الديوان المكتوب للشاعر / محمد بن فطيس المري "المقروءهـ" المكتوبه

( يا قـــو قلــــبـــك )


ياقو قلبك على الصّـده ويـا صُــــــبـرك
وياوسع صدري على صدك ويا صُبري

وياطول عمـرك بذاكـــــــرتـي وياكُبـرك
وياشيب عيني بشيّب عــــاد ذا كــــُبـري

والله لون حمل صبري فوقـك..ان تبرك
والله ولو تعتذر منـت بعلـى خــــــــبـري

ان ما جبرك الغلا ما اقدر على جـــبـرك
ياللي على ارض الوفـا ما شبرك بشبري

تـــزعل وترجع وتـلقانـي عــــلـى خبـرك
وانا انكسر لك واجـــــيـك ادوّر لــجبـري

طـــيفك وذكــــراك طـيلـة غيبتـــك سبـرك
وشـــــوقي لشوفتك طيلة غيبتـك سبـري

امـــــحق وليف ومحبه والا اقــول ابـرك
حسبي عليك اعشقك وانت اتحفر قــبري

( يـــوم المزايـيـــن )


من لابتي مّره الى جـدي افطيـس ..
.. ربعي مطوّعة الصعـب بالصمايـل

ناموس ياللـي تكسبـون النواميـس ..
.. ياهـل العلـوم الغانمـه والجمايـل

اهل السموت وفي الملاقا فواعيـس ..
.. يقطعـك يـاهـرجٍ بلـيـا دلايــل

انتو خيارينٍ علـى الخيـل فريّـس ..
.. اسـمٍ ينومـس بيـن كـل القبايـل

يامقلّطينٍ شـذرة السيـف والكيـس ..
.. قد قالها ابن حميـد ضمـن المثايـل

منصا الرجال اللي على ضمّر العيس ..
.. وفالحرب نطّاحة شبـا كـل عايـل

هواجـرٍ لاجـات قدهـي مقاويـس ..
.. ركب الضيوف امن السرا والقوايـل

تنصـا ربـاع امتعّبيـن المحاميـس ..
.. مروين حـد المرهفـات الصقايـل

يردون غصباً والعـزاوي متاريـس ..
.. لاجـا نهـارٍ فيـه عـدلٍ ومـايـل

وامسيّسين اسياسة الفـوز تسيّيـس ..
.. باللبل وبالهجـن السبـاق الاصايـل

تفوز في يـوم المزايـن وفالريـس ..
.. من كـل منعوتـه تسمـى وحايـل

ولو حصل للبل من النـاس تفليـس ..
.. يكفيكم انك فالعـرب مـن لاوايـل

تلبس من العنّـاب زيـن الملابيـس ..
.. يوم المزاين مـع ارجـال الحمايـل

يزها بها لـون العلـم تتبـع افنيـس ..
.. ابـلٍ لهـا عـادات كسـب النفايـل

ومدحي لبو زايد محمد بـلا قيـس ..
.. مدحٍ لـو يقـارن بفعلـه .. قلايـل

الله يمهّـل بـه ويخـزي لاباليـس ..
.. وايدوم ذكره فـوق كـل الطوايـل

(لا ضاقت الدنيـــا )
لا ضاقت الدنيا عليك وتشاويت ..
.. خلق الله اللي فالرخا كان واجد

ومن العرب والصوت والثوب مليت ..
.. وقامت عليك هموم بأقعا تراجد

فارفع يديك لخالقك لا توضيت ..
.. وادعو تراك أقرب إليا صرت ساجد

ووقت من أوقاتك للأوقات توقيت ..
.. وسجل لنفسك في المساجد تواجد

وأبشر بفزعة حامي الدين والبيت ..
.. إليا هجدك من الهواجيس هاجد

اللي يميت الحي ثم يحيي الميت ..
.. لرضاه شف كثر البشر بالمساجد

( الــبـارحـــة )


