رواايــه حقكـ علي ان كنـت زعلان-قمـه الرووووعهـ-

(الجزء الرابع عشر..)
(في بيت أم عبدالرحمن...)
,,فتحت الباب بهدوء.. وطلت عليه لقته نايم..
سكرت الباب وراها.. وجلست بكل هدوء على طرف السرير..
وهي موقادره تنزل عينها من عليه..
.... يا الله قد ما أنا مشتاقتلك.. قد ماقلبي مليان عليك..
بس خلاص ليه أعيش نفسي بنكد.. وزعل.. وإنت عرفت غلطتك..
الأفضل إني أنسى وأسامحك عشان حياتي تمشي..
,,قربت منه وضمت يده اليسار بين إيدينها الثنتين وتنهدت وقالت بنفسها:
الله يحنن قلبك علي يامشاري.. وتحس وتفهم إني إنسانه أحبك وشاريتك...
وتعقل وتبطل وساوس وتسرع...
عشان أرتاح وترتاح ونريح هالطفل اللي ماله أي ذنب..
,,جت تبي تفك إيدها وتقوم... لكن مشاري شد على يدها اليمين بيده...
ولف وجهه عليها وفتح عيونه ببرود وناظر لرهف..
,,أول ماطاحت عيون رهف بعيون مشاري نزلت راسها وداخلها أحاسيس كثيرة مختلطة..
إحساس بالخوف من المستقبل وإحساس بعدم الإستقرار والأمان..
وإحساس بإنها ثقيله وإنسانه غير مرغوبة من قبل مشاري... وإحساس بالغربة والوحشه والضياع..
رهف: معليش آسفه إني صحيتك..
مشاري:لا عادي.. أصلآ ماكنت نايم مره..
نزلت رهف راسها وبعدين قالت: مرتاح عالسرير..
مشاري: إي الحمدالله.. بس الله لايهينك زيني المخدات اللي تحت رجلي..
رهف باهتمام: طيب..
,,راحت رهف عند رجل مشاري وقعدت تزين المخدات اللي تحت رجله..
بعدين حست إنه من الأفضل تحط هالمخدات تحت فخذه اللي عليه الجبس..
لاإراديآ بيدينها الثنتين شالت رجله برفق من عند ركبته وضمتها على صدرها وحطت المخدات تحتها..
ورجعت رجله مكانها وقالت وهي تتنفس بسرعه بسبب ثقل رجل مشاري:
ها..كذا أحسن؟؟
مشاري وهومتنح: رهف بطنك..
إشلون تشيلين رجلي كذا ثقيله عليك؟؟
رهف وهي ترجع خصلات شعرها على ورى: لاموثقيله عادي.. بس إنت كذا مرتاح أكثر..
مشاري وعيونه مانزلت من على رهف:
هااه.. إي إي مرتاح..
,,بعد صمت لحظات..
مشاري:نحفتي يارهف..
رهف:جد... حتى أسماء تقولي كذا.. بس أنا مالاحظت..
مشاري: الظاهر إنك مهمله نفسك وأكلك..
رهف وهي مبتسمه: ولايهمك.. دامك قمت بالسلامه.. أببدأ أسوي حملة تغذيه لي ولك...
,,سكت مشاري ورهف سكتت وانشغلت تقرا وصفات الأدوية اللي جنب مشاري والكل وده إنه يحكي مع الثاني بس موعارفين إشلون..
رهف بعد ماملت من الصمت:خلاص مشاري أخليك ترتاح وتنام..
مشاري: وين تروحين؟؟
رهف: ولامكان... بس..
مشاري بنظرات رجاء:لابس ولاشي أنا مافيني نوم إقعدي معي..
,, تنهدت رهف وهي تتفحص ملامح مشاري التعبانه وعيونه الذبلانه وتذكرت ملامحه أول يوم من زواجهم لما ارتفعت حرارته وداخ عليها.... وعورها قلبها على طول..
وبحركه مفاجئه لا إراديآ قربت منه ولمته بين إيدينها برفق وهي تبكي..
