 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
01-24-2023
|
||||||||||||||||||||||||||||||
|
||||||||||||||||||||||||||||||
رواية على وتر الحياة غنينا البارت الثالث
{ البارت الثالث } مُعظم الأشياء لم تعُد قابلة للتمسُك خالد بأسى ع حال امه : نقول الحمد لله ام الزين : الله يشفيها ويرفع عنها ياوليدي عساه تخفيف عنها خالد: اللهم امين دخلت زين بالقهوه والتمر : السلام عليكم خالد وأم الزين: وعليكم السلام قام خالد لما شاف الدلة والصحن بايدها: هاتي عنتس ماكان له داعي اتعبتي نفستس الزين وهي تعطيه الصحن وتمسك الدلة : واجبنا خالد: ماني غريب يازين انا من أهل البيت الزين: لا تعتبرها ضيافة غريب وبعدين كنا بنتقهوى قبل تيجي خالد بمزح: مين يتقهوى الظهر ام الزين : ههههههه توي اقولها عاد هالبنت تتقهوى بعز القايلة لا تستغرب خالد بضحكه: من كانت تصحى تالي الليول وتصيح تبي مقالي وانا غاسلن يدي الزين باحراج: كنت بزر خالد بمزح وضحكه: ومازلتي الزين وهي تمد الفنجال : سم يالشايب خالد وهو يضحك: سم الله عدوينك ، اي شايب ماتشوفين الشيب ملى راسي ام الزين : الشيب زادك وقاره ياوليدي الزين: اللي يسمعكم يقول الشيب جاهه عن كبر موكأنه من وهو صغير ام الزين : هههههههه الا كيف شغلك ؟ خالد: الحمد لله ماشي حاله ، والتفت لزين : كيف دوامتس الزين: الحمد لله تمام خالد بستفسار :وش صار ع موضوع البعثه؟ قدمتي الزين: اي وبيردون خبر خالد: الله يكتب لتس اللي به الخير الزين :امين ام الزين : استأذنكم شويات وارجع التفتوا لها اثنينهم واسترسلت الزين : على وين يايمه كانتس تبين شيء اجيبة ام الزين: لا يابنيتي بروح الحمام وانتم بكرامه واجيكم الزين+ خالد: كرمتي وقف خالد :وانا بروح جيت سلم عليتس يايمه واتطمن عن احوالتس الام: اجلس ياوليدي ماخلصت فنجالك خالد: مره ثانية ياخالتي ومابي اطول عليكم الام: حلفت ان تجلس اقل شيء اشرب فنجال ثاني وروح ماشبعنا منك باس راسها وجلس : وعشانتس جلسنا الزين وهي تاخذ فنجاله وتصب وتمده له : اخبار خالتي خالد : الحمد لله الزين: ليه ماجبت البنات معك خالد: للحين مارجعت البيت خلصت دوامي وقلت امر اسلم ع طريقي الزين: جيبهم المره الجاية خالد: ليه ماتجينهم انتي الزين: ماقدر اخلي امي بلحالها ولا هي بترضى تروح معي خالد: اذا كنت انا اللي بوصلكم بترضى رفعت الزين حاجب وهي تناظرة : وليش تجينا انت ؟ خالد وهو يتربع بعد ماكان متكي ع المسند : لاني اولى من الغريب الزين :مانبي نتعبك مشكور خالد بجدية وهو يناظر ردة فعلها للكلام اللي بيقوله : الزين الزين وهي تصب القهوه بفنجالها : سم خالد:سامحتيها؟ رفعت الزين نظرها له ثم نزلته للفنجاال: وش يفيد جوابي؟ خالد:امي حالتها الصحية كل مالها تزيد سوء يازين الزين: الله يشفيها خالد: ابيتس تسامحينها الزين: اسامحها على وشو بس؟ على الطريقة اللي عاملتني فيها ولا على الكلام اللي جرحتني فيه؟ خالد: اعرف ان الكلام وكل شيء قوي عليتس لكن تكفين سامحيها نزلت الزين فنجالها: عشانها امك يااخالد تبيني اسامحها؟ لكن ماهتميت للشعوري ولا لصدمتي ولا حتى للكلام اللي جاني ؟ ماهمكم؟ بس همكم اسامحها خالد:ماقصد كذا يازين بس قاطعته الزين بوقفتها وطلعت بسرعه من المجلس وصادفت قدامها امها : علامتس مطيوره يابنت ماردت الزين ودخلت غرفتها ووقفلت الباب اكثر من مره دخلت الام وشافت خالد واقف وكانه بيروح بعد : علامها الزين تراكض ليكون تهاوشتوا خالد بضيق : لا ماصار شيء لكن سوء تفاهم الام : الله يصلح الحال خالد:اللهم امين واستأذنك ، وباس راسها وايدها: استريحي انا ادل الطريق الام: في امان الرحمن ياوليدي __________________________ ""في بيت سديم """" كانت توها داخله البيت وشافت ابوها بالصاله مشت وجلست مقابلة ع الكنبة : سم الاب : الناس لما تدخل تلقي السلام ولا ماتربيتي لهالشيء للحين؟ سديم: السلام علييكم الاب : وعليكم السلام ، ليش طولتي ؟ على خبري اختبارك ينتهي 11 والساعة الحين 2 الا ربع سديم ببرود:طلعت اتغدا ،وبعدين من متى يهمك ان طولت او لا؟ الأب بعصبية : سدييم لا ترادديني سكتت سديم ولا ردت الأب : ذي اخر سنة لك بالسعودية وبتسافرين لبريطانيا تكملين دراستك هناك سديم بضحكه خفيفه :سويت اللي تبي الاب: لا تقاطعيني انا ماخلصت كلامي ""وسكت شوي ثم اردف ، بتقعدين بشقة مشتركة لين مالفله تتجهز وتنقلين فيها سديم بسخرية : اشوفك رتبت لكل شيء الاب وهو راس ع اسنانه : سديييم لا تقااطعييني ، انحنت لقدام وتكت براسها ع ايدينها وتناظرة بمعنى كمل ، الأب : بتخلصين جامعتك وتنثبرين هناك لحد ماقرر متى ترجعين مفهوم؟ سديم هزت راسها وجت بتقوم الأب : سدييم التفتت له سديم بدون رد الأب بدون مايناظرها: صدقيني هالشيء لمصلحتك ماردت سديم وطلعت لغرفتها ، قفلت الباب ورمت نفسها ع السرير وهي تشتت نظرها بأكثر من مكان واخذتها الذكرى ل٩ سنوات ورا بهذيك الليلة اللي تمنت فيها الموت ولا جاها ""وصحت من افكارها ع صوت رسالة """ شافت المرسل وقفلت جهازها ونامت ___________________________ """الكويت""". دخل مكتب نوف وجلس ع طول نوف : الناس تسلم عبد العزيز : وعليكم السلام نوف بضحكه : لا ياشيخ الا وش فيك كأنك تركض عبدالعزيز:بلا هذره وقومي نروح لابوج نوف تريح ظهرها ع الكرسي وتلعب بالقلم بين اصابعها:ارى الخوف بعيونك عزيزي وهو يعدل شماخه وساعته: ابد طال عمرج ماهو بخوف نوف بضحكه : واضح عبدالعزيز: بتفزين نروح ولا شوضعج؟ نوف: ليش ماتروح انت وانا بعدك عبدالعزيز: لا خلينا نتهزئ سوا وقف نوف وهي ترجع شعرها لورا : ياربي ياعزيز كأنك ياهل ماتمشي الا ويا امك عبدالعزيز وهو يوقف :لا تكثرين حجي وامشي جدامي تورطيني ومن ثم تبين تشردين نوف وهم يطلعون من المكتب :ورطك بشنو؟ عبدالعزيز : منو قايل لي نيلس عند البحر ؟ نوف : ومنو قايل لي نطلع نتمشى؟ عبدالعزيز وهو يدق باب المكتب : خلاص اسكتي طنشته نوف وفتحت باب المكتب لما سمعت رد يسمح لهم بالدخول عبدالعزيز &نوف السلام عليكم بدر : وعليكم السلام ،وناظر عبدالعزيز ثم ناظر ساعته ،نورت المكتب استاذ عبدالعزيز عبدالعزيز : اسف ع التأخير استاذ بدر بس راحت علي نومة ولا انتبهت لساعة بدر: دامك تعرف ان وراك شغل ليش السهر ؟ ماكأنه في ويكند تسهر فيه ! عبدالعزيز : اعتذر استاذ بدر الغلط مابيتكرر بدر بحده : اغلاطك انت ونوف ماتتكرر انما تتجدد وكل يوم نفس طريقة الاعتذار نوف: اسفه بدر : اعتذااراتكم مابتفيدني تعرفون ان اليوم الأفتتاح للمطعم وبنعقد الشراكة مع شركة ال.... عبدالعزيز : موكأن هاي الشركة اللي ننتظرها من شهر بدر : بالضبط استاذ عبدالعزيز بس بسبب غيابكم والاهمال قررت اأجل الصفقة لين ماحضرتكم تشرفونا وتنتضمون لو غيابكم كان في يوم عادي كان ماتحجيت ولا قلت لكم شيء اتمنى الغياب ذا مايتكرر مفهوم؟ نوف بفطنه : مفهوم ، بس وش صار ع الصفقه ؟ اكيد متأجلت عشاننا بدر وهو يريح ظهره ع الكرسي بعد ماكان متقدم لطاولة: اجلسوا جلس عبد العزيز ع يمينه ونوف ع يساره وناظروه بتركيز بدر : تأجلت الصفقه بسبب تأخير طيارتهم وهذي فرصة نراجع مشروعنا ونشوف اذا في اي نقص له عبدالعزيز :انزين مشروعي جاهز ماناقص الا تشوفه استاذ بدر بدر : مشروعك انت ونوف تقدمونه لي ع مكتبي بعد ساعة لجل اقراه زين وللمعلومية مافي طلوع من الشركة واذا خلصتوا جمييع الملفات اللي بتجيكم تنزلوا للمستودع ترتبون الملفات الموجوده فيه بالكامل نوف بصدمه: بس يبه تعب بدر بحده: احد قالج تسهرين ؟ عبدالعزيز : على كذا مابننخلص الا تالي الليل بدر : الحين كل واحد لمكتبة وبتوصله الملفات مابي اشوف ولا شغل ناقص مفهوم ؟ عبدالعزيز & نوف : مفهوم بدر: خذو مفاتيح المستودع من الحارس نوف : امرك بدر : تقدرون الحين تطلعون وتخلصون اشغالكم __________________________ :ريينننااادددددد قوممي فزة مخروشة واول ماشافت اللي يصارخ سكتت شوي ثم قالت: سلمان ""وتحك عينها "" :وش جابك سلمان بضحكه: جابني الشوق ريناد ضحكت لكلمته وضربته ع كتفه ودفته : لييش ماعلمتني انكم جايين سلمان: يقالك بسوي مفاجئة ريناد وهي ترجع وتغطي راسها بالبطانية: امحق من يسوي مفاجئات سلمان وهو يناظرها بنص عين: بتقنعيني مانبسطي ؟ ريناد: انبسط اكيد رز نفسه سلمان ، وكملت ريناد : موب عشانك انما عشان اميمتي كش عليها سلمان وجاء بيطلع مسوي زعلان ريناد حست انه نزل من السرير ووخرت البطانية وجلست : هيه تعال سلمان: لا تحتكين دام شوفتي ماتبسطك بروح للي شوفتهم تبسطني ريناد: قصدك للي شوفتك تبسطهم سلمان : اللي هو وطلع وصفق الباب بقوة ريناد : وصمخ بالهداوة قلع الله ايدينك وانسدحت من جديد : اووف منه يحسسني بتأنيب ضمير غصب ________________________ بالصاله ، دخل سلمان واسترسل جهاد : وينها ريناد ؟ سلمان : جاية دخلت ريناد وهي لابسه بجامتها وشعرها مفتوح وواصل لنص فخذها باست راس عمتها ريناد: الحمدلله ع السلامه يمه ام سلمان : الله يسلمك وصح النوم ريناد: صح بدنك اخباركم ام سلمان: الحمد لله بأفضل حال انتي شخبارك وكيف كانت الاختبارات معك ريناد : والله تمام التمام الحمدلله خلصت ام سلمان : متى تنزل النسبه ريناد : بكرا او بعده ام سلمان: الله يوفقكك وخبري فيك شاطره اكيد نسبتك ترفع الراس ريناد: افا عليك دامك اميمتي طبيعي نسبتي زينه ام سلمان: هههههههههه عاد يلا جهزي نفسسك تسافرين مع سلمان تدرسين معه ريناد : نقول ياارب ووقفت وراحت تجلس جنب سلمان وتحاشره ع الكنبة ريناد: وخر شوي يالدب سمنان سفهها سلمان ولا رد ، وابتسمت ريناد على زعله لحد مابانت غمازاتها : وفديت اللي يزعلون انا طنشها ، ولف ع جهاد : الا ماقلت لي متى بتعرس ريناد : توها ماصارت عاقة لجل يبتلاها ربي جهاد : قصدك تتوب ع يدي ريناد : وش توبته والعيشه معك ضيم سلمان : الا اقول جهاد تسمع صوت خرافيش ؟ جهاد: اي مشتريين ارنب لا جاع قام يخربش ريناد وهي تأشر باصابعها : اولاً اسمها خرابيش خرفشوا راسك انت وياه ، ثانياً مابرد ع اهانتكم لي ثالثاً ماتشرهه عليك ياسلمان يوم تقول خرافيش عيشة الاجانب نستك لغتك ياحيفاه رابعاً تراك مصحيني بصراخ ولا زعلت يالنفسية قاطعها سلمان : خامساً ابقطع لسانك جهاد : تبطي تقطع لسانها دكتورتنا ذي سلمان: اهيب وش هالجحفله؟ كأنك قلبت علي قامت ريناد تتميلح وجلست جنب جهاد وتخبطه بظهره ع خفيف: هذا العضيد اللي ينشد به الظهر وبيننا لحم ودم ، موب حليب وقد انتهت صلاحيته جهاد: لا بارك الله فيك من بنت اصلا اشك بانوثتك وش هالضربة هاه ريناد : هالحين ضربتي اوجعتك اما دورات العسكرية والكرف ماوجعك؟ سلمان: اجل تقولين انتهت صلاحية الحليب ""وغمز لها"" ريناد فهمت وش يقصد ونطت جنبه : افا امزح وش بك ماتتقبل المزوح جهاد: وش فيها قلبت ذي ؟ صدق انك سحليه تتلونين مئة لون ريناد : السحلية ماتتلون يالعضيد سلمان: بعذره ماله خبره بفصيلتك ريناد : افا وانا كنت بقول فيك قصيدده تقول عني كذا ؟ جهاد: امحق قصيده ريناد: اسكت بس يالحسود سلمان وهو يضحك ع خبالها : قولي قولي بشوف تشفع اني اسامحك او لا ريناد : يقول الشاعر : يالعضيد ياللي حبه بقلبي تلالا سلمان :تلالا جهاد: موب ذي اهديتيها لي ريناد : ماذكر وحتى لو اذكر اتوقع مابيني وبينك عقد مختوم انها لك رسمي سلمان : اسلمي اسلمي ماعليك منه ريناد : أشهد أن لا إله إلا الله سلمان : خلاص يافله قصدي كملي ريناد : وش اكمل ؟ سلمان : القصيده ريناد: خلصتها ههههههههههه خذا المخده اللي جنبه وصفقها على راسها : الشرهه ع اللي يعطيك وجهه يالسحليه ريناد مدت لسانها : والشرهه ع اللي تسولف معكم ولا دكتورة مثقفه مثلي وش يجلسها مع فاشلين سلمان : اي اي فاشلين قومي انقلعي بس دخلت حور وهي لابسة حجابها : السلام عليكم الكل :وعليكم السلام سلمان : ارحبي حيا الله من طل وهل هلا بالزين حور :الله يحيك هلا بك ، ريناد تعالي ابيك تساعديني ام سلمان: لا تتعبين نفسك ياقلبي تعالي واجلسي حور: تعبكم راحه ياعمه وطلعت ولحقتها ريناد حور : ريناد بقولك موضوع مهم ريناد وهي تفتح الثلاجه وتطلع ليمونه : وش هو حور: بس لا يطلع تمام ريناد : ابد بكرا تلقينه على قناة العربية حور : ريناد بلا عباطه الموضوع جدي ريناد : طيب وش حور :فارس طلع يحب وناوي نية ريناد وهي ترش ملح فوق اليمونه بعد ماقطعتها : ااي وبعدين ؟ حور : وش وبعدين اقولك فارس يحب ريناد: طيب خليه يحب وش علي منه؟ حور : ياغبية المشكلة موب هنا ريناد: اجل حور: لا تقاطعيني لين اخلص ، ولا تلعقين الليمون بهالطريقة اسناني توجعني ريناد: زين وقفت قولي حور: فارس طلع يحب بنت ابو تركي واليوم سمعته يقولها ان شاء الله قريب اخذك ريناد: دامه بياخذها بالحلال وين المشكلة ؟ واذا هي بنت ابو تركي محرمه؟ حور: انتي غبية ولا وش وضعك؟ ابي افهم كيف نجحتي بمعدل كويس السنة اللي فاتت وانتي بهالعقل؟ ريناد: اقول عن الغلط انتي ماتعرفين تهرجين وتقولين غبية حور : ياغبية اقولك فارس بيهرب بالبنت مابيخطبها قالها باخذك وبحطهم بالامر الواقع ريناد سكتت شوي تستوعب الكلام ثم استرسلت : وليش ماتقولين كذا من اول حور: لاني فكرتك بتفهمينها ع الطاير دامني قلت موضوع مهم ريناد : والله انتي ماتعرفين تسولفين ""وسكتت شوي" ، طيب وش بنسوي ؟ حور: ماعرف بس ندعي ان مايصير شيء لانه لو صار صدقيني مصيبة ريناد: الله يجيرنا من المصايب وبعدين ليش مايخطبها ؟ حور : ببساطه لانها بنت ابو تركي ريناد : واذا ؟ محرمه وبعدين مين ابو تركي ذا حور : جارنا اللي بنهاية الحاره ريناد: البدوي ؟ حور : اي يالحضرية ريناد وهي تطلع فوق االطاولة وتتربع: ماعرفه حور : تستعبطين ريناد وهي تعصر الليمون بفمها وتغمض من الحموضه: لااا بس شفته كذا مره وانا راجعه من المدرسة وكلامه من اهل البدو بحة المهم ذا موموضوعنا ليش مايخطبها ؟ حور : ببساطه لان ابوها بدوي زي ماقلتي ومابيزوج بنته لحضري فوق ذا عندهم البنت مالها الا ولد عمها ريناد : لا حول يالعادات والتقاليد هذا من طقة ابوك حور وهي توزع الحلى بصحون وتجهز القهوه : مادريتي بعد شصار مع ولده ريناد : من ولده حور : تركي ريناد : وش صار حور : تخيلي انفصل عن زوجته قبل سنه وهي اللي طالبه الطلاق ريناد وهي تقلب الليمونه وتاكلها من جوا : لا حول ولا قوة الا بالله حور : عاد هم عيال عم وطلبت الطلاق لانها اكتشفت انه عقيم ريناد: حسبي الله وش هالسبب التافهه حور : من حقها حبيبتي تبي تشوف عيالها لا وازيدك من الشعر بيت كانوا يحبون بعض قبل يتزوجون والحين قبل 5 شهور يقولون تزوجت ولد خالتها ريناد: وعساها حملت ؟ حور : مدري والله ريناد: ووش سوا تركي حور : يقولون تهاوش مع ابوه وسافر وين سافر مدري ريناد : ووش دراك بهالاخبار كلها حور :البنات يقولونها بالتحفيظ وسمعت منهم ريناد : هذا تحفيظ ولا اخبار الثامنه؟ حور : هههههههههههههههههههههههه ريناد : وبنات التحفيظ قالوا لك بعد ان اللي يحبها فارس بنت ابوتركي ؟ حور : تستعبطين انتي ووجهك؟ ريناد : والله مدري عنك تقولين سمعتيه يقولها باخذك واحطهم بالامر الواقع شدراك انها بنت ابو تركي ؟ حور : لاني سمعته يقول اسمها ريناد : شسمها حور : هند وانتي ماتعرفين اي شيء بالكرة الارضية ؟ حتى بنات جيرانك ماتعرفين اساميهم ريناد : فاضية انا اجمع اخبار مثلك حبيبتي قدامي مستقبل بسعى وراه وبعدين ياكثر الهنود يمكن موب بنت ابو تركي حور : خبري ان الناس تقول وراي مستقبل موب قدامي مستقبل ريناد : الماضي ورا والمستقبل قدام الناس ماتفكر صح حور : اي اي انتي اللي تفكرين صح وبعدين متاكده انها هي لان ماعندنا جيران بدو غيره وفوق ذا هو الوحيد معه بنت مناسبة لعمر فارس الباقي يابالأبتدائي او متزوجات ريناد : يمه يالذكاء حور : اقول انزلي جايبتك تساعديني اشوفك جلستي ريناد : هيفاء وبزارينها ليه ماجو حور: تقول اخوك انشغل وبيجون بكرا ريناد : تمام بذلف اغير ملابسي وارفع كشتي حور : ساعديني ريناد : من بدء بعملاً فل ينهيه ، تميلحي بس لجل اميمتي تخطبك لناصر حور : وععع عليك انتي وناصر ريناد : وععع وبقلبك يالبييه ههههههههههه حور بخجل: اطلعي برا بس ريناد : وذا اللي ابيه يلا تشااو __________________ " بمكتب عبد العزيز "" نوف : عزيز عبد العزيز وهو يحرك الملعقه بالقهوه : همممم نوف : مين يشرب قهوه بعد الاكل ؟ عبدالعزيز : اجل متى تنشرب ؟ نوف : بتضرك كذا عبدالعزيز بمزح : خايفة علي ؟ نوف بعباطه :لا طبعاً اخاف ع نفسي عبدالعزيز : شدخل نفسج نوف : لاني ببتلى فيك بيقولون ذابحته عبدالعزيز : اهمممم وبدا يرتب الاوراق نوف بضحكه: عزوز عبدالعزيز لا رد نوف :عزيز عبد العزيز: هااه نوف وهي تغني بصوت ناعم وهادي : تدري اني من بعدك أتوه و عالمي بعدك يضيع تختلط عندي الوجوه العدو يصبح صديق تدري يالقلب الحنون انت بالنسبه لي ايش وانا بعدك كيف اكون وليه احس وليه اعيش سكتت شوي ثم كملت " ياللي شفت احلامي فيه والتقيت بأحلى جنه ادعو ربّي وارتجيه ربّي لا تحرمني منه رفع عبدالعزيز نظره يتأملها : كملي نوف : يكفي خلينا نخلص عبدالعزيز: نوف نوف: لبيه عبدالعزيز : تدرين اني احبج ؟ نوف بخجل وهي تشتت نظرها في اي مكان حولها وبهمس :اي عبدالعزيزز: وزين اللي يستحون نوف بضحكه : خلينا نخلص بس لا نطول ونبتلش عبد العزيز: كالعادة لقيتي تصريفة نوف:لا بس بجد ابي نخلص لان ورانا المستودع نبي ننزل له قبل يجي الليل عبدالعزيز : وشلون تخافين من الليل وانتي معي ؟ نوف : وكالعادة تلقى اي فرصة وتقلبها لصالحك عبدالعزيز: هههههههههههههههههه احبج طيب شسوي نوف : انننينيينينينيني عبد العزيز :هههههههههههههههههههه ___________________ يسكنني شعور غير قابل للبوح الساعة 9 ونص بالصاله كان الكل مجتمع ويسولفون بمواضيع مختلفه سلمان : ياخي لا تقولها خذ اجازة واجلس معنا نسهر الليلة جهاد: بودي والله بس مايمديني طالبيني لمهمه فارس: لو انك تارك هالشغل موازين لك ؟ جهاد: محد يترك شيء يحبه فارس: الله يوفقكك ولو انه تعب سلمان: ليه ماخشيت العسكرية ياافارس فارس : لا مرتاح بشغلي وش لي بالشقى ريناد بمداخله بموضوعهم :مايبي يعترف انهم مابيقبلونه طولة مايساعد فارس : ليش شايفتيني ريناد يوم يرفضوني ؟ سلمان: وش حشرك بيننا قومي سولفي مع البنات يلا ريناد: الله ياكبرها من كلمة ، من كثر البنات عاد تراهم حور واختك جهاد : كويس توكلي لهم ريناد : ليش ماتبوني ؟ فارس: خلوها تجلس وش ضاركم سلمان: لان سوالفنا شبابية مانبيها معنا ريناد وهي تتربع جنبهم : كلها عن المباريات والسيارات والنوادي الرياضية مسويين خصوصيات جهاد: توكلي سولفي مع حور وتونه تيما بصوت عالي : تونه بعيينك يالجهاز عن الغلط جهاد: لادارات موب اذاني ريناد: اقول يالبزر ناظري كراستك بس لا ترفعين صوتك ع اخوي دفها سلمان من كتفها : قومي قومي سولفي معهم ريناد: من زين سوالفهم مدري شلون حور متحملة بثارتها تيما: مالبثر الا انتي ريناد : وشلون تسمعيني وانتي باخر المجلس ؟ تيما : ليش قالو لك طرما؟ ريناد: اقول انطمي بس كشت عليه تيما وكملت سوالف مع حور رن جوال فارس ووقف : استأذنكم عندي مكالمة سلمان وجهاد : اذنك معك سلمان: من جينا وهو سوالفه قليلة وكل وقته ع هالجوال شعنده؟ جهاد بدون اهتمام: علمي علمك ريناد بتغيير للموضوع: الا ماقلت لي ياسلمان كيف اجواء بريطانيا سلمان: حلوة الجو معتدل بس بالشتا يقتل البرد ريناد : كويس يعني اشتري لي ملابس قطنية جهاد : هم يشتون انتي تلبسين قطن ليه ؟ ريناد: لاني ببساطه بسافر ادرس برا جهاد: ومين سمح لك ؟ ريناد: انت طبعاً جهاد: اي يصير خير سلمان : خلها تدرس برا وش فيها طنشه جهاد ووقف : استأذنكم بريح شوي بكرا وراي سفره ام ناصر: بحفظ الله ، الله يقويك وتوصل بالسلامة ام جواد وهي تناظر ريناد: قومي جهزي لاخوك الشنطه يابنت جهاد: مايحتاج يايمه انا اجهزهم ريناد: ليه ماتبغاني المس اغراضك بعد؟ جهاد بكسل : بنام مابي ازعاج يالنفسية ، وطلع سلمان: لا تزعلين مرده يوافق لا شاف القبول ريناد بتحطم: واذا ماجاء قبول؟ سلمان:تفائلي خير سكتت ريناد والغصه بحلقها شوي وتبكي سلمان بهمس : تتواصلين معه ريناد قربت منه شوي وبهمس مثله : منهو سلمان بنفس الهمس : اللي انتي خابرته ريناد: اسكت يالفضيحه سلمان: علميني ماردت ريناد وأردف سلمان: كنت شاك اصلا ريناد : وش مخليك تشك ام ناصر: وش فيكم تتهامسون كأنكم فيران سلمان : ابد ولاشيء ام جواد: همساتكم مافيها خير الله يستر منكم سلمان : افا ياايمه تظنين فيني سوء ام ناصر: وهي صادقه مايجي منكم خير لا اجتمعتوا تخرب هالبنت بشياطينك ام جواد: لا يخربها ولا شيء قرونهم مكسوره ولا اجتمعوا اكتملت ريناد : يوهه طاييحين من عينكم حور: توك تدرين ريناد: قم قم سلومي خلنا نشم هوا بالسطح محد ينصفنا بهالحياة سلمان: صدقتي امشي ياالعضيده _____________________ كانت ضامه رجولها لصدرها وجالسة فوق السرير وحاطه راسها فوق رجولها وتفكر بالاحداث اللي صارت معها هي وخالد دق باب غرفتها ام الزين: يمه يازين افتحي لي الباب علامك مقفلته وقف الزين وفتحت لها : هلا يمه ادخلي دخلت ام الزين وهي تمشي ع عكازتها ببطئ وجلست فوق سريرها ومدت رجولها ام الزين : تعالي يايمه جت الزين وانسدحتت فوق رجولها وصارت أمها تمسح على شعرها: ليش جالسة بلحالتس يايمه الزين بضيقه : مافي شيء بس كنت اذاكر وجلست قبل شوي اريح الام بحنيه : وش مضيق خاطرتس يايمه الزين سكتت بضيق ولا ردت وأردفت ام الزين وهي تمسح على شعرها وتحركه ع خفيف : تدرين يايمه وش كنت اتمنى من هالدنيا ومازلت اتمنى ؟ الزين: وش ام الزين : كنت أتمنى ربي يرزقني بطفل او طفله وصبرت كثيير لين جيتيني ونورتي حياتي "وسكتت شوي " ثم تمنيت تبقين لي ولا ياخذتس مني احد وكبرتي ع يدي ياازين ، صارت امنياتي انتس تكملين دراسة واشوفتس محققه احلامتس وصارت يايمه ، ثم الحين امنيتي اشوفتس عروس ومبسوطة الزين وهي ترفع راسها وتناظر الأم: يمه الام: ياعيون امتس الزين : كلامها للحين موجعني الام وهي ترجع راسها ع فخذها وتمسح ع شعرها: اشش لا تهتمين للكلام الزين : يمه الام: خلاص قفلي الموضوع ارتفعت وتقربت من خصرها وضمته: ليه سميتي الزين الام : لانك ازين ماشافته عيوني انتي الزين وكل من حولك شيون الزين بضحكه : القرد بعين امه غزال الام: وانتي غزالتي وقردتي وكل شيء الزين : محد يرفع معنوياتي كثرتس الام: ومحد مسعدني بهالدنيا كثرتس الزين: جعلني ماشوف حزنتس الام: حزني من حزنتس يازينتي الزين : طيب يمه بسالتس سؤال الأم: اسألي يمه الزين: ماتعرفينهم؟ الأم تتنهد وتمسح ع شعرها : لا يمه ماعرفهم سكتت الزين وغمضت عيونها ________________ بالمستودع كانوا جالسين حول المكتب الموجود ويرتبون الملفات نوف: عزوز عبدالعزيز وهو يرتب الملفات: همممم نوف: بسالك سؤال عبدالعزيز: ايوة نوف: وش حبيت فيني ؟ سكت عزيز شوي ورفع نظره لها :صراحه مدري نوف وهي تشيل الملفات من بعد مايرتبها عبدالعزيز وتوديها للرفوف بداخل المستودع ، شالت الملفات اللي جنبه ووقفت :كيف ماتعرف؟ عبدالعزيز: سؤالج مدري شلون جاي مشت نوف لداخل المستودع وبصوت عالي : وش اللي خلاك تحبني شال عبدالعزيز الملفات الباقي ولحقها: ابتلاء من الله نوف بزعل: الله يرفعه عنك ضحك عبدالعزيز ونفض عليها الغبرة : امزح يادلوعة نوف بصراخ: لااااا ياامجنوون "وصارت تنفض شعرها " ورفعت نظرها له: وبعدين ماني دلوعة عبدالعزيز:الا دلوعة ونص نوف وهي ترتب معه الملفات: لا أبد يتهيأ لك لف عبدالعزيز لها وبيده ٣ ملفات: طيب دوري بسألج نوف:شنو رفع ملف وصار يرتبه جنب الباقي: لو اتقدم لج بتوافقين؟ ناظرته نوف ثم نزلت راسها ترتب الملفات بالرفوف اللي تحت :لا طبعاً عبدالعزيز: الحمدلله جات منك رفعت راسها بسرعه وبصدمه: نعمم؟ ضحك عبدالعزيز ودفته نوف من كتفه لين رجع ع ورا : ياثقل دمك عبدالعزيز: هههههههههههههههه ها بتوافقين؟ نوف بزعل وهي ترجع شعرها خلف اذنها ومنزله راسها ترتب:لا ضحك عبدالعزيز وحوس شعرها: موب بكيفج اصلا رجعت نوف شعرها لورا ورفعت راسها: عبدالعزييييز لا تحوس شعري عبدالعزيز وهو يحوسه من جديد: بتوافقين ولا لا؟ رفعت نوف راسها وغطت ع شعرها بايدينها: لااا لااا سحب عبدالعزيز خشمها لين هي نزلت يدها بتوخر يده ورجع حوس شعرها: بتوافقييين ولا لا؟ ضحكت نوف ع عناده : اي اي بوافق وابتسم عبدالعزيز وسحب خشمها : اي خليج عاقلة "وحط اخر ملف "اسمعي بروح اجيب لي قهوه اكيف عليها ، عشان ارجع اكمل بنشاط ، تبيين اييب لج معي ؟ نوف: اي ، بس بتتركني لحالي؟ عبدالعزيز : مابيصيبج شيء وبسرعه برجع نوف:لا والله اخاف عبدالعزيز : زين تيين معي؟ نوف: لا بس خلي بيننا فون وانا اخفف من هالاوراق شوي طلع عبدالعزيز جواله من جيب ثوبه ودق عليها وهي طلعته من جيب بنطلونها وفكت الخط :انزين جذي مابخاف عبدالعزيز: مدري من شنو خايفة لكن يلا نوف : المكان موحش عبدالعزيز: قايل لج دلوعة قفلت الخط نوف : ماني دلوعة عبدالعزيز: الا دلوعة نوف: لا عبدالعزيز:الا نوف بعصبية: لااا لاا عبدالعزيز كتف ايدينه بصدره: اثبتي لي نوف: يلا روح وشوف شلون مابخاف مشى عبدالعزيز : يلا نشوف يالدلوعة __________________ بنفس الشركة وبمكتب بدر كان يقرا احد الملفات لكن قاطع تركيزه صوت الجوال معلن عن وصول رسالة من رقم مجهول استغرب من السطور واللي اثار استغرابه اكثر "مين هو المرسل؟ " كانت هالسطور تحمل هالكلمات ... :هذي الضربة الأولى يابدر لكن مامداه يغوص بستغرابه لأن صفارات الأنذار اعلنت عن وجود حريق _____________________ طلعوا لسطح وكان الجو دافي وظلام سلمان: الجووو جمييل ريناد بتنهييده: اااه ودي انام هنا سلمان : شرايك ننام صدق ؟ ريناد: عشان يجينا جهاد ويلطشنا سلمان: جهاد مسوي كبير البيت موكأن فارس اكبر منه ريناد بحلطمه: راعي مسؤولية عكس فارس عديم مسؤولية ومايفكر سلمان: خلينا منهم وتعالي نجلس ، فرشت بطانية كانت ملفوفه ع جنب وانسدحت وحطت ايدها تحت راسها وتنهدت جاء سلمان وانسدح جنبها وسوا نفس حركتها سلمان: علميني ريناد بستغباء وهي فاهمه مقصده : وش اعلمك ؟ سلمان: تتواصلين معه ؟ ريناد: وطي صوتك وبعدين مين قالك اني اتواصل معه ؟ سلمان: تشوفيني غشيم ياريناد؟ ريناد:سلمان تكفى اسكت اللي فيني كافيني سلمان: ماراح اسكت من متى تتواصلين معه؟ ريناد :من ثالث متوسط سلمان: من يوم العزا حق جدي؟ ريناد بطفش: ااي من يوم العزاا حق جدي سلمان : وكيف تواصلتوا ريناد : انت تحقق معي ؟ سلمان بحده: انا احقق معك ازين من يجيك جهاد يحقق معك ويعلمك الويل اخلصي ولا ترادديني ريناد: اوف منك ""وسكتت شوي ثم أردفت : من بعد مااغمي علي بالعزا جاتني مها ، قاطعها سلمان : مها ؟ ريناد: يب مها الحب سلمان: وطي صوتك يالمفضوحه ريناد: يوم صار طاريها تقولي وطي ، المهم جاتني معا وعلمتني انه يبي يكلمني ، وسكتت سلمان بتريقه : ااي وبعدين كملي نطيتي وكلمتيه؟ ريناد التفتت له : سلماااان سلمان وهو يرفع راسه ويتكي بيده : انا خايف عليك مااني خايف يأذيك لاني اعرف انه يحبك اكثر من روحه ، لكن خايف خالي يصمل ويرفض هالزواجه ، خايف جهاد يقفطك ياريناد ونهاية هالطريق ماهو سليم ريناد بتنهيده : سلمان مابيدي شيء ماتخيل نفسي اتركه سلمان: اعرف انك متعلقه فيه بس انتبهي ع نفسك ياريناد ريناد: اساساً صار له يومين مايرد سلمان وهو يرجع ينسدح ويحط يده تحت راسه ويلتفت للنجوم: تبين ادق عليه ريناد : ماراح اقول لا لكن كم الساعة ؟ سلمان ، يرفع يده ، يناظر الساعة الموجوده بساعده الأيسر سلمان: عشرة ونص ريناد: جرب اتصل اتوقع صاحي سلمان وهو يرجع يده لمكانها: اوك بس بساالك بعض اسئلة واذا ارضتني الاجوبة بدق عليه ريناد:بدا الاستغلال سلمان : مواستغلال لكن لكل شيء حقه ريناد : اوك ياابو حقوق وش الاسئلة سلمان : شخبار مها ؟ ريناد بضحكه : طيبه سلمان : كيف دراستها وتسألك عني او لا؟ ريناد : للامانه ماتسال عنك بطريقة مباشرة لكن بتلميح سلمان بتنهيده: وش تقول ريناد لفت راسها باتجاهه: تحبها؟ سلمان ولا كانه سمع السؤال: وش تقول ريناد ، رفعت حاجبها من تصريفته وعادت السؤال : تحبها؟ سلمان بطفش : رينناادددد ريناد وهي تناظرة وتقلد نفس نبرته : سلمااان سلمان : وش يفيد الحب دامه من طرف واحد ؟ ريناد جلست وخبطته على راسه: شدراك انه من طرف واحد سلمان وهو يتربع مثلها : احلفي انه تحبني ريناد ترفع اكتافها لفوق وتنزلها بسرعه : مدري بس صراحه حركاتها تبين هالشيء سلمان :وش تسوي ريناد: يعني مثلا اخر مره نزلنا لديرة وكنا سوالف عنك جت حور وقالت موقف من مواقفكم انت وياها كان الموقف سخيف جت الاخت تقول لها ريناد تطلع عليه لانها اخته بالرضاعه اما انتي على اي اساس ماتتغطين منه؟ سلمان وهو يحك شعره ويرجع ينسدح: ههههههههههه شدخلها ريناد وهي تلف عليه : يقالك تغار المهم ردت عليها حور وسكتت سلمان : وش قالت ريناد بضحكه وهي تتذكر كلام حور: قالت لها يوم انولد انا اللي مغيره حفاظاته هو وريناد لا ولو انك بيدي كان مغيره لك بعد ردت مها :انا اخاف عليك من عقاب ربك لانه مايجوز وردت عليها حور انا اخاف من ربي قبل تجين انتي وتعلميني وانا ماطلع عليه الا وحجابي ع راسي لان صعبه اتغطى منه وانا مربيته سلمان بتفاجئ: هههههههههههههه اما حور ترد كذا ريناد : شايف شلون حتى انا انصدمت ههههههههه سلمان وهو يناظر للنجوم وياخذ نفس ثم يزفره : وبس على هالموقف بنيتي بعقلك انها تحبني ؟ ريناد: ياكثر المواقف زي يوم اكلمك تنشب بالمكان اللي انا فيه كانها تدور شغله ويوم اقفل تسألني كيفه ويعني من هالحركات سلمان بتغيير للموضوع: اهمممم ياليت به فصفص ريناد وهي تضربه ع كتفه: اقول دق بس ولا يكثر سلمان وهو يناظرها ويرفع حاجب : اجاباتك مارضتني ناظرته بحزن : تكفى سلمان سلمان: لا تناظريني كذا ماتحمل قوست شفايفها وبنبرة إستعطاف: تكفففى سلمان وهو متعاطف معها: الله ياخذك طيب بدق ريناد ضمت يدها بفرحه: لببى اخوي ياناااس جلس سلمان بنفس جلستها : مصلحجيه ريناد : طالعه وراك سلمان: اسكتي طيب يرن ريناد: حطه سبيكر ولحظات ورد الطرف الثاني بصوت مبحوح : الوو حطت ريناد يدها على قلبها اول ماسمعت الصوت سلمان : حيا الله ابو سلمان عبدالله: الله يحيك ويبقيك وتعقب اسمي فيك سلمان : اححح شفيك منفس عبدالله:مومنفس شخبارك سلمان: ابد طيبين انت علومك ووين اراضيك عبدالله: الاراضي ياخوك نزلت للديرة سلمان : ليه وش عندك عبدالله: ابد اشتقنا للأهل سلمان: الحمدلله ع سلامتك عبدالله : الله يسلمك ، متى جيت السعودية سلمان: صار لي اسبوعين بالرياض واليوم نزلنا لمرت خالي عبدالله: ام ريناد؟ سلمان : اي ام جواد عبدالله بضحكه ثقيلة: شخبارهم سلمان : طيبين يسالون عنك عبدالله : للاحسن يارب ريناد تأشر له كمل سولف معه عبدالله: سلمان سلمان وهو متكي بيده ع فخذه والجوال بيده : سم عبدالله : شخبار ريناد سلمان: ليه تسأل عنها؟ عبدالله وهو يحك خده : ابد نشوف العلوم سلمان بلعانه: وليه ماتسال عن حور ؟ عبدالله : بالدور يالطيب نبدا بحليلتي اول سلمان: للحين ماصارت حليلتك عبدالله بتنهيده : قريب ان شاء الله سلمان :يكتب الله اللي به الخير عبد الله : اللهم امين ، تأمر ع شيء ياخوي ؟ سلمان : ابد سلامتك وسلم ع الأهل عبدالله : الله يسلمك ووصل سلامي لعنا قلبي سلمان يتصنع العصبية : اقول لا تفلها بس يلا توكل عبد الله : هههههههه يلا بالأذن ريناد : ااخ قلبي سلمان ضربها ع راسها: يابنت بلا قلة ادب اثقلي ريناد وهي ماسكه قلبها: وصل سلامه جعلني فداه سلمان ضربها ع راسها مره ثانية : ماعاد به حيا احترميني تحسست ريناد مكان الضربة بأبم : اقول اذلف بس فواز : سلام عليكم ريناد &سلمان : وعليكم السلام ريناد: بدري شايف الساعة كم ياحضرة معاليك فواز : جهاد صاحي ؟ سلمان : لا من حسن حظك نام فواز: اشوا ولا بيصفقني ريناد : حلال فيك ولا شايف ملابسك كلها تربان فواز: تربان انينيني ، خذانا الحماس بالمباراه سلمان : بشر عساك فزت فواز : للاسف لا انتهت المبارات 2& 3 سلمان : معوض خير فواز: يلا بنام ولا تعلمين جهاد يالعصلا ريناد : مابعلمه بس لا تعيدها سلمان: خذني معك انا بعد بنام اتعبني السفر ريناد: تصبحون ع خير فواز & سلمان : تلاقين الخير سلمان : مابتنامين ؟ فواز: خفاش ذي ماتنام الحين ريناد :جعل الخفاش اللي يصفقك كف ، والتفتت لسلمان :لا مافيني نوم سلمان : زين اسهري بس خليك عاقلة وانزلي تحت لا تقعدين بالسطح لحالك ريناد وهي فاهمه مقصده هزت راسها : ان شاء الله وراحوا وهي لفت البطانية ورجعتها زي ماكانت ونزلت غرفتها ____________________ بالمستودع قبل ماتعلن صفارات الأنذار عن وجود حريق ب٢٠ دقيقه كانت نوف جالسة عند الرفوف وتدندن بصوت خافت تونس فيه نفسها ثم سمعت صوت خطوات واسترسلت : عززوووز لا تحاول تمقلبني لاني بجلدك ماسمعت اي رد وسمعت صوت مويا ينكب لفت ع ورا وهي تحاول ماتخاف : عبدالعزيز ترا ماحب هالحركات امانه لا تسويها لكن ماسمعت اي رد وقالت برجاء أخير: عزووزز بلا عبط كم مره قلت لك لا تسوي هالح... ممداها تكمل الا والنار جاية من جهة الباب اللي كان مفتوح وبدت تمشي النار بسرعة للمكتب وكانت الاوراق الموجوده تساعد على قوتها وسرعتها شهقت نوف من الفجعه وصرخت بأعلى صوتها: عبببببببدددد اللعزييييييزززز 
 
|
|
01-25-2023
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
قيمه جيده لمحتها من خلال هذا
الجلب المميز في محتواه ونال الاستحسان والاعجاب التام والرضى وكل هذا دليل ذائقه راقيه جدا أدت لظهور هذا الطرح بهذا الشكل اتمنى تقديم المزيد والاستمرار عل نفس المنوال ولك كل احترامي وتقديري واسعدك المولى محمد الحريري
|
|
  مهم جدآ قرار بخصوص احتساب المشاركات وتوضيح مفصل بالاضافة لشروط استخدام الخاص وصندوق المحادثات تفضلوا بالدخول طريقة احتساب المشاركات وكيف تحصل على مشاركات اضافيه بنجاح - منتديات قصايد ليل قوانين استخدام الشات والرسائل الخاصة - منتديات قصايد ليل
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