البارحة ربي كتب لي ومريت ..
..دربٍ عليه بروق الأحباب لاحت

جيت المكان اللي جمعنا وخفيت ..
.. وقامت جروحي للجوارح وصاحت

ياليتني في لفة الدرب زليت ..
.. كان العيون من الدموع استباحت

التم غيم الدمع من يوم لفيت ..
.. وورقا القصيد لشوفة الغيم ناحت

وضحكت ماأبغي الناس تدري يبالفيت ..
.. لكنها غصبٍ على العين ساحت

حارت دموعي في عيوني وصديت ..
.. وأرمشت مابيها تبين .. وطاحت

وعقبه برق في العين براق .. واسقيت ..
.. خدي ووناتي بصدري تلاحت

وأنا أحسب إني في فراقه تشافيت ..
.. وان عبرتي من مدخل الزاد زاحت

اللي يحسب إني على البعد سجيت ..
.. والا ان عيوني للرقاد استباحت

ياليتني من قبل لا أحبه اقفيت ..
.. والا ان دروبي عن دروبه تناحت

أهون علي من البكا والتناهيت ..
.. وأشلا من سدودٍ على الناس باحت

عرفت كيف الحي يفرق عن الميت ..
.. وعرفت قيمة نعمتي يوم راحت

قولوله اني عقب بعده تدانيت ..
.. ورجلي عن دروب المعافين شاحت

البعد نار وطاعة العذل كبريت ..
.. يقصر على بعده .. ترى الكبد فاحت

( أنا جـــيت كـــلي )


ماهو بكيفك عقب شيٍ حصلي ..
.. من ذوّق المحتاج يصبر الى احرجْه

خليتني من حلو حاليك احلي ..
.. واصبحت مدمن حب والقلب روّجْه

بين العروق وصار مافيه " ملي " ..
.. الا وله جُرّه تمرّه وتسهَجْه

وذود الغلا في عشب قلبي تفلي ..
.. وتراب صدري للمطر منـْك ما احوجْه

يمحل الى صدّيت ويموت يا اللي ..
.. صديت عنـّه والله احياه واخرجْه

ولي خاطر ٍ يسألـْك من لي ياخلي؟ ..
.. غيبتـْك تلعب به وشوفتـْك تبهجْه

ولي عين حالي دمعها لك يهلي ..
.. وانْ رحْت راحت مالح الدمع تزعجْه

غالي ولا يحتاج بسّك تغلي ..
.. غلاك اخذ قلبي وروّضـْه واسرجْه

ولو قلت ياعيني بصدره تملي ..
.. شافت خفوق ٍ حبك الذرْب توّجْه

وماهو على كيفك عقب ما حصلي ..
.. من ذوّق المحتاج يصبر الى ازعجْه

(عطيتني وجهك وانا جيت كلي ..
.. محروم والمحروم ما ينعطا وجْه)

( همسات لبن فطيس )


