منتديات قصايد ليل - عرض مشاركة واحدة - قصائد سمو الشيخ حمدان بن محمد - فزاع

08-14-2011

كسرة الوادي

يموت يْموت لي فاتِك وتحيا لك عروق جْداد غريبه كيف يامحمّد بنفس الروح تحيا لك
على الله مابقى إلا أخلّي العقربي يعتاد على ليلي لعلّ الليل لو مظلم بيصفا لك
مزون وْبرْق سحّاب ومطرها في سما رعّاد تشوف مْزون تمطِر لك غلا لكن تهيّا لك
علوم الوقت تاخذ من علوم الناس قل أو زاد تضيّعك بْهواها ثم تضحك لك وتلجا لك
زمانٍ مَرّ في الدنيا على (عنتر) ابن شَدّاد يا (عنتر) ما اعترفنا بك ياْلين اثبَتّ بافعالك
يا كم واحد على خيله يزرّ شْداد فوق شْداد يزرّ ابطانها والفذّ يضحك والضلِع هالك
يقولون أعلى ما بالخيل تركبها عناد عْناد وانا اقول أعلى ما في الخيل في بالي وعلى بالك
أراضي واسعه تجذبْك وانته ما لك إلاّ بلاد بلادٍ عِرْقها عِرْقِك بالاحرى عمّك وخالك
عرفنا (كسرة الوادي)، ولكن لو يفيض الواد نصنّع لك مساييلٍ تركناها وْسمَحْنا لك
نحِن لا من بغينا الشيّ صرْنا للسناد سْناد نحِن مَدّك نحِن جَزْرِك نحن بَحْرِك نحِن فالك
نحن منّا الكرم منْبَع ويا كم بابنا ورّاد نحن لو جيتنا ضيفٍ قبِل تدخل وقفنا لك
يموت يْموت لى فاتك وتحيا لك عروق جْداد قبل تنْشِد عن احوالي أقوْلّك إنت وش حالك

خِذْ من الشاعر كلامه
لا تحسِبْ وْرود تنثَرْ لك غلا وتفلّه والبَحَرْ عشرين وِنْجومه وْضِحْك هْلاله
تعتقد إنّي أنا مَيِّتْ .. وانا لا واللّه آنا لا ميّت حبيبي لا ولا اللّه قاله
لى يبي يقرَبْ خفوقي ما يجيني بْزَلّه زلّةٍ أسْمَحْ لها ومن عقبها بِزْواله
كان عندك هرج بتْقوله لقلبي قِلْ له وش علينا بْهَرْجة المسكين واللى قاله
ما عرف شَيٍ في بالي لا بغيت أوصل له ويذكر اسمي يومها وبحلّه وبترحاله
من يحب بحب ضايع قلت اللّه شلّه ضاع واللي ضاع عندي إحتياط بْداله
والله لا احذفه أنا ويصير حرف العِلّه يالين ما يضحَكْ عليه ابليس قبل عْيَاله
لي (مَسِجْ) يكتب في بالي وعقبها أرسل له ويدخل بْشاشات حبّه وينحرِقْ جَوّاله
من خباله إلْخباله نيّةٍ ناوٍ لــــه ولا بغيت ازيد شاف خْبال غير خْباله
أرفعه وارجع أذلّه وارفعه وآذلّه لين أسمع مرّتين بأذني يا هي حاله
ولو بغاني هو رقى لي والاّ انا ما انزِلْ له لا له انزِلْ لا له ولا ألف من أشكاله
ذا طريقي من عرفتك والطريق تْدلّه الطريق اللي تدلّه لازم ان تسعى له
خِذْ من الشاعر كلامه والاّ حبّه خَلّه أنا آحبّك .. لا حبيبي لا ولا اللّه قاله

ديـمــقــراطــي

تصدّق ما بقى له شيّ في باله من الأفكار عجز يخفيه في صدره كلام الحق ويلمّه
عجز يقطف ورود الفل ويظلم وردة النوّار لاجل ما يكسب الآذان يطري له ولد عمّه
إذا ما عاش ليله ليل ولا عاش النهار نهار ليا صبحه غدى ليله ونور الصبح مظلمّه
واذا ما عاش مستقبل يعيش اليوم بالتذكار يعيش الحاضر الماضي يهمّه بس ما يهمّه
يمقراطي يعبّر عن كلامه عاش باستقرار يومّ القلب لافكاره واذا ومّ الفكر ومّه
وانا ما جبتها لك سحب إلا في سما الأمطار سحابٍ لا بغى يمطر دموعه إندفق دمّه
سحابٍ من دموع الموت هالك يروي الأنهار روى نهره ونبت وردٍ عجز يقطف ولا يشمّه
جبل صامد قوى عزمه كبر حتى بدى ينهار عقب ما كان في العالي تهاوى من على القمّه
بدى يصـغر يالين أصبح حجر يلعب بيدين صغار تبعثر والطفل ينثر حصاه ويرجع يلمّه
نصيحه قلتها إحذر تعاكس جارف التيّار صعب تامّن في بحر الوقت لاموجه ولا يمّه
ونصيحه لا تذيكا لك على ناس اذكيا شطّار ترى بعض البشر تحسب بلا روح وبلا ذمّه
وانا لا ما عليّ الاّ أقول الحق مهما صار تريد الحق خذ قولي ولا تاخذ ولد عمّه
أنا قلت النصيحه لك واعيد الدار غير الدار وافاعيها تريّا بس لحظة غدر وتسمّه
أنا ما جبتها لك سحب إلاّ في سما الامطار واذا زمّ البحر موجه لك الله ردّها زمّه

