ديوان /بن شلوان

عزّالله إنّي يا أريش العين مسـرور
صدفه بلا ميعـاد والنـاس غيّـاب
ومن أولٍ لاجيت لين أنت محضور
وتشّر على الحضّار وتقوم مرتـاب
وأتابعك بالعين والحـال مخطـور
وعليك دمعي فوق الأوجان سكّـاب
حط الوعد يـومٍ محـدّد ومخبـور
لاتتركه مفتوح والقلـب منصـاب
وجاوبتني بالهمس ثم قلت حاثـور
حاثور تاتي وإنتظر منّـي اكتـاب
وأقفت ليالينا مـع أيامهـا شهـور
وأنا أنتظر هالخط يا تلع الأرقـاب
والحمد للي بأمـره أيامنـا تـدور
اللي جمعنا اليوم ياسيـد الأحبـاب
شل البريقع يظهـر النـور يانـور
يانور عينـي كيفنـا تـو ماطـاب
وغير المبيسم يا هوى البال معذور
مالي هوى إلا طقّت الناب بالنـاب
عندي قناعه وأنت ماحولك قصـور
عطيتني روحك مسلهـم بالأهـداب
مشكور ياسيـد الغناديـر مشكـور
ملكتني ولاعادلـي عنـك مجنـاب
يفداك خلٍ ضيّع الوقـت مغـرور
ضاع العمر ويّاه ظنّي معـه خـاب
وألحين نادم خاين العهـد مقهـور
مقهور منّي يوم ماأحسب له إحساب
وإن شفت حاله شين ماقلت ماجور
خان العهد والحلف من بين الأطناب
باصوم لأجل الحلف والذنب مغفور
رب البريّة يغفر ذنوب مـن تـاب
ماني على طرد المقفّيـن مجبـور
ما خلق لي قلبين صـادق وكـذّاب
لي قلب واحد ما يداني هل الـزور
لكن أشوف الزين للصدق حـرّاب
حظّه تردّى خاطـره دوم مكسـور
ومن أولٍ يطلب وذالحيـن طـلاّب
مطلوب يوم إنّه صغيـرٍ وغنـدور
يوم الهوى فالجوف عاصف وهبّاب
والحب في وقته مثل ورد وزهـور
لاصار في وقته يجي شي جـذّاب
وقتٍ بغيته راح من دونه عصـور
توّه يجيني يشتكـي هـم واتعـاب
راح الربيع وموسم الحب محصور
وأقفى الهداد وحط للطير مقضـاب
ماعاد له رجعه وبالخيـر مذكـور
باجنّبـه مـا دام للكيـف شـرّاب
غيره لقيته صاحـبٍ كنّـه الحـور
وحظّي تعلّى وانفتـح تـوّه البـاب