,,رفع مشاري يده اليسار وقعد يمسح على شعر رهف وهويحس قلبه يعوره..
وقال: رهف لاتبكين..
رهف خلاص إهدي..
أوعدك يارهف إني مستحيل ءأذيك أو أمس شعره منك بعد اليوم..
أنا ظلمتك وتعديت عليك بمافيه الكفايه.. وإلين هنا وخلاص.. إنتي زوجتي وأم ولدي اللي بالطريق وياكثر ماصبرتي علي واحتويتيني بهدوءك وحنانك ورجاحة عقلك..
واللي مثلك يارهف ينحط فوق الراس..
رهف وهي تقوم من بين إيدين مشاري وتطالع مباشرة بعيونه:
بس أنا مومرتاحه..
مشاري برجاء: رهف خلاص حلفت لك إني مارح أرجع ءأذيك وش اللي مو مريحك..
رهف وهي تمسح دموعها: مشاري حتى لوعشت معاي حياه هاديه وخاليه من المشاكل.. ولبيت لي كل طلباتي..برضه رح أبقى مو مرتاحه..
مشاري باستغراب:
وش اللي مومريحك..
رهف: اللي مومريحني إني أسير أنانية..
إني أعيش مبسوطه ومتهنيه وطلباتي مستجابه.. وإنت مومقتنع ومجبور..
مشاري وهومصدوم ومو عارف شيرد: رهف... رهف... أنا..
رهف ودموعها تنزل غصبن عنها: مشاري أنا لوماسمعت بإذني كان ممكن أغالط هالشعور اللي بداخلي وأقول تهيآت.. بس أنا سمعتك..
وأدنى سوء تفاهم تنفجر علي وتعايرني بأبوي.. وتقول إني ذبحت خالد..
وإنك أحسنت علي بزواجك مني..
ليه موقادر تفهم إنه أنا مالي ذنب بكل اللي سار..
مشاري وهوندمان: رهف..
والله يارهف.. أناموكذا..
قسمآبالله إني إذا قلتلك هالحكي وإذا تصرفت معك هالتصرفات أستغرب من نفسي وألوم نفسي..
رهف: لاتلوم نفسك.. لأن هذا اللي بقلبك..
وهذي حقيقة شعورك تجاهي..
مشاري: واللي يقولك إنسي كل اللي فات ونبدا صفحة جديدة..
مستحيل ألقى وحده مثلك يارهف..
بجمالك ونعومتك ورقة مشاعرك وقلبك الأبيض ونيتك الصافيه..
رهف: مشاري .. أنا أحبك وأفديك بروحي..
بس إنت شعورك تجاهي مجرد تعايش وتعود.. موحب..
مشاري: رهف..
ليه ماتخلين الأيام تثبتلك حبي لك..
مثل ما أثبتتلي وبينتلي حبك لي..
,, ويمسك مشاري يد رهف ويبوسها ويضغط عليها بيده..
مشاري:تكفين يارهف ودي أعيش زي باقي الناس مرتاح..
لاتخليني وتروحين..
ياكثر ماضايقتك وظلمتك.. وبكل المواقف تبينيلي إنك إنسانه بمعنى الكلمه وجوهره..
سرت ما أتخيل حياتي بدونك..
رهف بعد ما اقتنعت بكلام مشاري وارتاحت:
خلاص يامشاري.. تعبتك بالحكي معاي.. وانت المفروض إنك ترتاح..
مشاري: بالعكس ماتتخيلين قد إيش جلسة هالصراحه ريحتني..
رهف وهي توها تتذكر:
صح آخر مره كلمتني بالمستشفى قلتلي إنك تبي تقولي شي لما ترجع البيت..
وشو هالشي؟؟
مشاري: إممممم... ضروري تعرفين..
رهف: كيفك ماودي أضغط عليك.. بس ياليت تقولي..
مشاري: إنتي تشتاقين لي مثل ما أشتاقلك؟؟
رهف وهي تتنفس الصعداء: ماني قايلتلك..
مشاري: ليــــــه؟؟
رهف بحياء: خل الأيام تثبتلك..
