ديوان الشاعرة اسيرة الصمت

نقاب .. و عبايا

كل بهالدنيا رزق له مزايا
وهالشي ربي خالقي خصني به

ياخذ ويعطي من جزيل العطايا
ومحد بياخذ فوق ما هو نصيبه

تدري مصيبة ذي ما هي فـ هوايا
وان ما دريت فهذي اكبر مصيبة

لنا تقاليد.. هموم وقضايا
ما ترتبط بالدين عادة غريبة

نساءنا تحشر بضيق الزوايا
لأنها أنثى تدفع اكبر ضريبة

وارجالنا تشبهوا بالمطايا
الكل منهم ناقل دون عيبه

المشكلة ما هي نقاب ..وعبايا
من ساء مفهومه ترى الله حسيبه

طفح بي الكيل وكسرت المرايا
وقاطعت مجلس به نميمة وغيبة

سبة من أكلن بعضهن بالوشايا
كل وحدة منهن لها أنياب ذيبة

وسط العسل تدس سم الحيايا
و ما تستحي تسقيه لأقرب قريبة

قصدي انا كله تفادي الخطايا
وقتلتني الوحدة ظروفي عصيبة

يبون عقلية قرون خلايا
جروح جداد فوق ذيك العطيبة

أسيرة الصمت

~~~~~~~~~~~~~~~~~~~~~~~~~~~~~