ديوان الشاعرة / ينابيع السبيعي

"صبر أيوب"

وينك بفضفض لك بمكنون صدري
صدك بنى في خافقي مستحيله

حتى غدى عرق الحزن سيل حبري
ودموع مكنون الغلا في هميله

كل ما ابتعدت القاك باعماق جذري
حروف شعرك بالمفارق وسيله

موجات حبك بين مدي وجزري
وغيوم صدك عتمة فيك خيله

ابسألك .وش اللي رحل فيك بدري!؟
واللي بقى من ذكرياتك حصيله

وليه انبنى في خافقي ليه مدري؟!
وأنين بعدك بالضماير صهيله

وشحيلتي وانت على ما انت خبري
أعطيت من صدك عطايا جزيله

رزنامة ايامي مضت دون عذري
والحب يسري بالضلوع النحيله

وانت الذي بيديك حفرت قبري
وشيعت جثماني وغيرك يشيله

مصيبة يا كبرها وانت تدري
منك الجروح النازفه كل ليله

هذي حقيقه صاغها فيك فكري
أبيات شعر كالجواهر أصيله

صبرت صبر( ايوب)مافاد صبري
حملي ثقيل حيل ما فيه حيله

هذي النهايه ترجمت بوح شعري
تبقى على مر السنين الطويله

ذكرى غلا من زود قدرك وقدري
بين الأماني والليال الجميله

وآسف ولا لي غيرها منك أدري!
وانا على جمر الغضى و المليله

سلمت لله في سواياك أمري
وجمر اشتياقي في غيابك فتيله