ديوان الشاعرة/همسة عنا

الشعر متعه وكل شاعر أجاريه
ببيات شعر نابعه من خيالي

وفيها أختصر ما أقول بروعة معانيه
وخير الكلام ما قل بكل المجالي

يا مطول أبيات القصيده على إيه
القصد واضح من جنوب وشمالي

من صغر سني والشعر عايشه فيه
غلاه عندي حسبت أصغر اعيالي

بيني وبينه عشرة إسنين مخاويه
بشهد على ما أقول كل الليالي

الحر يفهم بالإشاره معانيه
ويعرف بين غالي و غالي

مسك الختام سبعة أبيات تكفيه
يدور فيها من جوابك سؤالي

ريح الخزامى على معنى مكاتيبي
تفوح عطر الموده من مكاتيبه

على نسيم الليالي جت على طيبي
من كل صوب عطرها فاح تسريبه

وأنا عزيزة مشاعر مصدره عيبي
مكانتي فوق طيبي من عذاريبه

يمناي دايم بودي داخله جيبي
على الكرم هاجس الإحساس يسريبه

يا مرسل أشواق قلبك صعب تسريبي
أخذه عبره وليلي ما أقدر أسريبه

هذي الحقيقه وكل الناس تدريبي
جنبت درب الهوى وجفت مشاريبه

رغبة عيوني تهاوت بخطوة دروبي
الحب قلبي نساه وما يماريبه

على الحكى ياغاوي الرأي ما احلاك
جبت القمر والشمس للي أمامك

وأنا الذي أعرف خفايا نواياك
وقدرك صغير منثني في كلامك

من بين كل الناس أفهم خفاياك
وأعرف مواطي نظرتي في ملامك

بنت الحمايل جنبت درب شرواك
ماهمها حكيك وكثر إتهامك

الورد من حوله مسافات واشواك
يجرح إيدينك قبل يجرح اقدامك

لا إنت ولا غيرك ولذا ولا ذاك
يوصل اورود ترتفع عن مقامك

أقولها لك من تصاريف الأفلاك
يمديك تفهم نزوتك واحترامك

واختامها ضيعت وقتي وما جاك
يكفيك ياتايه ابعتمت ظلامك

في غيبتي .. مالي على الدنيا ملام
همسة عناء .. فيها تعابير الغرام
يوقف غلاي .. مني على حد النظر
يركض وراي .. ويشوفه كل البشر
وتنثر سحايبها غلا .. وتنبت على عيوني زهر ..
وأقول أحبك .. موت أحبك ..
وأعطر الدنيا زهور ..
من دمعتي فاحة عطور ..
وأنادي أيام الهوى ..
على أمل نبقى سوى ..
وأسامر دروب السهر ..
وأصحى على طيف القمر ..
وأرسل مراسيلي عذاب ..
على مراويح السحاب ..
تعبت ما اقدر أمنعك ..
واوادع أحلامي معك ..
وأخايل عيون السحاب .. أعاتب أيامي بلاك ..
وأقول أحبك .. موت أحبك ..

