لحظات غريبة بين اثنين ...خلقت الحب في قلبين "

للمرة الالف قرت المسجات اللي طرشها ضاحي ..صج موب بخطه..بس انها منه تخليها تقرأها عشر مرات ..وهي ما تقدر تفهم شي منها ..
مسكت ورقة ..وكتبت ..
(( قلق ...
كل ذره في جسمي تنبض بهالشعور ..كل نفس من انفاسي مغلف بهيبه .
أتساءل ...هل هو انسان يظلم ويجور ..ام انسان أحلى مافي قلبه.. طيبه ...
أكره الساعات اللي بكل بطء تدور ...وأتساءل درب بكره وراه اي خيبه؟؟
هل هو درب الخير والكرم مكلل بزهورولا درب كله تعب وخوف.وريبه((
حطت الورقه في درجها ..وهي مستغربة ..وين ملفها اللي تعودت تحط فيه هالمحاولات الفاشله في صياغه حياته؟
ماخطر لها ان الملف عند خالد ...مع ربكه التجهيز وصدمة العرس ..تخيلت انها ضيعته ..
دانه ــ صباح الخير ,,
سلمان ــ صباح النور والسرور ..
دانه ــ خلاص بقدم اوراقي للجامعه ..
سلمان ــ وافق السلطان ؟؟
دانه ــ اييه ..شتسوي في المطبخ؟
سلمان ــ ريوق ..لاتنسين عندي محاضرات ..والحمدالله قربت اخلص ...
دانه ــ الجامعه صعبه سلوم؟
سلمان ـ ام التسعين تسأل هالسؤال؟؟ عيل ام الستين شيكون سؤالها .
دانه ــ تشهد أعوذ بالله من عيونك .
سلمان ــ هههههههههه ,,, كأن محد غيرج ياب هالنسبة ..تعالي تريقي معاي ..
دانه ــ وين خوانك وعيال عمامك؟
سلمان ــ حمد راح الشغل بدري ..وحسن راح مع صالح ومشعل السنتر ..خالد نايم ..وهذا أنا ..بروح الجامعه الحين .
دانه ــ كم باقي وتتخرج؟
سلمان ــ كورسين ..وأخلص ..طبعا مع الصيفي .
دانه ــ وحسن؟
سلمان ــ لا ..حسن خلص أربع سنوات في الجامعه باقي سبع ..
دانه ــ يدرس طب هو؟؟ شسبع سنوات؟
سلمان ــ هذا هو ..ما أخذ خلال هاأربع سنوات الا ستطعش ساعه ..بس!! والمطلوب للتخرج ميه وعشرين!اذا خلال أربع سنوات خذ 16 ساعه ..و4سنوات اللي يايه 16 ..واللي وراهم 16 ..لا غلطت في الحساب يبي له تسع سنوات ..64 و64..اييه خلال تسع سنوات ..تقريبا ..
دانه ــ 16 ساعه بس ..في 4سنوات؟ في ناس ياخذونها في سنه!!
سلمان ــ حسون كان يصقط في المواد ويشيلها .. وكان ياخذ كل سنه بس تسع ساعات نصها صاقط فيها ..(شايلها ..(
دانه ــ وناصر ساكت؟
سلمان ــ أبوي ما يسأل وايد ...كل اللي يهمه ..حمد وخالد ..انه حمد يترقى خلال فترة بسيطه من شغله ..وخالد يترقى في الوزارة ..ويصير قريب منه ..
دانه ــ زين خلود ليش نايم ليش ما يروح الشغل؟
سلمان ــ شغل خالد حاليا مايبي منه الا توقيع بس ..عند بداية الدوام وعند النهاية .. شغله بسيط ..خلال هالسنه بتصعب عليه ..مع الترقية الجديدة ..حرف الواو وما يسوي ..
دانه ــ دام ناصر واسطته قوية ليش ما ينجح حسن في الجامعه؟
سلمان ــ لان حسن نفسه عاجبته حياه المهسترين ..حياة اللعب والعزوبية والدراسه ..وشلته في الجامعه مثله.. مهستره ..مو مهتم يتخرج متى ..بس شي يشغله عن نظر ابوي ومحاتاة امي ..بحجة انه يدرس لي متى ؟؟ محد بيسأل .
دانه ــ هناء خلقه ما تهتم في حد ..من عرفتها واعذرني لصراحتي مهما كان هي امك ..بس من يوم ماعرفتها ..وهي تهمها الاشياء الظاهرية .وحاليا قالت انكم كبرتوا وبتركز على بناتها الصغار تحولهم نسخه منها ..فما استبعد انها ماتدري عن حسن شي ..الا انه يدرس ..ايش وين وليش ..ماتهتم بالسؤال .بس بتظل امكم ...
سلمان ــ بتطلعين اليوم؟
دانه ــ مع قمر بروح السوق ..بتلاقينا مريم هناك ..والله يعلم شتشتري لي هالمرة .
سلمان ــ بدا العد التنازلي ..
دانه ــ صحيح والله ..بدا..
بعد الريوق رن جوالها ..
قمر ــ أنا تحت ..
دانه ــ الحين أنزل ..
رجعت الغرفة والبست شيليتها وعباتها ..وطلعت ..
***************