جنون الحب

لا جنون الحــــــب ينفع في بواد الإحتمــــــال - - - احتمال يكون ضايـــــــع واحتمــــــــــال إنــــــه يبين
الخيال أصبـــح حقيقة والحقيقة من الخـــيال - - - شوف يعني كيف بـــــاجر ضـــاع مــن عمر السنين
لا محبه يــا قليل الحــب مــــن غير اتصــــال - - - ولا تواصــــل بيننــــا يمشي علــــى مـــــــا تشتهين
كــــم عجزت أفهمج والله لـــو أفهم الجمــال - - - يمكـــن الإبـــــل تفهــــــم مــــــــــن قبـــل لا تفهمين

أحلى زعل
جيب بزعل عليك .. وناوي بالخصام
كل ما في خفوقي .. بس ازعل عليك
يعني روّح واروّح .. واسري ليل الظلام
بس من يوم شفتك .. قلت برضا عليك
خل روحي بروحك .. هذا اغلى وسام
خل عيني بعينك .. خل ايدي بديك
ياشروق المحبه .. يا شموع الغرام
يا ورود بحياتي عطرها يهتديك
سلم برمش عينك .. هالتغلي حرام
ما تموت المشاعر .. دامني احتويك
انطبع في خفوقي اسمك بحرف لام
وفي عيوني عشقتك بحياتي ابيك
دامك بوسط عيني .. كيف عيني تنام
ودامك بنبض قلبي .. كيف ما افتديك
مد لي كف وصلك .. قولها بحترام
موت احبك واحبك .. موت انا اموت فيك
عاد تبغي الصراحه .. ما تويت الخصام
هذا قلبي يحاسب .. كل خطوة اليك
اقترب لك حبيبي بالغلى والسلام
يا حبيبي بصراحه .. حلوه غمضه عنيك

البدر
هذا هو البدْر والاَّ البدْر بِنْ عَمّه في عِلْم أنا والاَّ هذا الليل وِحْلومه
إن كان للحِسن قِمّه هذي القِمّه والاَّ عسى الحِسنْ كلّه فَدْوَةْ قْدومه
أقْبَلْ يضمّ السَّهَرْ وِعْيوني تْضمّه ما ادري من اللى من الثاني سَرَقْ نومه
كَنّ الوَصِلْ دِنْيتي يوم الوَعَدْ تَمّه وْكَنّ الوَعَدْ جَنّتي دام الوَصِلْ يومه
ما الوم من لامني في حبّه وْنَمّه حتى فوادي ولو يشكيه ما الومه
إذا تكلَّمْ يغار العطر مـِنْ فَمّه سوالِفِه كلّهــا بالمِسْك مَخْتومه
ياليت لى هَمّني مِنْ نَظْرته هَمّه عينه خذَتْ نَظْرتي قَبْل آخِذْ عْلومه
أبطا يسولِفْ عن الطيْب وْحَنَان أمّه ما يدري أنّه بقلبي وَثَّقْ سْهومه
ما يدري أنّه علاج العاشِقْ وْسَمّه وانّ القصايد على طاريه مَنْظومه
طالَعْت في ساعْته رَدّ وْقَلَبْ كمّه لا ساعْته قَصْدي وْلا قَصْدي خْتومه
ما قَصْدي إلاَّ الغَلا لى ساقني يَمّه أحيان ارومه وبعض أحيان ما ارومه
لولا الحيا والاَّ انا في ذِمّتي ذِمّه لاغْزي على روض رمّانه وْمَشْمومه

بـرج عاجي
في حضورك في غيابك ما يغير لي مزاجـــي
في كلامك فـــي ملامك ما تكدر لي طربها
لا تحسب ان كل قلب انعكاسه كلزجاجـــي
وان ياخذ كل عين و يلعلن نهبـــها
كيف اعذرك عقب هجرك و ان برجك برج عاجــي
شفت نفسك مثل شمس للنهار الله وهبهــا
من عطى لك حق تجرح من يقول انك علاجـــي
لا تسولف عـــن علاجي و الجروح انته سببها
لا تناجي في عتابك العتب غير التناجـــي
خذ مقامك بحترامك لا تبين لي عتبـــهـا
طال داجي كيف اناجي في الهوى شخص احتجاجي
صار قدره مثل عذره يشبه ذنوب ارتكبهـــا
لا تلاعب بل مشاعر دام بحر الشوق هاجـــي
المشاعر نبض شاعر والحضيض الي كتبهـــا
و انت الي صرت خلي احذر اقوال المداجـــي
قال كلمه لوم لاكن ماعرف كيف يحسبهـــا
وان صفينا و التقينا لا تكدر لي مـــزاجـــي
خذ مقامك بحترامك لا تبين لي عتبها