حكّم ضميرك بين الاثنين واختّـر ..
.. لاهل العلا جرّه .. وللـدون جـرّه

الطيـب ماحـدد ابّحـرٍ ولا بـرّ ..
.. من جا على دربه من الخلق سرّه

يوم اللقا ما انّصف ضعيفٍ ولا سرّ ..
.. اللا مع مـن جـاد كـرّه وفـرّه

لو كان شفت النّاس ببشوت وغتّر ..
.. كم من محارٍ مـا لقـي فيـه درّه

الحلقه ان زرّت ابطان الجمـل زرّ ..
.. ما استرّ من لا عزوةٍ لـه تسـرّه

الجمره ان ماتت فلا ينّفـع الكـرّ ..
.. مافادهـا الشبّـاب لـو زاد كـرّه

كم واحدٍ يضحك وهو يضمر الشرّ ..
.. عرق الشري ما انّباك لونه بقّـرّه

ما كل من يضحك بوجه الفتى بـرّ ..
.. من يصدق الصاحب بالافعال بـرّه

،،،،،،،،،،،،،،،،،،،،،،،،،،،،،،،،،،

الذكا ما يلبس للفتى لبس ثوب ..
.. لا يحرّج عليـه ولا لمثلـه مـزاد

لا تدافع من اللي يحتمي له بطـوب ..
.. لا صفى جو مكه وش علي من تشاد

دام فيها مثل ماقيل نفضـة جيـوب ..
.. خل وضح النقا والصدق شف ومراد

،،،،،،،،،،،،،،،،،،،،،،،،،،،،،،،،،،

اذا اللي قبلنا مـا علمـوك؟ ..
.. مثل من جا وصـدّر مـا روا

ونكرانك جميل اللـي هـدوك ..
.. مثل من جوّد الصقر وشـوا

وسجّ وهج عن من هم نسوك ..
.. ترى من يتبع المقفـي غـوا

،،،،،،،،،،،،،،،،،،،،،،،،،،،،،،،،،،

البايع الشاري مع الناس مقبول ..
.. بيع وشرا عااادي.. قبول وتراضـي

الى اجتمع مرهي وشاعر ومخبول؟؟
.. خلطة ادب فاشـل تثيـر امتعاضـي

تشرى الذمم واتباع بالعرض والطول ..
.. والكـل ينظرهـااا بعينـه وراضـي

المال خلاّ غير معقووول؟؟ معقوول!!
.. ما ألوم نجم الاغنيّـه قـام ياضـي

ياللأسف.. ما كل منقـول مقبـوول ..
.. ثوبٍ مشجّر جنّب ثوبٍ ابياااااضـي

،،،،،،،،،،،،،،،،،،،،،،،،،،،،،،،،،،

في غيبتك ما ألد منا ومنا ..
.. ذكراك تملى وحشتك في غيابك

بالوقت في شوفة حلاك اتهنّـا ..
.. في وقفتك في مشيتك في ثيابك

لاجل العيون الناعسات اتغنّـا ..
.. الله يخلي لي غـلاك وشبابـك

البوح لك في شوفتك ما تسنّـا ..
.. مثل الكفوف الى شغلها التشابك

نسيت نفسي بين خنـه وحنّـا ..
.. بين العيون وبين صافي عذابك

،،،،،،،،،،،،،،،،،،،،،،،،،،،،،،،،،،

ألا يا وجودي وجد من فاجأه ديان ..
.. برغم اعتزال الناس من كثرة اديونـه

بعد ما فضى جيبه وكفه وحاله شـان ..
.. تناسوه ربعـه كنهّـم مـا يعرفونـه

تناسوا مواقيفه ولا كـن شـيٍ كـان ..
..على غير ما ترضى الكرامه يحدونـه

