 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
|
|
#1
08-04-2011
|
||||||||||||||||||||||||||||||||
|
||||||||||||||||||||||||||||||||
في بيت قوم سعيد
سعيد دخل البيت و ماسك غلا من ايدها ام سعيد: السلام لله سعيد: السلام عليكم و عقب كمل طريجه ام سعيد: على وين سعيد لف صوبها: رايح انوم غلا ام سعيد: ليش بعدها بزر يعني سعيد: اماية انا مب فايج للمشاكل ام سعيد: يعني انا راعية مشاكل سعيد: لا حول لا و قوة الا بالله ام سعيد: ما ادري عنك سعيد: اماية انتي ليش تكبرين الامور ام سعيد: انا ما كبرت الامور انت اللي تييب لعمرك المشاكل تراني قلتلك خلى هالمعوقة بالمستشفى و انت رفضت تراها ويه نحس من دخلت هالبيت و المشاكل تتحاذف فوق روسنا سعيد: و الله اني سكت عنكم وايد مب لشي الا لاني احترمج و ما ابغي ارفع صوتي عليج ام سعيد: تبغي ترفع صوتك علي على اخر العمر سعيد: استغفر الله كيف تفسرين كلامي على كيفج يا اماية يا حبيبتي تراني تعبان و مب متفيج لشي اللحين ام سعيد: عيل فايج للسم اللي ماسكها سعيد: عيب يا اماية عيب هالكلام تراها بني ادمية و تفهم الكلام ام سعيد: انا ما عليه منها راعية المشاكل سعيد: الله يسامحج اللحين هي راعية المشاكل و لا انتي و شيخه على اللي سويتوه اليوم ام سعيد: نحن ما سوينا شي غلط سعيد: قافلين على غلا الباب و لا عاطينها اكلها و لا حتى دواها و فوق كل هذا طردتي ظبية من البيت ام سعيد بحقد: تولي هالخقاقة بستين الف داهية انا مب ناقصتنها ببيتي و اصلا انا ما اتشرف فيها سعيد: الله ما يرضى بالظلم يا اماية اللحين هذي يزاتها المسجينه يايه تطمن على غلا ام سعيد: و الله اللي هي و ابوها سووه فينا بعد مب شوية سعيد: انسي الماضي يا اماية و عيشي يومج مرتاحه ام سعيد بحقد: عمري ما راح انسى الطرده اللي طردونا فيها و عمري ما راح انسى اهانتهم لي و هذي ام فهد العقربه مسوية روحها خايفة على بنتي و يايه تزورها بالمستشفى انا ادريبها اصلا هي ياية تتشمت فينا انا و بنتي حسبي الله عليها سعيد: لا اله الا الله الله يهديج يا اماية الله يهديج ام سعيد: و اسمعني هذي المعوقة انا مب نشاده عنها اخدمها هني ببيتي و لا ابغي خدامتي تشتغل حقها فييب لها شغاله خاصة فيها و فكني منها سعيد: هذا اللي بسويه جريب و ان شاء الله بييب لها مربية خاصة تعتني فيها لكن يا اماية بقولج كلام و سامحيني اذا عصب فيج ام سعيد: قووول سعيد: غلا هي الوريد بالنسبالي فاي حد يجيسها بالضر و الله ثم و الله لاتصرف معاكم تصرف ثاني لأن هذي طيرة من طيور الجنة و ابوي الله يرحمه وصانا عليها قبل لا يموت و عقب راح سعيد و هو متضايج من امه و خذ غلا و رقدها بحجرته معاه عسب يضمن محد يأذيها عند جاسم و أحمد قاعدين بالكوفي شوب جاسم: تصدق يا ريال خاطري يكون معاي عزبة احمد: هيه و الله حلاتها العزبة و خصوصا بوقت الشتا جاسم: شرايك نعزم و نسويلنا عزبة احمد: و الله الشور شورك يالغالي جاسم: الا تعال محمد باجر الساعة جم بيسافر احمد: بيسافر بوقت المغرب جاسم: حليله الله يوفقه يا رب احمد ابتسم: آمين الله يسمع منك جاسم: تذكر انا و انت لما خلصنا الثانوية حليلنا و لا حتى فكرنا بالسفر على طووول دخلنا كلية الشرطة احمد: ههه احسن لنا يا ريال بدال الدراسة بالخارج احس صعب فراق الاهل و هناك تحس بالوحشة جاسم: هيه و الله صدقت و ما تعرف حتى وين تروح لكن الحلو فيه انه يعلمك المسؤولية و الاعتماد على النفس احمد: اقول اليوم رطوبة اكثر عن البارحه جاسم: الله يعينا على جو الامارات المتقلب احمد: و حليلهم هالاجانب تشوفهم ببلادنا اربع و عشرين ساعه يدورون على الشمس و نحن يا نسافر بالخارج نشرد عن الشمس و لا ننحبس عند المكيفات من زووود الحر جاسم: ههههه يالله تعودنا الا اقول بو شهاب احمد: قول الغالي اسمعك جاسم: ما قررت تتزوج احمد ابتسم: امبلا طال عمرك لكن اتريا الامور تستقر جاسم: اي امور احمد: بتريا الين ما يخلص عرس مها و يمكن افاتح امي بالموضوع جاسم: ليش هي ما تدري انك تبا ميره احمد: امبلا تدري لكن انا قلتلها يوم بشوف الوقت المناسب بيي لها و بقول لها ابغي كل شي رسمي جاسم: و ميره ما بتكمل دراستها احمد: هي قالت بتكمل ما ادري عاد ان غيرت رايها بس اتصدق احسن لو ما تكمل لاني عقب مسستحيل اخليها تشتغل لآني ابغيها تربي العيال و تهتم بامور البيت جاسم: الله عليك يا بو شهاب فذمتي انك ما تستاهل الا كل خير احمد: و انت بعد ما تستاهل الا كل خير و انا بدونك ما اسوى شي جاسم: عسى ما يفرقنا غير الموت احمد: هيه و الله جاسم: انزين تعال عيل لازم تبدا تبنى البيت احمد: يمكن ابدى فيه على شهر 9 او 10 و اللحين نحن جريب بندخل شهر 8 يعني ما باقي وايد وقت جاسم: ممم انا متأكد 100% انك راح تخلي بيتك بسيط و تراثي احمد: هههههه أكيـــــــــد بس ان شاء الله يعجب ميره جاسم: مدام ذوقك فتاكد ان راح يعجبها يا ربيعهم حميد لهم ( لو تذكرونه انا ذكرته بالجزء الاول لما كان مع جاسم بصحاري يوم شافوا ميره ) حميد: حيــــــــهم الربـــع جاسم و احمد: الله يحيييييييك جاسم: يالله عنبـــــــــــو كل هذا رقاد حميد: هههههه شسوي يا بوك تحيدوني كسوووول و احب النوووم احمد: دب و كسووول الله يعين اهلك عليك حميد: هههه خسك الله كان انا دب احمد: جد يبالك رجيم ( يتمصخر على حميد لانه ضعيف ) جاسم: ما يحتاي عاده بروحه معصقل حميد: والله اني اكل وايد بس ما يبين فيني جاسم: اسميك محظوظ حميد: عيل وين حمدان جاسم: ما بيي اليوم شكله مشغول حميد: و يا ويهه اتصل له و ما يرد علي علموووه يسوي طاااف جاسم: ههه هذا طبع حمدان و عقب تموا يسولفون مع بعض في اليوم التالي الصبــح 9:00 ام سالم ادقدق الباب على ريم ام سالم: هـــــــــــي قـــومي سويلي قهـــــــــوة ابي قــــــــــــهوة ريم : اففففففففففففففف منها يعلها.... ( و سارت عقب تفتح الباب ) ام سالم تروعت من شكل ريم ريم: نـــــــــــــــــعم حضرتج داقة علي البـــــــــــــاب من صباح اللــــــــه خير شتــــبين ام سالم: انتي خــــــدامتي لازم تسمعين الكلام و لا بكنسلج و اسفرج بلادج ( مصره على ان ريم خدامتها بحجة ان لون شعرها اصفر ) ريم: يا بنت الناااااااااس روووحــــــــــي نامي و لا و الله ما تشوفين خيـــــــــــر مني ام سالم: عبدالله بالخير هني وينه ما اشوفه ريم: اففففففففف اللهم طولج يا رووح ام سالم: الله خذ رووح منو ريم: عسى الله ياخذ روحج قولي امين ام سالم بدون ما تفطن: آميــــن ريم: و اللحين يــــــــــلااااااا جلــــبي ويهج ( و تسكر الباب بويهها ) ام سالم ردت تدقدق عليها الباب: فتحــــــــــي الباب يا الصـــــــــــفره ابي قهــــــوة اقـــولج افتحي الباب ريم تفتح الباب بقوة و تصرخ بقو: ســــــــيري ذلفــــــــــــــي