشره وعلى قولة المثل العشره ماتهون الا على عيال الحرام وغير هذا كلام الناس بيكثر علينا لما وحده حثاله مثل هاذي تدخل لعايلتنا عيب والله بياكلونا الناس بالشماته والنقد :~
منيره : وشهو ؟ انتي وش تخربطين وتقولين ! اصلا من قالك انه بيتزوج انا اخر علمي فيه لما قال انه ماخذ فتره ومبتعد عنك ويبي يفكر ويتخذ قراره صح وماقال لنا الا انه بيصلح الامور بينكم وطلب مننا مانتدخل بينكم ابدا بس انتي متأكده من هالكلام ؟
ساره : طبعا متأكده ولا انا ليش رفضت ارجع له بعد ماشفته انحدر لهالمستوى معاد اقدر اطالع بوجهه بس اسمعي يامنيره حلفتك ماتقولين لأي كائن اني انا الي علمتك اخاف بكرى يقولون غيرانه وانا والله من منطلق اني خايفه عليه بس ولو ابيه كنت رجعت له لما جاني بس انا علشان سمعت عائلتنا مانبيها تشوهها هالحقيره يعني وش يقولون الناس بكرى خلى بنت الاصل والفصل وبنت عمه وخذا الصايعه الضايعه !
منيره : اعوذ بالله منك ياساره خوفتني والله الله لايقوله وش يبي من هالتصرف يبينا نصير علك بحلوق الناس لا لا هالموضوع ماينسكت عليه وامي واخواني لازم يعرفون بالسالفه
ساره : ايه طبعا لازم بس تكفين يامنيره حلفتك لاتعلمينهم ان انا الي بلغتك تعرفين تفكير بنات الجماعه يخلون صلب الموضوع ويقولون اني غيرانه وكذا
منيره : ايه عارفتهن الله يقطعهن مايخلن هالتلميحات الغبيه ، والحين عاد اعذريني بسكره منك وبدق على امي اخليها تكلمه وتشخله وتشوف وش وراه
ساره : ايه اخذي راحتك
منيره : يالله سلام
ساره تقفل من منيره وهي حاسه بالرضى الكامل عن نفسها وعن الي سوته وتقول لنفسها ألحين بشوفك تتزوج بنت الشوارع ولا لا
:
منصور يقوم على صوت جواله ويرد وهو مغمض وذابحه النوم
منصور : الو
امه : هلو هلو هلووه
منصور : هههههههههههههههه يالبى الصوت وراعيته فديت والله ذالصوت وشعندها الحلوه داقه علي من صباح الله خير اشتقتيلي
امه : ياوجه الله أي بالله اشتقت لك ماشاء الله نايم لهالحزه ؟ قم قم غسل وجهك واركب سيارتك وتعال ابيك ضروري
منصور : الله واكبر يايمه الي يسمعك يقول بيتك مابيني وبينه الا خمس دقايق ماكنها سفر ساعات
امه : ماعلي منك تعال ابيك ضروري وصلني علم ولازم اتأكد منه وماينحل بالجوال تعال وبس
منصور : يايمه ماقدر والله مشغول قولي لي وش العلم ؟
امه : انت بتتزوج لك وحده من الشارع ؟
منصور : وشهو ؟
امه : اجل تخلي بنت عمك الي باخصينها وعارفينها علشان بنت شوارع ماتعرف لها اصل من فصل اسمع والله وبالله يامنصور
منصور : يمه لحظه لحظه الله يرضالي عليك اصبري قبل تحلفين انا بعرف من قال لكم هالكلام ؟
امه : مالك مصلوح بالي علمني المهم اني دريت ومابه علم يتخبى ومهوب علشان ساره كرشتك تروح تلقط لك أي وحده ماشيه بالشارع وتتزوجها غمن لساره لا الامور ماتمشي بالطريقه ذي ياولدي تبي تتزوج ابد بنزوجك بس بالطريقه ذي والله لوك تنصرع قدامي اني مارضى انا ماتدخلت بلي بينك وبين ساره لأنك ترجيتنا محد يتدخل وخليناك تحل امورك بنفسك بس تحلها بذالطريقه لا
منصور : طيب يمه عطيني فرصه كم يوم اخلص اشغالي واجيكم وافهمك وترا الي وصل لكم العلم واحد خبيث يبي بس يشوه صورتي قدامكم بس انا عارفه وبعلمه قدره عدل ولا تحاتين ولدك تربيتك
قدر منصور يحتوي ضيقة امه وماتركها الا وهي راضيه عنه وعلى وعد انه يسافر لها ويفهمها الموضوع كله وبعد ما انهى مكالمته من امه عرف ان ساره ورا الموضوع عصب من حركتها القذره وكان ماخذ الجوال بيدق عليها يلعن خيرها بس تراجع بآخر لحظه لأنه مايبي يكبر الموضوع وهو عنده مواضيع اكبر مع عهود واهلها
منصور للحين براسه نوم بس قبل ينام دق على ام عهود وصبح عليها وكان يبي يعرف متى يقدر يزور عهود بالمستشفى وقالت له يدق عليها العصر تكون هي كلمت دكتورتها وتعرف متى تكون هناك علشان يقدر يزورها
منصور يحط المنبه على الساعه 3 بعد الظهر ويناااااااام
دق المنبه وقام يتروش وياكل له شيء يسد جوعه وبعدها كلم ام عهود وقالت له انا كلمت جيهان وتقول اليوم الساعه 5 بتكون موجوده هناك وعطيتها خبر انك بتزور عهود وهو يكلمها جته مكالمه ثانيه وقفل منها على طول ورد عالخط الثاني
منصور : هلا ؟
منيره : هلابك امي كلمتك ؟
منصور : يالييييل ايه كلمتني
منيره : وش وصلتو له ؟
منصور : ماوصلنا لشي لان مافيه شي من هالكلام صاير والي وصلت لك العلم وحده حاقده وياليت يامنيره معاد تاخذين وتعطين معها انتي تثقين بأخوك ولا لا ؟
منيره : طبعا اثق فيك بس الكلام الي وصلني يخوف ومابي بكرى سيرتنا على كل لسان انك ماخذ وحده سمعتها الله لايبلنا بس اعوذ بالله منك انت انهـبلـ...
منصور يقاطعها : لحظه قبل تكملين اعوذ بالله منك ومنها وصل فيها الحقد تطعن بالأعراض ماعليه شغلها عندي وانتي بتصدقين أي كلمه تقولها يعني ماتدرين انها ردة فعل حاقده
منيره : منهي ؟
منصور : الي وصلت لك العلم تحسبيني ماعرفها بس هين هالتطاول هذا ماراح يعدي بالساهل
منيره : منصور اسمعني البنت مالها شغل انا عرفت من نفسي وبعدين ماعلينا الله يستر على بنات المسلمين بسألك بتروح لأمي قريب ؟
منصور :'ايه نهاية الاسبوع ان شاء الله
منيره : خلاص يعني اجهز نفسي اروح معك ؟
منصور : مهيب مشكله بس بدون بزارينك خليهم عند ابوهم لأن احتمال كبير ارجع بنفس اليوم
منيره : خلاص اجل كلمني قبلها بيوم
منصور : طيب بس اذا لي خاطر عندك لاتمشين وترددين مثل هالكلام عند امي واخواني والسالفه انا اعرف انهيها
منصور انهى المكالمه من اخته منيره وارسل مسج لساره ..
لو كان عاد باقي لك شوية معزه وتقدير واحترام راح مع آخر تصرف منك
مشكوره يابنت عمي ( اتمنى معاد اشوف رقمك لا رساله ولا اتصال )
وانتظري وراقبي وبتشوفين وتسمعين الي يسرك ^إ*
منصور يستعد بيروح لزيارة عهود وقف عند ركن للزهور واخذ احلى باقة زهور لها وصل للمستشفى وراح لغرفتها ولقى جيهان موجوده افتحت له الباب دخل عليها وكانت بفراشها نايمه سكر الباب بشويش علشان مايزعجها قرب منها وكانت صلعتها باينه
كان يشوفها ويكتم ضحكته على منظرها اخذ الزهور وقربها من وجها وبدا يحركها عليها لين قامت واول ماشافته سحبت لحافها بسرعه و تغطت وهي تقول : لااااا يا منصوووور اطلع برا مايصير تشوفني وانا نايمه عيب اطللللللللع لين اتعدل اطلع براااااااااااااا
منصور يضحك عليها وهو يقول : خلاص الصلعه وشفتها وابد ماغيرت من جمالك شي وبلاش تتحسسين من هالموضوع انا جايك بموضوع مهم ترد عليه من تحت اللحاف طيب اطلع دقيقه بس
منصور : ماراح اطلع بعطيك ظهري وماراح اشوفك وركضي بسرعه للحمام يالله بعد للخمسه
واحد
اثنين
ثلاثه
اربعه سمع صوتها وهي تركض وتتحلطم عليه ودخلت الحمام وقفلت عليها
بعد شويات اطلعت ولفت راسها بفوطه وبدلت بيجامتها هو يشوفها وميت من الضحك علي نظراتها انها متفشله منه
عهود : اسمع منصور هاذي اخر مره تسويها وتدخل علي بدون استأذان تراجد ماحب احد يشوفني بهالمنظر
منصور : طيب أنا آسف بس وش دراني انك نايمه هالحزه ماهي حزة نوم
عهود : وانا شعندي ياحظي غير النوم بهالسجن ويمكن السجن احسن المهم ماقلت لي شنو مناسبة الورد
منصور : ابي اشتري موافقتك بهالورد
عهود : موافقتي على شنو ؟
منصور : على زواجي منك
عهود : هاه !
