رواية سحابة لو حملت جبال وحلوة لو شّربت المُر! / البارت 38

البارت 38❤❤.



سَـند :
تقدم لها خطوه وإبتسم لها علشان يهدي خوفها
وقال بصوت عادي ولا كأنه سمع خبر شين : وخير ياطير ؟
وإذا ارسلته لأهلي؟ واذا قالت لهم متزوج ؟ هو الزواج حرام ؟
ورد بلعت غصّتها : لا مو كذا بس.. أمك بتزعل
سند : ماراح تسويها ، واذا سوّتها امي مستحيل تصدق شيء عني لين تسمعه مني .
سكتوا شوي وارتاحت ورد وهدت نبضاتها وهمس سند : أجل تبي تاخذ كليتك هالحيوانه ، زين إنك خبرتيني!
ورد : انا خفت عليك ، ماقدرت ارجع للبيت وأخليك على عماك
سند سرح فيها وهي تتكلّم وكانت خصله من شعرها طايحه على خدها ، رفع يده لخصلتها ودخّلها بحجابها وقال بصوت خافت : أتخيل لو انك وافقتي ، وتبرعتي ، وضريتي صحّتك ، والله العظيم ساعتها لأقلب الدنيا عليك وعلى نوف ، بس حلو ماخدعتيني ، أثمرت فيك تربيتي !
رجع عنها خطوه وأخذ نفس وقال بهدوء : نسيت ارحّب فيك ، لخمتيني الله يهداك
ورد : عادي تكفيني الميّة هلا اللي قلتها لي لما أتصلت فيك لاتحسبني طمّاعة!
سند بعد تنهيده : ميّة هلا من مطلع العمر للحين .
ورد أبتسمت وصدّت عنه تدور مهرب لخجلها اللي ماكانت حاسبه حسابه، بالعكس كانت حاسبه حساب خنايق وشتايم ماتوّقعت إنه بياخذ الأمور ببساطة لدرجة إن الموضوع بعينها صار تافه.. عرف كيف يشيل خـوفها ويخليها ماعاد تفكّر فيه .
فتح الباب وطلع وهو يترقب الوضع ، وأشر لها تجي وراه وطلعت وراه بحذر الين وصلوا عند باب الشارع ، ومجرد مافتحه شاف بوجهه عمّته ليلى شايله بحضنها بنتها الصغيره وشهقت لما شافت ورد وقالت بوهقه : ياويلي ورد وش جايبك؟
ورد ببرود : جيت أشوف سند
ليلى بتوّتر : انا خايفه احد يشوفك ويتكلم عليك
ورد : ما أتوقع سند بيخلي احد يتكلم علي ، صح سند
سند : اه من لسانك ، صح
ألتفت لعمته وقال بهدوء : ورد كان عندها موضوع مستعجل وقالته لي والحين برجعها لبيتها
ورد بنبرة عتب : لا ماراح ترجعني للبيت بتوديني مطعم لإني جوعانه
ليلى : أقول انت وياها ، رجعها للبيت بسرعه وأتركوا عنكم الحركات اللي مالها داعي
سند سكت شوي وقال بصوت حاد : والله اللي ماله داعي أنتي، بسألك بالله كنتي بعقلك يوم رضيتي على ورد تشتغل عند نوف ؟
ليلى : ورد وضعها مايسمح تشتغل بأي وظيفه !
سند : غلطان لما قلتلك أنتبهي لها ، انا أدري مايعرف مصلحتها غيري
ليلى بضيق من كلامه : استح على وجهك ، ترا انا مثل امها
ورد لمعت عيونها من حوارهم عنّها وحست بشعور حلو رغم أحتدام الحوار حطت كفها الثانيه على كفّه وضغطت عليها في محاوله لتهدئته لكن سند كمّل بقهر : مثل امها وتاركتها تشتغل عند وحده حقيرة وماتربّت ؟ بهالشارب إذا ماخليتها تكره الساعة اللي شافت فيها ورد !
•