عن ويــــــــــــهي ذبحتـــــــــــــينا بالقهوه ام سالم قالت بعفوية و حطت ادها على خشمها: سكري حلجج الريحــــــــه جنها بـــالوعه خسج الله ( اكرمكم الله ) ريم تقفطت و سكرت الباب بسرعه ام سالم سارت تتحرطم فاطمة توها كانت واعية و قاعده على الكرسي و ماسكة بطنها اللي تحس شوي بالعوار فيه فاطمة: صباح الخيــر عمتي ( ترمسها عربي ) ام سالم: هـــاااه شتقولين فاطمة ابتسمت بالخفيف: كيف اصبحتي اليوم ام سالم : ابي قــــــــهوه فاطمة: هههه حاضر اللحين بسير اسويلج قهوه و سارت فاطمة تسوي القهوه و سارت وراها ام سالم ام سالم تطالع فاطمة: بنتي انتي ليش ترمسينا مقطع فاطمة: لان اصلي اجنبية ام سالم: من هالحمر يعني فاطمة ما فهمت ام سالم: انزين متى بتولدين فاطمة: بعد شهرين ان شاء الله ام سالم: واعليه عليج جنج الا بتييبين اربعه على هالبطن المنفوخ فاطمة: هههه انا حامل بتوام ام سالم: هيه بتولدين بمستشفى توام بالعين فاطمة: لا لا مب مستشفى انا اقصد اني حامل بتوام ام سالم: منوو حامل فاطمة مقدرة عمتها يوم تخرف فتراعيها و تتقبلها برحب صدر: انا حامل ام سالم: حليلج الله يقومج بالسلامة فاطمة حست بآلام فظيـــعة و ما قدرت تستحمل فطاحت على الارض و هي تتويع و تصارخ من شدة الألم ام سالم سارت حليلها و نادت على ريم و سالم يفزعوا بفاطمة على المستشفى في بيت ام ريم ناصر: يا حبيبتي يا بسومه بلاج صايرة جيه جبريت ما تتفاهمين موول ام ريم: من اللي اشوفه فيك موول صاير ما تقعد بالبيت عندي دقيقة وحده وين تسير ما اعرف ناصر: تراني قلتلج فديتج عندي وايد اشغال بالشركة ام ريم: ناصر لا تجذب علي انا كنت اسال عنك و يقولولي محد انت وين اتسير ناصر: افا بسومتي تسألين من وراي ام ريم ربعت ايدها: انت اللي تحدني على هالشي ناصر: انا يوم اكون برى الشركة اسير اقضي اشغالها و هذا غير الاجتماعات اللي عندي و غير الزيارات مع الوفد الاجنبي رن تلفون ناصر و شاف رقم سارة ناصر: الو سارة: انت وينك ساعه الين ما ترد علي ناصر: احم مشغول سارة: ايــهي لا تقـــــــولي قاعد مع هالساحره ناصر: ايه سارة: بسرعه خلص منها و تعالي ابغاك ضروري ناصر: خلاص تامر امر و عقب سكر عنها ام ريم معقده حياتها: منو هذا ناصر: هذا واحد من الربع يباني اروحله ضروري ام ريم: اففف ردينا ناصر: ايه حبيبتي لازم اروحله طايح بمشكله و لازم اوقف يمه و اساعده ام ريم: روح بس لا تتأخر ناصر ابتسم بتصنع: ان شاء الله يا بعد عمري و عقب ما راح ناصر لسارة سارة: ساعه الين ما اتي ساعه ناصر: فديتج انا شسوي هالنسرة ناشبة لي بالبلعوم مب راضية تفج عني سارة: المهم اسمعني اللحين عدل ناصر: آمري يا روح روحـــي سارة: التوكيـــل لازم اليوم قبل باجر تحصله منها ناصر: هذي صعبة شوي حبيبتي سارة: ناصر انت وعدتني قبل زواجنا و قلتلي انك راح تقنعها بالتوكيل و راح تسجل الشركة باسمي و تخليني انا راعية الحلال كله ناصر: خلاص باقرب وقت راح تحصلين كل اللي طلبتيه جم سارة انا عندي سارة: كل مرة تقول جيه و انا ما اشوفك تتحرك و تتصرف ناصر: لا لا اوعدج هالمرة جريب اتصرف في بيت بوفيصل طبعا مثل ما انتو عارفين ان اللحين بوزينب و ام زينب يسكنون ببيت بوفيصل بو زينب: تسلمين على هالفطور الطيب يا ام فيصل ام فيصل: ام زينب هي اللي ما قصرت يت و ساعدتني بالمطبخ مع اني قايله لها ما تمس شي انتو اهل البيت و نحن المفروض اللي نخدمكم ام زينب: فديت قلبج يا ام فيصل فيج الخير و الله بو فيصل يا عندهم: صبحكم الله بالخير الكل: صبحك الله بالنور ام فيصل: اصبلك شاي و لا عصير بو فيصل: صبيلي شاي احمر ام فيصل:ان شاء الله صبتله الشاي و عطته مسك بوفيصل الشاي و قال: عيل وينه حمدان من امس انا مب شايفنه ام فيصل: و الله ما ادري شقولك يا بوفيصل ما ادري شفيه حمدان كله مهموم و اذا حد كلمه يتواجع معاه بو فيصل: روحي ناديه خليه يفطر معانا ام فيصل: ناديته قبل شوي قال بيسبح و بينزل بوفيصل: الا فيصل تجهز للسفر و لا بعده ام فيصل: هيه تجهز هو مرته و الله انا الود ودي يا ام زينب انتو و زوجج ما تروحون عسب ما تتعبون كفاية انكم قايمين بالواجب معاه من البداية ام زينب: لا الغالية نحن ما بينا هالكلام و بعدين عبدالعزيز فديته ولد الغالية الله يرحمها الكل: الله يرحمها بو زينب: و واجبنا نوقف معاه الين ما يتشافى ان شاء الله ام زينب: و الله يا جماعة الخير انا متفائلة و يا رب الله يشفيه من هالمرض الخبيث اعوذ بالله منه ام فيصل: حتى عبدالعزيز صاير يلد على عظم هامني وايد بس نحن لازم نصبر عسب نلقى الفرج بو زينب اللي كان يسبح بالمسباح: يـــلا مدام اليوم بنسافر بيخبرونا هناك كيف حالته و بنرد لكم بخبر نطمنكم نزل حمدان و يا صوبهم حمدان: صباح الخير الكل: صباح النور بو زينب: تعال يا ولدي و كل لك شي من البارح و انت ما اكلت شي حمدان ابتسم: اللحـــين بعوض بالاكل بو فيصل: عيل متى بداوم انت و اخوك حمدان: على العصر ان شاء الله من بعد ما نوصل قوم فيصل للمطار بو فيصل: يالله عيل عن اذنكم انا رايح توصون على شي حمدان: مايامر عليك عدو ام زينب: مب كأنه فيصل هو زوجته تأخرو و لا نزلوا حمدان: قبل ما انزل لمحتهم شكلهم اللحين بينزلون فوق عند ميثة و فيصل ميثة: ما بطول دخيلك وافق فيصل بعناد: قلتلج لا البارحة شايفتهم ميثة: حرام عليك فيصل فيصل: قلتلج البارحه شايفتهم شله تروحين لهم اليوم بعد و قلتلج تراني بوديج تسلمين عليهم قبل ما تسافرين ميثة: بس انا ابغي اقضي آخر وقتي بالامارات يم خواتي فيصل ببرود: خــلاص خلي الدريول يوديج انا مب فايج اوديج ميثة استانست فيصل سبقها و نزل يتريق و عقب راحت وراه حمدان تريق و صعد فوق لدار جاسم حمدان: جســــووم قوم من الرقاد بسك جاسم قام و تسدح: الساعه جم حمدان: اللحين بتي الساعه عشر جاسم: يالله ما ادري ليش اليوم احس بكسل حمدان: قوم يــلا قوم و رانا شغل جاسم: اوووه صح نسيت سالفتك انا حمدان: ما شاء الله عليك يالفالح جاسم: عيل اترياني هني عشر دقايق بسبح و برد حمدان اتسد على السرير الين ما يخلص اخوه بعد 15 دقيقة خلص جاسم حمدان: عنبو ربع ساعه تسبح انا لو منك بخلص بخمس دقايق جاسم: ههه شسوي اليوم تحملني انا بطيئ لاني احس بكسل حمدان: انزين يـــلا نتكلم اللحين بموضوعي جاسم: اول شي قولي فكرت بكلامي حمدان: بصراحه فكرت و اقتنعت بعد بكلامك جاسم: هيه و الله صدقني احسنلك تودر هالعادة و ما تكلم البنات مولية بالفون لأنه حرام حمدان: صدقني يا جاسم انا عرفت غلطتي و فداحت فعلتي و اوعدك اني خلاص بتوب من هالشي جاسم: تصدق اني فرحت لك وايد على هالخطوة حمدان: انزين و النشبة شيووم شسويبها هذي وايد مأذيتني بتلفوناتها حشى لصقة عنزروت جاسم: انت شايفنها من قبـــل حمدان: ما شفتها الا يوم كنت مرقمنها