لاتظن أني ماأحبــك

الدكتور : دقيقة بس لو سمحت
الدكتور يركز في الأوراق وكأنه مو مصدق
وليد : دكتور وش صايرعلمني ارجوك فيه شي
الدكتور : اللهم لك الحمد على كل شيء اخ وليد كل شي مقدر ومكتوب وانت رجل مؤمن تعرف ان ربك ما يظلم حد وكل شي محاسبين عليه نحن معشر البشر سواء خير ولا شر
وليد : عطني الأوراق خلني اشوفها
ربع ساعة صمت
بعدها طلع وليد من غرفة الدكتور من دون أي كلام
الدكتور : وش فيه قام كذا بسرعة
في الخارج كانت الجازي توها جاية من الحمام
وليد : توك تجيين يالخايسة قصوا علي حسبي الله عليكم دنيا واخرة انتو اما تستحون تبون تتلصقون وتشفون حل بس لكم
الجازي : وش تقول انت
الوليد يمسك يد الجازي ويطلع من المستشفى
الجازي : وش قال لك الدكتور
الوليد : ركبي السيارة وتعرفين
الجازي : وين بتروح
الوليد : مالك دخل انتوا كفوكم الزبالة يا زبالة
الجازي خايفة منقبض قلبها وبخاطرها : لا الا هذا ما راح اقبل فيه اني اكون ...لا لا مستحيل وش بيصير فيني اهلي العالم وش بيقولون
وقف سيارته الوليد عند اقرب موقف ولف وجهه للجازي وعيونه حمراء يتطاير منها الشرار : سمعيني عدل انا لولا اني ولد عمك ولا طلقتك ورميت لأهلك الكذابين يكذبون علي انتي عقيمة تعرفين وش معنى عقيمة
الجازي انصدمت واجهشت بالبكاء : لا كذاب انت كذاب والدكتور كذا بتبون تقتلون اخر امل بحياتي طفل اسهر عليه ويلاعبني ويصير لي سند انتوا كذابين
الوليد : الأوراق هي الديل انتي عقيمة وش اسوي فيك اقطك هنا ويجي اخوك يشوف لك حل ولا وشو
الجازي خلاص ضاعت حياتها بالخبر هذا انتهى كل امل تعيش له هي عقيمة هي عقيمة
جلست تبكي يمكن البكاء يخفف عليها
سمعيني يا بنت العرب انتي بتروحين بيت عمي جلسي عندهم طول الأسبوع الجي بعد وبعدها راح اتصرف
الجازي نست كرامتها نست كل شي فكرت بس بالمجتمع الظالم وش بيسوي فيها : وليد لا تهدني وليد انت طيب اعرفك لا تهدني سو الي تبي بس لا تطلقني
الوليد وهو يضحك : اول تبين الطلاق ولاحين لا جد انك منافقة (يضربها كف )الحين تبيني انتي كلبة وتستاهلين انك ما تجيبين اعيال
الجازي : انا كلبة بس لا تطلقني وش بقول للعالم وليد ارحمني احب ايدك احب رجلك اسوي أي شي لك وليد اصير خدامة عندك بس لا احد يدري ولا تطلقني
وليد يشعر بالندم : سمعي الحين روحي بيت عمي ويصير كل خير
الجازي تحب ايده وهي ذاله روحها له
انزلت الجازي لبيت عمها وراحت لشيماء تبكي
تبي تقول لها وش صار تبي حد يسمعها
شيماء : يمه وش فيك
الجازي :امي انا ما اجيب اعيال انا عقيمة
شيماء تسمع الخبر وتهل دموعها على وجنتيها تذكرت كم هو الضنا غالي تذكرت جمانة اجلست تلفي على الجازي وتمسح على شعرها
شيماء : جازي هذي مشيئة الله لا تقنطي لا تجزعي هو معاك بس صبري ربي راح يجازيك خير على صبرك
الجازي : يمه انا عقيمة تدرين وش معناه هذا ماراح يجيني ضنا يعني بجلس وحيدة ما عندي حد يملئ علي حياتي اسمع صوت اصياحه يمه وليد بيطلقني راح اتشتت راح العالم كله يطردني
جلست تبكي على الي صار لها ومهما سوت ماراح حد يحس فيهاغير الي يذوق طعم الحرمان من الضنا