منصور : عهود تتزوجيني ؟
عهود مصدومه من كلامه : وزوجتك ؟
منصور : وش عليك منها ساره طلقتها من وقت وانتهت حياتي معها خلاص وانا ابيك انتي
عهود : هاذي لعبه منكم ولا شنو بالضبط ؟
منصور : منكم ! من قصدك بهالجمع ؟
عهود : انت وامي وسامي شناوين عليه مو كافيكم الي انا فيه ؟
منصور : عهود لحظه ركزي شوي انتي تظنين اني واقف بصفهم حرام عليك انا كلي معك انتي سلبتيني من نفسي ادري ومن حقك تستغربين بعد كل الي صار بينا والي سويتيه فيني اجي اطلب الزواج منك من حقك تشكين بس انا والله ياعهود ماني عارف نفسي حتى شلون افكر فيك كزوجه من بعد كل مصايبك بس انا احلف لك مابيني وبينهم أي شي وابيك لي زوجتي على سنة الله ورسوله
عهود : وشلون بتتزوجني وانا بهالسجن
منصور : انتي وافقي بس وكل شي بيتغير
عهود : واذا ماوافقت ؟
منصور :'بتجلسين هنا الى ماله نهايه طبعا هذا كلام امك وسامي ونهم مابيطلعونك من هنا الى ان تتعلمين من هالدرس وتعقلين او في حاله وحده انك تصيرين زوجتي وانا مسؤول عنك واعقلك ويتخلصون منك
عهود : اها يعني اطلع من سلطتهم وادخل بسلطتك وتحت رحمتك
منصور : عهود خلي عنك كل الاحتمالات انا بس ابيك تفهمين شي واحد بس
انا مفتون فيك واحبك وابيك والله هاذي مشاعري الحقيقيه بغض النظر عن احتمالات اهلك
عهود : ولو وافقت متى يطلعوني ؟
منصور : متى ماخلصت اجراءات الزواج بتطلعين وهذا كلامي مع امك
عهود جالسه ومحتاره وتفكر منصور قرب منها وهو يقول : معقوله ياعهود كارهه الارتباط فيني لدرجه تفكرين بيني وبين حريتك لهدرجه انا سيء
عهود : لا يامنصور انت مو سيء انا سيئه بالنسبه لك انت ماتستاهلني تستاهل وحده احسن مني انا عندي مشاكلي وماشوف اني اناسبك انت كل صفاتك حلوه بعكسي
منصور : بس مويقولون ياعهود الازواج يكملون بعض وكل واحد نصف الآخر وبس نتزوج بنعين بعض ومع العشره بتاخذين من صفاتي الحلوه وبعطيك من خبراتي وتجاربي ولو تبين اعطيك من شعري ماعندي مانع هههههههههههههه
عهود تبتسم ابتسامه صفرا وهي تهوجس قالت له : خلاص انا موافقه
منصور يقول لها وهو بقمة فرحته : ومهرك باروكه كدش الحين بدق على امك وازف لها خبر موافقتك
ومنصور يكلم امها كانت عهود سارحه بأفكارها وباين انها محتاره وفيه شي شاغل فكرها
منصور : ياعهود امك تبارك لك هالموافقه وقالت خلاص كم يوم ويتم كل شي ، وش فيك ساكته ؟
عهود :"انت سلمتهم كل التسجيلات ؟
منصور : وش دخل هالسؤال بموضوعنا ؟ ومع ذلك ايه سلمتهم كل التسجيلات
عهود :'ليش يامنصور ليش ؟ انا ماقلت لك خل واحد منهم عندك تضغط عليهم فيه في حال مارضو يطلعوني من هنا ؟
منصور : نسيت ! بس ليش متضايقه كذا !
عهود :'لاكنت بس بعفيك عن هالتضحيه انك تتزوجنني علشان تحررني من سجني وبالتسجيل تضغط عليهم يطلعوني
منصور شك بكلامها وقال لها : انا مادري ياعهود بس جاني احساس مو كويس من هالتلميح وكأنك بتقولين وبشكل غير مباشر اني تعمدت اعطيهم التسجيلات كلها علشان مايكون قدامك حل الا انك تتزوجيني يكون في علمك حتى لو بموت عليك مستحيل ألجأ لهذا النوع من الحيله انا ابيك لأني حاس ان لي مكانه عندك بس اذا ماتبيني نفضها من اولها وشوفي لك طريقه او حل يطلعك من هنا
عهود : لا لا يامنصور انت فسرت كلامي على هواك عموما انا عطيتك موافقتي والباقي عليك انت شايفني مافي يدي أي حيله او وسيله خلاص على بركة الله
منصور من الفرحه يبوس عهود ويقول لها : خلاص انتي تقريبا زوجتي وحلالي وبس نتمم كل شي راح انسيك كل هالفتره الصعبه الي مريتي فيها
باب الغرفه ينفتح ويدخل عليهم سامي !
نهايةة البآرت ،
|
|
|
|
|
10-24-2012
|
#15
|
البارت . .
عهود اول ماشافت سامي تذكرت كل الي سواه فيها علشان يدخلها المستشفى وماقدرت تتمالك اعصابها واهجمت عليه وهي تصرخ : يالنذل يالحقير وبعد جاي هنا بعين قويه ولا كأنك سويت شي ياحيوان
سامي توه بيمد يده عليها منصور يمسكه ويدفه بقوه بعيد عنها ويمسك عهود منه وهو يحاول يهديها
سامي يقول لمنصور : هديها وخلنا نتفاهم انا ماجيت علشان اتهاوش
منصور بعد جهد قدر يحتوي عصبيتها ويهديها جلسها على السرير وهو جنبها ماسكها وسامي لازال واقف وقريب من الباب ويقول لها بعد ماهدت : اسمعي انا ماجيت الا لسبب معين وهي ان امك كلمتني وفهمتني عن ارتباطك بمنصور وقالت لي روح لهم الحين هو موجود عندها وجيت نتفاهم على كل التفاصيل
اولا تتزوجون بدون أي مظاهر للزواج يعني مانبي العين تتفتح علينا
ثانيا معاد اشوف منكم ولا واحد لسنين طويله او طول العمر يكون افضل
ثالثا واخيرا كل شي يتعلق فيك بنرسله لبيت زوجك يعني مالك الا اشيائك الي في بيتنا وبكون كريم معك وماراح اطالب برصيدك خليه يعيشك وخليك تعرفين انك كنتي بنعمه بتندمين طول عمرك على انك تبطرتي عليها يعني لا اشوفك تطلبين منا مصروف او مساعده
واي إخلال بواحد من هالشروط تعرفين مكانك وينه بس هالمره محد بيقدر يوصل لك ولا ينقذك
وهنا تقول له عهود : هاذي شروطك انت ولا شروط امي
سامي : هاذي شروطنا كلنا انا وابوي واخواني وامك علشان تدرين انك عنصر مكروه والكل يبي يتخلص منك آذيتينا بمافيه الكفايه ومن ابسط الاشياء ان احنا نجمع على مثل هالشروط الي تظمن لنا خروجك من حيااتنا للأبد وكلن يعيش بسلام
عهود بنظرات حقد وكره تقول له : قصدك تعيشون بقذاره ورذيله براحتكم عموما انا موافقه على كل الشروط وانا ابي اعيش في بيئه نظيفه وابتعد عنكم وعن قرفكم
سامي : حلو يعني متفقين
عهود : ايه متفقين
سامي : خلاص من بكرى ان شاء الله نخلص كل الاجراءات و بينا اتصال يامنصور اوكي ؟
منصور : ايه اكيد بيكون بينا اتصال
سامي : يالله انا بروح وابيك شوي برا يامنصور بكلمك
وقبل يطلعون برا عهود تنادي سامي
عهود : سامي
سامي : نعم
عهود : ابيك دقيقه بس بقولك كلام ابيك توصله لأمي وعن اذنك منصور لو سمحت خلك برا شوي
منصور مستغرب طلع وسكر الباب وسامي واقف وهو حذر منها لاتهاجمه مره ثانيه ويقول لها
: خير وش فيه ؟
عهود : بسألك منصور سلمكم التسجيلات ؟
سامي : ايه سلمها لأمك وانا شفتها كلها يعني احقر واوطى منك ماشفت كل هذا كنتي ناويه تنشرينه الله يلعنك انتي بذره شيطانيه وقسم
عهود : طيب يالبذره الملائكيه كم شريط استلمتو منه ؟
سامي : ثلاثه ليش ؟
عهود : لا بس اتأكد هو سلمها كلها ولا لا لأني طلبت منه يحفظ واحد عنده بس طلع عند كلمته وسلمها كلها لكم
سامي : حقيره وطول عمرك بتظلين حقيره والله هو خساره فيك الله يعينه عليك
عهود : طيب طيب احتفظ برايك لنفسك ويالله اطلع برا
سامي يطلع منها وهو متنرفز ويقول لمنصور : الله يعينك انا لو هي اخر انثى بالأرض والله ما اخذها مستفزه وحقيره معجونه من شر هالبنت انت شلون تقبل ترتبط فيها
منصور : ليه وش قالت لك ؟
سامي : ابد ماقول الا ذيل الكلب عمره ماينعدل المهم خلنا باللي فيه يامنصور
اسمع الكلام الي قلته داخل انت المسؤول عن تنفيذه اولا واخيرا يعني هي بتكون مسؤوليتك انك تلتزم بالشروط انت بتتزوج وحده ماهي سهله يعني لو ماضبطت سلوكها وألزمتها بحدودها انت الي بتجني عليها كلنا نبي نخلص من هالموال ونلتفت لحياتنا ونستقر مفهوم كلامي
منصور : واضح ومفهوم وابد اوعدكم انها ماتدخل حياتكم ابد
انتهى الكلام بينهم وسامي راح ومنصور دخل على عهود وهو يقول لها
: وش قلتي له خليتيه يطلع منك متنرفز ؟
عهود : ليش هو ماقال لك ؟
منصور : لا بس كان متنرفز منك وطلع يشتمك
عهود : لا بس قلت له كلام مثل السم يوصله لأمي بس
منصور يجلس عندها ويسولف عليها وعن بعض الترتيبات وهي مو منتبهه لأي كلمه يقولها لها كانت تهوجس وتسأل نفسها ليش منصور كذب عليها وقال لها انه سلمهم كل التسجيلات وهو محتفظ بواحد لأن عددهم اربعه وسامي قال ثلاثه بس !
