الشاعر ناصر بن حطاب الدهمشي

شاعر شاب
يكتب بفكر الشعراء ذوي الحنكة المميزة
وشاعر مجتهد يكسب زواره ومحبيه من
خلال نشره لنصوصه في اشهر مواقع الشعر

قصيدة (أضداد)

للتحميل
اضغط كليك يمين واختار (حفظ الهدف بإسم)



وش حيلتي لا غشتني صورتك بالمنام
في ليلة ما تعذر العاشق المستهيم
فيها التَّوجِّد على شوف الحبايب حرام
و الشوق فيها على روس الثواني مقيم
مليت اشوفك على غصن امنياتي حمام
لا هزَّه الخوف ... شلَّع و اقتفاه العتيم
اسمع هديله يرتِّل للحياة السلام
يوصي غيابه ... يكون إفاقدينه رحيم
مثل الأصابع مكانه في غياب العظام
ماله تفاصيل وشكله لو وصفته دميم
حل المسا وامتلا حلمي سراب وغمام
وامسيت ما بين قربك وابتعادك اهيم
شاعر تجر المواقف من عيوني كلام
أقسى من الفقد صمتي في ملامح يتيم
اشبه حنين اليتامى لارتشاف الهيام
لا مرَّوا بشارع كل عابرينه حريم
فيني من الهاربين البهذلة وإنهزام
فيني من الثابتين الإنتصار العظيم
فيني من الليل حزن يستثير الظلام
فيني من الصبح نور منكسر بي قديم
أضداد كل المعاني في عيوني تنام
زي ما تنام الطفولة في عيون الفطيم

زفرتين وكلام

(للتحميل)
اضغط كليك يمين واختار (حفظ الهدف بإسم)


هذا الطفل في ضلوعه زفرتين و كلام
مدري ولكن عيونه خلفهن ما يهيل
ياصورته ليه اشوفك تكثرين الملام
اتبسمي وازرعيني في مكانه نخيل
لا يخدعك عنفواني اشبهه بالتمام
شاعر بلاني زماني بالعذاب الثقيل
عادي نشوف الملامح يعتريها غمام
عادي تكون الطفولة درب موحش طويل
عادي يموت الشجر ما هز غصنه حمام
يتْرحَّمه كل فصْلٍ ما جلب له هديل
عادي نمر المقابر ما نقول السلام
عادي نمر المآتم ما نحس بعويل
حنَّا نعيش بْزمان موغل بالظلام
عقَّد لنا هالطريق ولا عطانا دليل
نمشي نوزِّع بعضنا في دروب الزحام
متحيزمين الغياب اللي رماه الخليل
في ذاكرتنا وجيه فارقتنا تنام
لحباب صارت ملامحهم بقايا رحيل
وِبْ/أمكنتنا تناما الخوف و الإنهزام
لين استحال الطموح لْ/أمكنتنا يميل
يا صورته ليت يدري هالطفل عن مقام
دمعه بعين المكان وعين شاعر نبيل
ياصورته اهدنيه وخلي عينه تنام
غيره تغرَّب صغير وعاش عمره ذليل
يا صورته لو كتبنا ما نعيشه تمام
ماكان شفتي كثير مْن المشاعر هزيل


ناصر بن حطاب

هم الغياب

(للتحميل)
اضغط كليك يمين واختار (حفظ الهدف بإسم)


في غيابك يعزف الما داخل إعيوني اغاني
مايبي مِنِّك حنينك بس يبغى تسمعينه
يا كبر هم الغياب إن جيت أدوِّرك إبمكاني
ما اشوف إلا رحيل طال وأنتي تتبعينه
إرجعي ما عاد فيني حيل لسيوف الثواني
يا ثقل دم إنتظاري لا عقد لي حاجبينه
اتلحف بالشتات...وداخلي إنسان ثاني
حاير مثل أجوديّ نابت إبوجهه حنينه
من رحلتي هالمدينة كل ما فيها [ مباني ]
ينكسر فيها غروب و تنجبر فيها ضغينة
إن شكيتك للطريق إتضيق ارصفت المواني
وإن شكيتك للمدينة ..ضاقت أنفاس المدينة
لا الفضا بعدك فضاي و لا الزمن هذا زماني
إنتهى بي كل شي و لا بقى للحلم عينه
علميني .. يا عظيمة كيف أكون بإتزاني
كيف أعيش بخير و أنتي هالتلاقي تبعدينه
ما جمعني في غيابك غير حزني و إهذياني
و ما نثرني يا وجودي غير فرقانا اللعينة
إن تذكرتك تحير الكلمة بأطرف لساني
وإن سهيتك إشتياقي تعبث بصدري يدينه
ابحري بي يا بعيدة .. لآخر إحدود الأماني
يمكن إنلاقي بعضنا ( حلم ) أقفت به سنينه
و إن سألتي كيف حالي لا تعانقنا ثواني
قلت لك من يوم غبتي ..اغلب الأيام [ طينة ]
في غيابك شيّ أعظم من أخاف و من اعاني
في غيابك حتى وجهي لو عرض لك تجهلينه



