ديوان الشاعر / فارس الطريسي (فارس الوفاء)

درب الفقر

وشفيك يادرب الفقر من ملـذات .......

فيك العنا وفيك الشقا والبـلاوي

لاشك مافيك الا همـومٍ ثقيـلات .......

من طاح بك حظه رديٍ شقـاوي

تلعبه الدنيـا بوسـط المتاهـات .....

ويسوق رجله في دروب الرجاوي

يتعب ولا يلقى من الوقت بسمات .......

ويخوض فالدنيا شبيه الفـداوي

يصبح مع الامال روحـه وردات .......

ويمسي ودمعه داخل العين زاوي

ولا قرب فراشه لفتـه المعانـات .....

تكثر حلومه كـن قلبـه هـواوي

بفعل واسوي والموارد شحيحات ........

ويعزي نفسه في كثير المنـاوي

احيا تضحك له دقايق ولحظـات ........

وبلحظه ترجع له كثير البـلاوي

يعيش يومه بين ونه وحسـرات ........

طايح بحزنـه مالقالـه مـداوي

ما احدٍ يبي شوفه ولاله رفاقـات .......

حاله كما حال اليتيـم الجـلاوي

ماله جدى ياكود صرخه وعبرات .......

من لوعةٍ بالقلب ماهـي بتـاوي

عليه بالمسجد وكثـر التـلاوات ........

يجيه من ربه جزيـل العطـاوي

اللي رزق خلقه بليـا حسابـات ........

واللي ماغيره يستحق الهقـاوي

وياما حلا في تالي الليل ركعـات .......

وترفع يدينك تطلبـه بالدعـاوي

لاشك هذاي لذة العمـر بالـذات ..........

لاصارعودك مع هل الدين راوي

عــــــــــــــايف النوم

حاولت انام وخاطري عايف النـوم .....وعجزت ياعمـري اذوق المنامـا

بعدك زرع في وسط قلبي له سهوم ......وخلاني من غيبتك هايـم هيامـا

تعبت في وصلك وحدتنـي سلـوم ........ومابيننا لاشـك نرفـض حرامـا

محروم من شوفتك يازين محـروم .......وانا الذي معطيـك حـب وغرامـا

الشوق يلعبي وانا غصب مكتـوم ........وفي وسط قلبي تاركٍ لـه علامـا

صبرت وصار الصبر ماهو بزيزوم .........من عقب ماهو وافيٍ لـي تمامـا

واصبحت من بعدك انا اليوم مهموم ........جتنـي همـومٍ كلبوهـا عظامـا

حبك غدالي ياهوى البال مقسـوم ........قسـمٍ يفرحنـي وقسـمٍ ظـلامـا

قسم الفرح لاجاني من يمك علـوم ........وقسم الحزن لاغبت وين السلامـا

لاشك في حبك انا اليـوم ملـزوم .........وارخصلك الغالـي ولابـه كلامـا

وحاولت انام ولالفى عيني النـوم .........يوم ان خلـق الله تبـات وتنامـا

..( افراح دنياي)

