بسمه من شفاتك تموتني وتحييني

قلت : أكرمكم الله
مرت خالي بدون نفس : هني وعافيه ,,
قلت : خـــالي قاصرني أغراض وأبا أروح السوق تدري عاد مب يايبه وياي وايد أشيا ,,
بدور بطنازه : جيه بتشحتين عن عمي بيزات ,,

قلت لها : والله خير أبوي الله يرحمه مغرقنا ,, وبعدين هذا خالي يعني مالج شغل بينا فاهمه ,,
بدور بغت ترد عليه بس خالي تكلم : انزين بنتي ,,, سلطان ودها السوق ,,

طالعت سلطان وطالعني ,, ابتسمنا لبعض ,, حسيت كلام بعيونه يبا يقوله ,, الظاهر اليوم بيقوله عشان جذا استانس ,,

طالعت صوب بدور قبل ما أمشي ,, وشفتها بنظرة انتصار ,,, ومشيت ,,

صـــح كيف أروح مع سلطان روحي ما يصير ,, هذا غير اني ع ذمة يوسف بعدني ,, بـــــس ,,, يلا عادي .. وبعدين قوم خالي أصلا فري ,, وحتى خالي ما يغار على بنته أباه يغار عليه أنا هههه والله حاله ,,

هالناس شووه ماكلين لحم خنزير أعوذ بالله ,, والله لو عمي جان ذبحني يوم اني أطلع مع يوسف بروحي ,, قبل ما نعرس ,, بس أوقات الحايه تجبرنا ,,

دخلت الحجره ,,, رقدت لي شوي الين العصر وقمت من النوم صليت ,, ولبست عباتي عسب أروح السوق ,, نزلت تحت ما شفت أحد ,, رحت صوب الخدامه ,,

قلت : وين سلطان ..؟؟
الخدامه : في غرفته ,,

قلت لها : سيري ازقريه قولي له نوره تقول أنا جاهزه ,,
رحت قعدت في الصاله أترياه وأنا قاعده أطالع تلفزيون ,,, لمحت بنتين نازلات من ع الدري ,,

ما شفت صوبهم هالحيايه ,,, يو تقربو عني ,,
ساره : تيين ويانا الجيم ,,

طالعتها وقلت : لا بسير السوق ,,
بدور : أصلا هاي شكل جيم عسب نوديها الجيم ,,

طالعت سلطان نازل مبين عليه جاهز من وقت جان أرد على بدور ... بغرور
وقلت : تراني رشيقه هب دووووبه يعني ما يبالي لا رجيم ولا هم يحزنون ,,,

طالعت سلطان ابتسمت له أقهر بدور .. وقلت : يلا مشينا سلطان ,,
سلطان : مشينا ,,

رحت ورا سلطان تميت أمشي وياه الين طلعنا من البيت كانت سيارته سافطه يدام الفله ,, وركبت ورا ,, وتحرك سلطان ,, كان مشغل أغنيه بس موطي صوتها ع الآخر ,,

تميت عابل فالفون ,, الين ياني مسج ,,,
من بلسم جروحي ,, ( أنا بي بوظبي بيت خالج ,, )