منصور : عهود عهود انتي معي ؟
عهود : ايه معك
منصور : والله شكلك كنتي سارحه بأفكارك
عهود : لا ياحبيبي معك وانا موافقه على كل كلمه قلتها
منصور يحط يده على قلبه وينسدح على السرير ويقول آآه ياقلبي قتلتيني ابي اسعافات اوليه ابي تنفس صناعي من بعد هالكلمه واخيرا قلتي حبيبي
عهود تبتسم له بخجل وتقول : خلاص كلها كم يوم وبنتزوج لازم اتعود اقول لك هالكلمه
مر الوقت عليهم وهم يسولفون وكان منصور هو صاحب النصيب الاكبر من هالسوالف وعهود ياتبتسم ياسارحه ياتستمع فقط
بعد ماراح منها منصور جلست مع نفسها وتتسائل كثير عن تصرف منصور هل هو كذب عليها بخصوص الشريط علشان مايكون عندها خيار الا انها تتزوجه
او هل هو ناوي يسوي شي بهالشريط الباقي عنده ؟
طولت وهي تسأل نفسها كثير عن تصرفه وعن حياتها شلون بتكون معه وهي الي كانت عمرها مافكرت تتزوج او ترتبط عاطفيا بأحد هى ماتنكر اعجابها بشخصيته وعقلانيته بس هي ترفض فكرة انها تكون زوجه وهذا سبب التحفظ عندها على مثل هالقرار الي غصب تقبل فيه لأن هو ارحم من سجن المستشفى
:
مرت الايام وانهو كل الاجراءات ورسميا عهود زوجة منصور
منصور غاب عن عهود لمدة كم يوم لين خلص بعض الترتيبات وجا اليوم الي بياخذها من المستشفى على بيته راح لها هو وسامي وكان جايب معاه شنطه فيها شوية مستلزمات
دخل عليها منصور وسامي وبلغوها انهم خلاص انهو كل شي وهي الحين زوجته رسمي وبتطلع من هالمكان سامي طلع ينتظر برا وكان وجوده ضروري علشان تسمح لهم جيهان بالخروج
منصور يعطيها الشنطه ويقول لها هاذي فيها كل شي تبينه علشان تطلعين من هالمكان بشكل لائق ومرتب بطلع منك لين تخلصين وتتجهزين ونروح بيتنا
عهود تاخذ منه الشنطه وهي تنتفض وكأنها مسبهه منصور يلاحظها ويمسك يدينها ويقول لها
وش فيك ترجفين ومنتي على بعضك ؟
عهود : مادري يامنصور حاسه بخوف وتوتر فاجئتوني ماحطيتو عندي خبر وانت لك كم يوم ماجيتني عالاقل اعرف واتهيأ نفسيا اني اليوم بطلع وبروح لبيتك واني بكون عروس انا مادري شفيني عمري ماحسيت هالاحساس حاسه قلبي بينقز من مكانه من قو مايطق بسرعه
منصور يحاول يخفف من توترها وهو يقول لها : لاتستعجلين اخذي راحتك لين تحسين انك مستعده نفسيا ونطلع لو تبين اجلس برا 10 ساعات انتظر ماعندي مانع
طلع منها منصور بعد ماحس انها اهدا شوي وانتظرها برا
عهود تفتح الشنطه وكانت كل محتوياتها تعرفها والي واضح انها من كبت ملابسها جينز تي شيرت شنطه كعب عالي علبة مكياج وباروكه
شافت الباروكه وانقهرت على شعرها وعلى كل الي مرت فيه من تحت يد سامي دخلت للحمام وبدلت ملابسها وتعطرت ورتبت الباروكه و حطت المكياج ولبست العبايه والكعب والشنطه وتجهزت بشكل كامل وتناظر نفسها بالمرايه وكأنها استعادت ثقتها بنفسها وكبريائها طقت الباب وقالت لمنصور : يالله افتح انا جاهزه
منصور يفتح الباب لها ويشوف قدامه عهود الي انفتن فيها من اول مره شافها بطلتها الحلوه كبريائها وغرورها ورزتها وتوها بتطلع من الغرفه يرجعها ورا لداخل الغرفه بيده ويصك عليهم الباب وهو يقول يالبي الزين ياعهود منصور يقرب منها وهو يداعبها ويمسك طرف شيلتها وجهه بوجها ويقول لها الزين هذا مايطلع للناس لي انا وبس اخذي شيلتك بارك الله فيك وغطي وجهك كذا ويحط الشيله على وجها عهود توخر يده منها وتقول له : خير ؟ انا ماتعودت اغطي وجهي وماراح اغطيه
منصور يمسكها بقوه وينفضها : اسمعي انتي قبل انا مالي سلطه عليك الحين انتي زوجتي ولاتعانديني تغطي وبس ماعندي حريم يكشفون وجيهم ولاتخربين فرحتي فيك
عهود بعصبيه تقول له : يصير خير بلشنا من اولها تحكمات وأوامر
منصور : لا مو تحكمات ولاهي أوامر حاولت بلطف اعلمك اني ماحب حريمي يكشفون بس انتي فهمتيها انها اوامر ومافهمتيها انها حب وغيره وعاده
سامي يطق عالباب وهو يقول : اقول غرامياتك خلها في بيتك اطلع اخلص ماني فاضي لك اطلع
منصور يطلع وهو ماسك يدها ويبتسم لسامي ويقول له : انت فاهم غلط انا بس كنت اقول لها شي قبل تطلع
سامي : ايه طيب المهم لميتي كل شي لك هنا
عهود : لا واي شي وراي بالغرفه مابيه ولا اقول لك اخذه وعطه امي خلها تسوي حفل احراق لكل متعلقاتي . خلها تنبسط شوي
منصور يده بيد عهود وطالعين من المستشفى .