,,ابتسم مشاري وقال:
خلاص.. بصراحه جاني النوم وودي أرتاح شوي..
رهف: خلاص .. بس ماتبي تروح الحمام قبل؟؟
مشاري: إلا والله بموت .. أبي الحمام.. بس مستحي أدق على فيصل وأناديه عشان يوديني.. أخاف مشغول ولاشي..
رهف باستغراب: وليه تدق عليه؟؟
مشاري: عشان يساعدني.. ماأقوى أشيل عمري ..
رهف وهي تقرب من مشاري وتحط يدها حاولين خصره: يللاه قوم..
مشاري وهوطايره عيونه: ويــــن؟؟
رهف: ماتبي الحمام.. يللاه قوم..
أبحطك على كرسيك.. وأدفك إلين الحمام.. مايحتاج تنادي أحد وأنا موجوده..
مشاري: يابنت الحلال موسالفة دخولي الحمام هين ذي سهله..
المشكله لادخلت الحمام.. يبيلي أحد يساعدني..
رهف: طيب أنا أساعدك..
مشاري وهومستحي: لايارهف..
خلاص بنادي واحد من الشباب.. وبيجون الحين..
رهف: هـــــو... مشاري تستحي مني..
أنا زوجتك... ومارح أخلي أحد يساعدك غيري طول ماأنا موجوده..
,,ابتسم مشاري وقال:
كيفك إنتي حره.. بس لاتقولين حوم كبدي هالرجال..
رهف بعتب:ولو يا مشاري ينقطع لساني قبل ما أقول هالكلام..
,
,,
,,,
,,,,
مرت اليومين الأولين على رهف ومشاري وهم بغاية السعاده والتفاهم والإنسجام..
وماكان يعكر صفوهم إلا الآلام اللي تتعب مشاري وتسهره إلما الصباح..
وكانت رهف لماتجيه هالآلام تحاول تسيطر على نفسها إنها ماتبكي قدامه وتحاول تخفف آلامه بإنها تكون جنبه وتهديه وتعطيه أدويته وتسويله مساج خفيف..
كان كل البيت ينظر لرهف بكل احترام وتقدير لأنها ماخلت مشاري دقيقه وحده وخذت إجازة استثنائية للترم الثاني كله.. عشان تتفرغ لزوجها وتراعيه ..
كانت طول الوقت تسهر على راحته وهي اللي تشربه وتأكله وحتى تدخله الحمام وتروشه وتلبسه..
وكان دايمآ مشاري يعاتبها وينبهها إنها حامل ومو زين لها إنها تبذل مجهود كبير خاصة إنه بطنها بدا يكبر وهي بشهورها الأخيره.. لكن رهف دايمآ تطمنه وتقول إن كل الأمور ماشيه تمام..
,,,,
,,,
,,
,
,,,تحديدآ في الصاله..
كانت غرفة مشاري الجديده مليانه رجال وزوار..وأهم زائر بالنسبه للعائلة اللي هو عبدالإله...
والشغالات رايحات جايات بالقهوه والشاي..
وكانت لطيفة جالسه بالصاله مع حريم عيالها.. يسولفون ويتقهوون...
شوي ولاسمعوا بالحوش صوت صراخ حمودي وعبدالرحمن ولدتركي..
وساره وسيرين..
هنا لطيفة خافت وقالت: بسم الله وشفيهم العيال يصرخون..
منى بخوف: بسم الله.. أسماء طلي شوفي اشفيه..
,,مشت أسماء بسرعه وهي متوجهه لباب الحوش لكنها انصدمت وقالت:
أسيـــــــــل؟؟
,,دخلت أسيل الصاله وهي مي مصدقه نفسها وطايره من الفرح وقامت تسلم عالكل وتحضنه وهي تبكي وترتجف..
,,رمت نفسها أسيل عالكنب وهي فرحانه إنها رجعت لبيت أهلها..
كان الكل يناظر لأسيل باستغراب ومومصدقين إن اللي قدامهم أسيل..
كانت أسيل متغيره 360 درجه.... كانت نحفانه ومسمره ومن تحت عيونها سواد كبير ووجها أصفر وذبلان..
