ديوان الشاعرة/منتهى القريش

يا خوفي

يا خوفي الغربة تبعدنا
ولا نلقى ... شواطينا

نضيع بزحمة الأيام
تغربنا... خطاوينا

يا خوفي هالألم وياك
يشتتني
تتوه روحي وتتبعثر
من مينا إلى مينا

يجف البحر
والمرسى
سحابة هم تعمينا

يموت الحب
نتذكر...
هنا كانت لنا وقفة
هناك أبعد من النسيان
حفرنا احروف اسامينا

هنا نمنا.. بحضن الهمس
هناك الشمس
حلم يكبر
ربيع اخضر
يزهر بين ايادينا

هنا اشربنا
الفرح كاسات
وكان المر..
مزاجه غير
كنا بخير
هناك احنا
من الأشواق تساقينا

هنا أذكر
بنينا جنة الأحلام
سكناها
مليناها أمل وشموع
نار العشق تشعلنا
نهر حبنا
عجز يقدر يطفينا

هناك اذكر
فتحنا للهوى سيره
وسكرنا
باب الوهم والغيره
تعاهدنا
ننسى اجراح ماضينا

هناك ... تذكر؟
يوم انك
فتحت اجروح قدامي
سحابات الدمع جفت... وأحلامي
صباحاتك مع العتمة
وقلنا هالزمن يقدر
ينسينا مآسينا

هناك بعيييييييييييد
بياض القلب
كان لوحة بليا اغبار
كان الصدق يبروزها
وكان الطهر
يعزف كل أغانينا

هناك اذكر
فتحت الروح بيدينك
وكنت افرح بسكينك
واقول يا جرح ما أحلاك
دام انك بسكينه

هناك اذكر
نزف جرحي على جرحك
كان فرحي صدى فرحك
ولو نتعب من التنهيد
ما نعرف
من الي متعب(ن) فينا

تذكر لما تنزفني
اقول ايش فيني اتوجع
تقولي لا
فديتك يا بعد روحي
أنا الي جرحي يشقينا

تذكر لما أعطش بك
وتعطش بي
اقول اشرب.. بروى بك
قطره وحده تكفينا

بعد ش اذكر
وانا جرحي بدا يكبر
بدا ينزف حروف اسمك
وانا في واحة النسيان مزروعه
وروحي ضايعه تسأل
عن ايامك
هنا وهناك
تتبعثر .. من مينا إلى مينا

يا خوفي الغربه تبعدنا بعد أكثر
نضيع بزحمة الأيام .. نتذكر
سحابة عشقنا الكانت
تبلل كل خطاوينا

وتتكسر
مجاديف الهوى نغرق
ولا نلقى لنا مرسى
تضيعنا شواطينا