ديوان الشاعرة / ينابيع السبيعي

قل احبك

قلها ثاني قل احبك من جديد
قل وصرح واجهر بحبي معاك

لا يهمك من عذول لك يبيد
ودي اسمع كلمتك واسكن هواك

لا تخاف اهواك لي حبل الوريد
حبك بدمي وهجرانك هلاك

ما يهم اشرح وفضفض بالقصيد
وافهم اني ما أنقص من غلاك

كل خوفي تبتعد ادري عنيد
وادري انك بالحنان الله كساك

لا تقول انساك في حبك ازيد
واستشف الحرف من همسة نداك

وما عطيت القلب الا لك اكيد
ولا افكر يوم اتعمد اذاك

يا عسى ربي يحقق ما نريد
وما يمر الوقت في لحظة جفاك

حبي الوارف وتصوير النشيد
يتبع احلامه على لمعة سناك

طيعني لا تكون عن قلبي بعيد
انت لي حاكم وانا بحبك ملاك

لا تهد اللي بنيته ولا تعيد
كسر خاطر من تعنى في رضاك

تدري ان العاطفه فيني تقيد
واشهد اني ضعت في عالم فضاك

بس احبك قولها لي من جديد
وانسى هم الكون او خله وراك