رواايــه حقكـ علي ان كنـت زعلان-قمـه الرووووعهـ-

****
*****
(في شقة فراس..)
,,كانت لابسه عباتها وجالسه على طرف الكنبه وهي مصدومه ودموعها على خدها..
,,دخل فراس الشقه وأخذ آخر شنطه من شنط أبرار وقالها:
يللاه خلاص كل شنطك بالسياره..
يللاه تغطي وامشي قدامي..
أبرار برجاء وهي ميته صياح:فراس..
,,يلتفتلها فراس ويناظر فيها..
أبرار: خلاص مصمم..
الله يخليك.. الله يخليك سامحني..
خلني معك فتره وشوف بعينك اشلون أنا تغيرت..
الله يخليك يافراس..لو تخليني خدامه عندك.. إحرمني من دراسه من طلوع من نزول بس الله يخليك لاتطلقني..
أنا أبيك يافراس.. أنا أحبك..
الله يخليك...ســـــــامحني..
فراس بكبرياء:في أشياء ممكن الواحد يسامح فيها يا أبرار..
بس هالشي.. مستحيل..
[بهدوء] خلاص..
قومي يا أبرار..
قومي..
مالك لابالبيت ولا بقلبي مكانه..
توكلي على الله والله يستر عليك.. وتلقين ابن الحلال..
يللاه يا أبرار قومي..
,,ويمشي فراس ويطلع من باب الشقه وهو شايل شنطتها..
وتمشي وراه أبرار وهي منهاره ومحبطه وترتجف وتشاهق من الصياح وتتغطى وتنزل تركب السياره..
***
****
*****
بعد مرور شهر على هالأحداث
""""""""""""""""""""""""""""
(في بيت أم عبدالرحمن...)
,,تحديدآ في المجلس..
..كان موجود عبدالرحمن وتركي وفيصل ومشاري والكل أنظارهم متوجهه لشخص واحد... صــالح..
عبدالرحمن: معليش يا صالح يا ولدي بس أنا مستغرب يعني واحد مثلك شاب وبأول حياتك.. وشيجبرك تاخذ وحده سبقلها الزواج..
صالح: عمي أبوفيصل .. الطلاق موعيب ولاجريمه..
وزي ماسمعتوا إختي أبرار قبل فتره طلقها ولد خالتي.. وانفض الزواج اللي بينهم من دون مشاكل والطرفين راضين لكن السبب علمه عند الله..
وأسيل على حد علمي.. مالها ذنب باللي سار كله..
عبدالرحمن: يعني انت تعرف ان البنت كانت تعبانه..
صالح: انت قلتها بلسانك.. كانت.. والحين الحمدالله هذي هي سليمه..
عبدالرحمن: طب ليش ماجى معاك أبوك؟؟
,,وينزل راسه صالح ويبلع ريقه ويرجع يطالع بعبدالرحمن..
صالح:يا عمي.. أنا جاي هنا اليوم عشان بس أبي آخذ موافقتكم وبعدين أخطب رسمي..
[الكل ساكت]
صالح: عمي عبدالرحمن أنا عارف إني على قد حالي... وللحين أدرس.. والوظيفه اللي أشتغل فيها بعد دوامي الصبح بالجامعه مي لاهناك..
بس يعلم الله إني مستعد أنفذ شروطكم من الألف للياء.. وقد ما أنا متمسك بأسيل قد ما أنا قد كلمتي..
عبدالرحمن: تقدر تدفع مهر بنتي 100000ألف..
,,كل اللي بالمجلس استغرب من طريقة حكي عبدالرحمن لأنها مي من عادته..
صالح باستغراب: لا ما أقدر..
عبدالرحمن: تقدر تسفر بنتي شهر عسل برا؟؟
صالح: لاء..
عبدالرحمن: تقدر تعيشها بالمستوى اللي هي عايشه فيه ومتعوده عليه؟؟
صالح وهو يبلع ريقه: عمي أنا بحاول إني ألبي طلباتها وأعيشها مرتاحه..
بس مولدرجة إنها تعيش عيشه مشابهه لعيشتها معكم..
على حسب قدرتي وظروف..
عبدالرحمن: واللي يقولك إني أنا وبنتي مانبي من كل هالأشياء اللي قلتها لك ولا شي..
صالح: معليش عمي موفاهم قصدك؟؟
عبدالرحمن: قصدي إني ما أبي إلا السعاده لأسيل..
وانك تحبها وتخاف الله فيها..
,,صالح يناظر للكل بنظرات حايره..
عبدالرحمن: شوف ياصالح ياولدي..
أسيل صحيح إنها تعبت ومرضت لكن يعلم الله إنها تحسنت ورجعت زي أول وأحسن..
وإذا فكرت إني أزوج بنتي مارح ألقى أحسن منك ياصالح..
,,ارتسمت على وجه صالح ابتسامه عريضه وحس ان الدنيا مي سايعته من الفرحه..
عبدالرحمن: بس هاه ياصالح...
زي ماقلتلي... هذي الموافقه مبدئيه..إلين يجون أمك وأبوك ويخطبون رسمي ولاننسى راي البنت..
صالح وهو طاير من الفرحه: الله يبشرك بالخير ياعمي..
وتأكد إن أسيل بعيوني.. وأمانه برقبتي مستحيل أضيعها..
,,ويطالع صالح بمشاري ويقول:
وتأكد يا مشاري ان حياتي مالها أي دخل بحياتك إنت ورهف..
والله يقدرني أسعد أسيل...