المعاني عطرها فايح علينا من مكانه
ريحها ريح الخزامى والعطر سايق هبوبه

منك يافلانه لفتني والغلا معتز شانه
والخطا وارد وبعض الناس مهيب معصومه

بلغي راعي المكارم بالنيابه عن شيهانه
زلتي فيها إحترامي والخطا أعرف ادروبه

عمري ماجرحت إنسان عن زلة لسانه
عمري ماذكرت إنسان في كثرت اعيوبه

عارفه حدي ولا يمكن أبادر بالإهانه
الوفاء طبعي ملكته دايما أنساق صوبه

زلة جت سبه في سبايب في زمانه
الغلا فيها يماري في مواطنها سلوبه

كل قصدي من وراها ضحكة ترفع مكانه
فهمي قصدي يافلانه زلتي ماهي محسوبه

أنا بعيده قريبه ما أحب المعمعه
حولك ولانيب حولك خافقي ماسلا

صوتي معك لا تتجاهلني وتكفي أسمعه
اطلق عنانه تعرف إني معك في الملا

ترى المشاعر على بيوت الشعر مولعه
ترتاح فوق القصائد في مواري الفلا

أقولها والشعر يعرف ترى مرجعه
ياصايغ القاف قلبي قال مية هلا

جتني المشاعر وليلي زاد فيني موجعه
نقض اجروحي وخلاني جريحه ولا

هذا زمان غريب مايجمع معه
غير الهموم الكثيره مع حلوم البلا

حولي اظروف الليالي كلها منوعه
لا قلت راحت خذتني وقالت الفين لا

على عذابي ظروفي للأسف مبدعه
تقابل إحساسي بكلمه هلا ومسهلا

تحبني حب جارف والشقى مطمعه
تصدق إني أشوف المر فيها حلا

مليت صبري وصبري عافني مدمعه
من كثر ما اشكي أحس إني وحيدة خلا

ما غير أكابد زماني لا بكيت أدفعه
ذي قصتي يا شديد الباس بين الملا

أنا معك وأتفق يامعلن الدعوا
هرج القفا باين للناس تأثيره

ماهو جديد ولا له قيمة وجدوا
من سالف الوقت أجاهد حول تدميره

أهل النمايم تزود بطبعها الحكوا
والعاقل إللي يميز وزن تعبيره

أدور الطيب وعيبي دونه القسوا
وأرفع اسلاحي بوجهه في مشاويره

أنا أصيله وأحب إللي به أمروا
من فوق راسي أشيله فوق عن غيره

يملكني إللي بقلبه للبشر نخوا
لا جا مجاله يعطر طيبه السيره

أقولها وإنت تدري ياولد حوا
إن الوفا طبع فيني صعب تغييره

الله وأكبر عذاب صابني بهموم
مدري هو علم ولا وهم في ظنوني

من غالي زل في حقي بكف ظلوم
وأنا أحتمل وقلبي كله اطعوني

لو كنت عني غريب ما يلحقك لوم
لكنك عندي عزيز ودايم تموني

علمي بك إنك أصيل وتدرك كل علوم
آه يا فهد كيف عليك بلحظه اهوني

ترخص بقدري بكيف ثم علي تقوم
آه يا فهد فيني أوجاع من اشجوني

تذرف عيوني بهمسات وعتب وهموم
ياليتها جت من غيرك تراهم ما يهموني

ولك في خفوقي عظيم الود لك مكتوم
وأنا اطلب الله مصيبة أمري تهوني

باكر مع الوقت تعرف حقي مهضوم
وإنك علي أخطيت يا عز مضنوني

أرخ الحبل كلما شديت
لا تقطعه بيني وبينك

ياما وياما معك أرخيت
وحبل الهوى براحة إيدينك

إن رحت عني زعل أو جيت
حد الزعل عيني وعينك

أعرفك أنا من حمام البيت
يومين وتسأل علي وينك

يامالك الطيب أنا ما أخطيت
معقول أنا أحرجك وأهينك

أنا معك صادقه حبيت
شفني على عالم سنينك

ردة فعل بالغلا زليت
أموت لا يمكن أدينك

ما أدري وش إللي معك سويت
ياخف دمك ويا زينك

آخذ قراري في جميع المعابر
أجنب عيوب وراها الذليله

أكرم سبيل إللي لفى الدار عابر
وأدور علوم تجيب الفضيله

ماهمني من راح شاكي ودابر
ما دام في الدنيا مضيع دليله

المسلم المؤمن وراه المقابر
على النعش الناس لازم تشيله

كتبتها على الورق بالمحابر
أبيك تفهمها بأيت وسيله

مانيب أكابر ياجريح المنابر
أقوله لك يارفيق الفشيله

ما همني صالح وخالد وجابر
أصيلة من عائلات أصيله

الحب نزوه وإنت بالحب صابر
ليلك ظلام دايم تشتكي له

خلي الهوى لهله حرام تكابر
وكل على الدنيا يلاقى مثيله

ترى النساء مثل الرجال مخابر
وأقولها لك والهوى لا تجيله

دور على مثلك مع الناس عابر
تضحك معه ساعه وتطلق سبيله