ديوان الشاعر فهد المساعد

(عقد احجاجه)
.
.
ياصغيّر السن قدرك طاحت أبراجه=الجرح خلى الصخر ينطق ونطقني
خلاص ماعاد تعنينـي ولا حاجـه=رح جعل ربي يوفقـك ويوفقنـي
من بعد ما كنت نور العمر وسراجه=اليوم صرت الظلام اللي يطوقنـي
عطيتك أكثر من اللي كنت تحتاجه=أسرفت فـالحب لين الحب وهقنـي
خلاص مالي ومال الحب وإزعاجه=مالي ومال الدروب اللي تضايقنـي
تعبت أضم البحر واهدي أمواجـه=تعبت أجامل وأشوف الوقت يسرقني
شكواي للي عليه الضيق وافراجـه=اللي إذا شاء يرحمنـي ويرزقنـي
أما انت يابو جبين عقّـد احجاجـه=لاعاد تسأل علامك منت طايقنـي
الناس كلٍ علـى دربـه ومنهاجـه=وأنا عن الناس مابه شـي يفرقنـي
إلا اني دايم أحب الصدق وأواجـه=مخلوق والله على هالوضع خالقنـي
حتى رفيقي ضماد القلب وعلاجـه=على كثر ما أتمسك فيـه صدقنـي
لو ادري انه مرافقني على حاجـه=لاامسّكه حاجتـه وأقـول فارقنـي

( يشمومها)
.
.
.


يانديم الجرح واللـي وصتـك بارقامهـا=عارف انك ماتعرف الا شذى يشمومهـا
لا تعلمني عن اخـر ماحصـل بأيامهـا=من رسالتها عرفت اليـوم كـل علومهـا
ادري ان الوقت شمّر عن يديه وضامهـا=وادري ان الحظ الاقشر صار مثل هدومها
وادري ان الهم وقف في طريق احلامهـا=لين صار الحزن اثرها والشقى مقسومهـا
بس تستاهل هي اللي طاوعت من لامهـا=وباعت اللي كل ذنبه مادخل في سومهـا
خلهـا تدفـع ثمـن غلطاتهـا مادامهـا=هملت قلبي وراحت واسرفت في حومهـا
ويبتعد مع كل خطوه صوت وقع اقدامهـا=وتقرب الضيقه وتصحى دمعتي من نومها
لين غابت عن عيوني وانجلـى هندامهـا=ليلة تغفى على صـدر الظـلام نجومهـا
كنت احس بشي والله ماتشيـل عظامهـا=لو تحس بشي منه يمـر وسـط حلومهـا
كنت احس ان الضلوع العوج مثل ايتامها=واشعر ان القلب نبضه منتهي من يومهـا
والحياه اللي تدور شهورهـا واعوامهـا=وقفت واليـوم دور رماحهـا وسهومهـا
ياكثر ما اغرقت نفسي في بحور اوهامها=ويكثر ماضعت بين اوهامهـا وهمومهـا
ماجداي الا احلـم انـي واقـفٍ قدامهـا=واتخيلهـا تعاتبـنـي واروح الومـهـا
يانديم الجرح خلـك مـن علـوم ايامهـا=مابقى في القلب رغبـه يلتفـت لعلومهـا
والرساله ردهـا للـي زمنهـا ضامهـا=وقلها كلمـه وتفهمهـا حسـب مفهومهـا
والله ان اقص كفـي قبـل ادق ارقامهـا=والله ان اشيل قلبي قبل اشيـل همومهـا
.

(صوتك... وحشني)
.
.
.
الباب هذا بـاب بيتـك بـس مايفتـح عليـه=الباب هـذا لـو فتحتـه تنفتـح لـيّ الحيـاه
وأنا وراه احـس كـن الدمـع تخنقنـي يديـه=احس كنـه حـد منفـى والوطـن كلـه وراه
صوتك وحشني ياوطن واحترت وين القاه فيـه=وامسيت اغني به وأنا اللي كنت اغني له معـاه
وحشني صوتك ياوطن وامسيت اغني ليه .. ليه=ليه الكلام اللي نقول يموت فـي سكـة صـداه
ليه الدواير تنتهي مـع دربهـا اللـي تبتديـه=ليه الشوارع ساكته والنـاس كـل فـي هـواه
ليه اليدين تصـد عـن شـي تبيـه وتشتهيـه=يوم العيون تسابق الجايع علـى لقمـة عشـاه
علمتني في صف أول حبـك ان اكبـر سفيـه=اللي إذا حسّ بغـلا خلـه يفـرط فـي غـلاه
طيب علامك كل مازدتـك غـلا تـزداد تيـه=آهات والله ياوطن .. حتى ولو مـا قلـت : آآه
.

