قصايد الدكتور الشاعر صالح الشادي

في دنيته ..
لاهي
ولاهوب يمّها.

مبلوش بهموم السنين ..
ومختنق في غمّها.

والليل من حوله سراديب وحكايا عابسه ..
والناس فوق اليابسه ..
متواصلين بلا وصول ..
وغارقين بظلمها .

واهمها محبوبته ..
لو درت عن قصته واهمها .



تقول له مرتاح ..؟
يقول إيه ..
دامك معي أكيد أنا مرتاح ..!

مرتاح لك ياللي أحب ..
وخاطري مرتاح ..!



ويسْعل ..
وينفث ما تبقى بالحنايا من سُحب..
وإن أمطرت غنّى تعب..
وان مدّت النظره عليه ..
يمرر البسمه غصب .

وإن زارت العبره جفونه زمّها ..
ثم إنكسر ..
كأن شيٍ طاح..!؟


وإن صادته بعيونها..
قام انحنى -
وقال إتركيني لحظتين..
أدوّر المفتاح.


وإن راح ..
فاح الشعر كله وأزهر التفاح ..!

شاعر ولا عُمره لقى ..
مسكون غُربه وأصدقا
وقته سِفين من شِقا ..
ومِشاعِره مَلاّح .

1990



(نشر لأول مرة )











الأخيرة

شيخة الحور وقمرهن
بيضهن واحلى سمرهن
واجمل اجمل من عرفت من العذارى
واكمل اكمل من مشت بين العذارى
والمحال الممكن والصعب والسهل
البعيد اللي وصل
وشهقة الشعر وزفيره
والاخيره
*****
ريحيني من ابو زيد الهلالي
والملوح قيس
اقلبي التاريخ في عيوني تعالي
واشرقي بلقيس .
وامنحيني في الشهر حصة غرام
درسيني في مجازات الكلام
علميني الفرق
بين المبتدا.. وبين الختام
عافوا الطلاب جهلي ، وفكري المسكون حيره
وعفت انا التدريس والحصة الاخيره .
*****
كل مهنة غير حبك يابعد عمري سخيفة
اتركيني فيك اهيّم
واتركي نبضي بكيفه .
رزقتي شوفة عيونك
والهيام اروع وظيفة !!
لاتلفيني بسكوت، ولاتذليني بصمتك
غردي يا لعنبوها خفقة ماصهللت لك
انحرى رقاب الاماني والظنون
صبّحي عيد الجنون ..
وفجري بين العواذل حسرة تعمي العيون .
خبريهم من تكوني ..خبريهم من اكون
ولاتهابين السيوف اللي من الغيره مغيره
دام باقي للامل فرصة اخيرة>
*****
كنك المنوة هملتي
في مرابيع ٍ خلية.
بك تجدد روضي الذابل ، وشال السامرية
ان طلبتك حلم صرتي ..
وان بغيتك واقعية.
بالصحاري ريم عفرا
وبالشواطي ساحليه .
عشتك بكل الحضاره ،وكل ذيك الجاهليه
في ليالي الصخب كنتي، وباليالي الشاعرية .
يابنيه.. يافضا العاشق وطيره
مانسيتك واذكر القصة الاخيره
*****
ازعلي مااقول حدّك
سافري في كل وقت لديرة عنادك وصدك
مزقيني
انزفيني
عاتبيني من يحدك??
اه يازين العتب لامن تحدر فوق خدك !!
واه ياحلو الرضى عقب اشتعالك وشّدك
لولا لحظات التغلي ، والتظلم ، والظليمه
ماعرفتك باالتجلي ولاغدى للانس قيمة
ولولا ذلك يالظما ذيك الظهيرة ..
ماعرفنا قدرها .. القطرة الأخيرة .
*****
في مساحاتك يضيع الهم يرتاع برحَبها
كنه جبال الجليد، وكنك الشمس ولهبها
تزرعي شكواي ،واطلع غنوة يصدح طربها
تمنحي ظلماي صافي نورك الاسنى والابهى
تأخذيني طفلك المطلي شقاوه
تغسليني بالدموع وتمسحيني بالتلاوه
وتبهجي حزن السريره
وابتسم لك .. وأعزف الآه الأخيرة .
******
اعذريني لو بخلت احيان واحيان بكلامي
لهفتي لك ياغرامي دوم تسرقني كلامي
ومسمعي من ثرثرة شوقي يغار
ومن لساني لاتغزل بك يغار
وداخلي ديره وشيبان ٍقدامى
ودهم بالاختصار ..!
والحكي ريح ومراكب لليتامى
ولا على ارضي بحار ..!
والمعاني لص بين الناس بارع
والحرس في كل شارع
وابتهالتي كثيرة
ارتجلها .. بس في اللحظة الاخيرة
*****
من شمال اقبلت اسابق في طموحي
احسب الدنيا طموحي
احسب القصوى طموحي
لين جيتي وابتدا فعلاً طموحي .
انغرستي بين مااشوفه وشوفي
وبين رغباتي وعزوفي
وبين جثماني وروحي .
كنك بصوتي الحروف الابجدية
والملامح والهوية
والتعابير الصغيرة و العشيره
صدقيني ..
انتي اول من عشقت من النسا وانتي الاخيرة
******
كل انثى غيرك بعيني سراب
وكل منفى غيرك إجحاف وعذاب
وكل حب غير حبك سفسطة
وكل درب غير دربك مرمطة
وكل طير ماشدى باسمك كذوب
وكل فجر مااشرق برسمك شحوب
وكل شاعر ماقصد لاجلك لعوب
وكل عين ماقرت حسنك ضريره
سيرتك اغلى كتاب ..
وبيدي الطبعة الاخيرة
******
صورتك، في كل صبح لي جريده
وهجها اسرار واشعار ونشيده
ورحلة فوق السحاب
وسلة ورود جديدة .
ياملاك جاوز ادراك البشر
من سقى الضي القمر
ومن عطى اللحن الوتر
ومن ملا وحشة حياتي
وعطر انفاس الزهر؟
ومن نثر فيني فصوله
ولمني بين الطفوله والرجولة غير طيفك
لادنت حزّة وصوله .. بالمواعيد الأخيرة .
*******
ماعرفت اني ظلالك قبل اعْرفك
مابقت فيني خليه ماتعرفك
ابتهاجاتي تعرفك
انفعالاتي تعرفك
انكساراتي وذاتي واتجاهاتي تعرفك .
ساعتي ..عطري ..مفاتيحي.. وحاجاتي تعرفك
وكل من كان وعرفت، وصار يعرفني يعرفك
ومن سمع عني قصيده لو قصيره
ومن سمع اول قصيده
ومن سمع هذي الاخيره
******
طال عمرك أو قصر .. ماهمني
مادمت أنا عمرك
مادمت أنا أمرك
مادام قلبي لك مكان ..
مادام نبضي لك زمان ..
مادام شعري جلستك .. ودلالك .. وتمرك ..
ومادمتي في عرشي الأميرة ..
كل عام وانتي بخير
وكل عام وانتي الاخيرة.