منصور بالسياره و يمطر عهود بكلمات الغزل والحب وهي بس ملتزمه الصمت وصل منصور للبيت عهود تسأله : هذا مو بيتك الي جيتك فيه من قبل ؟
منصور : ايه ادري انتي انزلي بس
نزلت وراح هو وياها لداخل البيت وهو ينادي يامنيره ياهوووه وينك طلعت عليه منيره وتسلم عليه وهي مستغربه من الي معه منصور يقول لها : لاتطلع عيونك اكثر احب اعرفك على زوجتي عهود بنت فلان الفلاني وخالها فلان الفلاني منصور يقول الاسم لمنيره وهو يراقب ردة فعلها منيره تسلم على عهود وترحب فيها وتوديهم لمجلس الحريم وهي مو على بعضها جلست عهود وهي تقول : اول مره اعرف ان عندك اخت
منيره تستأذن علشان تجيب القهوه والشاهي وتقول لمنصور : تعال ابيك شوي
منصور يروح معها : هاه وش تبين ؟
منيره : وش ابي ؟ لعنبو بليسك تتزوج وماتعلمنا انت تدري امي وش بيصير فيها ان درت ؟
منصور : ماهو بصاير فيها شي ابد بيصير فيها نفسك يوم سمعتي اسم عايلتها وانتي مبققه عيونك هااه يامنيره هاذي البنت الي تقولين مالها اصل وفصل ؟ عرفتي اصلها وفصلها الحين ؟
منيره : انا للحين مصدومه انها من هالعايله بس ولو هذا مايعطيك الحق تتزوج وماتعلمنا
منصور : هذا انتي تدريتي المهم انا بس جبتها تسلمين وتتعرفين عليها ومابي اطول تعالي اجلسي معها شوي لأني مستعجل ومهوب لازم قهوه
رجعو لعهود جلسو معها وسولفو شوي ومنصور يقول : يالله تأخرنا حنا بنمشي الحين والجايات اكثر منيره تبارك لهم مره ثانيه وتقول لعهود لازم توعديني بزياره ثانيه علشان استعد لك عدل
عهود : خير ان شاء الله وتشرفت بمعرفتك
منصور يطلع مع عهود ويركبها السياره وقال لها : انتظري بس دقيقه وراجع لك نسيت شي يرجع منصور عند منيره ويقول لها اسمعي امي لاتدري فاهمه انا بفاجئها مثلك وانا بكرى ولا بعده بسافر لها ومعي عهود بتخاوينا ؟
منيره : ايه طبعا انا مجنونه افوت فرصه اشوفك فيها وامي تهزئك وتشرشحك
منصور : هههههههههههه يا لئيمه خلاص بينا اتصال ولاتعلمين احد حتى زوجك
طلع منها منصور وركب السياره وراح هو وعهود للبيت علشان يقضون ليلتهم الي ينتظرها منصور على احر من الجمر
|
|
|
|
|
10-24-2012
|
#16
|
دخلو البيت وكانت عهود تتفرج ومصدومه من عدد الشنط الموجوده بالصاله
: شنو هذا ؟
منصور : هاذي كل اغراضك الي كانت في بيتكم جابها سامي قبل يومين من كثرهم مالقيت لهم مكان الا هنا و حطيتهم وانتي بعدين لما تتفرغين رتبيهم بس الحين خليك من هذا كله وتعالي تفرغي لي مسكها منصور من يدها واخذها لغرفة النوم وهي تمشي معاه وكأنها بدون روح
بعد وقت متأخر من الليل طلعت عهود من الغرفة وكان منصور نايم راحت للصاله وجلست عالكنب وكانت حاسه بضيقه وشعور غريب اول مره تحس فيه جلست تبكي طول الليل ونامت بمكانها
منصور يصحى ويشوف الساعه 12 الظهر وعهود مو جنبه بالفراش ويقوم بسرعه يشوف وينها ولقاها نايمه بالصاله
منصور : عهود عهود قومي ليش نايمه هنا ؟ وليش ماصحيتيني بدري ورانا سفر
عهود : سفر !
منصور : ايه سفر بروح لأمي اعرفها عليك واعرفك عليها
عهود تقوم معصبه من مكانها : خيييير شسالفه امس تغصبني اغطي وجهي وتوديني لأختك بدون ماتشاورني والحين تبيني اسافر وحتى ماعطيتني خبر لايكون بس تحسبني عبدتك توديني وتجيبني على كيفك
منصور مندهش من عصبيتها : لحظه لحظه هدي واركدي شوي وش فيك جيتيني كلك انا لا احسبك عبدتي ولا شي انتي زوجتي وحبيبتي بس للحين يمكن ماتعودت اني اشاورك بأمور انا مخطط لها ومع هذا ياستي آسف وحقك علي بس قومي تجهزي ورانا سفر انا بدخل اتروش وانتي تجهزي وعمومالاتاخذين معك غيارات واجد لأن يمكن نرجع بنفس اليوم او ناخذ فندق ليله وحده بس
عهود تفتح الشنط وتجهز لها ملابس وهي متنرفزه
وبعد مرور الوقت كانو كلهم جاهزين وراحو لمنيره واخذوها معهم وكانو طول الطريق منصور ومنيره يسولفون وعهود اما ساكته او نايمه وصلو لبيت امه ودخلت منيره وقبل يدخل منصور يمسك عهود ويقول لها : قدام امي لاشوف منك الا الابتسامه كلمه منا ولا منا مو في صالحك ظروف زواجنا مابيها تطلع لأحد فاهمه ؟
عهود : فاهمه
دخل منصور قبلها وسلم على امه وهو يقول لها ويمزح معها : يمه انا لازم اجيب حبل الحين علشان اربط يديك قبل اقول لك اني تزوجت وهاذي زوجتي عهود بنت ال فلان منصور يقول لعهود : تعالي سلمي على امي لاتخافين ماراح تطقك
الام : تزوجت !!! اجل هاذي الصايعه الضايعه الي يقولون ؟ وجايبها لحد بيتي بعد لاتجيني ولاتسلم علي خلها تفارقني
منصور : يمه يمه الله يهديك وش هالكلام هاذي بنت ناس وعيب تكلمينها بهالطريقه اقولك زوجتي وتقولين لها هالكلام
امه : تخسي بنت ناس هاذي بنت شوارع الي تخرب حياة واحد وزوجته وترضى تتزوجه بدون ما اهله يدرون هاذي صايعه ومالها والي قم انقلع انت وياها ولاعاد اشوفك الا لين تطلقها
منيره : يمه الله يرضى عليك لاتفشلينا مع البنت والله ا ن اهلها ونعم فيهم واسمهم اشهر من نار على علم مايصير تصدقين كلام السوسه ساره كلامها من قهر وعيب تستقبلين البنت كذا وهي جايه تسلم عليك
الام : انطمي انتي وانقلعي بعد داريه بالسالفه وساكته ولاتعلميني ترضين اخوك يتزوج ولا يعلمني ولا ياخذ رضاي عن الي بيتزوجها
عهود واقفه تراقب الموقف بدون أي ردة فعل ولا كأن الأمر يعنيها
منصور يأشر لمنيره تاخذ عهود للغرفه الثانيه
منيره : عهود امشي معاي وحقك علي تعرفين الحريم الكبار مايحاسبون على كلامهم ، راحت هي وياها للغرفه الثانيه ومنصور جلس يترجى امه ترضى عنه ويحاول يمحي الصوره السودا الي طبعتها لهم ساره عن عهود بس مافيه فايده الام عصبت عليه وارتفع ضغطها واطردته
منصور وهو متنرفز يطلع ويروح للمجلس وعهود ومنيره بالغرفه يسمعون صوتهم وتدخل عليهم امه وتكلم عهود : قومي قومي اطلعي برا وروحي لكلبك الي بالمجلس وقولي له لاعاد اشوفه دام انتي على ذمته منيره تتدخل وتحاول تغير راي امها بس امها اعصابها فايره ومعاد تتحمل ولا كلمه
عهود تطلع بكل صمت وهدوء وتسمع صوت جاي من صوب مجلس الرجال وراحت له ولقت منصور ومعه واحد من اخوانه يتكلمون بنفس الموضوع وصوتهم عالي دخلت عليهم وهي تقول : منصور امك طردتني من البيت
منصور يقوم وهو يقول : لاحول ولا قوه الا بالله امشي يمسك يدها ويلتفت على اخوه وهو يقول له طلاق منيب مطلقها روح فهم امي وخلها تعرف ان هاذي رغبتي ومهوب علشان وحده سوسه حاقده اهدم حياتي
راح مع عهود وركبو السياره ودق على منيره : هاه بتجين معنا ؟
منيره : بترجع الحين ؟
منصور : ايه وش يقعدني
منيره : لا اصبر روح اخذ لك شقه ولا غرفه في فندق يمكن اقدر اغير رايها هي الحين معصبه لما تهدأ بيختلف الكلام
منصور : طيب اجل انا رايح ادور شقه
منصور طول الوقت وهو يتعذر من عهود وطول الوقت وهو يسب ساره الله يلعنها البسوس الحيه بثت سمها على امي ومعاد تصدق
عهود على الغير العاده ساكته وهاديه ومو مظهره أي ردة فعل وكأنها جسد بدون روح
منصور : عهود وش فيك ؟ صمتك هذا غريب حتى اني كنت خايف انك تصطدمين بأمي ومع هذا انتي بمنتهى الهدوء
بعد صمت طويل تقول له : ابي رقم ساره
منصور : نعم !
عهود : ايه ابي رقمها ابي احدد معها يوم نلتقي فيه
منصور : انتي صاحيه ؟ هاذي لاتشوفك قدامها قطعتك نسيتي قبل وش سوت فيك ؟
عهود : لا مانسيت بس ماعليه ابي رقمها
منصور : وش تبين فيها علميني ؟
عهود : مو شغلك انت تبي هالوضع يتغير وتهدأ النفوس عطني رقمها وكل شي بيتغير اوعدك
منصور : مافيه لو تحبين السما ماخليتك تقابلينها
عهود : انت حر بس بما انها هي السبب بموقف امك وعصبيتها هاذي ماراح يهدي هالموقف الا هي
منصور : خلينا ننتظر ونشوف منيره وش بتسوي مع امي يمكن تقدر عليها وترضى علينا
وصلو للفندق وارتاحو فيه وهم جالسين عند التلفزيون عهود تطفيه وتلتفت على منصور
عهود : منصور انت وش ناوي عليه بالتسجيل الي بقى عندك ؟
منصور : هاه !