سكوتك.......!
.
.
.
اللـي بقالـي فـي غيابـك سكوتـك=واللـي فقدتـه مـن غيابـك حنانـك
عذرك معك لـو خبرونـي بموتـك=وحقي عليك إن كان عـذرك زمانـك
ماكان موعد .. وأعذرك لـو يفوتـك=أنا انتظـرت العمـر كلـه عشانـك
غبت ورضيت .. وبعدها غاب صوتك=وابطيت اكذب مـن يقولـون خانـك
بالله كيف تحـس فـي طعـم قوتـك=لامن ذكرت إنسـان خنتـه وصانـك
ماكـن قلبـه واحـد مـن بيـوتـك=من تحت سقفه كـم شعـرت بأمانـك
وراك خليتـه .. لعتـمـة سكـوتـك=وأنا مـغيـر اعشمـه فـي حنانـك
في غيبتك ياكم تمنيـت موتـك ؟!!!=اقل شـي ارتـاح واعـرف مكانـك
.

- إيمانيه -
.
.
.

تطيح دمعه واسلّـم للفضـا موقـي=وارفع يدين الذنوب وتظلم أعماقـي
اشوف قبري يمر بوحشتـه فوقـي=وتصير كل الحياة أضيق من أخلاقي
يانفس طالت ليالـي غينـا فُوقـي=كم قلـت يالله وقلتـي تونـا باقـي
ياالمزنه اللي تحـن لغيهـا نوقـي=تعبت أخيلك وأقول نياقـي نياقـي
تعبت ياما تعبت وضاعت احقوقـي=ياما ندمت وردمت الذنب فـأوراقي
ياما سكت وتركت البوح لعروقـي=أخاف اسولف واخيّب هقوة الهاقـي
أخاف أبوح ويخون الصمت منطوقي=وأقول شيٍ يحـث النـاس لفراقـي
يالله وأنت الملاذ إن مس بي عوقـي=وأنا ذنوبي جهت من راسي لساقـي
يالله تغفر خطاي وترحـم وتوفـي=عظمي نهار الحساب وتقبل إعتاقـي
.

عيد ميلادك
.
.
.
حبيبي جيت أقدم لـك هديـة عيـد ميـلادك=وأنا متأكد إني لو نسيتـك مانقـص قـدري
ولكن قلـت أدور أي شـي يناسـب أعيـادك=تفحصت الهدايا لين ضاق بشوفهـا صـدري
أبي شـي يجملنـي معـك لافـاح رينـادك=ما ابي شي أمده والخجل من فوقـي وحـدري
وقلت أشوف بعض الناس قبل يحل ميعـادك=وش اللي من هداياهم يليق بوجهـك البـدري
بعضهم جاب ورد وشفت كل الورد مافـادك=وأنا أصلاً اعتبر من جاب ذاك الورد ما يدري
لان الورد لو ما زاد بيـن ايديـك مـا زادك=تركت الورد وأعجبت بثلاثٍ جوك من بدري
هديتهم قفص وطيور .. قلت فـعيد ميـلادك=اسوي مثلهم وأهديك طيرٍ في قفص صـدري
.

قالوا.......!
.
.
.
.
ياصاحبي لاتجي وتقـول لـي قالـوا=لو قلت .. ماقلـت غيـر الله يجازيهـم
لاشفت بعـض الاوادم للـردى مالـوا=نفضتهـم مـن عيونـي قبـل اخليهـم
يكفيني القـدر نلتـه يـوم مـا نالـوا=إلا .. أو أقول .. ما ابغى أجيب طاريهم
ما أقول غير انت لامن حطوا وشالـوا=تعـوذ برحمـة الله مــن اساميـهـم
وذكرهم إن الأعمار إن طالت وطالـوا=الخالـد الذكـر وإلا المـوت قافيـهـم
أما انت ياقلب إن صالوا بـك وجالـوا=خلك مثل ما انت لاتشره علـى ايديهـم
النـاس مـن خلقـة الدنيـا ومازالـوا=عيـال رجـال لكـن فيهـم وفيـهـم
ذولاك من عرض ناس مالي إن مالـوا=إلا اني اسكـت وأقـول الله يجازيهـم

........ الدلوعه............
.
.
.
.

إيه اعرفك بنت عز وكلمتك مسموعـه=وادري انك من خلقتي في ظلال وفيّـه
مالعب فيك الزمان ولا قرفتـي جوعـه=ولا وقفتي من همومـك وقفـة محنيّـه
ادري ورب اليتيم اللـي يهـل دموعـه=مابعد هلت دموعك في ضحـى عيديّـه
بين حضن أمك وأبوك وردةٍ مزروعـه=طول عمرك مافقدتـي لمسـة الحنيّـه
إيه اعرفك واعرف إن الناس لك متبوعه=وادري إن امرك مجاب وحاجتك مقضيّه
بس أنا من فضل ربي هامتي مرفوعـه=ورث أبوي وراس مالي عزوة جبريّـه
ما انحنيت إلا لمخافة ربي المشروعـه=ولا بعد دفقـت دم الوجـه أمـد ايديّـه
بدويٍ ماعرفت الضحكـه المصنوعـه=احمد الله من خلقـت وطيبتـي فطريّـه
قانعٍ في حكمة الله ماشـيٍ فـي طوعـه=ماحسبت حساب دنيـاً ناسهـا طرقيّـه
إيه أنا يا ام الترف قلبي إذا موضوعـه=الفراق اللي بلا رجعـه وطـاري جيّـه
بس روحي سايري قلبك وهدي روعـه=واعذريني .. وإلا .. عادي ازعلي عليّه
دامها وصلت لـذل النفـس يالدلوعـه=والله إن يعيش راسي ما انحنـى لبنيّـه

........ المراسيل............
.
.
.
.


أقول يمكـن تنفـرج فـالمقابيـل=ولا ادري إلا الأرض تحتي تهايل
وبعد التعب والهم والحط والشيـل=توي عرفت إن البخت كان مايـل
مع ذاك أبو ذيك الرموش المظاليل=ذاك الغريب اللي عمل بي عمايـل
جتني مراسيلـه تشـب القناديـل=ومعها سـؤالٍ جاوبتـه النحايـل
يقول كيف الحال بعـد المراسيـل=وأقول مثل الحال قبـل الرسايـل
عمر الكتابه ما تجيب المواصيـل=ريّح مكاتيبك تـرا الشـك زايـل
إن ما حصل همس وحنان وتعاليل=وأعاتبك لين المـح الدمـع سايـل
واجلس واسولف عن زمان البهاذيل=وانسى السوالف لا نسفت الجدايـل
كذا يصير الحب والوصل والليـل=وكذا ادري انك ما نسيت الجمايـل
إما كذا وإلا اتـرك الحـظ للميـل=واتركني فوق الأرض تحتي تهايل

........ تهذريبي ............
.
.
.
.
ياعين هلي دموع الوجد وانهمـري=محتاج لي دمعتيـن تعيـد ترتيبـي
نويت دمر الزمان اللي نوى دمري=بايعك ياطيبتي شاريـك ياطيبـي
والدانه اللي تغنـج كنهـا القمـري=أمنتكـم بلغوهـا يــا مناديـبـي
لاعاد تشفق على نخلي ولا تمـري=ولا عاد تشره علي في قل ترحيبي
إن كان ربي عطاها لونها الخمري=الله بنفسي عوضنـي فقـر جيبـي
أمنتكم الله بلغوها تحتـري جمـري=مادام مافاد معهـا حسـن تهذيبـي
إن عشت والله لـأمشيها تحت أمري=وأحس فيها تعـذب كثـر تعذيبـي
هذريت فيها ثلاث سنين من عمري=وان قالها الله لـأخليهـا تهذريبـي