بس جاسم: انزين هي تعرف مكانك و لا عنوان بيتنا حمدان: للاسف هيه تعرف لانها مرة يت عرس ميثة و فيصل جاسم: عيل كنت بقولك تغير رقم فونك لكن الظاهر ما بينفع بهالحالة حمدان: شوف انا راح اغير رقم فوني و افتك بعد من اتصالاتها و اتصالات غيرها و قبل لا اغيره راح اتفاهم معاها و اقول لها تودر تكلمني بالفون جاسم: زين تسوي حمدان: بس انا حاسس بالذنب ليش انها تحبني و انا قاسي عليها و مب معطيها ويه جاسم: مشكلتها هي لانها هي اللي اوهمت عمرها بالحب مع ذلك انت كنت قايل لها انك مب راعي حب و غيره حمدان: مشكله البنات عافان الله محد يعرف لهن جاسم: ههه تقصد منال حمدان: لا تذكرني فيها جاسم: ههه بصراحه انتو الاثنين شخصيتكم كلها عناد و تحبون الغياض ببعض حمدان: غير الموضوع الله يخليك في اليوم التالي في بيت قوم خالد ام خالد: اتصلت بمها اليوم ؟؟ خالد شق الحلج : اكيـــد مكلمنها الصبح و هي اللي موعتني ام خالد: هههه يالله مسرع ما تعودتو على بعض خالد ضحك: ههه انا قايل لها توعيني ابغيها تتاقلم معاي لاني احسها تستحي مني وايد ام خالد: يالله عساني اشوفك دوووم جيه فرحان خالد تنهد: بس شيخه ام خالد: شفيها بعد خالد: اتصل لها من البارحه و هي مسويه طاف و لا ترد علي ام خالد: ايه تراني انا مكلمتنها اليـــوم خالد استغرب: ترد عليج انتي و تحقرني أنا معقول ام خالد: اللي ما تستحي على ويهها متصلة لي الصبح تغثني بكلامها خالد: و الله شقالت ام خالد: خلها مستورة بالقلب تعودت على لسانها خالد: لا حــــول اسميها هالآدمية مابتوب من طولة اللسان ام خالد: أهم شي اللحين تهتم بمرتك اليديدة و بعد ما أوصيك لا تحقر شيخة مول تراك محاسب عليها هي و مها يوم القيامة فحاول تعدل من بينهن خالد تنهد: الله يقدرني على العدل فيما بينهن إلا أنا ندمت يوم قررت إني اسكن مها هني عندنا المفروض أخليها ببيت بروحها أنا ادري بشيخة بتنكد على مها ام خالد: انت لا تسابق الأحداث،، يمكن عل و عسى فيوم مرتك شيخة تتغير انت شو دراك قوم اللحين و اتصل لها يمكن ترد خالد: ادريبها يا اماية ما بترد يوم بتشوف رقمي ام خالد: عيل خذ تلفوني و اتصل لها أكيد يوم بتشوف رقمي بترد تبا تنكد علي بكلامها اللي يسم الواحد خالد تناول التلفون من ايد امه و اتصل شيخة: نعــــــــــــــــم فيه شــــــــي تبيــــــــــن تقولينه و نسيتـــي تقولينه الصبــــح خالد: اشـــحالج شيخة: خالد خالد: هيه خالد ليش ما تردين علي شيخه: خير شو تبى انته بعد خالد: فيه وحده ترمس زوجها جيه شيخة: و في واحد يتزوج على مرته و يتخلى عنها خالد: أنا ما تخليت عنج شيخة: ايه واضح يالجذاب خالد: أنا جذاب شيخة: جذاب و نص بعد خالد: شيخــــــة عن الغلــــــــــط شيخة: شو بتسوى يعني بتي تضربني تحسبني أخاف منك خالد: تراني أسويها لا تحديني على شي عقب تندمين عليه لكن أنا ساكت عنج بس لأنج حامل شيخة: سوى اللي تبا تسواه ما يهمني شو حسبالك ما اقدر بعد أنا اتصرف خالد: لا حول ولا قوة الا بالله أنا متصل اطمن عليج مب عشان نتضارب شيخة: أنا ما اباك تطمن علي خالد: انتي ليش جيه عسرة شيخة: كيفي خالد: اقول عيل خلي هواج يخرب بيتج و عقب سكر عنها من غير ما يسمع ردها خالد: اففففف من هالحرمة تبط الجبد حط التلفون على الطاولة و راح لغرفته و هو متضايج ام خالد: لا اله الا الله متى بتعقل هالمرة متى في بيت قوم ريم