بلا رقيب / لعاشقه ديرتها ، كاملة

((3))

(.. الاصطياد في الماء العكر..)

عساف

تسرعت باللي سويته كان كل شــي ماشي مثل ماخططت له بس شفتها أنقلب كل شــي أستفزتني أقهرتني يالناس مغروره ترفع الضغط تحسب كل شــي على كيفها يمشــي ,, أعجبتها فكـرت أنها هي اللي بيدها القياده تحسب مثل ماهي قاعده تمشي خـواتها بتمشيني وأنا الخبل ساكت لها أحسب أنها مع كثر الضغط بتلين ..أستاهل كل اللــي جاني ولا فيه واحد عاقل يسوي اللي أنا سويته .. بس انا خلاص مليت بانتظر مبــارك وش يسوي وأن ماقدر يسوي شــي انا بتصرف بطريقتي اصلاً أجازتي مابقى منها شــي كل اللي بقى أسبوعيــن ..لازم أستغلها وأخلص كل شــي وبعـدها أرجــع لشغلي بعد مأثبت وجــودي هنا واسس لي بيت وزوجه زي الخلق ..
وش سوت بأختها اللي شافتنا مع بعض ويمكــن بعد سمعت جزء من كلامنا ... بستين لعنه أنا وش دخلني فيها هي وأختها ..بس جت بوقتها ياحليلك ياضحى والله وأنحرجتي بس اخ أقدرت تطلع منها أعصابها صلبه مو أي شي يهزها ولا أي موقف ينهيها .. خلاااااااص وبعدين معك عساف أعقل ... كلمت نفسي بصوت مسمــوع أبغى أسمع صوتي وأستحي من حالي بس ماقدرت رجعت أهوجس فيها مانيب قادر اشيلها من تفكيري ... كل شي فيني صار يفكر فيها حتى وأنا جالس لحالي بالسيارتي أنطق أسمها من غير وعي ومرات أكلمها اعاتبها وكنها تسمعني .. والله اللي جننت فيك بنت مبارك ياولد محمــد ..
اوووه هذا جــوالي يدق ..شفت رقم خلف ورديت عليه ..
خلف :السلام عليكم ..
عساف :هلا والله وعليكم الســلام .. كيف حالك ..
خلف :بخير الله يسلمك .. وينك اللحيـن ..
عساف :بالسياره وش بغيت ..
خلف :تمرني بعد الدوام نتغدى سوى وعنــدي موضوع بأخذ رايك فيــه ..ز
عساف :ايه خلاص أشوف ..
خلف :الا عساف ماشفت قيس ..
عساف :هاه لااا وين أشوفه ..
خلف :ماهو بجاركــم ..
عساف :خلف لاتسويلي فيها قلت لك ماشفته ..
خلف :طيب لاتعصب قلت يمكنك شايفه .. على العمــوم انتظرك فالبيت لاتأخر ..
عساف :طيب على ثنتين ونص وأنا عندك ..مع الســلامه ..
ثنتين وعشــر كنت موقف سيارتي قدام بيته ونازل منها .. دخلت بالمجلس الخارجــي وفتحت الليت .. ولقيت مالك مفترش وحده من الكنبات ونايم ..
عساف :مالك مالك ..
انقلب على جنبه الثاني وبيده غطى عيونه ..
عساف :مالك قم اصحــى يامالك ..
مالك :اووووووف عمي ماهوبوقتك خلني نايم ..
عساف :تبي تنام أدخل داخل ماعندك حجره تنام فيها..
مالك :وين أدخل وأمي هناك بعدين أمي مكنسله حجرتي ..
عساف :مالك فز قم ..مالك ترى قسم بالله لأصب على راسك جركل ماء ..
مالك :عمي واللي يرحم والديك خلني نايم ..
عساف :مالك ووجــع قم أخوك عازم رجاجيل أصحــي قبل مايوصلون..
من سمع كلمتي تعدلت بجلسته .. وقال وهو يتثاوب ويرجع شعره اللي طاح على وجهه من طوله لورى ..
مالك :اللحين وين أنام به ..
عساف :دبر عمرك .. وبعدين حلق شعرك هذا اللي ماباقي الا تسويه جدايل ..
مالك :اللحين انت شكــو ابوي اللي هو أبوي ماعمره قالي طول شعرك ولاأحلق شنبك انت شكـو ..
عساف :يقولون أني عمك .. بس أي أبو اللي تكلم عنه لاتكــون للحين تحلم ..
مالك :آآآه قصدي عمي مبارك .. وينه خلف والضيوفه موكنهم تأخروا ..
عساف :وأنت تبيهم يدخلون عليك وأنت لابس كذا روح ألبس لك ثوب وتعال مو لابس سروال وفانيله وبتستقبل ضيوف ..
مالك :طيب زين بروح ويمكــن مأرجــع ..لاتنتظروني ..
عساف :ايه مير بنحتريك أنقلع بس ..
وطلع وهو مسكر عيونه ويحك شعــره ..سمعته يقول أح شكله صقع باالشــي ثم سمعت صوته يسلم على واحــد أستغربت شكلي كذبت كذبه وصارت صدق .. طلعت أشوف وش صايــــــر ..
عساف :ياااااهلا والله .. حياالله من جانا حيالله قيس .
قلتها وأنا أسلم عليه ..
قيس :ياهلا والله الله يحييك ويبقيك .. كيف حالك أبو محمــد ..
عساف :طيب طاب حالك تفضل يمل العافيــه ..توه الضحى سألني عنك خلف ...
قيس :ايه كلمني وتقابلنا قدام البيت ..
دخلنا ومأمدانا نجلس الا وداخل علينا خلف ..
خلف :وش فيه الخبل مالك ..
قلت له وأنا أضحك لأني تذكرت شكل مالك ..
عساف :خربت عليه نومتــه ..لا وقلت له أن خلف جااي ومعه ضيوف بس عشان يصحــى ..
خلف :لازين سويت فيه ..معذب الوالده معه بس نوم وسهــر وشغل مافيه ..
قيس :ليه هو خلص الجامعه ..
خلف :لاوين خلصها ......
سرحت عن كلامهم أفكــر بقيس أنســان عجيب غــريب يحيرك فيــه اذا جالسته تعجب من قل كلامــه بس بتعجب أكثر منه لتكلم لأن كل كلمــه تخرج منه حاسب حســابها وسوالفه ماينمــل منها لأنها نادره ..كل من يعرفه غصب عنه يحترمه لأنه بشخصيته يفرض أحترامـه على الجميــع ..بس فيه طبع ســيء عصبيته اللي كانت أستغربها على طبعه الهادي بس بعد ماشفته يدخــن زال الأستغراب ..
خلف :عمي عســاف ..
عساف :هاه هلااا ...
خلف :اللي مأخذ عقلك أنطح فالك اقلط ..
يوووه هذا الغدء شكــلي أبحرت بأفكـــاري بعيد بعيد بعيد ..