مشاري بابتسامه: الله يقدم اللي فيه الخير..
,,بعد هاللقاء طلع صالح من بيت أم عبدالرحمن وهو متشقق من الفرحه وحاط إيدينه ورجلينه بمويه بارده من ناحية جية أمه وأبوه عشان يخطبون أسيل ولاهوقلقان أبدآ لأنه يعرف اشلون يقنعهم..
ومن ناحية عبدالرحمن واخوانه وفيصل كانوا حاسين براحه من جهة صالح لأن عيونه وكلامه باين فيها الصدق والصراحه..وكمان مبسوطين إن الله عوض على بنتهم ..
,,,,,
,,,,,
(في غرفة مشاري فوق..)
,,كانت رهف جالسه عالسرير وحاطه جنبها خالد وتلبسه شراباته ..
دخل مشاري وهويناظر لرهف من فوق لتحت ورافع حاجبه..
,,انتبهت رهف لنظراته وقالت: مشاري إشفيك؟؟
مشاري: تدرين من كان عندنا تو؟؟
رهف: لاوالله مادري مين؟؟
مشاري: أخوك صويلح..
رهف باستغراب: صالح..غريبه.. وينه الحين..
مشاري: ذلــــف..
رهف باستغراب: خير يامشاري ليه تتكلم عن صالح كذا..
مشاري وهو منشغل بالسيديات: لاياشيخه.. يعني ماتدرين..
رهف: أدري عن وشو.. مشاري اشفيه؟؟
مشاري:أخوك المحترم يا أم خالد.. جى بكل ثقه يخطب أسيل..
رهف: وشو.. يخطب أسيل..
مشاري: إي إي مثلي يعنني مادري..
رهف: قسمآ بالله يامشاري إني ما أدري.. وبعدين إشفيك معصب ومتقرف ومو عاجبك الوضع..
مشاري بنظرات إستلعان: تتوقعين وش اللي يجبر أخوك ياخذ وحده سبق لها الزواج وكانت تعبانه؟؟
رهف بقهر: أنا داريه إنك تلمح إن أخوي صالح طمعان فيكم..
بس لايامشاري موصالح اللي يستغل ضعف الناس وظروفهم ..هذا أولآ..
ثانيآ أسيل الحمدالله لاسرقت ولاانحاشت ولاسوت شي عيب.. ثالثآ صالح تتمناه كل بنت.. شاب مصلي وحبوب وكريم ويخاف الله..
[وتبلع ريقها رهف لماشافت نظرات مشاري الحاده] وخلاص الزواج مو غصب منتوا موافقين عليه بلغوه.. ماله داعي تعصب وتجي تحقق معاي..
مشاري: بسم الله إشفيك كلتيني بقشوري...
رهف وهي مبتسمه: لا.. بس قهرتني نظراتك وكلامك..
مشاري:يعني تبين تفهميني إنك ماتدرين عن قرار صالح..
رهف وهي ترفع راسها فوق: واللــــــه إني ما أدري...
بس لحظه لحظه.. وأنا أقول ليه أثير كل ماكلمتني دايمآ تسأل عن أسيل خلصت عدتها ولا لآ..
[وسكتت رهف وابتسمت] آه يابخت أسيل لو تاخذ صالح..
مشاري: إلا يبخته هو لو أسيل تفكر فيه مجرد تفكير..
رهف وهي منقهره من أسلوب مشاري: لاااا..
عالعموم الله يقدم اللي فيه الخير للكل..
مشاري بأسلوب ينرفز وهو يتكلم بقرف:
عاد تدرين أخوك صويــــــلح هذا..
[فهاللحظه ناظرت رهف بمشاري بنظره صارمه كلها تهديد لمشاري]
..صويـــــلح هذا إنســــان...
قليله فحقه كلمة رجل ونعم فيه..
مؤدب ومحترم وينشد فيه الظهر..
وإذا أسيل فكرت في الزواج مره ثانيه ما بتلقى أحسن منه.... الله يوفقه ويوفقها ويكتبهم لبعض..
,,بعد كلمة مشاري هذي ناظرت فيه رهف بكل قهر وقالت:
أنا شسوي فيك... شسوي فيك..
إشهالأسلوب...[مشاري يضحك]
ماتنبسط إلا إذا عصبتني ورفعت ضغطي...
اللي يشوفك وانت جاي تعلمني بخبر خطبة صالح لأسيل كنك بتذبحني وتذبحه..
وفجأه تمدحه وتثي عليه..
مشاري:والله يارهف أظنك حفظتي طبعي وعرفتيه.. أسعد لحظات حياتي لارفعت ضغطك..
رهف: لاياشيخ..
مشاري وهو في يده سيدي: أقول رهف..
إنتي تعرفين ترقصين؟؟
رهف وهي مبتسمه باستغراب: حلوه ذي.. وشهالسؤال؟؟
مشاري: طب جاوبي تعرفين ولا لا؟؟
رهف: يعني.. أعرف ..
,,قام مشاري حط السي دي اللي بيده في الإستريو وشغل اغنية (ياحي..)
لحربي العامري..
وقال: يللاه ورينا إبداعاتك..
رهف وهي مطيره عيونها: نعـــــم؟؟
مشاري: خلاص عاد أتوقع إنك تعافيتي وأزين من صحتك مافيه..
يللاه قومي ..
رهف بعصبيه: وين أقوم؟؟
مشاري: هزي.. إرقصي..
رهف وهي تضحك بحياء: لا واللــــــه... مابي..
مشاري: رهف أنا زوجك تستحين مني؟؟
رهف: لا موسالفة حياء بس مابي..
مشاري وهو يحط لسانه على جنب ونظرات اللعانه بعيونه: لااا... طيب يارهف..