وهو كان منقع طيب منهل وفا واحسان ..
.. فلاشـك عّـوان الزمـان ايتحدونـه

رفع كفه الخالي الي الخالق الرحمـن ..
..عقب ما تصافوا كلهم ظلم مـن دونـه

،،،،،،،،،،،،،،،،،،،،،،،،،،،،،،،،،،

ابعدت مثل الحرف لا فارق شفـاه ..
.. ثم ضاع باحضان الفضا في العباره

ماهو بفرض اني على طول ويـاه ..
.. الكل منّـا عـز راسـه شعـاره

لو كان من راسه الى حد ماطـاه ..
.. زينه يزيّن خطوتـه فـي مسـاره

،،،،،،،،،،،،،،،،،،،،،،،،،،،،،،،،،،

لك حق تشره لو اني جيت ما جيتك ..
.. لاشك يامسنـدي تاتـي ولا تاتـي

في غيبتك لاحصل طاريك حييّتـك ..
.. واحمّل الغربي السـاري تحياتـي

،،،،،،،،،،،،،،،،،،،،،،،،،،،،،،،،،،

قطر موطني وأنا مثل من تربوا فيه ..
.. راع البل وراع المال والغيص والفلاح

رجال الا سمعوا نداه أجمعوا لبيه ..
.. تطيح الغتر والروس .. بس العلم ما طاح

سواعد الأمير وفي المحافل فخر ووجيه ..
.. ونارد حياض الموت كنحن خرز مسباح

،،،،،،،،،،،،،،،،،،،،،،،،،،،،،،،،،،

الموت تالي العمر والدنيا مقيل ..
.. والآخره هي منتهانا لا محال

وديني وحب الناس والخلق النبيل ..
.. ثلاث هي دربي الى حسن المئال

الله يقدرني على رد الجميل ..
.. واللي يجملني الا جالي مجال

،،،،،،،،،،،،،،،،،،،،،،،،،،،،،،،،،،

اندوج بأشقر صافي الظهر والذيل ..
.. مطروح قد ريشة ظهره محروقه

يطلع وطلعه لا طلع .. طلع دربيل ..
.. زود على طلعه وطبعه .. لحوقه

له هيبة في الجو قبل المحابيل ..
.. فرخ العقاب ايخاشره في حقوقه

،،،،،،،،،،،،،،،،،،،،،،،،،،،،،،،،،،

لا تحسب الجفن من دمعه عقيم ..
.. يستحي منك والا اقفيت انثره

ولا يغرك وان بدا جسمي سليم ..
.. والله انه مثل سور المقبره

والله ان احر من دمع اليتيم ..
.. دمعة الرجال من فرقى مره

،،،،،،،،،،،،،،،،،،،،،،،،،،،،،،،،،،

غاسل كفي من مصافحة بعض اليدين ..
.. وقافل بوجيه أهلها صناديق البريد

أشهد اني للبلاوي على الدنيا مدين ..
.. كل ما راجعت نفسي طلعت المستفيد

المواقف تشخل الناس والطيب يبين ..
.. كل عام يطيح تسعه ويصفى لي وحيد

،،،،،،،،،،،،،،،،،،،،،،،،،،،،،،،،،،

ودي بك .. وأبيك وأباك وأبغاك ..
.. جمعتها لرضاك واختار فيها

كانك مشكك في الوفا والغلا هاك ..
.. جوالي اقر القائمه كل ابيها

رقمك مع (الصادر) ولا (وارد) أسواك ..
.. والناس في اللي (لم يرد عليها)

