الكبـــــــــــــــاب الميرو مع السلطة " أكلة مكاوية مشهورة"

السلام عليكم ورحمة الله وبركاته جبت لكم اليوم وصفه حلوة وكثييير مشهوره عندنا بمكه وكمان يقولوا انها مشهوره عند أهل المدينه المهم يمكن سمعتوا عنها ويمكن جديده عليكم ماأدري بس هي سهله وبسيطه خلوني اعرفكم بالاكلة وهي : الكباب الميرو وعلى فكره في مطاعم شعبيه مخصصه لهالنوع من الكباب في مكة وماتبيع إلا كباب ميرو فقط وتعتبر مطاعم قديمه وأصحابها من أهل مكه زمااان ولا زالوا ففي هالموضوع راح أعرفكم على الكباب الميرو جربوه صدقوني بتحبوه زي ماأعشقه انا نبدأ بالمهم المقادير كاس لحم مفروم نص كاس دقيق دخن [ راح تلاحظ انه يختلف لونه عن الدقيق العادي مايل على خضار ] 3 فصوص ثوم مهروسه حبه بيضه [ كزبره ناشفه - فلفل أسود - ملح ] حسب رغبتك الكميات زيت للقلي الطريقة تعجن مقادير الكباب تمام وبعدها تكورها بس بشكل غير منتظم [ كور صغيره جداً بحجم قد حبات العنب الكبيره ] طبعاً ممكن تدخلها الثلاجه حتى وقت القلي اذا بتجهزها من بدري إقليها في زيت ساخن جداً وترى ماتاخذ وقت كثير لان الحبات صغيره مقادير السلطة الخاصة فيها بيض مسلوق خيار وطماطم مقطعه مكعبات صغيره طحينه طازجة من المعصرة ملح فلفل اسود خل ماء ثوم طريقتها في الخلاط ضع الطحينه والماء و الثوم و الخل هنا ماحددت المقادير بس زي سلطة الطحينه العاديه بعدها حطها على البيض و الطماطم و الخيار وحط الملح والفلفل برغبتك أساس الكباب يتقدم مع هذي السلطه والرغيف البر أو الأبيض ومعاه بطاطس مقلي بالبيت ملاحظات - تكور الكباب بشكل مو منتظم حتى يطلع مع القلي مقرمش - من عادات أهل مكه إنهم إذا سووا الكباب الميرو مايقدموا معاه إلا هالسلطه وبطاطس مقلي ضروري هالصنفين ،،، وإذا لا بد يتقدم معاه المطبق [ لا غنى من الزوائد بس قلت أقول لكم أصول الأكله ] الطحينه أفضل تسخدموا الطازجه من معصرة السمسم وصدقوني تفرق كثير كثير عن المعلبه وبالصحه والعافية عليكم :17: