 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
|
|
#1
09-21-2010
|
||||||||||||||||||||||||||||||||
|
||||||||||||||||||||||||||||||||
...ظهر السبت في قصر أبو فيصل و في جناح فيصل و نجلاء...
فيصل كان للحين نايم على نومتة اللي أمس ما تحرك وما صحى نومه ثقيل شلون بعد لا صار تعبان...؟ طلعت نجلاء من الحمام وهي تفرك شعرها بالفوطة الصغيرة لأنها توها ماخذه لها شور... دخلت الغرفة و طلعت لها ملابس من الدولاب بهدوء و طلعت لغرفة الجلوس عشان ما تزعج فيصل... غيرت ملابسها و جففت شعرها و بعدها وقفت تناظر نفسها بالمراية و هي تحرك شعرها بيدينها... سمعت صوت ضرب قوي على الباب و عرفت أنها لولو و راحت بسرعة فتحت الباب و قبل لا تتكلم صرخت فيها لولو:يا خاينة وينك أمس تقولين لي أنا بنتظرك عشان نسهر مع بعض و لما رجعنا جيت و ضربت الباب و ما فتحتي لي وش التصرف السخيف هذا؟ نجلاء حطت صبعها على فمها:اششششش لو سمحتي لا تصارخين تكلمين بهدوء... لولو و هي ترفع صوتها بعناد:و ليه ما أصارخ بأمر من؟ نجلاء قطبت حواجبها و ضربتها بقوة:يا حمارة تعندين يعني قلت لا تصارخين فيصل نايم... لولو فتحت عيونها و هي تفرك محل الضربه بيدها:وتكذبين بعد... فيصل مو هنا كيف نايم يعني يلا وضحي لي؟ نجلاء:أمس بالليل جا و أنتوا برا؟؟ لولو وسعت عيونها:طيب أمس جا وين سيارته لما رجعنا ما شفناها؟؟ نجلاء:لو سمحتي لا تصيرين غيبة أساسا هو ما راح بسيارته أخر مرة روحي شوفيها موقفه مكانها... لولو:لا مو مصدقه طيب أبي أشوفه؟ نجلاء ضلت واقفة تناظرها بعصبية:........................................... ..... لولو بضحك:وش فيك أخوي و اشتقت له أبي أشوفه فيها شي... نجلاء:طيب لما يصحى أكيد بينزل تحت شوفيه لما تشبعين منه بس الحين قلت لك نايم ما تفهمين... لولو دزت نجلاء و دخلت متوجه لغرفة النوم:يا عيني خايفة عليه بعد والله لو تفجرين يمه قنبله ما يحس... ضلت واقفة عند باب غرفة النوم و لما شافته نايم ابتسمت بفرح و الحين بس توها صدقت أنه رجع و لفت لورا بفرح:يييييييييي بروح أخبر أمي و أبوي و بكلم أحلام عشان تجي اليوم.. نجلاء من عصبيتها صرخت فيها:لولو يا سحيفه لا تعيدين حركتك مرة ثانية... بس لولو ما سمعت لها و كملت طريقها لتحت و نجلاء سكرت باب الغرفة بتعب... ما تدري ليه أخلاقها قافلة هالأيام و صايرة تعصب على أي شي... دخلت الغرفة و رفعت شعرها و قعدت على إحدى الكنبات في غرفة الجلوس تتصفح مجلة بس عشان تضيع وقتها... ...في المطبخ تحت... لولو:يما والله ما أكذب عليك شفته بعيوني و نجلاء تقول أنه جا أمس لما كنا برا... أم فيصل حطت يدها على قلبها بشوق و بحنيه:يا قلبي على ولدي من أمس هنا و أنا ما أدري طيب روحي قولي لنجلاء تصحية عشان يتقدى معنا والله مشتاقة له... لولو وسعت عيونها:يما نجلاء مو راضية تصحية حتى ما تبيني أتكلم عشان لا أزعجه و يصحى و الحين أقول لها صحيه و هي معصبة بعد عشان تنهيني... أم فيصل ابتسمت:يا قلبي عليها نجلاء حبيبتي... لولو:يما أنتي كل الناس يا قلبك عليهم...؟ أم فيصل قطبت حواجها بعصبية:أقول لا يكثر و قومي قولي لنجلاء تصحي أخوك عشان ينزل يتقدى معنا أنا بجهز القدا على ما يوصل أبوك... في نفس اللحظة دخل أبو فيصل بابتسامته:كنكم تتكلمون عني... أم فيصل مشت له و أخذت أغراضة اللي بيده كعادتها كل يوم بابتسامة و لولو ما تركت لها مجال تتكلم و تكلمت هي:يبا تدري أن فيصل أمس رجع و الحين هو نايم... أبو فيصل توسعت ابتسامته:لا...كيف يجي و ما يسلم..؟ لولو:تقول نجلاء جا لما كنا برا و نام أروح أصحية... أبو فيصل بشوق لولده الوحيد الغالي:يا ليت والله خليه يتقدى معنا من جد مشتاقين له و لهباله... لولو نطت بسرعة و هي تصرخ:دقايق و فيصل عندكم... طلعت من المطبخ و أبوها ضحك على هبالها اللي ما أخذته من أحد غريب... من أخوها فيصل أكيد... أم فيصل:ما العاقل فيهم إلا أحلام ولا ذيلي كنهم بزراين؟ أبو فيصل ابتسم:إلا أحلام وش أخبارها صار لي أسبوعين ما شفتها وش فيها؟ أم فيصل تنهدت:يوم الخميس لما شفناها ببيت أم وليد كانت تضحك بس لاحظت عليها متضايقة و لما سألتها ما رضت تقول لي شي أساسا نكرت أنها متضايقة فاكرتني ما أحس فيها؟؟ أبو فيصل:هي وش أخبارها مع أم محمد؟ أم فيصل:والله مدري يا أبو فيصل أنت عارف بنتك ما ترضى تتكلم و ما ترضى تقول إلا بالموت... أبو فيصل تنهد:الله يكون بعونها... لف للباب:يللا أنا رايح أبدل ملابسي و نازل... طلع أبو فيصل فوق و لقى لولو قاعدة في الصالة العلوية تكلم أحلام:أي والله فيصل جا...طبعا بتجين اليوم أكيد صح..؟ لا عاد مو كيفه محمد...وش فيه هذا ما اتصل إلا تقولين لي في الشغل وش ذا الشغل ما صارت؟؟ كيفك أهم شي بتجين فيصل مشتاق لك؟؟ بعد صمت تكلمت:اوك باي... سكرت و لقت أبوها يناظرها و هو يهز راسه:صحيتي فيصل؟ لولو هزت راسها:قلت لنجلاء و هي تبي تصحيه الحين...اي يبا أحلام تسلم عليك و تقول يمكن يجون الليلة يتعشون عندنا... أبو فيصل و هو داخل غرفته:حياهم الله... بعد ربع ساعة كلهم كانوا على طاولة الطعام ما عدا نجلاء اللي تعذرت أن ما لها نفس تاكل شي... فيصل تضايق منها و هو أول يوم له هنا و كان وده يتقدى مع أهله و معها بس ما يدري وش فيها متغيره كذا؟ لما نزل فيصل تحت سلم على أمه و أبوه اللي استقبلوه بحراره و أخته لولو اللي كانت مشتاقة له مـــوت... أم فيصل:وليه ما لزمت عليها تنزل؟ فيصل ببرود:وش فيك يما والله حاولت معها بس هي ما تبي تقول ما لها نفس تاكل؟؟ أم فيصل:طيب بس تقعد معنا مو لازم تاكل لو هي ما تبي... لولو اللي كانت قاعدة يم فيصل:أي صح مدري وش فيها مزاجها متقلب و دايما معصبة علي... أبو فيصل غير الموضوع و هو يناظر فيصل:ما علينا... ما قلت لي متى مقرر تجي تشتغل في الشركة؟ فيصل تنحنح و هو يسوي نفسه غص بالأكل و عيونه معلقة على أبوه بصمت و شكله كان فكاهي... أبو فيصل:وش الحركات هذي بعد؟؟ ما تشوف عبد الله ولد عمك صاير رجال و كل يوم يجي الشركة مع أبوه و ما يطلع إلا مع أبوه بعد و أنت كلما أفتح معك الموضوع سويت لي هالحركات .. فيصل ابتسم:أي هين عبد الله صاير رجال اتحدى جاي للشركة من نفسه؟.. أبو فيصل:نعم.. فيصل وهو مبتسم:لا سلامتك يبا أقول الله يوفقه... أبو فيصل:طيب ما قلت لي متى تجي تشتغل في الشركة؟ فيصل تنهد و تكلم بجدية:يبا أنا مو مكاني في الشركة..أنا مكاني في مركز الشرطة طيب؟ لولو لفت تناظره و هي موسعة عيونه:أخوي شرطي..؟ فيصل لف لها:و يشرفك بعد.. أم فيصل حطت يدها على قلبها:يا فيصل الله يهديك وش لك بالشغلة هذي اتركها لأهلها و الله أني خايفة عليك.. فيصل بثقة:و أنا من أهلها يما... أنا من لما كنت صغير و هذا حلمي و الحين تبون تمنعوني منه؟؟ أبو فيصل تنهد و هو يناظره:طيب و تدريبك؟ فيصل ابتسم و هو يناظر أبوه:يبا خلاص التدريب خلص و حولوني لمركز الشرطة مدري ليه...؟ أبو فيصل نسى كل شي و بفرح:تتكلم من جد.. التدريب خلص يعني ما راح تبعد عنا بعد. فيصل هز راسه بالنفي:خلاص قاعد على قلوبكم... خلصوا قدا و قعدوا في الصالة يشربون شاي و يسولفون و يضحكون مع فيصل اللي من زمان عن سوالفة... أذن المغرب و قام الكل يصلي و في وقت الصلاة انفتح باب الصالة و دخلت منه أحلام و هي ماسكة عبايتها بيدها و تنادي:يمــــــــــــا.... ما شافت أحد في الصالة و شكله الدور هذا كله فاضي لأن كان هادي... رمت عبايتها على أقرب كنب صادفته و توجهت للدرج و صعدته بسرعة و توجهت لغرفة لولو و دخلت بابتسامة:هــــــــاي... لولو لفت لها و هي كانت تعفس في دروج الكمدينة حقتها:هايات من جابك اليوم تقولين محمد ما يطلع من الدوام إلا متأخر... أحلام ابتسمت:لما كلمته و قلت له أستأذن و طلع صلى و جابني هنا... لولو ابتسمت و هي تغمز لأختها:أوهـــ ما يقدر يرد لك طلب أساسا تلاقينه طلع مو عشان الصلاة عشانك أنتي بس... أحلام ضحكت:يا حماره لا تقولين كذا..إلا فيصل و نجلاء وينهم؟ لولو وقفت بابتسامة فرح:ايييييييي ما قلت لك أن فيصل خلص تدريبه و حولوه لمركز الشرطة هنا... أحلام بفرح:تكذبين؟ لولو:والله والله ما أكذب عليك اليوم هو قال لأبوي على القدا و أبوي شكله مو متقبل الفكرة بس وافق عشان خاطر فيصل... أحلام بابتسامة:من قدي أخوي شرطي... لولو بفخر و هي تناظر أحلام:قصدك ضابط مو شرطي... أحلام اخفت ابتسامتها:والله سالفة غريبة عجيبة أول مرة أشوف ضابط يدربونه أول و بعدها يتحول لضابط... لولو:احمدي ربك جات على كذا لو أنه للحين في التدريب مدري وش راح يصير في أمي هي لحالها كل يوم تسأل عنه و كنه يتصل كل يوم... إلا محمد وينه تحت؟ أحلام:لا طلع يمكن ما يتعشى هنا يقول مشغول... لولو وسعت عيونها مرة ثانية:دريتي أن زواج وليد و رانيا بعد3 أسابيع... أحلام ناظرتها:وش الأخبار العجيبة اللي عندك ؟ لولو:والله ما أكذب عليك رانيا اللي قالت لي أمس حنا كنا ببيت عمي... أحلام ابتسمت:والله ما أتخيل شكل رنو عروس... لولو بضحك:لا و زوجها وليد ولد عمتي و الله مو راكبين على بعض... أحلام ضحكت:يا حماره لا تقولين كذا أساسا أنتي وش دخلك فيهم؟ لولو:هههههههههههههههههههه والله بتشوفين كل يوم مطاق هي وياه رانيا دلوعة و وليد جدي... أحلام:كنهم مستعجلين؟ لولو:كل شي جاهز ما ناقصهم شي بس هو مأجلين الموعد عشان شوق و شوق خلصا عدتها تقدر تحضر بأي وقت و بأي مكان... وقفت أحلام:قومي بروح أشوف فيصل بسلم عليه من زمان عنه... لولو:طيب روحي لاحقتك... طلعت أحلام و قبل لا تتوجه لجناح أخوها فيصل صادفت أبوها و أمها بالطريق و سلمت عليهم بحرارة و خصوصا أبوه اللي كانت مشتاقة له مـــوت... من زمان ما قعدت معه حتى لما كانت تشوفه بس تسلم عليه و تمشي... ضربت باب جناح فيصل و جاها صوت فيصل بالسماح و فتحت الباب بابتسامة:مسا الخير... فيصل وهو يرش له العطر و واقف قدام المرايه لف للباب و ابتسم:هلا و غلا مسا الخيرات... أحلام دخلت و انتبهت لنجلاء قاعدة على إحدى الكنبات و راحت قعدت يمها:مبروك زوجك صار ضابط... نجلاء ابتسمت و هي تناظر فيصل:الله يبارك فيك... فيصل لف لأخته:الوعد عندي يا أحلام الحين أنا اللي أصير ضابط و تباركين لها و أنا ولا معبرتني... أحلام ضحكت:والله كنت ببارك لك بس شفت نجلاء مكتمه و قلت بسولف معها... فيصل لف لهم و ناظر نجلاء:والله يا ليت تعرفين وش سالفتها من أمس لما جيت و هي كذا مو عاجبتني حتى لما عرفت بخبر تعييني بالرياض ما فرحت... نجلاء ناظرته بصمت و ما تكلمت لأنها من جد كانت تعبانة:........................................... أحلام لفت لنجلاء باستغراب بس فضلت ما تكلمها الحين لأن فيصل شكله طالع... أحلام رجعت لفت لفيصل:ها طالع... فيصل فتح الدولاب و أخذ كبوس أسود سبورت و لبسه و طالع شكله يجنن مع الثوب:أي بروح لعبد الله من زمان عنه بس مو متأخر أن شاء الله... أحلام قطبت حواجبها:و أنا جايه عشانك تطلع و تتركني والله عيب... فيصل ناظر نجلاء بطرف عينه:بس في ناس شكلهم متضايقين من وجودي هنا بخفف عليهم شوي... مشى فيصل لباب الجناح و طلع منه و أحلام لفت لنجلاء اللي كان وجهها أصفر:وش فيك نجلاء؟ نجلاء رفعت لها راسها:ما فيني شي صدقيني بس تعبانة شوي... أحلام:طيب ليه فيصل يقول كذا وش فيكم؟ نجلاء قطبت حواجبها و بهدوء:مدري عنه يا أحلام والله مو قصدي اللي قاله من جد فرحت له بس وش يبيني أسوي عشان يصدق أني فرحت أنطط له... أحلام ضلت تناظرها بهدوء:هو من أمس كذا؟ نجلاء قطبت حواجبها بقوة:خلاص سكري الموضوع... أحلام:طيب وش فيه وجهك أصفر كذا شكلك تعبانة مــــــــــرة... نجلاء:سلامتك ما فيني شي والله يمكن من قل النوم بس... ...في قصر أبو عبد الله... نزل فيصل من سيارته و صعد درج المدخل و ضغط على الجرس و ضل ضاغط عليه بشكل أزعج أهل البيت اللي موجودين داخل... شوي و سمع صوت عبد الله ولد عمه من داخل:طيب طيــــــب جاي... ابتسم فيصل بس ما شال يده عن الجرس و ضل ضاغط عليه... انفتح الباب و طلع عبد الله:وش ذا الإزعاج... سكت و هو يشوف ولد عمه و أخوه و صديق عمره واقف قدامه.. عبد الله ابتسم و هو يقرب منه:يالحمار والله ما جا بالي عليك مع أن محد يسوي كذا إلا أنت... ضحك فيصل و هو يحضن عبد الله ولد عمه بشوق:أي هذا من ذكائك.. عبد الله ابتعد عنه بابتسامة حلوة:من متى جاي و أنا توني أدري مع وجهك؟ فيصل:أمس الليل جيت المهم روح ألبس و تعال انتظرك في السيارة... عبد الله طلع و سكر الباب:ما يحتاج لبسي مو عاجبك... مشوا مع بعض و ركبوا سيارة فيصل و عبد الله ما بدل ملابسة لأنه كان لابس تي شيرت و جينز و كبوس و شعره الطويل طالع من أطرف الكبوس ... وصلوا لكوفي شوب و دخلوا و قعدوا على طاولة و طلبوا لهم و ضحكات الشباب كانت مملية المكان... فيصل:والله من جد ما أكذب عليك؟ عبد الله مبتسم:أوف مقدر أنا ولد عمي ضابط يعني عندنا واسطات... فيصل ابتسم:لا حبيبي ما عندي شي اسمه واسطات بستخدم معكم القانون... عبد الله ضحك:تكفى يا القانون... فيصل وهو مبتسم:أي بشرني وش صار لك مع حبيبتك؟ عبد الله ابتسم بفرح و أشرق وجهه:خلصت عدتها و لو بيدي كان خطبتها من أول يوم بس هي قالت لي أصبر شوي تقول مو حلوة على طول كذا وش راح يقولون عنها الناس... فيصل:صح كلامها أصبر شوي مو طايرة هذي هي قاعدة.. عبد الله مبتسم:حبيبي لا تفرح أنا بكلم أبوي قريب و هي كيفها ما راح تقدر ترفضني أساسا... فيصل:واثق بقوة... عبد الله تنهد:عقب كل اللي صار ما تبيني أثق...والله أحبها يا فيصل مو مصدق أنها راح تصير زوجتي... فيصل ابتسم:الله يدوم عليكم... عبد الله:ونجلاء وش أخبارها؟ فيصل تنهد و هو يسند ظهره لورا:اسكت يا عبد الله و الله مدري وش فيها...من أمس لما رجعت و هي متغيره مــرة مدري ليه...تتوقع ملت مني؟ عبد الله ضحك و بمسخرة:وين تمل منك و هي ما تشوفك إلا أسبوع في الشهر... فيصل ضحك:هههههههههههههههههههه يا حمار... عبد الله:أنا أدري عنك قاعد تتفلسف(يقلد على فيصل)ملت مني... كملوا سهرتهم مع بعض و طول الوقت كانوا يضحكون و هم يسترجعون ذكرياتهم مع بعض... و فيصل ما رجع بيتهم إلا قريب الفجر و نجلاء كانت نايمة و هو اللي كان متوقعها قاعدة تنتظره..؟؟ طبعا فيصل لما عرفوا أهله بموعد رجعته جاوا له كلهم ثاني يوم و سلموا عليه و حتى عمه خالد و كلهم فرحوا له لما عرفوا بالخبر الحلو... ...الثلاثاء في قصر أبو عبد الله الساعة10الليل في المجلس الخاص للرجال... كان عبد الله نايم على إحدى الكنبات و حاط ذراعه على راسه و يناظر السقف بملل... قرر قرار أخير و ما راح يرجع فيه لو مهما يصير... انفتح باب المجلس و دخل أبو عبد الله و استغرب لما شاف ولده على هذي الحالة و تكلم و هو مقطب حواجبه:عبد الله وش فيك قاعد هنا لحالك.. عبد الله انتبه لما سمع صوت أبوه و عدل قعدته و ناظر أبوه:لا بس قبل شوي كان فيصل هنا و مشى و ضليت. أبو عبد الله ابتسم لولده و مشى للكنب اللي يمه و قعد عليه بابتسامة:وش أخبار الشركة معك؟ عبد الله هز راسه:الحمد لله كل شي ماشي تمام... أبو عبد الله مبتسم بفخر:أنا أفتخر فيك يا عبد الله..الكل يمدحك في الشركة من جد رفعت راسي فوق... عبد الله ابتسم لأبوه و بهدوء:تستاهل أكثر يبا أنت ما قصرت معي... أبو عبد الله:الله يعطيك العافية و يسعدك يا عبد الله...أنت رجال و ينشد فيك الظهر... ابتسم عبد الله لأبوه و هو يفكر في الموضوع هل يقول له الحين أو يصبر بعد... مسك أبو عبد الله الجريدة و بدا يقرا فيها بتركيز... عبد الله بعد صمت دام لفترة تكلم من غير تردد:يبا ممكن أتكلم معك شوي... أبو عبد الله رفع له راسه و لما شاف ملامحه الجادة سكر الجريدة و حطها يمه:خير يا ولدي تبي شي... عبد الله بلع ريقه و هو يحك راسه و مو عارف كيف يقول لأبوه عن اللي بقلبه:بصراحة يبا...أنا... سكت عبد الله و تكلم أبو عبد الله بخوف و بحنية:وش فيك يا عبد الله تكلم..لو محتاج شي قول لا يردك إلا لسانك.. عبد الله وهو يناظر الأرض:لا يبا خيرك سابق ما تقصر... اللي بغيت أقوله لك...أني أنا قررتــــ... سكت شوي و هو يستجمع قواه و تكلم و هو يرفع نظره لأبوه:قررت أتزوج... أبو عبد الله ضل ساكت شوي بعدها ابتسم لولده بفرح:هذي الساعة المباركة يا عبد الله أنت عارف رايي في الموضوع هذا من زمان.. أنا موافق و ما عندي مانع أنا حلمي أشوفك ليلة زواجك يا عبد الله بس أنت كلم أمك و قول لها تشوف لك بـــ... قبل لا يكمل أبو عبد الله كلمته قاطعته عبد الله بهدوء:لا يبا.. ما أبي أمي تدور لي عروس أنا لاقيها بس أبيكم تخطبونها لي؟؟ أبو عبد الله بنظرات حادة و حنونة:أوهــ والله و صار ولدي يفكر في عروسته ولاقيها بعد؟ عبد الله ابتسم:لا يروح بالك بعيد يبا هي وحده قريبة مــــرة و أنت تعرفها.. أبو عبد الله بفرح:طيب ممكن تقول لي من هذي؟ عبد الله بلع ريقه للمرة الثانية و تكلم و هو يراقب ردة فعل أبوه:..العروس هي.... شـــ... شوق بنت عمي... قال كلمته و نزل نظرة للأرض خايف من رفض أبوه لها و قلبه يدق بقوة شوي و يطلع من مكانه... أبو عبد الله باستغراب:شوق..؟ عبد الله هز راسه بصمت:............................................. ........ أبو عبد الله ابتسم:هذي بنت عمك يا عبد الله و النعم فيها بس أنت عارف أنها مطلقة ولا نسيت... عبد الله ناظر أبوه بجدية:لا ما نسيت...بس هذا مو عيب.. أبو عبد الله ابتسم له بفرح:أنت متأكد أنك تبيها ولا تقول كلامك عشانك متعاطف معها؟ عبد الله:افا عليك يبا... هذا زواج ما فيه شي أسمه متعاطف معها...أنا من جد أبيها؟؟ أبو عبد الله بفرح طالع من عيونه:و النعم فيك يا عبد الله...كل يوم عن الثاني أنت قاعد تكبر في عيني... شوق بنت عمك و أنا متأكد أنك راح تسعدها بس من جد استغربت... أنتوا يالشباب ما تفكرون ببنت مطلقة؟؟ عبد الله ابتسم لأبوه و بثقة:يبا ولدك غير... أبو عبد الله:أكيد غير... أنت فرحتني يا عبد الله فرحتين... فرحتني لأنك قررت تتزوج و فرحتني لأن العروس هي شوق بنت عمك... بيني و بينك أنا بعد كنت أتمناها لك من زمان بس أنت أدرى بالظروف اللي حصلت و هذا هي رجعت لك و كنكم مكتوبين لبعض... شوق بنت صغيرة و حبوبه و تستاهل كل خير...