ناصر بن حطاب الدهمشي

راس الغياب

(للتحميل)
اضغط كليك يمين واختار (حفظ الهدف بإسم)


يطيـح الليل .. في حضن النهار ويبتـدي ميــلاد
صباح ٍ يـكتب الذكرى علـى أشيائـي ويمحيها
كثيـر أشيـاء أقـابلهـا بنفـس أشكـالهـا تنعـاد
حِـزن هالحي وطيـور ٍ خريـر الماء يصحِّيـها
أنا من وين أبلقـاهـا ( تهاني ) و الغيـاب إعتاد
يساهرني وحـسـراتي عـُـمُـر والليل يوحيها
دروبي كلها زحمة وجيــه .... ولا بها أجــواد
ومشـاويري تعلِّمـك إحتيــاجي لـو تروحيهـا
تعبـت أجامل أوجاعي .. وأنا فيني تعب وأضـداد
تعبت أدوِّرِك و أرضـي تـشتـتـنـي نـواحيهـا
و تعبت أضيـِّف هموم ٍ تجيني كـل يوم جـداد
تفـك حلوقهــا و أمـزع لها من متني وأدحـيهـا
تهاني.. إرجمي راس الغياب ورجـِّـعي لي بلاد
تـرى هـالحـال بغيابـــك تناحينـي واناحيهـا


ناصر حطاب الدهمشي

أغراب

لسماعها اظغط هـُــنا

كنت أجْمَع الغيـم إبجناحينـي وْهِـي
كانـت تهجَّـى بالسحـاب إختلافـي
أنثى ملامحها يـا لـو تِنْقِلِـب مـي
ما كـان فرَّحـت الظمـا بإرتجافـي
في صوتها كل غايـب ٍ يقتـرب لـي
وفي همسها كل خوفٍ يموت غافـي
نضحك..! و ينبت في وسَطْ ليلنا ضي
نَسْكِت ..! و تِخْلَقْ من نِفَسْنَا مرافـي
عشَّاق تبعدنـا المنافـي عـن الغـي
نسرق من عيون الغيـاب.. التّجافـي
نسهر وكل همٍّ تـوارى بنـا .. نـي
هم ٍّ عّلَـقْ بشفاهنـا و هـم خافـي
الأرض نامـت مابهـا غيرنـا حـي
و ريْـح ٍ تِكَحِّـل عينهـا بالسوافـي
مـن كُبْرَنَـا نطـوي غياباتنـا طـي
حافين .. وْ يركض خلفنا الشوق حافي
نَحْلَمْ .. و لا شِفْنَا من أحلامنا شـي !
[ أغراب ] .. لكـن جمَّعتنـا منافـي



ناصر بن حطاب

نشوة استشراق
لسماعها اظغط هـُــنا

لبسني صوتك البارح وأنا في نشوة إستشـراق
أحـارب فلسفـة حلْـمٍ رمانـي فـي متاهاتِـه
صحيت و نامت أوجاع السنين وجيت لك منساق
لـدرب ٍ أجهلـه ..لكـن تعلَّقـت بمسـاراتِـه
أبحيي صمته بركضي مادام إن الفضـا رقـراق
بشعر ٍ يشرح صـدور الحيـارى فـي ملاقاتِـه
أبزرع بك طهر آدم .. أبجني من نحرك إعنـاق
عناق أصدق من آهات لْغريـب ٍ موطنـه فاتِـه
و إذا مات الرجا دونك .. أعيشك بالمنام أشواق
أعيشك ( أجودي ) صدره تزاحم فيـه فزعاتِـه
طريقي لو بدى وردي .. يا عمري بالنهاية شاق
وأنا شرقي سقا مجده مـن أمطـار إنتصاراتِـه
دخيلك يا زمن قـدِّر مسافـات إقطعتهـا سـاق
ولا تتعب عظم ساق ٍ ذبـح لـلأرض خطواتِـه
أنا اللي تعرفه صدري تضيق سنينك وما ضـاق
نما عشقي وسط قلب إحظنته عْـروق نخواتِـه
لـذا لله أعتقنـي .. بغنِّـي للـغـلا مشـتـاق
بمسِّي صوتهـا قبـل المسـا تتكاثـر أصواتِـه
مسا الخير يا صوت ٍ طرد سرب الظـلام و راق
مزاجي .. لين بعَّدنـي حنينـي عـن غياباتِـه
مساء الخير يا جـذع ٍ حكـى لطفلاتِـه الأوراق
خفايـا أربـع فصـول ٍ تمـرَّد جوَّهـا بذاتِـه
مساء البسمة العذرا على شفَّـة شعـور ٍ بـاق
من عيونِك إضـاءاتٍ زرعهـا فـي مساحاتِـه
مساءك غير يا حرف ٍ تغنِّى في غـلاك وْ فـاق
من نعاس ٍ قضب جفن القصيد وْ يرفض إفلاتِـه

تمــــــــــــــــــــــت ...,