قرب منها ومسك ذراعها بقوة : لا تستغبين علي .. انا ما الومك مادام اصلك من ارض خبيثة مايجي منك
طيب ابد ..
جمانة تنرفزت من كلامه : ما بسمح لك تغلط عليه ازا لساتك زعلان لانو افترئنا .. انا خلص ماعاد بدياك ..
ياسر بضحكة استهزاء : اييييه بلاك ماتدرين يوم فرقاك كان يوم عيد ..
بهالوقت انفتح الباب .. ووقفت سناء مكانها مذهولة ..
ياسر : هلا والله .. تعالي صفي مع خويتك واسئلي وش اللي صاير ..
سناء : بجد في ايه ؟
ياسر : اسئليها وبتعلمك .. " وناظر في جمانة باستحقار " لو مهما سويتي وربي ماتجين ظفر
الجوهرة ..
جمانة : ممكن تفهموني شو اللي صاير .. ؟
ياسر شدها اقوى : جمانة لا تمثلين البراءة ماتليق لك ..
سناء تبي تهدي الوضع : لو سمحت .. " وقربت منه " يا استاز
ياسر : وخري هناك بس .. " وطالع في جمانة بتهديد " والله اذا جاني منك مسج واحد بس .. هالشقة بتصير قبرك ..
جمانة : مسج ؟ انا من يوم اللي تركتك مسحت كل شي بيخصك ..
ياسر بابتسامة علت وجهه استهزاء : تركتيني ؟ لا يكون قايلة لصديقاتك انك تركتيني وانا الحين اللي
ميت عليك وابيك ..
جمانة : مائلت شي لحدا .. وماصار شي مهم لحتى أووله .. حل عني ولا
ياسر : اذا بروح رحت بمزاجي .. مو انتي اللي تطرديني " وبصق على وجهها " اطلعي من حياتي ولا عاد
اشوفك ابد ..
سناء مسكت يده تبعده عنها : سيبها بئى ..
دفها عنه : وخري انتي الثانية جاية تفزعين معها ..
جمانة وهي حاقدة عليه : هي آخر مرة بسمح لك تمد ايدك عليي .. ومن هلا ورايح مابئى تجي هون ..
ياسر : ومن قال اني بجي لك .. انا اليوم اسعد ايام عمري .. يوم ربي ساقني لهالمكان عشان اشوف
اللي يريحني عمري كله ..
جمانة من قهرها قامت تهدده : والله لو شفتك هون مرة تانية رح بلغ الشرطة .. !
ياسر ابتسم : ماراح اجي ابد صدقيني .. واذا براسك شي سويه
مادام كسبت زوجتي ماهمني لو
اخسر الدنيا كلها ..
ناظرته بقهر وهي حاسة فيه انه متعمد يقول هالكلام يبي يقهرها ..
ورغم انه اي واحد بهالموقف ممكن تكون ردة فعله اقوى وانتقامه اشد الا انه فرحته ببراءة زوجته طغت
على اي شعور ثاني .. مشى عنهم وراح لسيارته وهو يحمد ربه ويشكره .. صحيح هو ظلمها بس هي اثبتت له انها مخلصة له ..
ولو انه مايدري للحين هل يصارحها ويعلمها اللي صار .. او يحتفظ بهالسر في قلبه للأبد ..
اتصل عليها وهو طاير من فرحته : وينك فيه ؟
الجوهرة : عند بشاير يعني وين بكون فيه ..
ياسر : هههههههه الاخلاق تجارية اليوم .. بجي امرك الحين اوكي ؟
الجوهرة : طيب ..
اول ما وصل كلمها تنزل له .. من ركبت السيارة كانت عيونها حمرا ومبين عليها انها كانت تصيح ..
ياسر ناظرها مستغرب : تصيحين ؟
الجوهرة : لا روح البيت مافيني شي ..
ياسر : والله انه فيك .. وش اللي صاير .. !
الجوهرة : بشاير بتروح وتخليني " وفكتها مناحة "
ياسر ضحك : هههههههههه والله ان البنات حساسات .. هذاك بتبعدين عني ماصحت ..
الجوهرة : هذا انت قلبك قاسي ..
حرك السيارة وهو مبتسم : الحين صار قلبي قاسي ؟ وين اللي دايم ماتناديني الا القلب الحنون .. !
ضحكت من بين دموعها : هههههه يانصاب ..
ياسر : ايه كذا اضحكي .. ياشينك لا صرتي تصيحين وجهك يصير كله متفخ وخشمك احمر ..
الجوهرة مسكت خشمها : خشمي احمر ؟ اكيد من البرد ..
ياسر : تبين اقدم رحلتك اسبوعين وتحضرين عرسها بالكويت .. ؟
الجوهرة ناظرته متحمسة : جد ؟
ياسر : لا طبعا مو جد .. بس قلت يمكن تقول لا حبيبي بقعد معك قبل اروح لاهلي ..
