ديوان الشاعر عبدالعزيز بن سعود - السامر

قصيدة النوافل - السامر


مجد الحساني في وجوه الرجاجيل
أبلغ معان النفس واعلا رتبها

إلى بذلت الجاه ما قالوا ابخيل
والمال بذله من مقادم وجبها

علق رجاك بكايدات المناويل
واحسب حساب المقبلات بعطبها

باكر على وضح النقا يطلع سهيل
ويكذب الحساب والخلق نبها

العجل ما يصبر على الحط والشيل
تقلبه الايام وإلا قلبها

لادم سيل النو لا تنطح السيل
والمقفيه لا تعترض في سببها
المترفات الضارية بالمواصيل
أحذرك لا تنجرف مع عجبها

يمكن يجيك العز هيل بلا كيل
غصب على ناس كثير غضبها

قوم ابرهه ما فادهم قوة الفيل
شبولهم نار وصاروا حطبها

أرسل عليهم ربنا طير أبابيل
أفنى جنود تغدى اللي حسبها

ابعد عن اللي يزرعون العراقيل
ويوشحون المغديات بذهبها

تبي نخل بغداد يشرب من النيل
منابعه من روس منداه جبها

ولا تقول الهرج من غير تدليل
أضغان خلق الله سريع ندبها

كم واحد يقع بفح المحابيل
يبي الطماعة والمخاطر جنبها

مخاطر تولد كبار وهي حيل
خلك حذر لا تعترض في نشبها

و لا تحلل ضايع الهرج تحليل
تبلش بكذبة كاذب ما كذبها

وصبرك على الاحداث لو يطول الطيل
ادراك غاية مفخت ما قضبها

الفايت اللي فات ما يدركه ويل
والحاضر امجاده لحي خطبها

كبل شفوف النفس بالصبر تكبيل
الشمس ما حي بكفه حجبها

تركيبة ايامك على العدل والميل
سنة حياة كلنا في طلبها

أحد قناده راهي البن والهيل
وأحد قناده شربة ما شربها

من دونها يوم تطارد به الخيل
في ساعة ياحظ منهو كسبها

وأحد يدور زود مال ومحاصيل
ويموت وصات العمر ما كتبها

وأحد شفاته بالليالي المقابيل
يبي المراجل ما يهمه تعبها

وأحد عليه من الليالي مداخيل
يغطي مداخل لهبةس له نهبها

تلعب بنا الايام جيل بعد جيل
موارث يلحق بها من عصبها

خل الأمل بالرب منش المخاييل
وتشوف كان الولي لك وهبها

ولا تخل النافلة تالي الليل
بر النوافل دايم في رجبها