رواية:: محد يهمني واللي براسي بسويه !

رنا
بعد ماعطيتهم القهوة جلست في الصالة وانا حاسه بدوخه ..
ودي انااااااااااااااااام وارتاح .. بس مقدر لانهم راح يجيبون لي الدفتر عشان اوقع ..
ياربيه متى ينجزون علي ويخلصوني ..
جلست اهز في الصالة الين اذن العشاء .. والمللك ماجي ..
شكل احمد مواعده بعد صلاة العشاء ..
تنهدت بضيق يوم جبت طاريه ..
تعبت من الجلوس .. فتمددت على الكنبه وجلست افرفر في القنوات اللي عورت لي راسي ..
بس وش اسوي ؟؟ ماقدامي الا الصبر ثم الصبر ثم الصبر ..
شوي الا يدخل فواز ومعه صياني القهوة والتمر والحلى ..
فواز وهو يقرب من عندي وشكل الصينيه ثقيلة : قومي بسرعه شيلي الدلال عنها . . مرة ثقيلة ..
قمزت بسرعه وشلتها ورحت للمطبخ عشان اغسل المواعين ..
لحقني فواز بالصينيه اللي كانت معه ...
حطها على الطاولة وهو يقولي : والله يارنا لو تشوفين احمد وشلون شكله ؟؟ ان تضحكين عليه ضحك الين يوم الدين ..
ضحكت ضحكة خفيفة على المرسال فواز ..
فواز : عجبك كلامي ..
قلت بثقة وانا اصد عنه : جعله من ذا الحال وأردى ..
فواز : افااااااااااااااااا .. لا لا ماهقيتها منك وانا اختك .. مهما كان ترى هذا بيصير زوجك ..
جلست اغسل في المواعين وانا مقهورة : ان شاء الله مايتم ..
فواز : اعوذ بالله من كلامك .. اذكري الله وتعوذي من ابليس ..
طلع وخلاني .. لانه عارف لو قعد اكثر راح يسمع كلام اقسى من كذا ..

احمد
ماصدقت اذن العشاء عشان نروح نصلي .. وارتاح شوي من خنقة المجلس ..
اول ماطلعت دقيت على الممللك .. المسكين طلع مضيع المكان ..
وصفت له البيت بالضبط ورحت اصلي معهم ..
وبعد الصلاة ولما رجعنا .. شفته جالس بسيارته ينتظرنا ..
اول ماشافني نزل .. سلمت عليه بعدين سلم على الرجال .. ودخلنا للمجلس ..
بدى يكتب في الدفتر الكبير .. بعدين بدى يكتب في دفتر العقد .. وينادي على الشهود يجون يجلسون جنبه ..
جلست انا وجنبي سعود ..
وجلس عبدالرحمن وجنبه ناصر ..
بعد ماوقعت في الدفتر الكبير .. ارسلوا الدفتر لها عشان توقع ..

رنا
كنت في المطبخ اسوي الشاهي لما كان يناديني فواز المزعج ..
طلعت له في الصالة وانا معصبة من ازعاجه : خير وش تبي ؟؟
فواز وهو يغمز لي ويأشر على الدفتر الكبير اللي كان في حضنه : التوقيع ياحلوه ..
ميلت فمي .. وقربت من عنده ..
مديت يدي : عطني القلم ..
اول ماعطاني اياه .. سحبت الدفتر من عنده ووقعت عند اسمي وبصمت ..
مشيت وخليته .. رحت للمطبخ وانا احاول ما أفكر بأي شي ..
جالسه افكر في الشاهي والبيالات والصينيه .. غير كذا مافيه شي ببالي ..

أحمد
لما دخل فواز بالدفتر .. قرصني قلبي .. وحسيت نفسي بيغمى علي ..
فواز وهو يعطي المملك الدفتر ..
المملك : وقعت ؟؟!
فواز وهو يبي يطلع من المجلس : ايه ..
هنا انا غمضت عيوني براحة اول مرة احسه من بديت افكر برنا ودخلتها بعقلي وقلبي ..
كتب الشيخ العقد .. وسلمه لي وبارك لي في هالزواج .. بس انا من زود الفرحه ..
ماكنت ارد او اقول أي شي ..
بس كنت اناظرهم وابتسم ..

نهاية الجزء السادس عشر ..