,,ويسكر مشاري الإستريو ويلتفت لرهف ويقول:
طب إسمعــــي..
إذا...إذا الله كتب وتم زواج أسيل وصالح... بترقصين بزواجه؟؟
رهف: يبيلها كلام بعد أكيـــــد..
مشاري وهو ينسدح جنب خلودي: أكيــد... أكيــــــــد؟؟
رهف: طبعآ زواج أخوي الوحيد..
مشاري: طب علمن يوصلك ويتعداك...
قسمــــــــــــآ بالله يارهف ماترقصين في زواج صالح..
وإن رقصتي... لاتقعدين عندي بالبيت.. سيده روحي بيت أبوك..
رهف بصدمه: خيـــــر..
مشاري بلعانه: أتوقع سمعتيني..
رهف: مشاري ليه تحلف؟؟
مشاري: ليه أحلف..
الحين أنا زوجك ماتبين ترقصين قدامي.. وقدام صالح وحريم خلق الله عادي ترقصين..
رهف وهي ماتدري إشتقول: مشاري... مشاري.. أأ..أأنا..
مشاري: خلاص يارهف إنتهى الموضوع..
,,سكتت رهف وناظرت بالأرض وهي مقهوره بعدين قالت بنفسها:
يللاه يابنت الحلال ماله داعي تكبرين الموضوع..
,,وتقوم رهف وتشغل السي دي.. ومن حسن الحظ كانت لابسه فستان بيت ناعم أسود سيور..وقصير..
وفكت الشباصه اللي في شعرها وبكل جراءه مشت لعند مشاري وقامت ترقص بكل نعومه قدام مشاري..
..طبعآ مشاري على نفس وضعيته منسدح جنب ولده ولما شاف رهف ترقص..
عدل جلسته وقعد على طرف السرير وهو مبتسم وتحمس وجلس يحيي رهف ويقولها عاشو ويطق إصبع..
ومع تفاعل مشاري مدت رهف يدها وسحبته وقومته معها وهو مايحتاج على طول تحمس وقام يرقص أكثر من رهف وبحماس إلين حمر وجهه..مع إنه شوي يعرج..
,,وبعد شوط الرقص الساخن دنق مشاري على رهف ولمها بين إيدينه وهوطاير من الفرحه ويضحك ورهف ميته ضحك..
وفجأه رهف أشرت لمشاري ولفت وجهه عشان يشوف خالد..
,,وعلى طول أول ماطاحت عيون مشاري على خلودي مات ضحك وضرب كف بكف..
كان خالد طايره عيونه ويناظر بأمه وأبوه وهو مايدري وشالسالفه مثل الأطرش في الزفه ومايصدر أي حركه ومتنح...
قام مشاري شال خالد وهو ورهف يضحكون وقاموا يرقصونه معاهم ويضحكون..
,,وبعد هالرقص والضحك والوناسه جلس مشاري وهو يقول:
آآآآه يارجلي.. ياحليلك يارهف والله إنك رقاصه..
رهف وهي تاخذ خالد: وانت بعد ماشالله عليك.. الظاهر إنك مخذ كورسات في الرقص..
,,بعدين قالت رهف بغنج:
ها مشاري خلاص هونت من حلفانك..
مشاري: هااه... أفــــــكر..
رهف: مشاري تكفى أنا بطلع الكفاره عن حلفانك هذا.. بس تكفى والله ماعندي إلا هالصالح أخوي الوحيد ما أرقص بزواجه..
مشاري: على شرط..
كل يوم ترقصينلي ساعتين متواصلتين..
رهف بقهر: أقووول.. روح..
والله لو إني روبي على غفله...
,, وتستمر سهرة مشاري ورهف وهم يضحكون ويمزحون مع بعض..
***
****
*****
(في بيت أبوصالح..)
صالح: إنتم أحــــــرار..
أنا حلفت لزوجتك وفهمتها إنكم لوماتروحون معي وتخطبونها والله والله ماعاد تشوفون وجهي.
وانتي يمه تعرفيني إذا حلفت وطلعت من البيت..
سلطان: إنت ماتفهم ...
توك بزر ويوم فكرت بالزواج تاخذ مطلقه..
وبنت مين بنت أعدائي..
صالح: الحمدالله رب العالمين.. الله لايبلينا.. من عاداك ومن قرب منك..
الناس محترمينك وحاطينك فوق الراس وماحد جى جنبك..
لكن هذي عادتك ماتخلي لك صاحب... وكل الناس أعدائك...
وبعدين تعال هنا.. وشفيها المطلقه.. هذي هي أبراربنتك مطلقه..
يعني لويتقدملها شاب مابعد تزوج مابترضى..
,,هنا أبرار نزلت راسها وعيونها مليانه دموع وتحس كأن أحد يعصر قلبها..
منيره: الحين ياولدي ورى ماتفكر وتتروى..
صالح: لاخلاص فكرت بما فيه الكفايه..ها إشقلتوا..
وبعدين خلاص ترى رفعتوا ضغطي.. يومين وأنا أحاول فيكم والليله أبي الكلمه الأخيره.. ها تجون معي ولا لآ..
أبرا بصوت مبحوح ووجهها كله ألم واللي يشوفها يقول مستحيل هذي أبرار:
يبـــه..يمه..
تكفون خلاص.. ليه بكل سالفة زواج تعارضون وتتمشكلون..
صالح يبيها ومتمسك فيها ليش تمانعون وتحرمونه من اللي يحبها..
ليش تكسرون قلبه وتقهرونه... ليش ماترتاحون إذا أحد منا كان سعيد..
