انا البسمه انا الدمعه ملامح من بقايا اثـار
انا غيمه ويدفعها الهبوب وترفض هطولـه

قصيدة صفحة التاريخ حامت في سما البحار
انا الميته انا الحيه بنعش الريش محمولـه

انا الحوراء انا الدانه انا الماسه انا المحـار
انا من عمرها ظلت مـع الآثـار مشيولـه

انا ظروفي تعاندني .. زماني قاسي وجبـار
انا لامن نويت انهض بحظي (تحرد خيوله)

اعاني وحدتي .. حلمي ابي فارس بعد مغوار
واحب الواقع الملموس وارفض كل مجهوله

رسمت البسمه العينك واخفي صبري المنهار
انا اللي مكبلـه فعـادات والكفيـن مغلولـه

انا الحلوه انا المره وطيب الهيل والمسمـار
انا كلمه ولي اعراب للـي صـادق قولـه

بقايا حزن يسكني وتنبت في ثـراي ازهـار
مزيج العطف والرقه وشذى ينساب بسهوله

امد يديني للدنيا وانا اللي احفـظ الأسـرار
دلايل طبعي الوافي قصيـدة مجـد وبطولـه

انا ابيات معانيها وضوح الشمس وسط نهار
اناغيمه طواها الريح قبـل تسيـل سيولـه