،،،،،،،،،،،،،،،،،،،،،،،،،،،،،،،،،،

بعض العرب حبـه يـوردك الجنـون
ولا يوصف لـه غـلاه احكـاك لـه

مايقنعه وصف الغلا لـو وش يكـون
لو كل حـرفٍ بالحريـر يحـاك لـه

الموت جاك وهـو تقلبـه الضنـون
ولا لك الا الصبر....وش وداك لـه؟

ان قلت ضايق..قال : هونها تهـون
مايدري ان ضيقتك لـه وبكـاك لـه

تقعد تحبه وانـت ساكـت ومغبـون
يمكن بيوم يقال له مـا اوفـاك لـه

وكانك مشكك هو يمون او مـا يمـون
تخيّل ان عفـت الصبـر فرقـاك لـه

غلاه من فوق الغـلا ماهـو بـدون
وحكاه سمعك يجبـرك بارخـاك لـه

ودك تحطه فالعيـون مـن العيـون
وتبسط على رمضى الثرا يمنـاك لـه

وتظله من الشمس في ظل الجفون,,,,
ولا يمر اذنه سوا لباك له

وتسج من غيـره لونهـم يذكـرون
ومنين ما سجت القـدم ممشـاك لـه

فلو ٍ يميله التـرف ميـل الغصـون
غصن ٍ ليان ومكرمـه بسقـاك لـه

جديله الى اقفى ستـر منـه المتـون
كنّـي بريحـه لالتفـت لدعـاك لـه

يزها الملابس ..اي لبس ..واي لون
وفالليل وجهـه لا ظهـر قـداك لـه

كيك وعسل لكن ماهو فـي صحـون
ودعاك من عين الحسود اغطاك لـه

الله لا يعطيـه نـاس س ينضلـون
ويستر عليه مـن النحـل لا ياكلـه

الوصف والتعبير في وصفـه يخـون
غير اطلب الله يستجيب ادعـاك لـه

وعذال قلبك فـي محبتـه يخسـون
سكينهم عـن قطـع حبلـه حاكلـه

اللـي مـن لحـوم الاوادم ياكلـون
وحلوقهـم دافـع البـلا متواكـلـه

ناس ٍ عن اعراض العرب ما يعرضون
ودايم على نفس الشكـل والشاكلـه

في سلمهـم اولا بالاكـل الاقربـون
واطيبهم اللي صيدتـه شكـواك لـه

يدعيهم الشيطـان للذنـب ويجـون
هـذا يقطـع لــه وذاك يواكـلـه

يا جعلهم فدوة ثـر الغـض الفتـون
اللي على الدرب الطويل اخطـاك لـه

طيفه الى نـام البشـر زارك بهـون
وطيفك الى نام البشـر سـرّاك لـه

حبه دفان ومقبـرة خضـر الطعـون
بيـن العظـام العـوج كنـك تاكلـه

اللي كذا حبـه لـو تمـوت مغبـون
ولا لك الا الصبـر .. وش وداك لـه

( قد عطيتك )


قد عطيتك وانـت ماضنـك لئيـم ..
.. والنصيـحـه لليـالـي تـذكـره

لاتحرك جرحـي الماضـي الاليـم ..
.. ولاتحسب ان طول بعـدك طهـره

كل جرح يهـون يالجـرح القديـم ..
.. وكل شي قد مضـا معـك اذكـره

جرحي وذكـراك والليـل البهيـم ..
.. حـزت فـوادي بمثـل المنشـره

العذول غراب وانا اكبـر غشيـم ..
.. والجروح الماء وطاريـك حجـره

والزمان اكرم من الحـظ الكريـم ..
.. لانفتح لي بـاب صوبـك سكـره

وحبك اللي لاطرى لي رحت اهيـم ..
.. قمت احسب اصغر كلامك واكبـره

ليتنـي عـاد الهـوا تـوه فطيـم ..
.. انعذلـت لعاذلـي بـس خـيـره

مالقيت من الوفـاء يـااول نديـم ..
.. كون صدق الحزن وجهه وظهـره

عقب رمح الشوق في وجه الصميم ..
.. سيف هجرك في قفاه وشف ثـره

وانت شكلك تحسبنـي فـي نعيـم ..
.. لنـي اخبـي صوابـي واستـره

لايغـرك حلـم رجــال حلـيـم ..
.. مهون اللي مـن سكوتـه فجـره

ولاتحسب الجفن من دمعه عقيـم ..
.. يستحي منك والى اقفيـت انثـره

ولايغرك وان بدا جسمـي سليـم ..
.. والله ان جسمي سـوار المقبـره

والله ان امر من ضحـك الغريـم ..
.. شوف حقي بين اياديـه اشكـره

والله ان احر مـن دمـع اليتيـم ..
.. دمعة الرجـال مـن فرقـا مـره

(عقبال مية عام )



