ديوان الشاعره ابعاد التركي

زيــــــــــد
هذا شهـر والنـور للعيـن مـالاح
والليل في وسـط الضمايـر مقـره
القلـب لايدلـه ولاهـوب مرتـاح
هــمٍ تثنـالـه وهــمٍ يـجــره
ليت المرض.. يا(زيد) يدفع بالارواح
" والله لجي بينك وبيـن المضـره"
وليت الحزين اللـي توقيـه ماطـاح
ساعة تذكر طيب وصلـك (وبـره)
(يازيد )وانت اللي لنا درع وسـلاح
أيامنـا مـن عقـب فرقـاك مـرة
ياكن نجـد فغيبتـك قفـر واشبـاح
والارض ودّعها الامـل والمسـرة
يامسندي ( ياخوى )دمع العزا بـاح
وانا على الـدرب البعيـد اتشـره !
قالوا عليك من المرض جهد وكفـاح
وقالوا بخيـر وحالتـك( مستقـره)
وانا على قربك مواريـدي شحـاح
والفكـر منـى كـل طـاري يفـره
والحزن له وقفة وتصوير والحـاح
والهـم مـا غابـت مساريـه مـرة
ياالله يافالـق مـن الليـل الاصبـاح
يامجـري نجـوم الفلـك والمجـره
يااللي بذكرك ضيقة النفـس تنسـاح
ياعالـمٍ بالغيـب خـيـره وشــره
تشفي عليـلٍ ساقـه البعـد نـزاح
البحـر دونـه والمسافـات بــره
عليه قلبي كـل مافـاض بـه نـاح
والدمع له في زويـة العيـن جـره
وعليه وجد الحال مسرى ومـرواح
وحشة فـراق ولـو عـةٍ مستمـرة
نرجيك يااللي رحمتك ساس الارباح
تكتب له مـن الخيـر دربٍ يمـرة
تغنيه يارحمـن عـن كـل جـراح
انـت الطبيـب وعالـمٍ مايـسـره
ويارب ثبتنا علـى درب الاصـلاح
واغفـر لـزلات القلـوب المغـره
ويارب ترحمنا مصليـن واصحـاح
ونموت مافينـا مـن الحقـد ..ذره