الجوهرة : لا تدقق عاد هي طلعت كذا .. بعدين انا رحلتي بعد 18 يوم مو بعد شهر
ياسر : وحاسبتها بعد ؟ الظاهر مستعجلة على فراقي ..
الجوهرة : لا والله بس ودي اولد وارتاح ..
ياسر : هذا وانتي توك بالسادس ..
الجوهرة : خايفة مادري ليش .. الله يسهل ولادتي يارب ..
ياسر : ان شاء الله ربي يقومك بالسلامة ..
مشو بطرقات لندن اللي كانت شبه خالية من المشاة خصوصا لا غربت الشمس وجا الليل بهالشتاء القارس ..
اول ماوصلو .. فتح باب السيارة بينزل .. وباغته لفحة هوا باردة : ياشين البرد حتى الواحد يصير
ماله نفس يطلع .. تغطي زين لاتبردين ..
الجوهرة : الله يعين بس ..
نزلو لشقتهم .. وارتجفت الجوهرة من البرد : ياسر .. الشقة متجمدة انت مقفل نظام التدفية ؟
ياسر : لا والله ماسويت شي .. لا يكون عطلان ..
وراح يشيك عليه .. رجع شغله واشتغل .. : خليك لابسة ثقيل ..
الجوهرة وهي تفصخ الشراب اللي برجلها : لا خلاص بديت احس بدفى ..
وقعدو اثنينهم بالصالة .. هو ماسك الكتب يدور اللي يبيه منها .. وهي تمددت تريح شوي ..
ياسر بعد تفكير طويل قرر يقول لها شي من اللي بخاطره .. يمكن يرتاح .. : جوجو ..
كانت منسدحة على الصوفا ومتلحفة بشال صوف .. رفعت راسها وناظرته : هلا ..
ياسر قام عندها : وخري لي شوي " جت بتقوم بس مسكها " خليك مرتاحة ..
الجوهرة : مابيك تقعد عند رجليني ..
ابتسم لها : وين اقعد طيب ؟
قامت وغيرت وضعيتها وحطت راسها على فخذه : العب بشعري وسولف لي ..
ياسر : تتدلعين علي ..؟
" ابتسمت له وكمل كلامه " اخاف تنامين ..
الجوهرة : لا ماعليك .. قول اللي تبي ..
ياسر : تذكرين المسجات اللي كانت تجيني من فترة ؟
الجوهرة ركزت معاه : رجعت تجي لك .. !
ياسر : ومن قال انها وقفت اصلا .. بس اليوم عرفت من اللي يرسلها ..
الجوهرة : مين ؟
ياسر وعينه عليها .. يبي يشوف شلون بتكون ردة فعلها : جمانة ..
ابتسمت وبكل برود : وانت كنت متوقع غيرها ؟ بس شلون عرفت ..
ياسر : صدفة
الجوهرة : يعني سوت اللي براسها وخلتك تشك فيني ..
ياسر ماحب يكبر السالفة : كانت اوقات تخليني اوسوس .. بس انتي كنتي قد الثقة ومحيتي اي شك من
قلبي ..
الجوهرة : وانا انتظرت هاليوم من زمان .. كنت عارفة ومتأكدة انك تشك فيني بس كنت ابي تقول لي
ولو انها جت متأخرة بس يكفيني انك صريح معاي ..
ياسر : يعني مو زعلانة
ابد ؟
الجوهرة : زعلت منك اول .. بس الحين اعترافك يشفع لك ..
ياسر لام نفسه انه ما اعترف بكل شي .. بس بما انه شي وانتهى مايبي يفتح على نفسه سوالف
ماتنتهي : تصدقين اوقات احسد نفسي عليك ..
ابتسمت له وغمضت عينها مرتاحة لسير حياتها مع زوجها ..
ناظرها بحب : اللي يعجبني فيك عقلك ورزانتك .. مواقف صارت لو عقلك صغير كبرتيها .. بس يوم
عن يوم تكبرين في عيني اكثر ويزيد اعجابي فيك ..
الجوهرة : بشوف نفسي ترى ..
ياسر : ههههههه صوتك كله نوم .. اجل قعدنا بدون عشا الليلة ..
الجوهرة طلعت كلماتها متثاقلة من النوم : حبيبي شوي بس .. ومسكت يده حطتها على وجهها ..
واستغرقت في نوم عميق .. وهي تحس بدفى يسري بجسدها .. ودفى آخر يعمر قلبها .. وحب كبير
متمكن بداخلها للانسان الوحيد اللي ملك قلبها ..
*********************
بمطار هيثرو بلندن .. كانو ينتظرون النداء الأخير على رحلتها ... هو مايبيها تروح عنه ..
وهي حاسة انها مو قادرة على فراقه .. كانت ماسكة نفسها ماتبي تصيح قدامه ..
