يا ( جنّي ) ياللي ضايقٍ بقصرانه .. يحسبني بضيقه أبفزع وأجنِ

يا ( جنّي ) ياللي ضايقٍ بقصرانه .. يحسبني بضيقه أبفزع وأجنِ
وفّر عناك وخل عنك الذهانة .. ماهتز لي قلبٍ على زول ( جني )
الليل أعسه رغم إنسه وجانه .. وأدحم ظلامه للهموم إدحمني
منيب شاعر سلعته في لسانه .. لكني صدرٍ ذيب حزني سكنّي
أسرج ظلام الليل وأركب حصانه .. وأهدم به حصون وحصونٍ أبنّي
أنا ( سعد ) وإفهم معاني بيانه .. كانك تجيهل فعلي قم وامتحنّي
والشخص يعرف معدنه بإمتحانه .. إمّا فعولٍ أو حكي في الهبنّي
مانيب حي الله بشر في اللعانة .. أنا اللعانة واللعانات فنّي
وأنا ( العناد ) اللي شديد المتانة .. أمضي وتُمضى غيبتي بالتمنّي
الشيب لو يغرق شبابي لـ ذانه .. تبطي سنينه في العزم ماسلبنّي
عدو عيني عجز يكسب رهانه .. وساقٍ قصر عن دربي ماهوب مني
وانا ( سعد ) في عدلته وإعوجانه .. وانشد جموع ( الجن ) تنبيك عنّي
كانك تفكر لي تسوق الإهانة .. منيب من يحشم لحىً ماحشمنّي
أكسر حجاجٍ ساق لي حْقرانه .. وأحقَر سنيني كلها ماحقرنّي
الليل كانك تحتمي بحميانه .. أظهر به وآيات ربي حمنّي
ياتظهر بوجهك ولو بلمحانه .. هذا وإلا خل عنك التجنّي
مالي معك موقف عداء أو ميانة .. يوم أنت ليّه بالعداوة تكنِ
دام ألتقينا خل كلٍ وشانه .. ليلٍ يغني لك لمثلي يغنّي
ودام أجتمعنا خل كل بمكانه .. لا سيء ظنك لا ولا تسيء ظني
رد السهم خل السهم في الكنانة .. ما والله أبرح عن مكاني وأدنّي
مهما اختلفنا نلتقي في الديانة .. سواء شيعي كنت .. أو كنت سنّي
هالليل ليلٍ واهج البدر زانه .. واللي فتنَك به يـ ( المقاصر ) فتنّي
والطيّب اللي مايضر قصرانه .. ولا يشاغبهم اذا الليل جنِ

سعد العوجان
أو
" ليل النديم "