الهوى غلاب

لحفظ القصيدة (أضغط كليك يمين واختار حفظ الهدف بإسم )





هوّه صحيح الهوى غلاب

كذاب

سيرة ظما، وتراب

وأسباب للمووووت،

وأمراض الرئة والربو والتدخين

وفقد الأمل وخيانة الأقراب

هو صحيح !!

إن الهوى غربه، وسهر قلب ووجع أهداب

أهداب ما تعرف تلاقي بعضها إلا لزوادة دموع

من شنطة أقدارك

وانته طفل

مأخوذ في هالمطارات الكثيرة

ما يوم مروا بك/او شافوا أخبارك

أو عالأقل أحوال طقسك، نشرة أوجاعك،

جرايد غربتك

يا طفل استسلم لخوفك

أو صدق إنك تهت

شكل من ألعابك حروفك

ما يشبهك إلا أنت

فتش عن أي شي تشبه وارقد عليه

( الهجر قالوا مرار)

نهار

باكر بتصحى

الهجر دافي مثل حضن الأم

قالوا مراااار

مراااار

ما يوم عاشوا به

ما يوم حرق جفنهم يقروه في ضي السراج المهتري

انته الوحيد اللي قريت

انته الوحيد اللي اهتريت

اللي عشقت

اللي احترقت

اللي احترفت الحزن وأضناك الغياب

هوه صحيح إن الهوى.. إن الهوى.. إن الهوى.. غلاب

قصي أزارير الرضا من ثيابي

ما عدت أطيق أعقم على عريي ثياب

قصي أصابيعي ودفتر غيابي

إن جيت أزف عيوني لقفرك أعشاب

جربتك.. أكثر من حرقت بعتابي

ما حرك براكد تضاريسك تراب

لو جيت أسامح.. تسرفي في عذابي

غشيمه جروحك بدون أية أسباب

كم اغتربت بداخلك.. مادري بي

غيرك، وقلتي ذوقني، وذقتك أحباب

سيّلت لك حبر القصايد.. شبابي

كم جيت أجوعك، وانفتح للعطش باب

هوه صحيح/ صحيح/ صحيح /

الهوى غلاب ....؟





خميس المقيمي