قصائد نبــــض .,

هلابك يا ظروف اهـدت لقاموسـي جديـد مفيـد
وزادت ثــروة أوجــاعٍ ألا يــا ليتـهـا لافـــلاس
تحذرني النقا ، تحكي ، تنهّـد ، تنتحـب وتزيـد
على صمت الأسى زفرة تراقص حرقة الأنفاس
كما قـد سـارت العـادة ، دخلـت فلعبـة التجديـد
ضحيّة والنقا خنجر طعن صدر الرجـا باليـاس
نـزف دم الأمـل دمعـة تغنـي فـي ليـالـي العـيـد
وحيـده الا مـن آهـاتٍ تطـول فزحمـة الـجـلاس
تلحفـت الشتـا بـدفـى حرقـنـي بــرده الرعـديـد
تدفّى نبضـي ...وخـلّا لقلبـي رعـدة الهوجـاس
كثر ما شفته بعيني خزامى ، طايفي ، اوركيـد
بياضه شي من روحي ولا له في الغلا مقيـاس
نثرنـي كذبـةٍ سـودا علـى اوراقــه بــلا تحـديـد
رماد..إلا بقايا منْ رماد ومـن قديـم احسـاس!!

اشتقت لك يا الصاحب اللي على البال
صحيح لا قالوا:البشـر مـا تشابـه
واحد يجـي ويغثّـك بكـل الأحـوال
وواحد يغيب وكن عقلك غـدا بـه!
غيابك اللي باختيـاري ولـو طـال
مـا شوفـه إلا زاد قـدرك مهابـه
بعماق روحي لك على البعد منـزال
واليا قربـت يجيـك مفتـاح بابـه
غبت وحياتي مالهـا بعدكـم حـال
عزّيت صبري واحتسب في مصابـه
أعيد رسم الليل في فجـري سـؤال
حاير ولا لـه غيـر شوفـك اجابـه
أتخيلك شمس الوفـا، بـرد وظـلال
إحساس منهو قبلنا قد حكـى بـه؟؟
مدري وش اللي في معاليقي انهـال؟
إن كان قلبي؟!..خايفه من عتابـه!!
كنّي بصوته زلـزل الصـدر زلـزال
يقول: عصر ايديك ذوقـي شرابـه!
يا ما نصحتك ما سمعتيلـي أقـوال
عيّـا عنـادك لا يــرد لصـوابـه
ذوقي مرار الشوق والشـوق قتّـال
والاعتراف أقسـى عليـك بعذابـه.
فقمت أردد بيت "شامان" بـه قـال:
ما مالت غصون الـورود لذبابـه!!!
لا من تخطّى الورد لغـروره ومـال
مـا جابـه إلا مستحـق انجذابـه .
للطهر أغنّي وأعشق القاف والـلال
وأحـب قلبـك والنقـا والـذرابـه
غنّيت ودّي لـك مـع البعـد مـوّال
ودّ افتخر به وإن عذولـي درى بـه
أشتاق لـك قلبـي، ومشتـاق لازال
رغم إنّ قلبك ... مستريـح فغيابـه..