تغطيت وبعدني الليلة بردان
لأن مو انت يمي فراشي بارد
وينك يادفو ياجمر الاحزان
احسن دمي بالشريان جامد
يامهر الصبر ما كضك اعنان
نسمع بس صهيلك وين شارد
كل ساعة وتعتني اجفوف بطران
ونة جلد العلية قماشة بايد
تعال اوزن همومي وجيب ميزان
وشوف شكد عذاب الروح زايد
انسحبو من حياتي هواي خلان
بقيت ب هالزمان لوحدي اعاند
سواد الليل يبقى وتطفى الالوان
وعيد بذكريتك والمشاهد
اذا كل طير عندة اثنين جنحان
آنة مكسور وعشت بجناح واحد
على بير المنايا وجيت عطشان
مجبور وشربت الماي راكد
وينك يالبعيد الكلب مليان
غنة وبستات ودموع وقصايد
وياك بعشرتي يازمن خسران
مثل عشرت النار وية الكواغد
لو طاهر حليبة الزمن ما خان
ضربني براسي غفلة وآني كاعد