منى: أسيل وشرجعك يابنيتي الحين؟؟
أسيل بزعل وعصبيه: ليه ماتبيني؟؟
لطيفة: لايابنيتي اشلون ماتبيك.. بس احنا مستغربين لأننا عارفين إنه رجعتكم للرياض مي بعد أقل من شهرين..
أسيل: لا أعوذ بالله.. تبوني أقعد شهرين ماشوفكم..
إلا صح وين أبوي وأعمامي.. وغريبه عمتي دينا هنا.. شكلكم مارجعتوا جده من بعد زواجي..
,,الكل استغرب وقاموا يناظرون ببعض وحسوا إن أسيل ماعندها علم عن الحادث اللي سار لمشاري..
,,دخل فيصل وبدون ماينتبه لأسيل قال:
يمه خلي الشغالات يجون يشيلون القهوه.. [وفجأه شهق وقال] أسيــــــل؟؟
أسيل وهي تضحك: صح النوم توك تنتبه..
وتقوم أسيل وتسلم علي فيصل..
فيصل: أسيل.. وش اللي جابك؟؟
أسيل وهي متنرفزه: حلوة ذي اللي وش اللي جابك..
فيصل: لابس أنا أقصد وين رجلك معاذ؟؟
أسيل كشرت لاإراديآ وقالت بدون إهتمام: الظاهر إنه لسه بالشارع برا..
الكل باستغراب: بالشـــــــارع؟؟؟
منى: فيصل بسرعه رح دخل رجل إختك .. قبل لايزعل بسرعه..
,, وينطلق فيصل عند معاذ..
لطيفة: أسيل.. الحين تدخلين وتخلين رجلك برا..
أسيل: وشتبين أشيله على ظهري وأدخله..
من فرحتي إني وصلت بيتنا دخلت ونسيت أدخله..
,, الكل جلس يناظر بأسيل باستغراب ومو مصدقين إن أسيل تحكي عن معاذ بهالطريقه..
,,,,
,,,,
,,بغرفة مشاري..
كان معاذ جالس بين الرجال ووجهه تعبان وباين عليه ضيقة الصدر..
عبدالإله وهويتكلم بصوت واطي جدآ:
أقول تركي.. منت ملاحظ على أسيل شي يوم سلمنا عليها..
تركي: إلا والله إشلون ما ألاحظ.. وجهها تعبان وحالتها حالة..
عبدالإله: حتى معاذ شوف إشلون سرحان ومتضايق.. ويادوبك قال كلمتين على بعض..معقول كل هذا تعب السفر..
تركي: ماظنيت.. شوف إشلون حتى عبدالرحمن متضايق وطول الوقت عينه مانزلت عن معاذ..
عبدالإله: الله يستر.. معاذ وأسيل مايستاهلون إلا كل خير.. ياترى وش اللي حاصل بينهم..
***
****
*****
(في بيت أبوصالح...)
,,خلصت أثير غسيل ملابس وتوجهت لغرفتها فوق وهي تعبانه وسرحانه وشايله هموم الدنيا على راسها..
ومادرت إلا بإيد تمسك ذاعها..
أثير: بسم الله صالح..
صالح: بسم الله عليك خوفتك؟؟
أثير وهي تبلع ريقها: صالح.. وشفيك؟؟
صالح: تعالي أثير معي غرفتي أبيك..
,,دخلت أثير مع صالح غرفته وجلست على سريره وسكر صالح الباب وسحب كرسي المكتب وجلس قبالها..
أثير: صالح إشفيك؟؟
صالح: أنا بسألك وأبيك تجاوبيني بكل صراحه..
أثير بخوف: أجاوبك على وشو؟؟
صالح: أثير.. أنا ملاحظ شي غريب..
أبرار سايره لاتاكل ولاتشرب وبس نايمه ومسكره على عمرها وفي حالة برود شديده..
ومي جايبه خبر لزواجها أبدآ.. يا إنتي تشترين لها أغراض جهازها يا أمي..
وحتى لما نوريها وش شرينا.. ماتظهر أي فرحه أو حماس أبد..