خلاص زوجوه أسيل..
مارح يلقى أحسن منها.. سواء كانت بنت ولامطلقه..
مومهم.. المهم يعيشون مع بعض طول العمر وهم سعيدين..
,,وتنهار أبرار وتحط يدها على عيونها وتجلس تبكي..
الكل جلس يناظر ببعض وهو موفاهم شي...ومومصدق إن هالإنسانه المنهاره..أبرار..
أثير: يمه.. يبه والله أبرار صادقه بكل كلمه قالتها ..خلاص ليش التعقيد والمشاكل..
صالح وهو يناظر بأمه وأبوه بتحدي: ها اشقلتوا..
سلطان ولأول مره بحياته يقرر من غير راي منيره:
صـــالح.. دق على أبوفيصل وحدد موعد.. وأنا وياك بنروح ونخطبها..
,,الكل انبسط وطار من الفرحه وأبرار رفعت راسها ومسحت دموعها وهي مبسوطه...
صالح وهو مبتسم: بس هااه..
أنا أعرفك يبه لارحنا خطبناها مابي كلام طالع نازل.. ومهما تشرطوا ولاغلوا المهر لاتعلق أنا رجال وأعرف اشلون أطلع نفسي بين الرجال..
سلطان بدون اهتمام: أبد أضمنلك إني ما أخرب عليك ولا أقول ولاشي..
بس هااه.. إنت تتحمل زواجك من الألف للياء لاتطلبني ولاريال ماعندي..
صالح: لاتخاف مانيبطالبك ريال واحد..
***
****
*****
,,بعد ثلاثة أيام من هالأحداث..
راح صالح وأبوه سلطان وخطبوا أسيل رسمي..
وبعد أسبوع من إقناع أسيل تمت الموافقه .. وتحدد الزواج بعد ثلاثة شهور..
وحددوا إن الزواج عائلي..في منزل أم عبدالرحمن..
والكل فرحان لها من أهلها وحتى أهل صالح فرحانين باستثناء الأم والأب..
وحتى أبرار...كلمت أسيل وباركتلها..
وكلمت رهف بعد قطاعه زادت عن سنه بينهم وباركتلها بخالد..
***
****
*****
(في بيت أم عبدالرحمن..)
,,تحديدآ بغرفة رهف..
,,,,الساعه 12,30 الليل..
دخل مشاري الغرفه وهو يغني وسكر الباب.. وأول ما التفت وناظر الغرفه تنح..
مشاري وهوفاتح فمه:الظاهر إني غلطان بالغرفه...
وشهالزين؟؟
رهف: أووصص...
لاتعلي صوتك ترى ماصدقت ينام..
,,كانت رهف جالسه على مقدمة السرير ولابسه قميص نوم أحمر قطعتين..
وفاله شعرها وحاطه ميك أب خفيف..
وناثره على السرير أوراق ورود.. والشموع والفواحات معبيه المكان..
مشاري:وش عندك.. اليوم ذكرى زواجنا..
رهف: هاهاا..
يوم ذكرى زواجنا أنا كنت بالمستشفى بغيبوبه..
مشاري وهو يجلس جنب رهف: أجل وشو..
رهف: مشاري حبيبي ترى زواجنا ما انتهى عشان تقول ذكرى..
وبعدين لازم يسير فيه مناسبه عشان نسهر مع بعض..
مشاري: الله لايحرمني منك..[ويجي مشاري يلم رهف لكن رهف فزت بسرعه وقالت]
رهف: مشاري..قبل أي شي..أبيك تقبل مني هالورد..
,,وتعطي رهف مشاري باقة ورد كبيره جدآ كل الورود اللي فيها حمراء..
وكان معلق بالتل والشرايط الساتان اللي مغلفه الباقه السي دي اللي زينته أسماء لرهف..
بس كان مغلف بنفس التل اللي مغلف الباقه..
مشاري: اللــــــه...تسلم الأيادي..
ياحلوها هالباقه من جد ذوووق..[وينتبه مشاري للسي دي ويبتسم ويمثل إنه متفاجئ]
مشاري: إش هذا؟؟
رهف: فكه وشوف إشهذا؟؟
,,ويفك مشاري التغليفه اللي مغلفه علبة السي دي..
ويقول: سي دي؟؟
رهف: إيه..
مشاري: وشفيه هالسي دي.. ترى هااه..
أنا ما أشوف أفلام نص كم...
رهف وهي تضحك: لا السي دي هذا من غير أكمام مره وحده..
مشاري وهو يضحك: لااااا..
رهف: شغله بلاب توبك.. وتعرف وشو..
مشاري: اوكي..
,,ويروح مشاري ويشغل لاب توبه ويحط السي دي فيه ويجلسون هو ورهف عالسرير..
كان السي دي اللي شافه مشاري يجي فوق العشرين مره يشتغل قدامه وهو طول الوقت يمثل إنه مبسوط وفرحان بالعرض اللي قدامه وطول الوقت عين رهف مانزلت من عليه..
وفي آخر العرض جت الشريحه اللي كاتبه فيها رهف كلمتها الأخيره..
,,وكانت رهف تتنفس بسرعه وتطالع بمشاري وعيونها تلمع..
لكن بعد هالشريحه ألأخيره مسك مشاري رهف من خدودها ولف وجهها وخلاها ترجع تطالع بشاشة اللاب توب..
,,تفاجات رهف وطارت عيونها لما لقت شريحه أخيره ثانيه..خلفية هالشريحه صورة من صور خلودي مكتوب فيها..
,,