راشد اتصل لريم ريم: الو راشد: اهلين انتي وينج فيه ريم: انا بالبيت راشد: ضروري اتيني اللحين ريم: على وين بعد راشد: على المريخ بعد وين بالفلة ريم: شتبي بعد راشد: اشفيج انتي اليوم ريم: مالي بال لاي شي احس بخنقة راشد: ما يهمني المهم عندي اتيين بسرعه لا تتاخرين ريم: اوكي اوكي يايه بعد ربع ساعه سكر عنها راشد و عقب قامت ريم تتلبس ريم " يالله بالستر من يوم ما ذيج طاحت بالمستشفى و البيت فاضي محد عندنا يطبخ يوعانه حدي و لا اقول بخطف المطعم باكلي شي و عقب بروح لراشد " و بعد نص ساعة كانت ريم عند راشد ريم مبتسمة: ســــلاااام راشد بنص عين: غريبة توج مالج نفس تكلمين احد ريم: ههه لا بس كنت يوعانه و اللحين كلت و شبعت و مروقة على الاخيــــــر ( قالت اخر كلمة بمد الياء ) راشد: انزين مدام المود متفتح عندج عيل سمعيني ريم: قول اسمعك راشد: اليــــوم رآح ننفذ الخطة ريم ابتسمت بخبث: مصر على مهره خلاص راشد: ايه مصر ريم: انزين ما تبي بعد ميره وراها راشد: لا ما ابغي حد من عقب مهره ريم: انزين قولي اليوم على الساعة جم تبيها راشد: شوفي اللي يريحج بس أهم شي تكون عندي الليلة ريم: خلاص مثل ما تحب راشد: شوفي قوليلها ان اليوم عندج حفلة للبنات و لازم تسهرون و تتأخرون شوي ريم: افا عليك من هالناحية لا تخاف مووول هالجذبة اقدر امشيها على هالغبية بكل سهولة راشد: آخ متى بس اتي هاللحظة ريم: ههه لا تستعيل دام انها بتوصلك الليلة راشد: خلاص عيل بتريا و بشوف بس هاه مثل ما قلتلج قبل اوهميها ان بيتي هو بيتج بالاصل و اول ما تنزلينها هني عندي تركيها و روحي برايج ريم: خلاص و لا يهمك كل اللي تامر عليه انا حاضر تبغي شي قبل ما اروح راشد: لا برايج سيري في بيت ام ريم ام ريم انتبهت ان ناصر توه حادر البيت ام ريم محرجة: الحمدلله على السلامة و اخيرا شرفت ناصر: مساء الفل للحلوين ام ريم معصبة: وين كنت من امس ناصر: تراني قايلج ان ربيعي عنده مشكلة و لازم احلها له ام ريم: و هالمشكلة المستعصية خلتك تبات برى البيت ناصر: شسوي عاد طولت المشكلة و تعقدت علينا ام ريم رافعة حاجبها: و من وين لك هالثياب انت البارحة كنت لابس لباس ثاني ناصر: آآ هذا ربيعي عطاني ثياب من عنده جيه تبيني اتم بثيابي يوم كامل ام ريم: ايـــوا ( بدت تصدق جذبته ) ناصر عطاها جيس ام ريم: شو هذا ناصر ابتسم: انتي فتحيه و بتعرفين شو داخله فتحت ام ريم الجيس و ظهرت منه صندوق احمر صغير ام ريم: هذا صندوق ناصر: ايه ادري انه صندوق يلا فتحيه فتحت ام ريم الصندوق و شافت خاتم ام ريم ابتسمت: يـــمحلاتـــــــه تسلــم حبيبي ناصر: عشان تعرفين شقد أحبج أنا ام ريم: يا بعد عمري يا ناصر و الله اني ظلمتك و الظليمة شينة سامحني فديتك ناصر: مسامحج بس على شرط ام ريم: آمر يا بعدي ناصر: اذا تحبيني سويــــلي توكيـــل عام على حلالــــج كامـــل !! ام ريم: توكيل ناصر: ايه توكيل و لا انتي ما تحبيني يعني ام ريم: لا انا احبك الا اموت فيك لكن ناصر: لكن شو ام ريم بتردد: خــلاص حبيبي انت تامر آمر و اللي تباه راح انفذه لك بالحرف الواحد ناصر ابتسم بخبث و فرح وايد لأن عمره ما توقع ان زوجته تكون مقصة هالكثر فهاليوم الكل ودع فيصل و ميثة و بوزينب و زوجته لانهم خلاص راح يسافرون بعص ساعه بالضبط منال سوت مناحة وميثة ما قصرت كملتها زووود و مها و ميره و مهره وصن ميثة تدير بالها على