و ما تستاهل اللي صار لها؟ عبد الله ابتسم له:من جد يبا؟؟ أبو عبد الله:أي من جد و ليه ما تصدق؟ عبد الله قام و حب راس أبوه و قعد يمه:يبا مو عارف كيف أشكرك كنت متوقع أنك ترفضها؟ أبو عبد الله قطب حواجبه:وليه أرفضها مو هذي بنت أخوي... و إذا على الطلاق أنت تو قلتها مو عيب أنك تاخذ وحده مطلقة و خصوصا إذا كانت هذي بنت عمك من لحمك و دمك.. بس ما أوصيك عليها يا عبد الله... ترى البنت تيتمت من لما كانت صغيرة و حتى لما كبرت ما ارتاحت في حياتها هذا الحين الدور عليك.. عبد الله ابتسم لأبوه:لا توصي حريص يبا أنا ولدك تربيتك و أنت تعرفني زين.. انفتح باب المجلس و دخلت أم عبد الله و استغربت لما شافتهم قاعدين لحالهم في جو هادي و تكلمت و هي تمشى لهم باستغراب:وش فيكم قاعدين هنا لحالكم... أبو عبد الله ابتسم لها و لف لعبد الله:البشارة ولدك قرر يتزوج أخيرا... أم عبد الله ضلت تناظر عبد الله و بعدها ابتسمت بفرح و بدت تلولش بفرح... عبد الله ضحك:هههههههههه خلاص يما ما بعد يصير شي و بعدين أنتي للحين ما عرفتي العروس... أم عبد الله بنظرات من جنب عينها:بعد لاقيها العروس ولا تقول لي يا عبد الله... عبد الله ابتسم لأمه:الحين بقول لك يما... العروس هي شوق بنت عمي... أم عبد الله أبد ما عارضت و ابتسمت و هي تمشي لولدها بفرح:شوق ما غيرها... يا قلبي يا عبد الله والله من جد لايقين لبعض أنت و هي و شوق بنت ولا كل البنات... عبد الله ابتسم(أدري أنها بنت ولا كل البنات يا يما و الله أدري هذي ملاك مو إنسان) أم عبد الله:و متى تبي نخطبها لك؟ أبو عبد الله:باقي أسبوعين على زواج أختك بس نخلص من حوسة زواجهم و أنا بكلم عمك... أم عبد الله قطبت حواجبها و هي تناظر زوجها:وليه نصبر لبعد زواج رانيا الله يهديك أنا بكرة بكلم أختي أم محمد و أقول لها و بعد زواج رانيا نسوي الخطبة ولا وش تقول يا عبد الله؟ عبد الله ابتسم بفرح و هو يشوف فرحة أمه و أبوه:على راحتكم اللي تشوفونه سووه... وقف عبد الله عنهم بفرح:عن أذنكم أنا طالع و ما راح أتأخر.. طلع عبد الله من المجلس و ضلوا أمه و أبوه يخططون لزواجه بكل فرح... هذا مو أي أحد هذا عبد الله ولدهم الوحيد.. بالنسبة لعبد الله طلع برا و ركب سيارته و على طول اتصل على شوقه و حبه و ضل ينتظرها ترد عليه و قلبه بيتقطع من الشوق لصوتها... وصل له صوتها على آخر رنه بهدوء و نعومة:ألو... عبد الله ذاب مكانه:يا بعد قلبي الألو الناعمة هذي... شوق ابتسمت لما سمعت صوته:هلا عبد الله أخبارك؟ عبد الله:تمام...والحين أنا فرحان بشكل مدري كيف أوصفه لك يا شوق أحس نفسي بطير... شوق:أي قول عشان نفرح معك لا تصير أناني و تفرح لحالك.. عبد الله:طيب يا قلب الأناني بقول لك بس توعديني تفرحين معي؟ شوق ابتسمت:ما دام أنه شي يفرحك أكيد راح يفرحني ما يبي لها كلام بعد.. عبد الله و قلبه يدق بقوة:شوق اسمعيني مو عارف كيف أقول لك... شوق ضلت تسمع له بصمت بابتسامة:......................................... ............ عبد الله تنهد بقوة:أنا كلمت أمي و أبوي بالموضوع؟ شوق قطبت حواجبها:أي موضوع؟ عبد الله ابتسم:بموضوع قلبي يا حياة قلبي أنتي... شوق قطبت حواجبها بهدوء:عبد الله وش قلت لك أنا ليه منت فاهمني والله مو عدله كذا.. عبد الله:ليه مو عدله وش الغلط فيها؟ شوق:مدري.. بس وش راح أقول لأخواني وش راح أقول لأبوي؟ عبد الله تضايق شوي و تكلم بترجي:بليز شوق عشاني أنا... دافعي عن حبك لو لمرة وحده بحياتك لا تخلين حبنا يضيع مثل المرة اللي فاتت؟ شوق ضلت ساكتة:............................................ ........ عبد الله بترجي:شوق تكلمي قولي شي... أنا واثق أنك ما راح ترفضين بس لا تخيبين ضني و تحطميني مرة ثانية والله ما بقى فيني... أنا تحملت المر عشانك و أنتي عاجزة تسووين شي واحد بس عشاني أنا؟؟ شوق بهدوء و عبرة:عبد الله أنا مو عاجزة... أنت ما قطرت معي و أنا مستعدة أسوي لك اللي يرضيك بس أنا بنت و أنت رجال في فرق بينا... ما أقدر أوافق بهذي السرعة صدقني والله صعبه... أنت استعجلت أنا قلت لك أصبر شوي ليه ما صبرت؟ عبد الله:افا يا شوق... ليه أنتي تحبين عذابي كذا ليه ما تحسين فيني أنا أحبك صدقيني مو قادر أصبر عنك أكثر.. أنا زين مني صبرت الفترة اللي مضت و تبيني أصبر بعد.. شوق بصوت تخنقه العبرة:عبد الله لا تقول لي كذا... أنا محتاجة لك أكثر مما أنت محتاج لي بس مو بيدي صدقني؟ عبد الله بعد صمت تكلم بهدوء:فكري زين يا شوق... أمي و أبوي لما عرفوا الموضوع فرحوا من جد بس أنتي اللي ما فرحتي.. يللا أخليك.. سكر الخط و حرك سيارته بضيق... طلع له سيجارة و شغلها و صار يدخن و هو يدور بشوارع الرياض و يفكر بشوق و بكلامها و بعذابها... من جهة ثانية شوق سكرت الجوال و حطته على مكتبها بهدوء وهي تفكر باللي سواه عبد الله... هل هو صح أو خطأ؟ ليه هو مو راضي يفهمها؟ هي تحبه و ودها لو تجتمع معه اليوم قبل بكرة بس صعبة عليها؟ حطت راسها على مكتبها و حوطته بيدينها و تركت المجال لدموعها بالسيل على خدها... 
   
|
|
| مواقع النشر (المفضلة) |
| الكلمات الدلالية (Tags) |
| أعلنت, عندما, كامله |
| الذين يشاهدون محتوى الموضوع الآن : 4 ( الأعضاء 0 والزوار 4) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| عندما يأتي اليك من تحب وترى | دلوعة الليل | …»●[الاختلاف في الرأي لايفسدللود قضيه]●«… | 9 | 03-23-2009 05:06 PM |
| عندما تستيقظ من النوم ابتسم واشكر الله على البقاء !! | زخــآت مطر~ | …»●[ أرواح أيمـــانيـــه ]●«… | 13 | 03-02-2009 10:59 PM |
| ღ كن رائعاَََ ღ | a7med | …»●[مثاليــة أفلاطــون للمجتمـع الواحد]●«… | 11 | 02-17-2009 11:18 PM |
| صـدمـه ..!! | نادر الوجود | …»●[مثاليــة أفلاطــون للمجتمـع الواحد]●«… | 8 | 12-17-2008 11:40 PM |
 |
العرض المتطور