عهود : منصور انا سألت سامي عن التسجيلات الي استلمها وقال 3 وانا اعرفهم 4 يعني فيه واحد انت محتفظ فيه ليش ؟
منصور : هههههههههههههههه تبين الصراحه وماتزعلين
عهود : لا ماراح ازعل
منصور : احتفظت فيه اولا على اساس طلبك اول ماقلتي لي بس انا كل ماشفتك رغبتي فيك تزيد وانتي بالنسبه لي شي مستحيل احصل عليه بس من بدت الفكرة براسي اني اتزوجك حافظت عليه في حال انتي رفضتي تتزوجيني اضغط على اهلك يزوجني منك غصب عنك انا في كل الحالات ابيك ومالقيت احسن من هالظرف علشان استغله
عهود تضحك وتقول له تذكر لما كنت تقول لي : وسيلتي قذره ورخيصه في الوصول للشي الي ابيه وشوف نفسك الحين ماتختلف عني بأي شي اهم شي يامنصور انك عرفت الشعور لما تكون عندك رغبه في شي واحد يبي يمنعك منه للأسف انت لعبتها صح وحصلت الي تبيه وانا لا
من كلام عهود منصور يحس فيها وهي تتحسر يحاول ينسيها بمداعباته لها وكلامه الحلو ويقول لها : طول عمري ياعهود اتمسخر على الي يقول فتاة احلامي بس عرفت ان لكل رجل فتاة احلام والمحظوظ الي يلقاها على ارض الواقع وانتي احلامي كلها
مضت ليلتهم وكلن يهوجس بشئونه منصور يفكر بأمه وشلون يرضيها وعهود تفكر بنفسها وللحال الي وصلت له
من الصبح منصور يكلم منيره يتطمن على امه وعلى موقفها بس قالت له ان الوضع صعب وانها مو متقبله أي كلمه او راي وتقول هاذي خلته يتزوج واهله مايدرون وش بتسوي فيه بعد والله ان تمشيه وراها مثل الحمار
منصور : يامنصور امي زعلت علي انا بعد والله من امس وانا اراضي فيها واقول لها انا مالي ذنب ولا ادري بأي شي ولا فيها فايده
منصور : لاحول ولا قوه الا بالله اجل اقولك تجهزي بمرك انا وعهود وبنرجع وعلى يوم بجيها تكون اهدا من كذا واحاول اراضيها
وهم راجعين بالسياره منصور يقول لمنيره والي كان واضح عليها انها متضايقه من زعل امها عليها : اسمعي يامنيره الظاهر ماقدامنا حل الا حل عهود
منيره : وش حل عهود ؟
منصور : والله مدري يامنيره بس عهود تبي تقابل ساره
منيره : يؤ تقابلينها ؟ عهود انتي من جدك لامستحيل انا ماتصور الوضع وش بيكون بينكم
عهود تششاركهم الحديث بعد صمت طويل
عهود : انا لو راجعه علي انا مو متضرره من زعل امكم لأن اساسا رايها مايشكل أي اهميه بالنسبه لي
منصور : عهود تأدبي
عهود :طيب sorry انت واختك الي متضررين من زعل امكم وواضح انكم ماراح ترتاحون وهي مو راضيه عليكم انا عرضت مساعدتي والقرار لكم بس انصحكم تخلوني اقابلها لأن هي الي الحل بيدها
منيره تقول لمنصور : وش رايك نجرب الحل الي عندها يمكن ينفعنا ؟
منصور : خلاص ماعندي مانع
رجعو ونزلو منيره في بيتها وراحو بيتهم
منصور يقول لعهود : بدخل اخذ لي غفوه واسترخي شوي ولاتخليني اطول بالنومه
عهود : طيب بس قبل تنام ابي رقم ساره
منصور يعطيها رقم ساره وتسجله عندها
منصور دخل ينام وعهود ترسل لساره مسج
( هاي ساره : انا عهود زوجة منصور ابي اقابلك ضروري بس بدون ماتمدين يدك علي زي اخر مره بينا ابي لقاء هادي وحضاري بينا ممكن ؟ )
عهود تنتظر شوي وتوصلها رساله
يعني احقر من كذا ماشفت وبكل وقاحه معطيك رقمي !
ان شفتك ياحقيره لاتلومين الا نفسك .
عهود تدق عليها وساره ترد
عهود : انا حقيره وانتي حيوانه طيب وبعدين ؟ خلينا من هالكلاام الي مابيفيد احد فينا
سارة : الحيوانه انتي واشكالك
عهود : طيب ياساره بنشتم بعض لمتى ؟ خلينا في المهم انا لي مصلحه معك وانتي لك مصلحه معي طيعيني خلينا نتقابل ونتفاهم عليها
ساره : انا مالي اي مصلحه معك وان شفت رقمك مره ثانيه ياويلك
ساره قفلت بوجه عهود وهي للحين ماخلصت كلامها
عهود ترسل لها :
امه مو راضيه عن زواجنا وبيطلقني وبيرجعك بس عنده شرط وهالشرط مابقوله الا لما نتقابل وجه لوجه - حددي يوم وساعه نتقابل فيها وارسليها بمسج - انا الحين تعبانه و بنام وعذرا منك اذا مارديت وبس اصحى ارد عليك ( فكري )
سلام
|
|
|
|
|
10-24-2012
|
#17
|
ساره تفكر ومحتاره خايفه تكون عهود تلعب عليها لعبه كبيره ولا تبي ترفض تقابلها لأنها يمكن تكون هي السبيل الأخير الي ممكن يرجعها لمنصور وبين حيره وتفكير وفضول لمعرفة وش تبي منها عهود ارسلت لها :
خلاص انا موافقه نتقابل اذا تبين اليوم الساعه 8 المساء في بيتنا
عهود تقرأ الرساله قبل تاخذ لها غفوه وراحه من بعد تعب السفر ونامت
بعد مرور الوقت عليهم نايمين صحت عهود وشافت الساعه والتفتت على منصور تصحيه
منصور
منصور
منصور قوم يالله تأخرت بالنوم وانا عندي مشوار وابيك توصلني
منصور : وين بتروحين ؟
عهود : كلمت ساره ووافقت اني اقابلها في بيتهم يالله قوم مابي أتأخر
منصور : ماشاللله بهالسرعه وافقت الخبيثه طيب بوديك بس اخذي منيره معك هاذي متوحشه ويمكن تذبحك او تسبب لك عاهه من الطق
عهود : لا بالعكس ساره كانت هاديه وهي تكلمني ورحبت فيني وماراح اخذ منيره معاي انا اقدر احل الموضوع بنفسي
منصور : مافيه الا تاخذين منيره معك ولا بلاها هالروحه من اصله امي مع الوقت بترضى انا لو اني مو شايفها وش سوت فيك كان ممكن ارضى بس شفتها ومستحيل اعرضك لمثل هالموقف مره ثانيه يمكن ينفلت الحوار بينكن ويقوم البقس بينكن من بيساعدك وقتها وهي بين اهلها والله ان يرطقونك طق لين تعضين الأرض استريحي ومافيه روحه
عهود : منصور انا واعدتها وخلاص هي تنتظرني انت خلك بسيارتك قريب من البيت وبس يصير شي وانا متأكده انه ماراح يصير بستنجد فيك اوكي ؟
عهود ظلت تقنع منصور لين وافق انها تروح لساره بروحها بدون منيره
منصور بالصاله جاهز وجالس ينتظر عهود تخلص طلعت لابسه وكاشخه ومن احلى مايكون
وهو يشوفها جايته وتقول له يالله انا جاهزه منصور يوقف ويمسكها ويحاول يراقصها مثل الأفلام وهو يغني لها
ااااه عندك خبر شو حلوي انتي ياروحي انتي
نيالو شعرك بيضلو جنبك نيالا الميه يلي عشفافك
ياحرام شوعملتي فيني مثل الورق طيرتيني
بدي الدنيا عشها معك ويوجعني الي بيوجعك
تنغري بيلبئلك ولا اهضم من حركاتك
ااه ياعهودتي علشانك اصير صابر الرباعي تدرين انا عندي شك ان صابر غنى هالأغنيه لك بس هو وين شايفك اعترفي
عهود : ايه واضح انه شايفني واهم شي نيالو شعرك بيضلو جنبك لازم يقول نيالها باروكتك لأنها فعلا تظل جنبي على طول
منصور : عهود شوفي انا احبك واموت فيك بس اتمنى معاد تحاولين تنكتين لأن يمكن هالشي يتسبب بمقتلك هههههههههههههههههههه
عهود : طيب طيب اوعدك ما انكت بس يالله مشينا لانتأخر
وصلو لبيت ساره ودخلت استقبلتها سار ه بدون سلام ولا شي بس قالت لها تفضلي من هنا وراحو لمجلس الحريم وسكرت الباب عليهم
عهود : شوفي ياساره من اولها ابيك تنسين الي بينها قبل وتشيلين أي مشاعر اتجاهي سواء حقد كره غيره أي شي وكلميني بتجرد من العاطفه ابيك بمصلحه وانتي من ورا مصلحتي بتكون لك مصلحه بعد
سارة : انا لاكرهك ولا اغار منك اخلصي وش تبين
عهود : حلو من بدايتها نرفزه واستفزاز ساره الظاهر مافهمتي مقدمة كلامي انا بسألك سؤال علشان من بعده تعرفين شعورك صح
سارة : وش سؤالك
عهود : انتي تعرفين منصور شلون تزوجني ؟
