قصائد الشاعر / ناصر الفراعنة

ياكتاب من غلى راعيه

يا كتابٍ من غلا راعيه قلبي مات فيه
كيف اعرّف فيه من كان اسمها مفرد علم؟

يا قلم من طحت من رمشه على راحة يديه
يا قلم من لا رعت ذودٍ ولا ساقت بهم

لا بغيت آقول: ما ابيه, اختلفت وقلت: ابيه
كنّ قلبي له يلفنّه غصونٍ من سلم

بنت شيخٍ كلّ من طارت عيونه ينتخيه
صيرميٍّ كنّ في عينه ليا شبّت سهَم

جادلٍ في حسنها كم علّقت باشا وبيه
في حشا ناصر لها شادوا من ضلوعه حرَم

كم نبيهٍ من هواها غاديٍ مثل السفيه
فتنة الجمعين من صنعاء إلى أرض العجم

يا سميّ الريم من قِصّة أخٍ قاتلْ أخيه
لا تعجّب,كم ألم يُنسيك ألم جرحه ألم

مصرع الأنذال مهما كان من ضحكةْ جنيْه
ومصرع الأبطال مهما كان من ريشة قلم

بالقلم موت الفتى لا غمّضت عينه يجيه
وبالقلم شهب الذيابة فحّلوا فيها غنَم

وبالقلم كم من وَجِيْهٍ مع ذويه ابكي ذويه
وبالقلم كم من أمم في موتها مولد أمم

يا قلم من عنه خطواتي ترجّعني إليه
جادلٍ ما للفتن مع فتنته ماطا قدَم

يا قلم مَن ويل ويلي منه يا ويلي عليه
سيّدي سيّد حروفي كلّبوها: (لن) و(لم)

اختلافٍ في الليالي واختلافٍ في الوجيه
والوضع لا زال نفسه والعلَم نفس العلَم

تحميل