غصون الراك
يا (أحمد)خفوقي غدا في يدينها لعبة...
لعب الهوا في غصون الراك لا مالت...
و هي في قلبي تمركز في طرف شعبه..
وذكرى غلاها ليا ذا الحين ما زالت...
قولوا لمحبوبتي نفس العنا تعبه.....
وان قلتوا إلها .. أبا اعرف إيش هي قالت....
إلى متى هالخفوق يعيش في رعبه...
وشلون يركد شعوري و الغلا فالت...
الحب حاكم طغى ظلمه على شعبه...
و النفس تشكي على ظلمه ولا احتالت...
يا بنت أنا صعب ودموعي بعد صعبه...
من قو عزمي ليا ذالحين ما سالت...
إن كنتي الزين من راسه إلى كعبه...
نفسي لحب المكارم و العلا نالت...
الله يحرم عذولي شوفة الكعبه....
ياللي يدينه إذا طال القفا طالت....
لو كل من شافت عيوني تولع به....
ما صرت كني في غصون الراك لا مالت

حكومه الحب
سألت جفني ليه ياجفن ماتنام
قال اسأل القلب الشقاوي لعله
يجاوبك لانه هالايام منضام
سألت قلبي قال الاحساس خله
اسأل زمانك لانه اسباب الآلام
رحت اسأله شفت الزمن فيه عله
والأسئلة تشبه تفاسير الاحلام
والحلم ما تقدر تفسره كله
وان الليالي والثقافة والالمام
اقول لنجوم السما والاهله
ماترفع الشاعر محطات الاعلام
ولا الصور على غلاف المجله
مايرفعه الا مقامه ليا قام
في موقف ما كل رجلٍ يحله
والصحف لو جفت ما جفن الاقلام
سمع قلوب الحاسدين المغله
وانا قبل عامين والا قبل عام
والشعر سيفٍ لاتضايقت اسله
اركب الفكره على حسب الالهام
واخاف من بيتٍ يجي فيه زله
والارض ضاقت كره والعالم اقسام
ولكل قسم بين الاقسام مله
ولا صار وضع الناس في كل الايام
بين المجامل والحياة الممله
ودي اكون دولة دون حكام
الحب يحكمها وهي مستقله
ماحب ابدي راي او آخذ احكام
قبل اطلع على جميع الادله
سياسة المتسيد القائد العام
اللي يقدره الزمان بسجله
ابوي عون الجار وضعاف الايتام
اللي يفز لهم لاجوه فـ محله
الله يعز اللي يعزون الاسلام
والله يذل اللي يحب المذله

مظاهر الطواويس
هـذي مظاهـر مثـل ريــش الطـواويـس عــادة طـيـور وصــارت بـعـادة الـنـاس
هــذي المـسـائـل حـلّـهـا بالتـوسـويـس طافـت فـروخ وصادهـا اليـوم جرنـاس
قال الموصّف لي به الوصـف تأسيـس هذاك لي وصفه علـى العيـن والـراس
أشــوف زولــك داخــل القـلـب جلّـيـس لـو كـان فـي وسـط المعالـيـق عـكّـاس
هـــذي المـحـبّـه كـلّـهــا بـالأحـاسـيـس حـس البعيـد وحـس أقـرب مـن انفـاس
القـلـب لــه واحــد ولا مــزرة الـكـيـس وخلّك تعرف وش حاجة الناس للنـاس
خلّـك بــوادي فـيـه خـضـر المغـاريـس توطى على الأخضـر ولا تـدوس يبّـاس
بـعـض الـكـلام أحـيـان يبـغـي تلمّـيـس لمسه تهدّي الروع من لمسة احساس
بيـن العشـق والحـب دسـتـور تـدريـس ولا لا تشـبّـه لمـعـة زجـــاج بـالـمـاس
الـشـاطـر الـلــي يـعـرفـه بالمـقـايـيـس يعـرف خطاهـا دون مـا يصيبـه البـاس
كـل شـيّ قبـل لا يسـتـوي لــه تأسّـيـس يكبـر ويكمـل كـل سـاسٍ عـلـى ســاس
خــلّ الـغـرام يعـاتـب القـلـب ويـجـيـس نبضه على شان الهـوى يطـرد اليـاس
وتحـط فـي قلبـك شـرى عـرش بلقيـس من زِيـن شِعْـرك لبّسـت شعـرك لْبـاس
والـيـوم ليلـتـنـا تـــرى لـيـلـة خْـمـيـس والموعـد اللـي بيننـا وقــت الاغــلاس
دايــم واحــذر تـوعّــي تـخـتّـل ابـلـيـس واكتـب أخـو فـزّاع مـا بـيـن الأقــواس