,,

حبيبي كل مافيني...يذوب بملح همساتك...
حبيبي كل إحاسيسي..
يعشقــــونك...يعشقـــــونك...
حبيبي طالبك تكفى... أبيك لكلك لذاتك..


أبي أكون جنبك مثل ظلــــك...
ولا أبي شي من دونـــــك...

أبسهر في وسط عينـــــك...
وابشرب كاس نظراتك..

وإلى مني بغيت النوم... أبي أنام بعيونك...

وأبي أصحى بكلمة..صباح الخيـــر...بشفاتك...

وأبي فنجال حبك...
والغلا تمده جفــــونك...

وأبي أهيم بك...لامن نثرت عطور كلماتك..

واعيش مقابلك دنيا..
ينورها قمر لونك..

أبي فنك.. وأبي سحرك..
وأبي جذاب بسماتك..

أبسأل: وش كثر حبي؟؟

وأبي منك إجاباتك.. وأبيك تجاوب بضحكه...
معاها هزة متونك..


عشقت الدمع بأحزانك..
عشقتك عند ضحكاتك..
عشقت اللي يعرفونك..


بروحاتك.. وجيــــاتك..
بجياتك... وروحـــــاتك..


أخاف الناس ياعمري..
يصيبونك يحسدونك..

تعااااااال واطلب الغالي..
تعال وهات رغباتك...


فداك اللي تبي آمر... أنا صرت مجنــــــونك..
وإذا ودك أأكد لك..
تعال وشف مساحاتك..

بوسط الخافق اللي لك..حلف لايمكن يخونك..

لك الله صورتك بعيني..تذكرني بجلساتك..
تذكرني واقول:
شلون أعيش أوقاتي بدونك..


تراني لاتباطيتــــك..
أحن لصوت نبراتك...
عسى الله لايخليني بعيــد..

وأعطش دوم لمزونك..
وعساني ماانحرم منك..

لأن عيوني الثنتين..
يحبـــــــــــــونك.....يحبــــــــونك,,,,


,,,الوفي لك طول عمره...
زوجــــك مشــــاري...