ساره : ايه سعيتي وراه هدايا واشرطه وقلة ادب لين سحرتيه وتزوجك
عهود : لا غلطانه ساره انا كنت مسجونه وشرط اني اطلع من هالسجن يكون فيه ناس وصيه علي واهلي مايبوني ولايبون يتحملوني وكان منصور هو المبادر لهالشي يعني هو من منطلق اخلاقي وشهامه لا اقل ولا اكثر وانا وافقت عليه لأني ابي اطلع من السجن وانا الحين جايتك تساعديني اخلص منه انا مابي اتزوج بس كنت مضطره
ساره : نعم نعم ! فلم هندي هذا من تكذبين عليه انتي ؟
عهود : طيب مو مصدقتني خليني اوريك اثار هالسجن علشان يمكن تصدقين عهود ترفع فستانها وتوريها الاثار الي بجسمها وترفع الشيله وتشيل الباروكه هاه وش رايك الحين بالفلم الهندي ؟
ساره مصدومه من منظرها وماقدرت تقول ولا كلمه
عهود تضبط نفسها وتقول لساره : نرجع للبدايه الحين بتتجردين من كل عواطفك وانتي تكلميني ولا لا ؟
ساره كأنها تأثرت وعلامات الحزن على وجها وهي تقول لها : انا اسفه لو ادري بلي مريتي فيه صدقيني ماكانت هاذي ردة فعلي انا غيوره صح بس مو معنى هذا اني ماعندي قلب منظرك يحزن والله
عهود : مابيك تحزنين لمنظري ابيك تساعديني بس
ساره : وش اقدر اساعدك فيه
عهود : ابي اطلع من هالديره ابي اسافر لأوروبا بدون وصاية احد
ساره : وانا وش في يدي لازم اهلك او زوجك
عهود : ادري انه لازم اهلي شوفي لوين وصلوني لأنهم مايبوني اسافر
ساره : طيب وليش ماقلتي لمنصور يوديك شهر عسل لأوروبا
عهود : اقول لك مابي وصايه احد تقولين خليه يوديك شهر عسل ابي اروح واعيش هناك بروحي مابي لأي احد علاقه فيني
ساره : طيب سافري على انه شهر عسل واهربي منه وخلاص
عهود : الكلام سهل ياساره وانا ان هربت على قولتك بيسكت مابيبحث عني ويبلغ الامن لين يلقاني بعدين انا مادري اهلي وياه وش دار بينهم لكن مستحيل اطلب منه هالشي وهو يعرف اني كل الي سويته علشان السفر واعيش بروحي دون وصايتهم اول مابيفكر فيه اني ناويه اهرب منه وانا مابي اخسر املي الوحيد وهو الباقي لي ومابيه يشك في نواياي ابي استغل انجراف عاطفته اتجاهي وانه مايبي يخسرني بأي طريقه وكنت احاول افكر بطريقه احقق الي ابيه بس بدت تنهار كل امالي يوم بعد يوم بس لين شفت ردة فعل امه امس وانذكر اسمك بالموضوع جلست افكر فيكم كانو من حوالي كلهم يتهاوشون وانا بس احاول اركز انتي وامه بشنو بتفيدوني لو دخلتكم من ضمن الاشخاص الي بيوصلوني للمكان الي ابيه ولقيت انكم انتم السبيل ومحد غيركم
ساره : وشلون فهميني وانا وش مصلحتي من هذا كله ؟
عهود : تبين ترجعين لبيتك وزوجك هاذي مصلحتك انا برجعك له بس ساعديني بهالخدمه انا شفت الويل وبشوف اكثر ان ظليت على هالحال انا من امس وانا مو طبيعيه حاسه اني قريب بيجيني انهيار عصبي من كثر التفكير والصراع الداخلي
ساره : قولي لي الخطه واشوف شلون بقدر اساعدك
عهود : حلو اسمعي برتب مع منصور زياره لأمه واني بروح اتودد لها انها ترضى عني ومن هالأمور وطبعا انا لما اجيها لا بتودد لها ولاشي مرتبه كلام خطير لو مشت خطتي صح بييخليها هالكلام تغير رايها وتسمع كلامي بالحرف الواحد ولاتقدر تعارضني بشي بس المهم وقتها هي بتكلمك وتطلب منك ترجعين لمنصور وانتي توافقين بشرط انه يوديك شهر العسل بأحد الدول الاوربيه ويدفع لك مهر ميتين ألف وخلي الباقي علي
ساره : هههههههه ميتين ألف ! والله مايدفع فيني ريال واحد تقولين ميتين الف صاحيه انتي ؟ وبعدين لحظه ليش انتي متأكده انها بتسمع كلامك وانها بتغصبه يرجعني وهو من وين له هالمبلغ يمكن خطتك ماتمشي عليها ياحلوه
عهود : انا مو بس متأكده انها بتسمع كلامي لا الا بترضخ لكل كلمه اقولها والمبلغ هو بيعرف يدبره لاتحاتين طبعا المهر موب لك علشان بس نكون واضحين من البدايه بعطيك منه بس الباقي كله لي انتي المهم عندك زوجك وبيتك صح؟
ساره : صح
عهود : خلاص لما تكلمك امه قولي لها الي قلت لك عنه وباقي التفاصيل بينا جوال واهم شي الي دار بينا كله محد ياخذ علم فيه اوكي ؟
ساره : اوكي ؟
عهود : والحين يالله خلينا نتهاوش شوي ويطلع صوتنا لزوم التأزيم بس انتبهي لاتلمسين باروكتي عهود وساره صوتهم يرتفع وشوية مسبات وهواش وام ساره تدخل عليهم تفرقهم عهود تدق على منصور علشان يسمع الهواش وتقول له انت برا ولا لا
منصور : ايه انا برا انزل لك ؟
عهود : لا لا جايتك الحين
تطلع عهود ووراها ا م ساره تهدي بنتها الي أجادت الدوور
منصور : قلت لك لاتروحين لها المتوحشه عسى بس ماتعورتي
عهود : لا امها الحقت علينا قبل تسوي فيني شي
منصور : وليش تهاوشتو ؟
عهود : الغيره ذبحتها مني بس ياحرام يامنصور البنت تحبك وتموت فيك والله للحظه كسرت خاطري صح انها تشتمني و تتهجم علي بس تبكي بقهر للحين متولعه فيك
منصور يسكت ويكمل طريقه للبيت
:
عهود :منصور انا لازم اكلم امك ساره اوحت لي بشي يمكن يكون سبب انها ترضى عن زواجنا
منصور : وش اوحت لك فيه ؟
عهود : لما اقابل امك بفهمها عن هالمتوحشه ساره وش سوت فيني وانا جايه اترجاها انها تصلح الموقف الي سبب لنا مشكله وتعترف انها قالت عني بنت شوراع من باب الغيره والقهر وشلون انها مدت يدها علي في بيتها مع كم دمعه تمشي الامور و يمكن امك تقتنع واكسر خاطرها
منصور : عهود انتي حسبالك امي بزر تلعبين عليها بهالكلام ماراح تصدقك ولا بترحمك وبتقعد على نفس موقفها اعرف امي
عهود : منصور خلنا نتفائل وبعدين انتو ماخليتوني اتكلم معها انا عندي اسلوب واقدر اخليها تتعاطف معاي وترضى عن زواجنا منصور انا ماراح ارتاح وانت مو مرتاح وتبي رضى امك انا من عندي اهم منك منصوري انت الي بقيت لي بهالدنيا ومابي اكون سبب بتعاستك نبي نعيش مبسوطين
منصور : يابعد عمري ياعهود الله يعين امي واعرفها صعبه والله بس مع هذا بحاول خلال هالايام نروح لها
عهود : لا مو ايام بكرى نروح لها
منصور : ياقلبي ياحياتي انا للحين ماتهنيت فيك نبي ننعزل عن العالم الخارجي بس انا وانتي ابي انسى كل همومي ومشاكلي ابي بس استمتع بوقتي معك بروحنا بدون مانفكر بأحد ينغص علينا كم يوم ان شاءالله وبعدها نروح لها منها هي تكون هدت وانا اكون انفردت معك بدون تشويش
عهود ترضى بكلام منصور بعد عدد من المحاولات انها تعجل بمقابلتها لأمه بس بدون فايده
بدون زيارات ولا مقابلة احد قضى منصور وعهود ايام العسل ك سينفونية غراميات على دقات الساعات والدقايق والثواني
بعد كم يوم سافرو لبيت امه
الام ماستقبلتهم ورفضت انهم يدخلون بيتها منصور بعد محاولات معها اقنعها ان عهود تبي تكلمها على انفراد
دخلت عهود سكرت عليهم الباب واول شي قالته : اسمعي يام منصور بقول لك سر بس لازم تهدين وماترفعين صوتك ابد وتفكرين قبل تقولين أي كلمه لأنه بتصير مشكله كبيره ان تكلمتي او أي احد من الي برا سمعنا
ام منصور : وش تبين وش بتقولين ؟
عهود : اذا انتي تبين مصلحة ولدك وتبين تلحقين عليه قبل يضيع اسمعي كلامي حرف حرف ونفذيه تخيلي بكرى بالجرايد اسم عايلتكم واسم ولدك الكاتب المشهور متزوج من وحده كانت بالأساس ذكر وسوت عمليه وصارت انثى وش بتقولين !!