إشفيها هي تعبانه..
,,سكتت أثير وهي تطالع بعيون صالح بكل خوف..
ياربي أقوله ولاما أقوله...
لازم أقوله عشان نمنع المصيبه اللي بتسير..
صالح: أثير تكلمي إشفيه..
أثير بتردد: وش ...وشفيها يعني مافيها شي..
صالح: بس أنا قلبي قارصني مو مرتاح للحاله اللي أبرار فيها..
أثير وهي تقوم: لا..لا.. أبرار مافيها إلا كل خير..
بس يمكن عشانها زعلانه إنها بتفارقنا..
,,وتقوم أثير وتطلع من الغرفة بسرعه وتترك صالح حيران ومو مقتنع بكلام أثير أبدآ..
***
****
*****
(في بيت أم عبدالرحمن..)
,,,في مجلس الرجال الرئيسي..
,,,ماكان موجود إلا عبدالرحمن ومعاذ..
عبدالرحمن وهومتضايق: لاحول ولاقوة إلا بالله..
معاذ: يعلم الله ياعمي إني ماكذبت عليك بكلمه..
أرجوك ياعمي.. أنا شاريها وأبيها ومابي أرجع أسبانيا وأباشر عملي إلا وهي معي..
أنا أحب أسيل ياعمي ومستحيل أستغني عنها..
شوف إنت وعمتي منى.. وشفي خاطرها.. ووش اللي مكدرها وقولوا لي..
عجزت معاها عجزت..
عبدالرحمن: متى بدت هالحالة معها؟؟
معاذ: بعد زواجنا بأسبوعين..
عبدالرحمن:خلاص ياولدي تطمن وهدي أعصابك وأنا وأمها وجدتها .. بنشوف وشفيها .. خلها عندنا كم يوم..
معاذ: خلاص ياعمي أنا أستأذن ... بروح أسلم على أهلي..
وانشالله كل يوم بكلمك..
عبدالرحمن: في حفظ الله إنتبه لنفسك..
,,,
,,,
,,في غرفة أم عبدالرحمن..
الساعه 11 الليل..
منى وهي مصدومه: إنا لله وإنا إليه راجعون..
عبدالرحمن: أنا الحين ماقلتلكم إلا أنتم الثنتين لأنكم الوحيدات اللي ممكن تعرفون شالسالفة بالضبط..
لطيفة:خلاص ياولدي إنت هدي قلبك وريح بالك وأنا وأمها بنمسكها ونشوف وشفيها..
يمكن في أشياء ماتقدر تقولها لك.. ويمكن ترتاح لنا أكثر وتقول اللي مضايقها..
عبدالرحمن: خلاص أنا الحين مابيكم تضايقونها أو تبينون إن فيها شي أبيكم تعاملونها.. معامله عاديه.. ولاكأن فيه شي إلين تشوفون وشفيها وقولوا لي..
لطيفة:يسير خيرروح إنت وزوجتك الحين غرفتكم ريحوا وهدوا بالكم.. والله يقدم اللي فيه الخير..
,,,
,,,
,,بغرفة مشاري..
,,الساعه 12 الليل..
مشاري بعد ما أخذ حبوب الدواء من رهف: وشفيك زعلانه..
رهف: هاه.. لاولاشي..
مشاري: إشلون ولاشي.. كل البيت مكتئب..
إنتي وأمي وأخواني ...وحتى أسيل اللي يشوفها مايقول عروس وشفيكم..
رهف وهي ماودها تضايق مشاري بسالفة أسيل: مشاري مافي شي..
مشاري:إي صح دريتي.. أبوك دق على عبدالرحمن وعزمه على زواج إختك أبرار..
رهف مصدومه:زواج أبرار!!!..
مشاري:مادق عليك؟؟
أبرار: لاوالله مادق ولاقالي..أنا سمعت من صالح إنها انخطبت بس ماقالي إن الزواج تحدد..
مشاري وهويختبر رهف: بتروحين؟؟
رهف: وين أروح؟؟
مشاري: زواج إختك...