,,,,
,,,,
بعد عرض هالشريحه الأخيره..
كانت رهف عيونها مليانه دموع ومو فاهمه شي.. وعينها مانزلت عن شاشة اللاب توب..
رهف: إشـــلوون..
مشاري: أنا أقولك إشلون..
بعد ماطولتي وانتي بالمستشفى حست أسماء إن هالسي دي خانقها وموقادره تستحمل وجوده لسبب بسيط إن صاحبته بين الحياه والموت..
جت أسماء وعطتنياه وبقى معاي... كل يوم أشوفه مره ومرتين وثلاث ..
ويوم الله كتب وأكرمني وقمتي بالسلامه.. زدت على هالعرض هالشريحه إهداء مني لك..
رهف وهي تمسح دموعها: طيب يا أسماء أوريـــــك...
مشاري وهويقلد طريقة رهف بالحكي:
إهيئ..إهيئ...
ياعيني عالرومنسيه اللي إنتي فيها.. بدل ماتمسكيني وتبوسيني..
وأعيش أنا وياك لحظات حلوه قاعده تتحلفين في البنت..
,,رهف تضحك وتمسح دموعها..
مشاري: يعطيك العافيه يارهف..
تسلمي ياقلبي.....والله هالسي دي أحلى هديه جتني..
رهف:وكلمتك الأخيره اللي زدتها عالعرض..
أحلى كلام سمعته بحياتي...
..الله لايحرمني منك يا نورعيني..
,,وتنزل رهف راسها بخجل.. ويقرب منها مشاري وهو مبتسم,,
ويادوبك قرب ولا للأسف الأخ خالد يطلق صافرة الإنذار..
,,وعلى طول فزت رهف وقامت وراحت عند سرير خالد..
هنا مشاري ضرب كف بكف وشبك أصابعه وجلس يناظر فوق..وهوعاض شفته..
,,ويقوم بهدوء ويروح عند رهف اللي كانت واقفه وشايله خالد اللي ميت من الصياح وتهزه على خفيف..
مشاري: عطينياه ..عطينياه..
رهف وهي تعطيه خالد: مدري اشفيه..
مشاري: أنا أقولك إشفيه..
بوديه عند هالمبزره أسيل وأسماء يورونه شغله..ويعرفون إشفيه..هالمدلع..
رهف: لامشاري من جدك..
مشاري: أزعجنا هالنتفه كل يوم يجلس يصيح ويولول هذي حزته..
أنتي مسيكينه تقعدين على طرف السرير إلين الفجر تهزين فيه.. وأنا نايم على آخر السرير وراسي تحت المخده..
رهف برجاء وهي تحاول تاخذ خالد:
لا مشاري تكفى..حرام عليك إشلون تطلعه..
مشاري وهو يعطيها خالد: خذيه..خذيه..
لكن صدقوا طاح كرتي.. حتى ربع ساعه رومانسيه أعيشها معك مافيه..
لكن اسمعي ترى إذا ظلينا على هالحال ماعلي منك انتي وولدك ترى بتزوج..
,,رهف وهي تناظر بمشاري من فوق لتحت:
خل الولد ينام..
وأنا أوريك من اللي بيتزوج..
,,مشاري وهو يتمدد عالسرير ويرفع حاجب ويبتسم على الجنب:
يللاه أستنـــــاك..
***
****
*****
,,,
,,,بعد شهور بسيطه..
""""""""""""""""""""
,,كانت جالسه على طرف الكنبه وبيدها مسكة الورد وبتتشقق من الحياء..
صالح وهويمسكها بحنيه: مبروك يا أسيل..
أسيل: الله يبارك فيك..
صالح: عجبتك الشقه؟؟
أسيل وهي تبلع ريقها: إي حلوه ماشالله..
صالح: أنا داري إنها صغيره ومولاهناك..بس يا أسيل لاتزعـــ....
أسيل وهي تقاطعه بدون خجل: صالح المكان والمظاهر آخر اهتماماتي..
أهم شي إنا إحنا مع بعض..[وتسكت أسيل ويحمر وجهها وينقلب ألوان بعد ماقالت هالكلمه]
صالح: أسيل حبيبتي..تتذكرين أول لقاء بينا..
أسيل وهي مبتسمه: إي أتذكر..
صالح: التنوره هذيك للحين عندك؟؟
أسيل باستغراب: إيه..
صالح: أشوا..
طول الأيام اللي فاتت التنوره وصاحبة التنوره ماراحوا عن بالي..
..أسيل الله يعيني إني أسعدك وأعيشك أحسن عيشه وأملي حياتك زي منتي ماليه حياتي..
أسيل: صالح إنت من اليوم كل حياتي..
,,سكت صالح وهو هايم بالملاك اللي قدامه وكل واحد منهم قلبه يدق بسرعه ومتطمن وفرحان إنه إحساسه كل الأيام اللي فاتت ماكان مجرد خيالات أو حب من طرف واحد بالعكس كان حب متبادل والله كتب إن هالحب يحياء ويعيش ويتوج بالزواج..
***
****
*****
(في بيت أبوصالح..)
,,الساعه 2 الليل..
,,,كانت حاسه نفسها مكتومه ومخنوقه..مالقت قدامها إلا السطوح..
طلعت وسندت جسمها للجدار وهي جالسه وضامه رجولها وراسها على ركبتينها..
ولا تحس بيد على كتفها لما رفعت راسها لقتها أثير..
أثير: أبرار ليش جالسه هنا؟؟
أبرار ودموعها على خدها: سمعتي ياأثير شيقول أبوي واحنا في السياره بعد ماجابنا من زواج صالح..
فراس ملك.. ملك على وحده ثانيه..
أثير بألم: سمعته يا أبرار..
أبرار: أنا مومصدقه..مومصدقه..
أثير: خلاص يا أبرار إنتي انفصلتي عن فراس وطلعتي من حياته..
إدعيله إن الله يوفقه..
أبرار: الله يوفقه..
بس موقادره ياأثير أنساه..موقادره..فراس ملاك..
رجل بمعنى الكلمه..علمني معنى الحياه وحدودها وآدابها بعد ماكنت هايمه ولا أدري عن نفسي..مستحيل أنساه..مستحيل أنساه..
,,وترجع تنزل راسها أبرار وهي تبكي..