طبعا عندك خيارين اما تعلمينه وهو بيكذبك ويعتبرك خرفتي خاصه وانتي شايفتني ماشاءالله اجنن ومحد بيصدقك وماعندك دليل على كلامك وبتعشين طول عمرك ماتشوفين له عيال لأن الرجال لما ينقلب ويصير مرأه ياخذ شكل المرأه بس مايحمل فهمتي
او انك تسمعين كلامي وندفن هالسر بينا واوعدك ان مشيتي معي للآخر بختفي من حياتكم للأبد وبدون ما ولدك يتأثر ولا انتي تنحرمين من الاحفاد ولا تنفضحون هذا غير لاسمح الله يمكن ولدك يصير فيه شي من الصدمه
الام مصدومه : انتي وش تقولين الله يلعنك ! وش هالكلام ؟
عهود : شوفي
وترفع الباروكه والام تنهبل من المنظر وماتدري وش تقول
عهود : تدرين ان ولدك هو الي جايب لي الباروكه لأنه صدق كذبة ان فيني ثعلبه وقال عادي اهم شي اتزوجك شايفه ولدك شكثر يحبني ومتمسك فيني ؟
تعتقدين لو جيتيه وقلتي اني كنت رجال بيصدقك ؟
ولدك مستعد يسوي أي شي علشاني بس انا ما ابيه انا ابي شي واحد ساعديني عليه علشان الكل يرتاح وولدك يرجع لبنت عمه وانا انتهي من حياتكم
ام منصور : ويوم انك ماتبينه ليش خذيتيه وش تبين مني و منه حسبي الله عليك
عهود : تقولين له انك بترضين عن زواجي انا وياه بشرط انه يرجع ساره على ذمته بهالحاله انتي ترضين على زواجنا وغضبك ورضاك انه ينفذ هالشي ولا يطلقني وهو لأنه مايبي يخسرني ولأني بقنعه بيرجعها لذمته وطبعا لازم تمارسين كل ضغوطك عليه زعل ومرض وحركاتكن يالعجز طبعا عارفتها
ام منصور : وانتي وش مصلحتك من انه يرجع ساره ؟
عهود : مهوب شغلك سوي الي قلت لك عليه وبس
ام منصور : انا ماعلي منك الحين اناديه الكلب واخليه يكشفك على حقيقتك ويعرف الي ضمها من الشارع وشهي بالأصل
عهود : يالله قومي نادييه علشان من بكرى اوراقي الي تثبت اني سويت العمليه تنتشر بكل الصحف وتعالي عالجي ولدك من الانهيارالعصبي وعالجي سمعتكم الي بتصير مسخرره لكل الناس يالله روحي قولي له قومي يالله وش ناطره !
|
|
|
|
|
10-24-2012
|
#18
|
ام منصور بنظرات حقد تقول لها : وش المطلوب الحين ؟
عهود : المطلوب تنادين ولدك وتقولين له تبيني ارضى عن زواجك من بنت الشوارع رجع ساره ولا لا أنت ولدي ولا اعرفك
ام منصور : اخ ياالقهر ليته يجي يشوفك وشلون تتكلمين وتخططين عليه علشان يعرف قدر بنت عمه
عهود : طيب طيب بلا فلسفه زايده اقوم اناديه وتقولين له الي اتفقنا عليه ؟ ولا ؟
ام منصور : ايه روحي خليه يجي و نخلص منك
عهود : منصور منصور تعال امك تبيك ،
منصور قبل يدخل على امه : هاه بشري ياعهود وش قالت عساها رضت بس ؟
عهود : امش وبتعرف
دخل منصور وجلس قبال امه وهي تقول له :
اسمع تبيني ارضى على زواجك من بنت بليس ذي رجع ساره على ذمتك ولا انسى ا ن لك ام لين اموت وبموت وانا غاضبه عليك
منصور : وشهو ! يمه حرام عليك انتي تبين تجننيني انا مابي الا عهود تجبريني على شي ضد سعادتي تبين تشوفيني متضايق على طول انتي !
ام منصور : اطلع برا ولا اشوفك الا جايني ومعك ساره ولا انساني اطلع براااااااااا
عهود :منصور حبيبي امش امش امك متضايقه حيل اطلع لا تتعب قلبها ويصير فيها شي ،
عهود تحاول بمنصور يطلع من الغرفه لين طلع وهو يكلم امه وهي ماترد عليه سكرت عهود الباب وراها ومسكت منصور تهديه وتقول له : لا تخاف حبيبي اهم شي امك ورضاها استغفر الله يامنصور تخيل امك يصير فيها لاسمح الله وين بتروح انت من تعذيب ضميرك وشلون بترتاح بحياتك انا ادري ان امك وساره ظلموني بس انت انصفتني بين الناس كلهم وضحيت وتزوجتني وتحملت مشاكلي انا اخسر أي شي بس ما اخسرك واشوا انها قالت ترجعها بدون ماتطلقني
يعني امك اقتنعت فيني
منصور : عهود انتي صاحيه انا مابي الا انتي ساره ارجعها وش ابي فيها ! هاذي بتشب بحياتنا غيره وحقد وكره وبعدين اشوفك راضيه بالموضوع ومتقبلته وش هالقلب الي عليك
عهود : يعني تبيني اعاند واقول لك لا ما تاخذها واخليك تجي بالنص بيني وبين امك منصور حاول تفهم ياقلبي انا مالي بهالدنيا غيرك خلاص الكل تخلى عني مضطره اقبل قرار امك غصب علي لأني مابي اخسرك انا فرحانه انها ماقالت لك شرطها تطلقني لكن فيه شي اهون من شي اهون علي ترجع زوجتك ولا تطلقني وارجع لأهلي الي الله اعلم وش بيسون فيني
اسمعني ياقلبي انت اول شي واهم شي ترضي امك وساره لما ترجعها بنطفشها انا وياك ونخليها تطلب الطلاق وامك وقتها بترضى بالواقع لأن ساره الي طلبت تنفصل صح ؟
عهود تحاول تبسط الموضوع لمنصور علشان تمشي خطتها مثل ماهي راسمتها
منصور ماسك راسه وكأن مصيبه جت عليه
عهود : بروح اشوف امك واقول لها انك موافق وانا موافقه
منصور : خلاص روحي انتي عند امي وانا برسل مسج لساره اسفل فيها واحذرها انها ماتقبل ترجع لي وبكذا نخلص من هالموضوع
عهود ارتبكت وماعرفت شلون تتصرف اخذت جواله من يده ويعننها معصبه : هات الجوال صاحي انت ! وش تبي ترسل لها وتسفل فيها يعني بظنك ماراح تعلم امك وساعتها امك بتعصب علينا ويمكن تقول لك تطلقني خل ساره لاتكلمها ولا تقرب صوبها خلها تتفاجئ يوم تجي تبي ترجعها ويمكن تجي منها وترفض ونخلص من هالسالفه
عهود تسكر الغرفه عليها وعلى ام منصور وتقول لها دقي على ساره وقولي لها ان منصور بيرجعها وانك بتزعلين ان مارضت ترجع وعطيها من الاسلوب الحلو
عهود بهالوقت ترسل مسج لساره وتقول امه بتتصل فيك الحين وخلينا على اتفاقنا اوكي ؟
ام منصور تكلم ساره وتتعذر منها وتقول لها : والله يابنتي لو اني داريه انه بيتزوج وحده من الشارع وماتربت وكلبه كان ماسمعت كلامه يوم قال لنا لاتتدخلون بيني وبين ساره بس قدر الله وماشاء فعل وانا طالبتك يابنتي انك توافقين يرجعك علشان يعرف الفرق بين بنت الاصل وبين بنت الشوارع ويطلقها ويصفى لك انتي بس
ساره : طيب بس انا لي شروط وماراح ارجع الا اذا نفذها ابي شهر العسل جوله في اوروبا والمهر ميتين ألف ولا لا اشوفه جاي صوب بيتنا خليه يعرف قدري
ام منصور : من حقك تتشرطين بس هالامور خليها لين يجيكم وقت الملكه وهو خلال هاليومين جايكم ان شاءالله
انهت ام منصور مكالمتها وقالت لعهود تقول لمنصور خلال هاليومين يخلص كل شي ولاتشوفه جايها الا وساره معه
بلغت عهود منصور بشروط ساره وبقرار امه
منصور : نعم نعم ميتين ألف وشهر عسل بعد ؟ منين اجيب لها هالمبلغ وش مفكره نفسها ذي منصور يفتح الباب على امه وهو معصب : انتي راضيه عن هالمهزله يعني انا مابيها وهي تتشرط بعد يمه انتي ناويه تذبحيني تكفين حسي فيني والله احس صدري بينفجر من القهر
