ديوان شقى جدار الزمن للشارع المصريه منال درويش

كان وكنا..




ياما ، حبيت الاماني

جوه ف عيون الصغار

واتصفيت ويا زماني

رغم ظلم الانكسار

رغم ظلمك ليه عشتك

رغم هجرك ليه شوفتك

رغم بعدك ،،

عشت صورتك ليل ، نهار

كنت أوراقي القديمة

والجديدة واللي جاية

كنت ليه شمس بكرة ،

حتي ساعة المغربية

عشت فيك الحب ذكري

عشت أحلام مستحية

كان وكنا مش ح اقولها

قصة تاهت من فصولها

مش ح تبقي ف يوم قضية

حرف متكرر علينا

كلمة تاهت بين عينينا

مش ح تقدر يوم تقولها

وانت بايع ،،

واحنا برخيص اشترينا

مش ح تقدر يوم تقولها

رغم صدق النبض فينا

عيش حياتك ، زي ما انت

ضيع مع الاوهام وانسي

اما قلبي مش ح يقسى

ف يوم عليا ..

مش ح يرضي يكون ضحية

كان ، وكنا مش ح تبقي

ف يوم قضية

لم ليلك ويا قمرك

واطوي ظلمك ويا غدرك

واطلب الغفران بقلبك

لو طلبت ف يوم سماح

راح اسامحك ، رغم جرحك

مش عشان خاطر عيونك

لأ عشان قلبي اللي حبك

قلب صافي ،،

حب كل الناس وعاشهم

حب ليلهم ، قبل نورهم

كل أحلامه لوجودهم

كل همه انه يساعدهم

قلب عمره ف يوم ما يكره

حتى لو كرهت قلوبهم

كان وكنا مش ح تبقي

ف يوم قضية …!!