1994سبتمبر








1)

من أرض الملح واللولو

على موجة شعر جتني

وأنا فزيت أهلّي .

هلا بالملح واللولو

شياطين الشعر جتني

وتصافق بي محلي .



وقووووووف ..

أيها الشعر العمودي النحيف !

وقوف ..

ياتفاعيلي .. أنا كلي تجلي .

(قد أتت ..

كالضوء في ديجور أعمى ..)

ياضمير الحزن مهما غاب عنك الفجر ..

أعَرفه .. مايخلي !

والتخلي مو عوايدها ..

هلا برنة قلايدها

على لحن (التغلي ) .




(2)

على رغم التعب فيني بهاللحظة ...

وعلى رغم الغضب ، مسرور ...!

(فلتُحرق الغابة ..)

أناعندي مساحة طفل ، مسترخي مع ألعابه ..

وطافي من زمان النور .

لذيذ هذا الإنبعاث ..

ولذيذ ياذا الذعر من حيرة هواجسها ..

ومن ذاك الشعور ..

قل يا الصباح ...

وش غرد العصفور .. ؟

وش ماغرد العصفور

تغريدك هو الأحلى ...

هلا وسهلا .. على رغم الجفا والجور .

هلا باللي ترد ولا تولي ..

والتخلي مو عوايدها .

هلا برنة قلايدها ..

على لحن التغلي .



(3)

تحياتي ..

على آخر هنوف تكتب الشعر /الصهيل .

ضوا القنديل من ساعة ...

وأنا من أربع وعشرين شهر ، وخمسة أيام بلا قنديل .

هناك .. أوجاع ممطورة ظما ..

هناك أرض وسما .. ولا ناس !

قولي وإصدحي : يا ناس ...

يمكن يجفل الحراس ...

ويطلع سيل .

هناك حجار ...

ممكن لو رصفناها نسوي دار ..

ونسرج للأماني خيل ! ..

هجوع الخلق يا(قمرة) حياتي ..

والتعب مسحوب من (صنعا ) إلى ارض (الدردنيل ) .

وش اللي تحمل أوراقك من (البلسم) .. ؟

كفاية مانبي نحلم ...

كفاية مانبي تمثيل ..

كفاية ماحصل فيهم ...

كفاية ماحصلي من تخلي !

والتخلي موعوايدها ...

هلا برنة قلايدها ...

على لحن التغلي ..



صالح الشادي

2004





















(زمن)

يا هلا في يوم (ستة)..
في شهر (ستة) وعام ألفين و(ستة)..

وياهلا، يا آخر العنقود جيتي يا (زمن )..
يا هلا بأخت (الوطن )..
وأعذب إحساس غرسته.

(*)

طلتك والفجر (نور )..
و(رحمة) تملا مداهيلي سلام

طلتك، مسك الحبور..
وغايتي يا طربة العمر و(مرام).

