ديوان سعود الدهيمي

قصيده موجهه للشاعر مبـارك ابـن عيينـان

مني علي البث المباشـر للهناديـب اجتمـاع
جلسة تصارح مغلقه ماحد(ن)يعرف اسرارهـا
تنتـج قصيـده فالمجالـس ماتمـل الاستمـاع
تنقال لامـارت شواعيـر العـرب باشعارهـا
وانا لياجيت النداوي جيـت قـدر المستطـاع
باجزل قصيده للرجال اهل العقـول اختارهـا
اتعب عليها قبل تنهش مـن مناويـب السبـاع
واديرهـا منـا ومنـا ليـن ازيـح ستارهـا
حتى تجي مثل الهنوف اللي نواعسها وسـاع
والزين تزهابه من اعلاها لـروس اظفارهـا
واليا استـوت قدمتهـا تقديـر والدنيـا متـاع
للـي لياجتلـه يقدرهـا عـلـى مقـدارهـا
اهل العقول من القصيد اللي بلامعنـى شبـاع
ياوين تلقـى لـك قصيـده تستحـل افكارهـا
مثل مبارك مايجي الا فـي منازيـل الرفـاع
رجـلاً يميزهـا ويعـرف سرهـا وجهارهـا
ابو محمد لاطرق قافه صعيب القـاف طـاع
قدامـه القيفـان لاغنـا تــدق ازوارهــا
يالهاجري ماللسفينه فالبحـر غيـر الشـراع
ولاتاصـل المـاد البعيـد الا بيـد بحـارهـا
ونا بدوي وافرح بطيب البدو في كـل البقـاع
البدو اراسلها وترسل لـي واحـب اشوارهـا
لاكن طرالي ماطرالي فالصحـاح وفالوجـاع
وارسلتها لـك وانـت ماتخفـاك يابيطارهـا
لاواحسوفه بكرتي راحت وهي وقـم الربـاع
وردتها للمـا لكـن افلسـت مـن مصدارهـا
وسمتها بالمطرقين اللي علـى حيـد الـذراع
واليوم راس الحول ماحتى سمعـت اذكارهـا
انشدك عنها وانت مالك ذنب واللي ضاع ضاع
لاكـن اظنـك يامبـارك سامـع ٍ باخبارهـا
هاك الليالي يوم كـان العلـم يشـرى مايبـاع
مرتكـم البكـره وشفتـوا فالتـراب اثارهـا
وانا تراني يامبارك محتمـل ذنـب الضيـاع
ياليتـنـي جودتـهـا بقيـادهـا وهجـارهـا
مير الليالي يامبـارك كـان ماطاعـت تطـاع
والعاقل اللي غلطته ينحـاش عـن تكرارهـا
لاوميت بالكف اليمين اعني تحيـات الـوداااع
وانا خلاص اوميـت للـي ماتلـد انظارهـا
تحسب خساره والخطا كله على خـط الدفـاع
ماتعرض السلعه على اللي مايعرف اسعارهـا
وصلت بالفكر الرزين اقصى حدود الاقتنـاع
فاللي تعب مدخالها اهون من تعب مظهارهـا
والثانيه حصنتها مثـل الحصـون ام القـلاع
مـاودي انـه كـل واحـد ينتبـه لاسرارهـا

*********
وسلامتك وسلامة الاخوان والاخـوات كلهـم
المطرقين وسـم قبيلـة الدهمه(للعلـم فقـط)