رهف: والله إذا أبوي دق عليك وعزمك وعزمني بروح..
إذا مادق عليك إشلون أروح من غير عزيمه..
مشاري وهومرتاح من رد رهف: رهف إذا تبين تحضرين أنا ما أمنعك..
رهف بضيق: مشاري أبوي ماعزمك وشلون تبيني أروح أرز وجهي.. وأصلآ حتى لو أروح... أنا أعرف أبوي ماعنده تفاهم بيخلي أمي منيره تطردني..
مشاري: نفسي أفهم شي واحد..
ممكن الأب يسير قاسي والطمع يعمي عيونه..
بس معقوله الأم يسير فيها نفس الطبع.. وين اللي يقولون قلب الأم..
رهف وعيونها مليانه دموع قامت تضحك ضحكة استهزاء وقالت: أم..
مشاري وهويحاول يهدي رهف: خلاص يارهف لايضيق صدرك..
إذا هم مايبونك وبايعينك أنا أبيك..
وماشالله يارهف أمي لطيفة مي مقصره معك وتعاملك مثل بنتها..
رهف: إي والله .. الله يطول عمرها..ويخليها لنا..
,,شوي ولارهف تعفست ملامح وجهها وحطت يدها على بطنها وهي عاقده حواجبها..
مشاري باهتمام: وشفيــــك..
رهف: الله يهديه يرافس وهومتحمس..
مشاري وهومبسوط: على أبوه .. نشمي ..رجال..
رهف: إي والله من الناحيه هذي صدقت.. ماترتاحون إلا لما تعذبوني..
مشاري: ماعاش من يعذبك.. خليه يطلع دلوع أبوه وأمه وأوريك شغله..
رهف: ليه شبتسوي؟؟
مشاري: أبد بس بسوي شعره سبايكي..
وألبسه برمودات.. وأشتريله همر.. وأعطيه أغلى وأحدث الجوالات..
وأشتريله شارع التحليه بكبره.. عشان إذا عاكس.. ماحد يضايقه..
رهف وهي مبتسمه: لا والله تبي تفسد الولد بالدلع الزايد..
لاتشتريله ولاشي.. خليه هويعتمد على نفسه..
مشاري: براسك.. أول ماينولد.. بدخله العسكريه عشان يطلع رجال..
,,رجعت رهف كشرت ونزلت راسها تحت وهي تحس بألم شديد..
مشاري: رهف.. تبين أهلي يودونك الطوارئ..
,,وترفع راسها رهف وتبتسم وهي تكابر.. وتقول:
لاتخاف .. مافيني شي..[وتسحب يد مشاري وتحطها على بطنها وتناظر في عيون مشاري]..
,,ابتسم مشاري وناظر لرهف وقال:
سم الله عليه.. كل هذي حركته..
مستعجل يبي يطلع..
,,شوي ولامشاري يناظر ببطن رهف ويقول:
هيه إنت.. اسمعني.. ترى ياويلك ان سرت بكاي وصياح بذبحك ذبح..
خلك مثل أمك هادي..
رهف وهي تناظر لمشاري بحب: بالعكس ياليته يطلع بطيبتك وصفاء نيتك وقلبك الحنون..
مشاري: لا لا.. انشاله ياخذ أخلاقك.. وياخذ وسامتي وحلاوتي..
رهف: لاااوالله... إخس عليك يعني أنا شينه..
مشاري وهويضحك: لااااااا.. واللــــه.. موقصدي..
رهف وهي مكسور خاطرها: لا....لا تحلف.. واضح إنه قصدك..
,,جلس مشاري يتمعن بملامح رهف البريئة وهي تناظر لتحت وتلعب بخيوط المخده اللي حاطتها تحت إيدينها..وهي ساكته..
مد مشاري يده وخذ جواله وقال:
رهف.. اسمعي زين هالأغنيه .. وقولي لي رايك..
,,بلعت رهف ريقها وهي لازالت مدنقه وساكته.. ولا شوي وتسمع..
,
,
,
حقك علي إن كنت زعلان..
يابعد عمر وقلب غاليك...
برضيك مهما يكـــــــــون يا فـــلان..