غابت ومعها غابت افراح دنيـاي .........وغابت معها كل لحظـه سعيـده

وجلست انا والهم والحزن وشقاي.........اذكـر زمـانٍ فـات الله يعيـده

هلت دموع العين واتعبني بكـاي.........وبغيابهـا قلبـي تقطـع وريـده

وضاقت بي الدنيا وثقلت بي خطاي..........واصبحت مثل اللي مضيع وليـده

بغيابها زادت همومـي وبلـواي.........الله يشيلـك يالظـروف الشديـده

دايم تبين الحزن يخيم على سماي........وتبين ضرباتك بصـدري سديـده

وتبين بعد اللي لها القلب شـراي........وانا وهي صرنا بـروحٍ وحيـده

لها بقلبي حب زايد علـى غـلاي.........لنفسي وروحي بغلاهـا شديـده

في قربها يزول همـي وبلـواي........واعيش وسط الفرح دنيا سعيـده

واشوفها قـدام عينـي لهـا راي........تأمر على روحـي بقـنٍ تجيـده

ولاشفتها اجيها كلي من اقصـاي.......واروح انا فيها بضحكـه فريـده

هي عشقي الاول وهي اكبر مناي.......وغلاها وسط الجوف ماأحدٍ يبيده

وتبيع كل الخلق ولاتريد فرقـاي.......وتبغى تعيش بقري شخصٍ تريده

ماانساها لو انسى حياتي ودنياي........حتى لو صارت عن حياتي بعيـده

دفتر العشاق

الجادل اللي سرت من نجـد مقهـورة

يحدهـا الوقـت والايـام تشقيـهـا

سرت وهي عن ديار الحب مجبـوره

غصبٍ عليها ولكـن مـن يراعيهـا

تنظر وراها وعين القـرب مكسـوره

على وليـفٍ عليـه الـروح تبديهـا

نظرة حزن تتعـب القلـب وشعـوره

وهلت دمـوعٍ تكفـه وسـط اياديهـا

قامت تفكر وتجمع صـوره بصـوره

وتذكر ليالٍ وليـف الـروح ناصيهـا

وشلون حاله عساهـا دوم مسـروره

تبغى تعـرف الـذي يخـص غاليهـا

ماتدري إن الزمن زايد علـي جـوره

وإني مـن فراقهـا حالـي اعزيهـا

وأن الوضع يوم راحت زايد خطـوره

الله يستـر علـى روحـي ويحميهـا

غلاها وسط الضماير فارض حضـوره

متمكنٍ وسط روحـي عايـشٍ فيهـا

الله يذكـر زمـانٍ فاتـت عـصـوره

ايـام راحـت ماتنـسـى لياليـهـا

كنا نشيـد غلانـا ونبنـي قصـوره

واللحظه اللـي علـى الملـه الاقيهـا

واحكيلها كيف وسط العيـن محفـوره

صورة ضياهـا تصبحنـي وامسيهـا

واشكيلها البعد والاوضـاع معسـوره

وتشيكلي الغيبـه اللـي دوم تكويهـا

وتكتبني قي دفتر العشـاق وسطـوره

وتحكيلي عن حبها وصـادق معانيهـا

ومرات تبكي حزن ومرات مسـروره

واللوعه اللي بوسط الـروح تخفيهـا

يانـور عينـي تـرى والله معـذوره

دنيـا تفلـب عجزنـا عـن بلاويهـا

حكم القدر غصب نمشي دوم في شوره

الله ومـر حاجـةٍ لابــد يقضيـهـا

ودرب الهوى ياحياتي صعب دستوره

يبعـد قلـوبٍ تـدور مـن يواسيهـا

وباح الخفاء والليالي حيـل مشكـوره

تعلـم اللـي مايـدري وش بلاويهـا

والله يجمـع قلـوبٍ حيـل مقهـوره

يحدهـا الوقـت والايـام تشقيـهـا

قافي المحبوك






قافي المحبوك

ياقافـي المحبـوك وشفيـك وشفيـك............لاقلت عطني بيـت جتنـي دموعـك

لـك مـدةٍ بـس التنهـد مخـاويـك..........أنصحـك لكـن ماتفتـح سمـوعـك

مـدري علامـك ماتبيـح خفـاويـك..........لاشـك ماهـذي سوايـا طبـوعـك

عطني سبب قلي وش اللـي مخليـك...........طافـي ولاتضـوي عليـه شموعـك

يمكـن اداوي علـةٍ حـيـل تـذيـك...........او اني اهـدي مـن اسبـاب روعـك

وشفيـك ماتسمـع خفوقـي يناديـك...........من اقصى ضميره يرتجي كشف لوعك

بالله بيـح لـي وش اللـي معنـيـك..........وانا اخبـرك وافـيٍ فـي طلوعـك

قال استمع بيتٍ مـن الشعـر يغنيـك..........لاتتركـه لـو انـك تحـب كوعـك

إحفظ صلاتك قبـل عمـرك يجافيـك........ولغيـر ربـك لاتبيـن خضـوعـك

انا اشهـد إنـك جبـت بيـتٍ يكفيـك.........بيتٍ يبين لـي فخـر طيـب نوعـك

انا حفيد اهل الوفاء منبع الطيـب......اللـي مراجلهـم عزيـزة عليـه

اللي بهم افخر بوسـط الاجانيـب......واللي لهم روحي ونفسـي هديـه

اللي رقوا بالمجد رووس المراقيب......واللي سمو بالعـز فـوق البريـه

اللي مواقفهـم تسجـل بترتيـب......في صفحة الامجاد حـروف نديـه