عقبال ياماخذ فـؤادي ميـة عـام ..
.. ضيعتني منك وانـا مـا اهتديتـك

لا ..ما نسيتك كيف بانساك مـا دام ..
.. ذكرى الفراق تهزني لـو نسيتـك

حبك قدر وانا على ديـن الاسـلام ..
.. مكتوب في وجه الجبين ورضيتـك

لك في الضمير الود والحشمه اتوام ..
.. ولي في ضميرك مثل ما انا بغيتـك

ولك منزلٍ في نايف القلـب وخيـام ..
.. وذود الغـلا ترعـاه ولا شكيـتـك

يفطر عليك القلب وان فارقك صـام ..
.. والله لونك شـوك سـدره كليتـك

القلب طيرٍ لادعـي للهـوى حـام ..
.. والا انت وكره من كثـر ماهويتـك

كن العيون من النظر عقبـك ايتـام ..
.. وكني ماريت الا انت من يوم ريتك

وكنك معي وانا فقدتك مـن اعـوام ..
.. مـع الخيـال القـاك كنـي لقيتـك

من صعب وصلك ما تهنيتك احـلام ..
.. وان جابتك فزيت شـوق ومحيتـك

يعني وصالك صعب واهدافي اوهـام ..
.. يعنـي زرعتـك للقـدر ماجنيتـك

صبرك يقولون العرب كـل الايـام ..
.. يوم عليـك ويـوم لاجـاك جيتـك

ويا قلب ياللي ورثك اجـروح وآلام ..
.. بليتنـي ماهـو بانـا اللـي بليتـك

ولعتني من عادني في الهوى خـام ..
.. واسرفت بي وانا خطامـك عطيتـك

طعتك وزبدة طاعتـك هـم وهيـام ..
.. مالله كتب لي واستخرت وعصيتـك

لوللقلـوب اسـواق بايـع وسـوام ..
.. لاابدلـك وان جيتنـي ماشريـتـك

والا انت ياللي جيش عينيك مقـدام ..
.. لا اقنعت منـك والرجـا مارجيتـك

كني سجين بين..افـراج ..واعـدام ..
.. وكنك سجن وانـا بنفسـي بنيتـك

تنبيك عن حالي محاصيـل الالهـام ..
.. وتخبرك نظراتـي نهـار التقيتـك

عقب الوصال اللي على عين من لام ..
.. قدهو يكفيني عن الوصـل صيتـك

وقدني الى مريت بالشـارع العـام ..
.. لديت من ما في الضميـر ودعيتـك

ادري ان صوتي ماقطع عشرة اقدام ..
.. وادري بي اعود الى مـن نصيتـك

ياشينهـا يامحنـيٍ راس الابـهـام ..
.. ماقدر على شوفك وانا عنـد بيتـك

الاعمار ما تضمن وانا اخاف الاحكام ..
.. ارثيك خـاف اودعـك مـا رثيتـك

( الحب مثل النوم )