حتى ولو راضي براضيــــــك...
قلبي بك مولع وحيران..
محتار مايدري بك اشفيـــك..
ويقول لك إن كان غلطان...
إرضى عليه اللــــه يخليكــــك...
عليك أنا ياشوق ولهــــان..
دايم أنا وقلبي في طاريك..
جفني يقضي الليل سهـــران..
والعين يالغالي تنـــــاديك..
إنت وأنا يازين خلان..
واجب تداريني وأداريك..
مانختلف لوكان ماكان..
ولاعاد تشفيني ولا أشفيـــــــك..
,
,
,
,,بعد ماخلصت هالأغنية اللي منزلها مشاري بجواله..
مشاري: ها اشرايك بهالأغنية؟؟
رفعت رهف راسها وناظرت بمشاري وعيونها كلها دموع وقالت:
اللــــه يا مشاري.. ياحلو كلماتها..تجنــــن..
مشاري وهومبتسم: أول مره تسمعينها؟؟
رهف وهي تمسح دموعها بأصابعها قبل لاتنزل:
لاقد سمعتها قبل.. بس مادري هالمره أحسها غير..
مشاري: هالأغنية لك يارهف...
,,ويمد مشاري يده ويمسك يد رهف ويضغط عليها ويقول:
حقك علي يارهف..
لاتزعلين علي..
يعلم الله إنك أحلى ماشافت عيني..
وينقطع لساني قبل ما أقول عنك شينه..
رهف وهي تحضن يد مشاري بيديها الثنتين:
سم الله عليك.. لاتدعي على نفسك..
أنا موزعلانه... أزعل من نفسي ولا أزعل منك..
مشاري: رهف... ودي أقولك شي..
رهف: قول؟؟
مشاري: عمري ماتوقعت الحب حلو لهالدرجه؟؟
,,تنحت رهف وجلست تطالع بعيون مشاري وهي بتطير من الفرح ومومصدقه إن مشاري يقول هالحكي..
مشاري: كل ما أتذكر إني فكرت أضيعك من إيدي أكثر من مره..
ألوم نفسي وأقول قد إيش أنا غبي..
وكل ما أتذكر قد إيش قلبي كان قاسي عليك.. وأرتاح لاجرحتك وضايقتك..
أحس نفسي وحش.. مو إنسان..
رهف برجاء: مشاري.. الله يخليك..
إنسى كل اللي فات.. وخلنا نبدأ حياة جديدة..
حياة إحنا الإثنين نرتاح فيها.. ماحد يجرح الثاني بقصد..
مشاري: رهف.. أبي أفهم شي واحد بس .. وش اللي جابرك طول الأيام اللي فاتت تصبرين علي وتستحمليني...
,,انصدمت رهف من سؤال مشاري وقالت:
مشاري.. مارح أكذب عليك وأقولك إن طول الفترة اللي فاتت كنت أحبك..
بالعكس..مرت علي أوقات كرهتك فيها.. لأنك كنت في قمة القسوه معي..
بس أرجع يامشاري لأرض الواقع وأعرف إن مالي بهالدنيا غيرك..
ممكن تقول إني مصلحجيه.. وصبرت عليك عشان مصلحتي وما أرجع أذل نفسي لأبوي اللي طردني..
بس في أوقات لما أتضايق منك وأبي أصرخ بوجهك وأقول كفاية..
أرجع أهدي نفسي وأقول يمكن الله يغرس بقلبك لو شي بسيط من مقدار الحب اللي بقلبي لك..
والحمد الله يامشاري.. أملي ماخاب..
الله لايخليني منـــــك..
مشاري وهو يتنهد: آآآآه... ليت هالحادث سايرلي من أول يوم من زواجنا..
رهف: بسم الله عليك.. مشاري اشهالحكي؟؟
مشاري: لأني ماحسيت بقيمتك وعرفت قدرك إلا بعد ماتكسرت..
,, بعد هالتعليق.. تموا مشاري ورهف يضحكون ويسولفون بكل حب وود وتفاهم وهدوء..
,,,,
,,,,