ديوان الشاعر مدغم ابوشيبه

(( مولاتي )) !!


علـى طريـق الـغـرام اخــر محطـاتـي

نــهــايــة ٍ رجـعـتــنــي لـلـبـدايــاتــي

لو ما امتلا العمر من غيمـة بشايرهـا

لاكـــان عـمــري فـراغــات فـراغـاتـي

مـاجـت تـقــول الـهــوى ربٍ فنـعـبـده

ولا رســولٍ علـيـه افـضـل صـلاواتــي

جت تلغي اسوا مفاهيمي وتعكسها

عـلـى اتجـاهـات غـيــر الاتجـاهـاتـي

تاخـذ مـن اجمـل مراحلهـا وتعطينـي

مايجعـل احلامـي بـرهـن اختيـاراتـي

تقولـي خلـك مخـلـد عـلـى الحـاضـر

بلغي لك الماضي وبضمن لـك الأتـي

ابقا على تسعه وعشرين من عمـرك

وباقي السنوات ضفهـا مـع سنواتـي

الحـب ماهـوب طيـرا فـي سمـا ربــه

يرحل متى يرحـل وياتـي متـى ياتـي

الحب سلطان في ظلمه وفي عدلـه

يجبرنـي اقـول رغـمـا عــن قناعـاتـي

لـــك الـولايــه ورث الـقـلـب والبـيـعـه

الـمـلــك لله ثــــم إلــيـــك مــولاتـــي

يافتـنـةٍ مــن انــاء الحـسـن مصبـوبـه

على الجمال الطبيعـي بالمقاساتـي

قبلـك وكـل القلـوب الخضـر منساقـه

ورا الـنـسـا والمـفـاتـن والشـهـواتـي

ومن يـوم حولتـي انظـار البشـر يمـك

عيـت تلـد المشالـح فــي العبايـاتـي

لايمكـن الوقـت ياخذنـي ويسرقـنـي

عـن لحظـةٍ ذوبـت ذاتـك علـى ذاتــي

كن السحابه وانا عيني علـى جيـدك

تشكلـت فـوق راسـي مــن تنهـاتـي

حديـقـةٍ بـيــن نـهــر ونـهــر مـزروعــه

مـكـتـظــةٍ بـالــفــراش وبالـنـبـاتـاتـي

فسـتـانـك الازرق يــحــرر تفـاصـيـلـك

وانـــا اتـهـجــاه واخــونــك بـنـظـراتـي

لـو لـم يكـون اجمـل الالــوان ازرقـهـا

مــا اخـتــاره الله لـــون للسـمـاواتـي

ولو ماوقف خصرك الناحل ورا شعري

ماعلقـت فـي القبـاب الخضـر راياتـي

حبيبتـي لا لمحتـي الانـس يغمرنـي

لاينـخـدع قلـبـك بـزيـف إبتسـامـاتـي

لـو يولـد الحـزن مـن صـدرٍ بـلا ضيـقـه

مايولـد الضحـك مـن رحـم المعاناتـي

جيتـك وانـا ذكرياتـي كنـهـا الاسـمـاء

يشيلـهـا الـحـي لــو انـهـا للامـواتـي

ماجيـت اراجـع علاقـاتـي مــن اولـهـا

جيتك على شان اكفر عـن علاقاتـي