ام منصور : شفت احساسك هذا ياولدي هو احساسي الحين شفت ان الامور ماتنحل بهالطريقه انا بموت من القهر من فعلتك ولا انت حاس فيني وتبيني احس فيك روح سو الي قلت لك عليه ولاتجيني الا وساره معك ونفذ لها كل الي تبيه ولا عيني لاتشوفك
ارجعو بيتهم ومنصور مهموم ومتضايق وبعد مرور كم يوم وعهود طول هالايام تحاول فيه وتبسط له الامر وتقنعه وتزن على راسه لين استسلم للأمر الواقع واقتنع من كلامها
منصور : ياعهود انا من وين اجيب لها هالمبلغ ماعندي وهي ماتستاهله انتي الي تسوينها مادفعت فيك ريال هي ادفع فيها هالكثر ليه
عهود : الفلوس امرها هين انا عندي فكره اخذ اخر شريط عندك وقول لسامي انك لقيته عندي مخبيته وانت من زود امانتك جبته له بس انك محتاج لك مبلغ مقابل هالشريط وبس وانت عارف الباقي
منصور : وشهو ! تبيني ابتز شخص عطيته كلمه اني معاد اخليك تدخلين حياتهم من جديد
عهود : منصور انت عطيتهم كلمه ومع هذا خبيت لك شريط واحد يعني فيه استثناءات لكل شي وحنا محتاجين لهالفلوس قول له واطلب مبلغ كبير وهم بيدفعون فلوسهم من كثرها ماتكلها النيران ولا خلني انا اقوم بهالمهمه
منصور : لا لا انتي لا خليك بعيد عنهم وانا بتصرف
منصور يكلم عمه ويحدد معاه يوم للملكه منصور بقمة تعاسته وضيقته وعهود بقمة فرحتها
بيوم الملكه منصور متضايق ويلبس ويتزهب وعهود تعطره وتحاول تخفف عنه بالكلام والمداعبات وهو يقول لها : والله ياعهود اني متضايق مرره والي مضايقني اكثر موقفك شوفي وش كثر تحاولين تخففين عني علشان بس تدارين على حياتك معي ورضيتي اني اتزوج ساره واجيبها على راسك بس علشان ماتخسريني مقهور عليك شلون بنت مثلك بنت عز ودلع ترضى بهالظلم خوف من انها ترجع للتعذيب الي ذاقته من قبل الله يلعن الكلب سامي لهدرجه قدر يرهبك
عهود : ماعليك مني ياحبي خلك بموضوعك وخلنا نرضي هالأم ونعيش بسلام
يطلع منصور ويروح بيت عمه ويخلصون اجراءات الملكه ولما كان منصور بيطلع امسكه عمه وقال تعال انت الحين رجعت زوجتك ادخل عليها بالمجلس وحاولو تتفاهمون وتتجنبون الاشياء الي سببت لكم الانفصال من الاساس
دخل منصور على ساره جلس عندها وهو يقول لها : ممكن اعرف وش هالطلبات انتي تعرفين وضعي المادي شلون تطلبين مني هالمبلغ وبعد شهر عسل بأوروبا من وين اجيب لك؟
ساره : انت متزوج بنت العز والدلال خلها تعطيك مو شغلي الي طلبته يجيني انت اهنتني بما فيه الكفايه وما يرد لي جزء من كرامتي قدام الناس عالاقل الا هالطلبات
منصور : الله يصبرني ويعيني عليك مابي اعصب عليك بمثل هالوقت عيب علي وعليك نبتدي خناق من اولها خلاص انا بس ارتب اموري بجي اخذك واعطيك الي طلبتيه يالله بالإذن
ساره : وين وين انا الحين زوجتك ومن الطبيعي اكون بالمكان الي انت تبات فيه دقايق بس اجيب عباتي واغراضي ونرجع بيتنا
منصور يمسكها بقوه من ذراعها : وين ترجعين هذاك بيت عهود ومنتي طابته بأجر شقه لك واضبطها وبعدها تجين معي
ساره : مافيه رجلي على رجلك و هذاك بيتي وانا برجع لبيتي غرفه لها وغرفه لي مؤقتا والشقه الي بتأجرها خلها لها هي
منصور : يارب الصبر يارب اقولك انثبري ولاتخليني افقد اعصابي ،
ابو ساره بهالوقت يدخل عليهم ويقول لمنصور : هاه على وين وين بتروح ؟
ساره ترد على ابوها : يبيني ارجع البيت معه الحين
العم : ايه وش فيها انتي الحين زوجته رسمي الله يستر عليكم ويهدي سركم موفقين يارب
ساره تلبس عباتها وتجيب اغراضها وتجيب معها شنطتها وتقول لمنصور الي جالس وكأنه في عالم ثاني : انا جاهزه يلا مشينا
منصور تفاديا للمشاكل ارسل مسج لعهود يقول لها ترا ساره جايه معي
عهود شافت الرساله جلست شوي تفكر وطرت عليها فكره راحت لبست شورت قصير مرره وتي شيرت شفاف وجلست بالصاله وكأنها جالسه تداوي بعض الآثار بجسمها ، منصور يدخل ومعه ساره وعهود تتصرف كأنها متفاجئه فيها Ops آسفه حبيبي مادري انك بتجيبها معاك اليوم ماكنت اخذت راحتي باللبس وكذا مبروكين تفضلو استريحو دقايق اجيب العصير
عهود تروح تتمخطر بشويش وغنج وعيون منصور وساره تتبعها بإختلاف النظره منصور بنظرة حب واعجاب يتابعها وساره بنظرات حقد
ساره تلتفت على منصور : وين بحط اغراضي ؟
منصور : تعالي معي ويفتح لها غرفة الطعام الداخليه ويقول لها حطي اغراضك هنا مو انتي اصريتي تجين معي وانا مارتبت شي تفضلي اجلسي هنا
ساره : نعم ! ابي غرفتي القديمه
منصور : اسف صارت لي ولعهود ولاتبتدين بالمشاكل
عهود تجيب عصير وتحطه بالصاله وتناديهم
ساره : عهود ممكن اكلمك شوي ؟
عهود : ايه تعالي تفضلي
ساره : لا ابيك على انفراد شوي ،
تاخذها عهود وتوديها لغرفة النوم وتسكر الباب
عهود : انتي انجنيتي من اولها تعالي ابيك وبكلمك تبين تفضحين لعبتنا يعني ؟
ساره : انا بفضح كل شي بينا اذا مارحتي لمنصور وقلتي له ارجع لغرفتي هاذي وتطلعين انتي منها لأن انا قلت له ورفض اجل يبي يحطني بغرفة الطعام ؟
عهود تضحك وتقول لها : تهدديني ؟ لا حبيبتي ماحزرتي انا محد يلوي ذراعي يالله روحي قولي له عشان ترجعين مطلقه للمره الثانيه ومن اول ليله ترا منتي قدي
ساره تكتم حسرتها منها وتقول لها : الله ياخذك وافتك منك بأسرع وقت
وتطلع للصاله وتجلس عند منصور
عهود : منصور بما انك معرس جديد اليوم انا راح اتخلى عن غرفتي لك ولساره تقضون فيها ليلتكم وانا بدبر نفسي وبنام بالصاله
منصور يقول لعهود : تعالي ابيك بكلمه
راحو مع بعض ،
منصور : انتي انجنيتي وش هالكلام
عهود : خل عنك كلامي اشرايك فيني وانا من اولها بديت مرحلة التطفيش
منصور : شلون ؟
عهود : انت لما ارسلت لي المسج رحت ولبست هالملابس المشخلعه شوي ابيها تنكوي من البدايه
ولازم الحين نكمل تمثيلية سياسية التطفيش وتشاركني الدور
منصور فهم عليها ويقول لها : والله انك شيطانه
عهود تتعمد ترفع صوتها هي ومنصور ويعني انه يداعبها ويضحك معاها من ورا الباب وساره تسمع ومقهوره
عهود تلعب على الحبلين تبي تثبت لمنصور انها معاه للنهايه وانها بتطفش ساره ومنها تلعب بأعصاب ساره علشان تلتزم بالاتفاق وتتخلص من وجود عهود بحياتها بأسرع وقت
طالت تمثيلتهم عليها وراح دفت عليهم الباب ولما شافته حاضن عهود وذايب فيها فقدت سيطرتها على نفسها وبدت تخربط بالكلام
منصور : الله يلعنكم ياكلاب لو تدري هالحقيره وش ناويه عليك ما تعمدت تهيني كذا انا الغبيه والحماره الي طاوعت هالخبيثه
عهود طيران على ساره وتحاول تشوش عليها بالصراخ والكلام وساره انفلت لسانها زي مافلتت اعصابها
بوسط هالموقف والي واضح ان عهود تبي تسكت ساره بأي طريقه منصور ينتبه لنرفزه عهود والي وصلها انها تمد يدها على ساره !
|
|
|
|
| | | | | | | |
العرض العادي