هم عزوتي من دون شكٍ ولاريب......وهم نخوتي لاصار فيهـا حميـه

وهم فرحتي لاشفتهم بالمناصيـب.......وأحزن اليـا منـه لفاهـم أذيـه

إليا زعلوا نارٍ تسـن اللواهيـب......وإليا رضو صـارو ظـلالٍ وفيـه

ومن هو نصاهم مايردونه مخيـب.............يبشـر بعـزه لـو تحـل المنيـه

مشهود لنا بالفعل عند الاجانيـب.....تشهد لنا العربان زيـن السويـه

حربي ولد حربي ودربي هو الطيب.....بحر الوفاء والجـود نبعـه يديـه

تمشي خطاوينا ولانقـرب العيـب......ونشوم عن هرج الوغى والرديـه

خوينا مايشـوف منـا عذاريـب......يفرح اليا من شاف حربي خويـه

نفعل ولانـدور وراهـا مكاسيـب......جمالـة حربـي مايـدور جزيـه

وفي وصفهم تجف كل المكاتيـب.....لكن لهـم منـي سـلام وتحيـه

درب النـــقاء

امشي على درب النقاء وين مارحـت........واتبعـك ياكـل الـدروب الشريفـه

ولكـل واحـد لـه الاسـرار بيحـت........سـري مكانـه بالقلـوب النظيـفـه

اللي بهـا الدنيـا صداقتهـم ربحـت........خوة وفـاء مثـل الوليـف لوليفـه

ولامـرةٍ وسـط المجالـس تبجحـت.......ارفع لسانـي عـن علـومٍ خفيفـه

ومايوم عند الناس دجـت وتبطحـت.......اعـز نفسـي لـو ظروفـي كليفـه

وإليا احتمى الموقف وللشـر نطحـت.......ضرباتي في صدر المعـادي عنيفـه

ومن دون ربعي مايجي يومٍ وشحـت.....انا لهـم فـي كـل موقـف خليفـه

ومدامني عن حـق غيـري تريحـت......ولاأحـدٍ يطالبنـي بلقمـة رغيـفـه

انا اشهد إني صرت مرتاح وارتحـت.......ورزفي على محـي العظـام الرفيفـه

ومن خوة اهل الطيب انا فزت وافلحت........متقاسميـن المرجـلـه بالنصيـفـه

هذا وانا عن سلم الاجـواد مازحـت........لاشك انا اعشق كل حاجـه شريفـه

كــــــــل الغــــــــــرام


يابنت حبك داخــل الــــــروح مامات
حبٍ حقيقي له مشاعر خفوقي
يسري بوسط الجوف ماله مسافات
في وسط دمي ماشيٍ في عروقي
لـــــي تيـــةٍ وحده ماهي بعشر نيات
ابغاك في شرع الولي من حقوقي
دايم على شــــوفك اسوق المنيات
وعمري على لاماك والله شفوقي
يانــــــور عيني مابقى شي بالذات
غير الوفاء وإخلاص قلبٍ صدوقي
وإحساس شاعر ناظمٍ فيك الابيات
يكتب على شأنك لحون وطروقي
أفرح على شأنك إلا شفت بسمات
على شفاتي كل بسمة تروقي
واشوف زولك داخل العين بسكات
كني ظلام الليل وزولك بروقي
في غيبتك ماأشوف غير المعانات
وقلبي من غيابك تصيبه حروقي
خذيتي عمري دون ذنب وغرامات
ورمشك يانور العين لقلبي سروقي
ويبقى غرامك داخل الروح مامات
حبٍ حقيقي له مشاعر خفوقي

قصيدة موجهه للشاعر / صالح بن مصلح الحربي

يم الكويت اشغل الجيـب بشويـش

واعشقـه بالـدي واقــول : يالله

تستر علينا من جميـع التفاتيـش

وتاقـى خطرنـا يالهـي مـن الاه

أباصل اللي يكرمـون الطواريـش

اللي منازلهم علـى العـز مبنـاه

واخص فيهم دون نقصٍ وتهميـش

صالح بن مصلح على الطيب مرساه

هذا ولد عمي له المجـد درويـش

نعم الرجل لاقيـل ذكـره وطريـاه

ياصاحبي ماشفت شيٍ لـي ينيـش

ويتل قلبي يارفيقـي مـن اقصـاه

شـيٍ يتعبنـي وبالخافـق يجيـش

وبنـات فكـري عايفـاتٍ سوايـاه

جانا خطر ماهو سلاحٍ مع الجيـش

مصيبةٍ جتنا علـى غيـر مشهـاه

الوضع مايبغـى علـومٍ وتنبيـش

الشعر صابـه علـةٍ فـي حنايـاه

خرابت القيفـان جتنـا معاطيـش

تبغى تسلـى بالحـروف المقفـاه

كلن على خباله شبك وصلة الفيش

وقام يتلاعـب بالطواريـق بغنـاه

الله يستـر لايجـي فيـه تشويـش

وتشوف بالمعزى قصايـد معانـاه

اول حياته يلقط الكيـس والخيـش

والحين شاعر عالمي فـي مزايـاه

إعلام فاشل زود الطيـش بالطيـش

ماغيرك احـدٍ يالمـدارات يرعـاه

صفحات شعبيه عسى دايم تعيـش

يقودها حرٍ علـى الطيـب مربـاه

وإلا البقيه صابهـا اليـوم تبويـش

كلن تصفق لـه وتدعـم خطايـاه

وختامها جتك القوافـي معاطيـش

يسقيهـا ردك يارفيقـي بمعـنـاه

رد الشاعر / صالح بن مصلح الحربي :

