" قصايد ليل " (( دفء الصباح .. وهمس المساء )) "

مساء الخير والاحساس والطيبة مساءٍ ما يليق إلا بأحبابي
مساءٍ غير غصن لطير يحكي به عن اللي مسكنه جفني وأهدابي

هلا باللي أحبه كثر تعذيبه وكثر ما هو يغيب وكثر ترحابي
حبيبي هو ولو ما قصّر الغيبة ولو عن بسمتي قد طوّل غيابي

أعرفه زين وأعيتني أساليبه عدوي يوم ويوم أقرب من أصحابي
ملكني بين ترغيبه وترهيبه يفارقني وهو واقف على بابي

به الصادق به الغارق بأكاذيبه يبي بعدي ودمعه بلّل ثيابي
به القسوة به الرقة به الهيبة به الضعف القوي به نشوة إغضابي

هلا باللي يصيب العطر بالريب يقول العطر أنا زايل ويبقى بي
هلا باللي يقول الورد وش لي به؟ من المهدى؟ أنا أو هو لأطيابي

هلا باللي علي يقسى وأماريبه هلا باللي أبد ما لان لعتابي
هلا باللي عجزت ألقى عذاريبه هلا باللي تحبه كل أسبابي

مساءٍ فاق كل الشعر ترحيبه بجيّة من سكن قلبي وأهدابي
مساءٍ فاض بالاحساس والطيبه مساءٍ ما يليق إلا بأحبابي