روحها و غير هذا كله ظبية ما نست تنصح ميثاني على زوجها و ولد زوجها و نورة بتشتاق لميثة وايد و ودعتها بالاحضان منال ما شبعت من اختها حتى انها اتصلت لاختها و هي بالمطار ميثة تصيح: هــــــــلا حبيبتي منـــال: ميـــثة خليتيني يوم تزوجتي و اللحين بتسافرين شهور و نحن ما دارين عنج ميثة: لا تصيحيني زود و بعدين انا ان شاء الله راح اتصلج دووم و ما راح اقطع اخباري عنكم و لا تنسين انا رايحه عشان ولد زوجي فديته الله يشفيه ادعيلنا يا منال ادعيلنا منال تمسح دموعها: ان شاء الله من عيوني ما راح انساج من دعواتي ميثة: يلا فديتج هالله هالله بعمرج و ديري بالج على روحج و سلمي على البنات مرة ثانية منال: خلاص فديتج تروحون و تردون بالسلامة ان شاء الله ميثة: الله يحفظج غناتي و عقب سكرت عنها نورة: شـــو هاليـــــوم النحيــــس ظبية: هيه و الله و بعد جم ساعة بيسافر محمد نورة: و الله بفتقده وايــــد مها: يالله نحن نتأمل خير برجعتهم محمد بيرجع لما بالشهادة ان شاء الله و ميثة و زوجها بيردون لنا بخبر شفا ولدهم عبدالعزيز ان شاء الله ظبية: آمين الله يسمع منج فديتج مهره: حتى منصور فديته ما رضى اليوم يهد محمد مووول ميره: هيه الله يعينه على فراق عمه نورة: هيه و الله الله يعينه خصوصا ان محمد ثاني اكثر شخص منصور متعلق فيه من عقب ابوه منال مسهية عنهم و قاعدة تصيح ميره راحت لها: حبيبتي منوول تراها مب رايحه للابد بترجع ان شاء الله بالسلامة منال: بس انا خايفة عليها ميرة: لا تخافين دام فيصل معاها و بعدين هي مب رايحه بروحها رن تلفون مهره فراحت طلعت عنهم تكلم المتصل لها مهره: الو ريم: هلا الســـلام عليكم مهره: و عليكم الســلآآآم اشحالـج الريم ريم: يسرج حالي من صوبج الغالية مهره: أنا الحمدلله بخير و سهاله ريم: اقول اليوم فاضية مهره: ايه كالعاده فاضية ريم: ممم بصراحه انا اليوم عازمتج مهره: على شو ريم: اليوم انا مسوية حفلة و ابيج انتي اول الحاضرين مهره: بصراحه ما اظن اختي الكبيرة اطلع من البيت اليوم ريم: لا حرام عليج اذا ما ييتي راح الغي الحفلة بكبرها مهره: لا شو تلغينها بسببي خلاص بحاول معاها ريم: تراني انا اللي بيي بنفسي و بوصلج مهره: لا عقب بتعبج ريم: تعبج راحه فديتج مهره: على الساعه جم تبيني اكون جاهزة ريم: على الساعه 9 ها شو قلتي مهره: و متى بتخلص الحفلة ريم: ممم تقريبا على الساعه 2 مهره: شو الساعه ثنتين وايد الوقت متاخر خواتي مستحيل يوافقون ريم: عفية عشاني حاولي تقنعينهم مهره: بس صعبة وايد ريم: قوليلهم ان هالحفلة كلهل بنات و انا بنفسي راح ارجعج البيت مهره: صدقيني مها بتكون اول الرافضين دام السالفة فيها سهره لساعه ثنتين ريم: خـــلاص أنا زعلت منج ( بالطقاق ازعلي يالشرانية ) مهره: انزين شقول لمها ريم: قوليلها بس هالمرة عشاني عفية مهره: انزين ما يصير تخلينها الين الساعه 12 ريم: خلاص اوكي اللي يريحج مهره: اذا جيه احتمال مها توافق ريم: خلاص كلميها و رديني بخبر يالله باااي مهره: الله يحفظج راحت مهره لمها و يالله يالله اقتنعت و وافقت و عقب طرشت مهره مسج لريم تقول لها ان مها وافقت و طبعا مهره ما قالت لميره ان الحفلة بتكون من ريم عسب ما تقوم الدنيا فوق راسها.. على المغرب تقريبا خلاص حان موعد سفر محمد محمد: بس يا اماية بس غرقتينا بيتنا صار بحر ام فهد تكمل صياح و لا عليها: كلمني كل