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$ $
$$$$$$$$$$$$$$$$$$$$$$$$$$$
$$$$$$$$$$$$$$$$$

(في سيارة مشاري..)
,,الساعه 12 الظهر..
,,كان ماسك الجوال ويكلم عزام ومجنب السياره...
عزام: كيف كان زواج طارق؟؟
مشاري: ماشالله تبارك والله باين إن البنت اللي ماخذها بنت أجوديه..
وزواجه كان رائع واللي بسطني أكثر إن أعمامه ماقصروا معه..
عزام: الله يوفقه انشالله..
مشاري: ها كيف الدراسات العلياء ببريطانيا؟؟
عزام: الحمدالله ماشي..
مشاري: ياخي متى تجي إشتقنالك؟؟
عزام: أبستنى زوجتي إلين تسير بشهورها الأخيره ونرجع السعوديه عشان تجي تولد هنا وتقعد عند أهلها كم أسبوع..
مشاري: الله يجيبك بالسلامه وأنا أخوك..
عزام: يللاه حبيبي تامر على شي؟؟
مشاري: لايالغالي سلامتك..
,,وأنهى مشاري المكالمه.. وهويطالع من شباك السياره ويبتسم وعلى طول فتح الباب وطلع..
مشاري وهو يدنق ويفتح ايدينه الثنتين: هلا..هلا..
خالد: بابا..حبيبي..
مشاري وهو يحضن خالد: حبيبي إنت.. وين أخوك صلوحي؟؟
خالد: ورايه يا بابا..
,,ويلتفت مشاري لورى خالد وابتسم ومسك خالد مع يده وتوجه لبوابة التمهيدي..
ودنق وهويطالع بكل رحمه لوجه صالح اللي كان ماسك شنطته بيده اليمين ويسحبها عالأرض..
مشاري: صلوحي يابابا إشفيك..
صلوحي وعيونه كلها دموع: أثامه ضلبني..
مشاري وهو يلتفت لخالد: من أسامه ياخالد..
خالد: يابابا هذا صديق صالح..
مشاري وهو يشيل صالح على يده: معليش حبيبي هذا وهوصديقك يضربك..
لكن بكره أنا بأكلم الأستاذ حقك ينتبه لك..
,,ويركب مشاري السياره ويحط عياله الثنين بالمقعد اللي جنبه..
خالد: بابا ليش تيجي إنتا اليوم وين السواق؟؟
مشاري: عشان حبيبي طلعت من الدوام بدري وانا الحين أخذتكم عشان نمر ماما ونروح ناخذها من مدرستها ونسويلها مفاجأه..
,,ويتوجه مشاري بعياله الثنين لمدرسة رهف ويدق لها جوال ويقولها تطلع..
وتطلع رهف وهي متفاجأه ومبسوطه من المفاجأه اللي مسويها مشاري..
رهف وهي تبوس إيدين عيالها: غريــــــبه؟؟
مشاري: عاد قلت اليوم أسويلك مفاجأه..
رهف: ياحياتي عليك وعلى مفاجآتك..
صراحه أحلى مفاجأه..
مشاري: إلا أقول إشرايك نتغدى برا؟؟
رهف: لامشاري تكفى والله تعبانه... وصعبه والعيال لابسين لبس المدرسه..
مشاري: أجل خلاص اليوم نطلع نتعشى أنا وياك والعيال برا..
رهف:مشاري نسيت إن أخوي صالح وأسيل جايين يتعشون معانا اليوم..
مشاري: إنا لله أخوك وبنت أخوي هالدلخه ماعندهم دم..
حد يجي عند أحد وسط الأسبوع..
رهف: خلودي سمعت بابا شيقول مايبي خالو صالح وأسيل يجون عندنا..
خالد: لابابا أنا أبيهم يجون.
رهف وهي تضحك: ليش تبيهم ياخلودي يجون؟؟
خالد وهو ماد بوزه: عشان لارا..
مشاري وهو يضحك: بعدي.. ولدي..
صدق من قال الولد سر أبيه.. مايبي لا أخوك صالح ولا أسيل يبي بنتهم لارا..
,,وجلس مشاري يسوق السياره ويتوجه للبيت وهو مبسوط ويضحك ويمزح مع أولاده ورهف...
ورهف حاضنه صلوحي الصغير بين إيدينها إلين وصلوا للبيت..
البيت اللي حمل أحلى الذكريات وأقسى الذكريات وشهد على دموع رهف وعلى ضحكتها...