إحتفلت بشوفتك يا شهد روحي
وكل ما فيني سجد لله شكرا..
يا(زمن ) أهلا وسهلاً..
طبتي، وطاب المقام .

(*)

لك عصافير الحشا سرب يتغنى..
والمعنى، يا سواد عيون (بابا)
ما كأنه قبل ميلادك تعنى ! .

إضحكي..
وغصن الحياة الأخضر المياس خليه يْتثنى .

وإشرقي،
وكوني مكان الشمس ما دمتي زمنا.

ذكرينا في براءتنا ، وفينا -
يوم كان احساسنا يلعب علينا..
(ذات صبح ) في وطنا.

عمان 6/6/2006م .

















( لا تـحـزنـي )


لا تحزني .. ؟
هذا أنا من أول أيامي كذا ..
الواحد بزحمة مدن .. !

ماهي بقلة ناس ..
لكن قلة إحساس
وضياق أنفاس وحكاية شجن .

لا تحزني ..
مثلي كثير العايشين بروحهم
وأجسادهم ..
في ذمة الله والنحول مهدهده ..
تقرا تراتيل الكفن ! .

الله ، لو شفتي مداين خاطري ..
وأنوارها ، وأخبارها ،
وذاك السكن ..!

الله لو شفتي الوطن ..
إللي تخيرته أخير.. بعد ما عز الوطن !
ما كان صابتني العيون ..
ولا كان صابك ذا الحزن.


لا تحزني …
أنا سعيد بها النوى وأيامه الصعبه
أنا هنا لا زيف يزعجني ولا كذبه !

بين الطيور اللي تغرد والنشيد ..
أنا سعيد !

أضحك ورا كوم الجليد الهش والغربة.

مالي ومال الهامش المبني من إسمنت وحديد
مالي ومال الغارقين بشبر خوف..
ولا بهم حي يشوف ..
إلا ضرير ميّت قلبه ؟!

أضحك على ذكرى جهل ..
وذكرى هَبل ..
وذكرى رجاجيل ودجل..
وما يشبه الصحبه !

وأضحك على أوهام مضت ..
وقصة قضت ..
كانت على راي (الشِعر) يا كذبتي كذبه .

لا تحزني..
خليني أضحك وانتشي.. في سكرة الغربة .


















ياغزل .

(1)
وش آتغزل ياغزل .. !
طاحت سواليفي على حظنك ..
وجفني طاح ..
وإسترخَى كسل .

وش آتغزل ياعسل ..
و(الشهد) نحل الشوق من حُسنك جنَاه ..!
ومن رحيقك..
سافر العطر ورحل .


وش آتغزل والزعل -
إليا زعلتي ،
يستعر فيني زغاريد وطفولة ..!
تزعلي ..
وآموت في (هيك ) مهبولة ..!
يعني مقبولة
ومقبولة
ومقبولة
ولا فيها .. جدل .

(2)

صمتك.. أنا أدري وش وراه ! .
مليون آه ..محاصره في آهتين .
آه .. لعيون الحبيب -
وآه .. من سطوة هواه .




هو صحيح يحبني ..؟!
هذا الجنون اللي على ها لارض يمشي ؟!
أو يساير عقلي الغايب ..
ويلعب من وراه ؟

ياترى .. كم ألف أنثى ذاقته قبلي قصيده ..؟
وكم قصيدة حب فيني صاغها..
وهو (صحيح ) و( جد ) يعنيني ؟
ويعني ماحكاه ! ؟

ياترى ..الطير هذا..
يخونني كل يوم ..؟
ولا.. كل شهر مرة.. ؟!
والله ، لو مرّة وقع بيدي بلحظة (ملعنة ) –
إني لأخرب هالسنة وألعن أبو جد الحياة ؟


يخونني ..؟!
مو على كيفه يخون .
أنا - وإذا فكر بغيري ، أفضحه..!!
أو أجرحه ..
أو أذبحه ..
طيري ، وأنا حُرة بطيري .. ولا أبي غيري معاه ؟!.

(3)
ياهوه .. ياذا الفاتك المزّا ح -
زحزحتني عن ثقل أبوي آدم ،غصِب ..
وأشغلتني ( حسبي عليك ) بحفلة التفاح .
قل : ماتبي ترتاح ؟

قلي : متى تهدا الظنون العاصفة ..؟
ومتى تصدق إن عشقي إنت وأصل السالفة .. ؟
وإنك إذا قررت مرة تحتويني ..
ممكن انك تحتويني ..
وتنفرد بالباب والمفتاح !! .
قل : ماتبي ترتاح ؟

إهدا ، أباشعل فيك صمتي .
أُطرد الوسواس ..وسوس بي ..!
وعشني ،
وروق من عصف الرياح .
وقل : ما تبي ترتاح ؟

إرتاح ياقلبي..
كفاك اللي جرالك من زمان فات ..!
خذني وبلا هذا الشتا ت .
خذني، وحن ياقلبي على روحك..
وريّح هالجناح..!
وإطفيّ المصباح .