يوم و لا تقطعني و اهتم بنفسك عدل محمد حب راسها للمرة الالف: ان شاء الله كلامج أوامر شو تبين بعد فهد: عشانك انته اقنعتني اتم عندك اسبوع و عقب اروح ام فهد: ايه تم هناك عنده فترة الين ما تستقر اوضاعه و لا تهده مووول محمد: بـس بصراحه فاجأتني أمس لما قلتلي انك انت و منصور بتسافرون معاي لمدة اسبوع و هالطمة ( طق براس منصور ) ما قالي انكم بتسافرون معاي منصور: آآآخ انا ما كنت أعرف فهد: هههه فديت ولدي أنا حبيت اسويها لك مفاجأة حبيبي و عقب نزل فهد على مستوى ولده و باسه على خده منصور: ابوي أنا خلاص قررت فهد: شو قررت فديتك منصور: أنا بدرس بالخارج مثل عمي محمد أبا استوي دكتور جراحة مثله فهد: هههههههههه انته بعدك صغيرون منصور: ابوي لا تفضحنا و تقول صغيرون انا كبير فديتني محمد: و يتفدا عمره بعد ههه ام فهد: فديتكم يا عيالي الله لا يحرمني منكم ( و زاد صياحها ) محمد: هههه بدى الفلم المكسيكي فهد لوى على امه: ههه فديت روحج هو رايح يدرس مب رايح يحارب عسب تخافين هالكثر ام فهد: بغصب عني احاتي يا ولدي محمد: يمكن هناك بعد اظوي على وحده مزيونة و اعيل هناك ام فهد عصبت: شـــــــــــو هذا اللــي ناقص بعد تتزوج لي وحده من هالمفاصيــــــخ و الله بزوالك كان سويتها الكل: ههههههههههههههههههههههههههه محمد: يالله أنا أسولف هههههه و انا يوم بظوي بظوي اماراتية فديت بنات البلاد فذمتي محد يسواهن يا بوفهد و بو فيصل بوفهد: يـــلا جاهزين محمد: هيه جاهزين بو فهد: يــلا ركبو السيارة بنوصلكم المطار اللحين بوفيصل: الجوازات عندكم ما نسيتوهم محمد: هيه عمي موجودة عند فهد كل البنات نزلن و اولهن نورة و سارن يسلمن على فهد و منصور و محمد و احمد محد بالدوام بس اتصل لاخوه و ودعه و لا تتخبرون عن ام فهد مسوية مناحه بالبيت و ام فيصل من الصوب الثاني بعد مسوية مناحه على حفيدها عزوز كـــــــــــــ Stop ــــــــــــت خلص البارت و الأحداث الياية تحمل الكثير من المفاجآت حانت ساعة الصفر و بدت نهاية مهره على يد راشد !! الخطر محيط بشيخة بيصير شي يهدمها غير زواج زوجها عليها !! أم ريم بتنصعق من حقائق يديدة بتنهل عليها !! حمدان و منال و بعدين معاهم لوين يبون يوصلون !! ميثة و فيصل علاقتهم صارت غير مترابطة شو اللي راح يربطهم !! فاطمة ( نورما ) شفيها بالمستشفى و بعدها ما ولدت !! 
|
|
| مواقع النشر (المفضلة) |
| الكلمات الدلالية (Tags) |
| مايرحم, يتامي |
| الذين يشاهدون محتوى الموضوع الآن : 2 ( الأعضاء 0 والزوار 2) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| الديوان المكتوب للشاعر / محمد بن فطيس المري "المقروءهـ" المكتوبه | نادر الوجود | …»●[دواويــن الشعــراء والشاعرات المقرؤهـ المسموعهــ]●«… | 23 | 07-03-2011 11:22 PM |
| العين والرؤيا ... موضوع طبي شامل . | البرق النجدي | …»●[لكل داء دواء ولبــدنكـ عليكـ حق]●«… | 6 | 03-16-2009 12:04 AM |
| ااسماء الله الحسنى | ضحكة خجوله | …»●[ أرواح أيمـــانيـــه ]●«… | 8 | 01-22-2009 07:13 PM |
| موسوعه قصايد ليل المعلوماتيه ...؟ | البرق النجدي | …»●[لكل داء دواء ولبــدنكـ عليكـ حق]●«… | 12 | 01-12-2009 07:18 PM |
| ღღسلـــــةفواكـــــــه والخضـــرواتღღ | نادر الوجود | …»●[لكل داء دواء ولبــدنكـ عليكـ حق]●«… | 6 | 12-13-2008 12:43 AM |
 |
العرض المتطور