مازفته عقـب العصيـر المراهيـش

وابل مطرها من علي ارضه دفق ماه

وما اسدل جناحه طيرها ضافي الريش

ومن زار مكـه طامـع ٍ بالمناجـاه

يا مرحبـا لهـا الحنايـا مفاريـش

معطـره بالمسـك والعـود مهـداه

بفارس وفا نسل الرجال المداغيـش

رجل الصخي والطيب من طيب مجناه

من لابـة ٍ تاريخهـا حـي ويعيـش

حرب العزيزه مجدها عالـي الجـاه

ويا صاحبي انعشت هالروح تنعيـش

في غيرتك للشعـر واخـذت حسنـاه

ومادمت وامثالك ثنيتوا معـه ليـش

مايرتفـع سهمـه ويرقـي لعليـاه

ولاهو بحاجـه للقلـوب المغاشيـش

ولا اهتز ركنـه لـو تفجـر زوايـاه

متعنّـزن ماحششّـوه الحواشـيـش

تقصر يديهـم جعلهـم مـن فدايـاه

ناس ٍ همج في شوفهم صار تعميش

يبي الشعر يملا مـن المـال مخبـاه

يبحث عن الشهره ويدفع بخاشيـش

وهـذا يتاجربـه .. وهـذا يتمـالاه

وان جا قصيده لا المعانـي خرابيـش

معني تجـاوز بـه ومعنـي تمثنـاه

ناس ٍ لك الله مثل سواة المخاريـش

طبّل لها الطبـال وصـارت مهاتـاه

يجيك واحدهم يهابـد كمـا الديـش

يمشي بـلا تفكيـر يشعـب مطايـاه

يا صاحبي لو شفت وضعك شوابيـش

الشعر قدرِه عنـد رجـال ٍ مسمّـاه

مايصح غير الصح رغم المخاشيـش

والجدي هو وسهيل تِعـرف نحايـاه

والليـل يبقـي راحـة ٍ للخفافيـش

اللي تهاب النـور لا شعّـت اضـواه

وراس الظبي من قبل مابه عراميـش

والعين الرمـدا كحلهـا مـا تحـالاه

واسلم وسلّم وانت ذيـب الغطاليـش

والارض ارضك والسما لـك مغطّـاه

لـــــــــذة النـــــــــــــوم

ياليت حلو النـوم تهنابـه العيـن.........مير البلا عافـت لذيـذ المنامـي

متى تجيني حـزه النـوم وتحيـن........ويرتاح بالي مـن كثيـر القيامـي

وكثر السهر عذب عيوني له سنين........ولعب بحالي لعـب حـر بحمامـي

وصارت حياتي كلبوها بـلا زيـن.......وبين الشقا والياس قلبي حطامـي

تعبت ادور فرحتي والهنـا ويـن......والمشكله حظي مسك في زمامـي

ليته ترفق يومـه اسقانـي البيـن.....مـازود القلـب المعنَـى ملامـي

وإلا رفعني فوق وكـر الشياهيـن.....وإلا وقف وقفة رفيـقٍ عصامـي

وش حيلتي لاصار بالقلب هميـن......هم الحياه وهـم حـب وغرامـي

دنياي تطلبني ولها بذمتـي ديـن......وصعبه اوفـي دينهـا بالكلامـي

وخلٍ معاهدني على الزين والشين.......بعـده يزودنـي جنـون وهيامـي

ودي بقربه لكـن الوقـت حاديـن.......ياقوهـا لاشفـت خلـي امـامـي

من دونه الايـام تتعـب وتشقيـن......وقربه يداوي قلب بالحيـل ظامـي

لاشك ذقت المر والصاع صاعيـن.......وذقت العناء وجروح قلبي سقامـي

ومن لامني عساه يطعـن بسكيـن................بين الحنايـا دمـه اليـوم حامـي

ومتوكلٍ باللي خلقنا مـن الطيـن.........ربٍ كفـل بأرزاقـنـا بالتمـامـي

واكرمنا عن خلقه من الناس ثنتين.........نبينا محمـد وشـرع الاسلامـي

ولاصرت بين الناس بالحيل مسكين.........الديـن يجعلـك كبيـر المقـامـي

ويالله ترزقني انـا بكثـرة الديـن.........وترزقني يارحمن مجمل احلامـي

ومتى تجيني حزه النـوم وتحيـن..........وارتاح لو لحظه بحلـو المنامـي