البيت اللي جمع قلبين غريبين عن بعض.. إلين إنغرست بذرة الحب بكل قلب...
,,,,,,
,,,,,,
,,,كلمه أخيره بعد النهايه,,,
كانت ورده حاوطتها الأشواك من كل مكان.. قدر الله إن مشاري ينتشلها من بين هالأشواك..
ما اهتم فيها ولارعاها وعرضها للشمس والرياح والآلام..
كانت تذبل شوي شوي.. لكنها صبرت وسارت كل مكان تروحه تمليه بريحة الورد والحب والطيبه...
بعد ماكان قاسي وشرس صار إنسان رائع ورجع لأصله وتربيته..
وش اللي رجعه؟؟
الطيبه والعطاء والحب والحنان والتضحيه..
كل القراء لهالقصه عارضوا الطيبه اللي فيها رهف..
بس مو كل شي يجي بالعصبيه والصراخ والزعاق...بالعكس ممكن كل هالإنفعالات تخرب بيت بأركانه وتهدم حياة هالأشخاص..
الحب بعد العناء والجفاء والصبر... شيئ رائع جدآ...
واللي يزرع ورد...يحصد ورد..
,,ليش مجتمعاتنا تظلم البنت الكبيره.. وليش تحرمها من فرصة الحب والزواج والإنجاب وتكوين أسره..
ومن قال إن الرجل السيئ بنته سيئه مثله...
ياكثر المظلومات بين جدران هالبيوت... إما بسبب التشدد من الأسره ... أو تضييع البنت بالدلال والإهمال..
,,والكل كره مشاري على تعامله مع رهف ..بس لاننسى إن مشاري توه صغير وقرار زواجه من رهف إتخذه من دون تفكير وحب يصحح هالخطأ بخطأ أكبر إن يعامل رهف بكل قسوه وجفاء..
بس لما راحت الغشاوه من عيونه وفقد رهف وحس بالفراغ اللي تركته رجع لعقله وحكم قلبه وعقله وعرف إن رهف ماتتعوض..
وانغرس بقلبه حبها وكان نتاج هالحب طفلين في قمة البراءه والروعه (صالح , وخالد)
,,عزام مالقى حل إلا إنه يملي حياته الفارغه بناس يهتم فيهم ويحبهم عشان يحس بوجوده..
جرب كل الطرق وما لقى نفسه..
بس أخيرآ لقى نفسه بين إيدين ربه وأيقن إن الوضع الأسري اللي هو فيه هذا قضاء وقدر وماله يد فيه..
وصبر ودرس وتخرج إلين الله عوض عليه ببنت الناس بعد ما إستقام وصار إنسان..
,,أبرار ضحية الدلال والتربيه الخطأ والتستر على الأغلاط والإستمرار فيها..
صحت لنفسها وعرفت الصح من الخطأ ولكن بعد ما انتهى كل شي... وانتهى أحلى شي بحياتها..فراس..
,,فراس الرائع الرجل في زمن قل فيه الرجال..
حاول يصبر ويفتح صفحه جديده لكنه ماقدر.. وماحد يلومه...
,,أسيل وصالح..
قصة حب الكل ظن إنها اندفنت بمهدها ..لكن ليش دايمآ إحنا نحب ننهي قصص الحب قبل بدئها.. وثمرة هالحب والزواج (لارا)
,,لطيفه الأم نادرة الوجود..
اللي ضحت وربت وحرصت إنها تجمع عيالها حاولينها قدام عيونها..
حتى لاتتباعد القلوب مع تباعد الأجسام..
,,,إنتهى...
الكاتبه: ماعــــاد بدري...







,,,,,,

,,,,


,,,,


وبعد أيام وشهور أخيرآ نزل الجزء الأخير,..


أتمنى إن النهايه حلوه وعجبت الكل..
وإذا كان يوجد أخطاء أو قصور أوركاكه بالأسلوب وسرد الأحداث..
فإعذروني.. ومافي شي كامل بهالدنيا..
وسامحوني إذا جرحت شعور أحد بكلمه او تعليق في سرد القصه..
أو إذا كنت جريئه في أحد المواقف.. بس على قولة الممثلين( الجمهور عايز كده)
,,ورجاء أخير..
لاتنسوا هالقصه وأعطيكم الحريه باي طريقه تريحكم أنشروها..
بس هااه..
لاتنسوا إسم الكاتبه تكتبونه...تحت عنوان القصه على طول..

تحيـــــــاتي,,,,