ناس ٍ تسولف بك وتقفي وتقفاك؛

لاتنفعل وتثور والعلم يفداك
يفداك .. ويفدا ثورتك وانفعالك


طش الخطا منّاك .. والعذر منّاك
أجادلك وأقنع مع أوّل جدالك


ولا تعقد حجاجك وتزعل محيـّاك
وأبسط فراش الصدر وأجلس لحالك


أجلس لحالك .. عن هذولا وذولاك
وأنا ومكنون الجــــوارح حلالك


يهواك قلب ٍ كل ما قلت يهواك
نبض لك ولمـّك وحطــّك وشالك !


جابوا مجالك قلت يا حيّ طرياك
وطرياك لو يقصر .. يطوّل مجالك


ناس ٍ تسولف بك وتقفي وتقفاك
ويخيب فال الناس .. ويطيب فالك


نم ٍ تمثناني .. و نم ٍ تمثناك
ماعاد فيها قول ( مالي ومالك ) ؟


ترا المحبّه متعبه لا عدمنــاك
أمـّا كذا وألاّ فـ لاهي كذلك


أحـّرفك فـ البال واكتبك واقراك
والحبّ كلمــه بين بالي وبالك


وأهيم بك وأحط روحي بيمناك
وأقول صفـّق في يمينك شمالك


ولانيب ميّت غير من ريح حنــّاك
وأن متّ من حنّــاك سقت العزاا لك


تلعب بي الأشواق وأنا اتحرّاك
أخاف لا تجزع وتقطع وصالك


وغابت عليّ الشمس والحبّ فتـّاك
وضاقت على رجلي جميع المسالك


أشوف حالي فيك وأقول وش جاك
عني تلد الشوف .. وتشوف حالك ؟


لو ان كل الخلق مثلك وشرواك
واللــّه ما يصلح حبيب ٍ بدالك