الحب مثل النوم .. والوصل .. الاحلام..
.. والشيين من الاحلام..صـد المحبييـن

نوم ٍ طويل ٍ عمره اشهـوور واعـواام ..
.. وان قمت.. ففهمها فرااق وسهر عيـن

وانا رقدت وعمري اربع عشـر عـام ..
.. وصحيت في شهر اربعه عام الالفيـن

نـوم ٍ ثقيـل ٍ كلـه احـلام واوهـاام ..
.. ونصيبي من احلامـه الجانـب الشيـن

صحّى الفرااق اقلوب في عكسه..نيـام ..
.. وغاب الفرح وانا بعكسه الـى اللحيـن

ياحزن كبدي حزن من ضاق ثـم حـام ..
.. اخذت فروخه مـادرى ليـه ولويـن؟

بعد ما شاف العـش عيـدان وعظـام ..
.. خاالي..تفكر فووق ويسـاار.. ويميـن

خلا عشاها فيه ومـن الوطـى شـاام ..
.. زبن علـى روحـه وفـل الجناحيـن

وياوجد حالي وجد مـن نـام ثـم قـام ..
.. على صياح امـه وهـو دون رجليـن

عويـق وامـه تنعتـه والنعـت سـام ..
.. وهو خابر انه يقسـم الصـف صفيـن

حبا وصاح بصيحـة ٍ تاصـل الشـام ..
.. منهـا تقطّـع فـي خفوقـه شراييـن

على وليـف ٍ قسـم اظنونـي اقسـام ..
.. واقفى وانا ما اعـرف طـرد المقفيـن

راح وترك في صدري ووسووم واعلام ..
.. وصـى علـي طيفـه وقفـى بقلبيـن

ليتـه تعـذّر كـان مـاهـو بـمّـلام ..
.. بعد ماشـااف الـدرب بيسيـر دربيـن

اشوى عليه شوي..مـن عـظ الابهـام ..
.. واشوى علي شوي..من دمعـة البيـن

تمشـي بنـا الاقـدام والمـوت قـدام ..
.. وميعادنـا يمفـرق اثنـيـن بعـديـن

ياعيـن لا تبكـيـن وعيـونـه تـنـام ..
.. عادش الى ما خـاب ظنـي بترضيـن

لـو الدمـوع اتفيـد فـادن الايـتـام ..
.. ولـو الكـلام يفيـد عـادت فلسطيـن

ولـو النبـاات يطّلعـه دمعـة هيـام؟..
.. شفتوا علـى وجهـي ورود وبساتيـن

الحب سجن..وبعد الاحبـاب الاعـدام ..
.. وقلوبنـا السجّـان مـدري مساجـيـن

الحب نوم ٍ عمـره اشهـوور واعـوام ..
.. وان قمت ففهمها فرااق وسهـر عيـن

( يالله عفوك )



يالله عفوك يوم تصفية الحساب ..
.. يوم حصاد لما زرعنا في السنين

يوم الحشر قرب ولا معنا زهاب ..
.. اليوم في الدنيا وبكرة راحلين

نجني ذنوب ونرتجي عفو وثواب ..
.. وعلى نصر ربي لنا مستعجلين

تدرون ليه آمالنا كنها سراب ..
.. تدرون ليه النصر سيف الأوليين

الأوليين أعمالهم وفق الكتاب ..
.. قاموا عليه وباعوا الدنيا بدين

وحنا غفلنا بين مالذ وطاب ..
.. والنصر سيف ما يسله غافلين

نصبح على شوف انتهاكات وخراب ..
.. ونمسي على دمع وتنهات وونين

بصدورنا شي تذوب اله الهضاب ..
.. وأفعالنا والواقع رياح .. وطحين

وعلى العيون من الفتن مثل الضباب ..
.. معد درينا من يسار ومن يمين

ما للضيف الا الدعا لو ما يجاب ..
.. ما غيره الا الشوف مكتوف اليدين

يالله زلزل تحت الأعداء التراب ..
.. والطف بنا واحقن دماء المسلمين

ندعوك يا قادر على جعل السحاب ..
.. جيش لنصرة قلة مستضعفين

أغرقهم بنوع من أنواع العقاب ..
.. غرق الغلام اللي يحسب انه فطين

لوما عصى نوح نجا به في رحاب ..
.. سفينته وأمضى معه في العمر حين

لكنه اختار الخساره والذهاب ..
.. اصنع بهم صنعك به وانت المتين

والا اخذهم يا مجري سود الحقاب ..
.. أخذ العجوز اللي بقت في الغابرين

ذوقهم اللهم أنواع العذاب ..
.. اللي عثوا في أرضك أمن المفسدين

وألطف بمن لبسوا من التقوى ثياب ..
.. عبادك المستهدفين المتقين

تكالبت عليهم أنياب الذئاب ..
.. ولا غير عونك يا معين الصابرين

من بينهم شيبه يعجزون الشباب ..
.. من وقفته من طولها في الركعتين

ومن بينهم بنت تون بلا حجاب ..
.. أحجابها لفوا به الجرح المكين

وطفل عن عيون أمه الثنتين غاب ..
.. تبكيه عين وتلتفت لأخيه عين

من هول ما يجري لهم شاب الغراب ..
.. يا وسع حلمك وانت ما فوقك مدين

أدعيك وانت ادرى بحال أهل المصاب ..
.. وأمد كفي لك يا أكرم الأكرمين