ديوان الوبل

قالـوا تحـب النـوادي قلـت لابالله
مانيب اشجّع ولانيب اعشق الكـوره
انا بـدويٍ واحـب النجـر والدلّـه
واحب شوف الدبَش والارض ممطوره
هذي هواياتـي اللـي تبـري العلّـه
ولاشك كلٍ علـى شفـه ومنظـوره
يوم ان راعي المدينـه زيّـن الفِلّـه
والبايكه حطها للجمـس مقصـوره
وجا بالخدم والحشم كلٍ علـى ملّـه
واحد مسيحي والاخـر عابـدٍ ثـوره
الين راحـت زوايـا البيـت محتلّـه
كلٍ علـى مذهبـه ويحـط دستـوره
والوِرع لاولِد قالو ويش نعمـل لـه
امـه تـداوم نهـار وليـل دكتـوره
تـداوي النـاس ثـم تـدوّر الفَلّـه
وماهيب لمقابل الورعـان مجبـوره
هاتوا له مربيّه لاجـاع تفطـن لـه
تعطيه لاقـام تالـي الليـل قـاروره
ثم جا هزيـلٍ وبانـت فالولـد خِلّـه
يصبح ويمسي على اندومي وشابوره
ولاكبر سنـه يهيـن العـوَد ويذلّـه
يقول عـوَدٍ مخـرّف وانتهـى دوره
يالله دخيلك مـن الحقـران والزلّـه
ومقابل اهل الردى بالصوت والصوره
اللي حياته مـع السهـرات والشلّـه
ولابان وجه النهـار مطفـيٍ نـوره
هذاك حطه على يسـراك ثـم زلّـه
ولاتاخذك فيه رحمه واجرح شعـوره
قٌرب الهلايـم يعـل القلـب ويسلّـه
ويحط فالكبـد شـيٍ كنـه باكـوره
الله علـى واديٍ تـو المطـر علّـه
والسيل خلا البطاحـي كنهـا نـوره
جايه من الوسم مطّـار علـى حِلّـه
ستين ليلٍ وهـي ماجفـت زهـوره
مع صحبةٍ نـادره فالمجتمـع كلّـه
مافيهم اللي يشل الكبـر فـي زوره
احسن مـن مقابـل الخـدام والفلّـه
واحسن من مشاهد الجمهور والكوره