ناظرها وهي تقوم متوجهة للطيارة : لانك بتفارقيني مشى الوقت بسرعة ..
مسك يدها وهي ساكتة ماتبي تتكلم .. حاسة انها مخنوقة : طالعي فيني ..
ناظرته بتردد وتمتمت بكلمات مو مفهومة ...
ياسر : انتبهي لنفسك .. ولو احتجتي اي شي كلميني على طول ..
" هزت راسها وكمل كلامه " وادعي
لي تكفين انا محتاج لدعاك .. وامي زوريها لا تقاطعينها ..
الجوهرة : مايحتاج توصيني هذي خالتي قبل تصير ام زوجي .. ياسر تأخرت ..
ياسر : خلاص روحي وانتبهي لنفسك .. واول ماتوصلين كلميني ..
مشت بخطوات مرتبكة وخايفة للطيارة .. جلست بمقعدها واستمعت لتعليمات السلامة .. بعد ما استقرت
الطيارة في الجو نزلت دمعتها غصب عنها لأول مرة تسافر لحالها .. واول مرة من استقرت حياتهم تبعد عنه ..
اشغلت نفسها في احدى المجلات تضيع وقت .. واللي ريحها شوي انها سمعت اللي جنبها وعرفت
انهم
زوجين سعوديين وهالشي كان كافي انها تحس بطمأنينة .. استسلمت للنوم وقت مو قصير ..
وماتدري شلون قضت هالوقت الطويل والممل .. شوفة الرياض واخوها ناصر ازاحت الهم عن
قلبها ..
من نزلت وتوجهت لصالة الاستقبال .. وعيونها تبحث بلهفة عن اخوها ..
مشت له مبسوطة .. مدت يدها وصافحها .. ورغم انهم تعودو من ناصر انه دايم رسمي معاهم .. الا
انها تمنت انها تضمه من شوقها لأهلها .. من ركبت السيارة اتصلت
على ياسر تطمنه عليها ..
وصلو لبيت اهلها ولقت العايلة كلهم مجتمعين يستقبلونها ..
على طول نزلت دموعها وهي تشوف جمعتهم الحلوة ..
مشاعل : توك مارحتي الا من شهرين .. مامداك ولهتي علينا ..
سلمت على امها وخالتها .. بعدها سلمت على بنات عمانها وبنات خوالها وخالاتها : ماشاء الله
كل هالجمعة الحلوة عشاني ؟
ام ناصر : قلنا اليوم خميس وانتي راجعة مبكر .. نسوي عشا ونجتمع كلنا ونستانس ..
الجوهرة : الله يجعلها دوم هالجمعة وهالوناسة .. يمه وين ابوي ابي اسلم عليه ..
مشاعل : الحين بروح اصوت له ..
راحت تسلم على ابوها ورجعت قعدت معاهم ...
قضت ايامها كلها وناسة وانتظار لمولودها البكر .. وبعد شهرين و 3 ايام من وصولها ولدت بالسلامة ..
جابت ولد وسمته حمد على اسم ابو ياسر ..
وبعد زيارات وروحات وجيات عليها .. اليوم مجتمعة هي والبنات لحالهم ..
اريج : احس مالي بطن ياناس من يصدق اني بآخر السابع ..
فاتن : عادي يقولون الوحدة بأول مولود كذا ..
الجوهرة : انا اول حمل بس كان بطني اكبر ..
اريج : اصلا ذا مو اول حمل لي ..
الجوهرة : في ناس كذا .. بالعكس احسن لك بعد الولادة ماتتعبين يرجع جسمك مثل اول ..
اريج : عاد يقعد لي فيها بندر انا من اول وما اسمع منه الا يادوبا .. شلون عاد الحين
مشاعل : هههههههههه قروي يبي يصير رومانسي مايعرف شلون ..
اريج : يازينك ساكتة بس انا قلت يعايرني فيها مو يتغزل .. الله عاد هالفيصل اللي مدري وش يقول ..
مشاعل : بعد عمري يقول احلى كلام بعد ..
الجوهرة : كانك صادقة دقي الحين ونشوف رده ..
اريج : ههههههههههه اي يالله ابي اضحك تكفين ..
غادة : يقال لك ماضحكتي الحين ..
اريج : لا في فرق ابي اضحك عليها اونس بصراحة
مشاعل : مانيب داقة عليه ..
الجوهرة : هههههههههههه عارفة وش بيكون رده ..
اريج تثقل صوتها : خير وش تبين
شهد : هههههههه تكفين ميشو دقي
غادة : صار عليك مطالب الحين يلا عاد ..
مشاعل : بدق بس بشرط .. كل وحدة فيكم تدق على رجلها ..
عبير : انا من الحين اقول لك بيقول لي ايش عندك
ندى : هههههههههه اجل ابشرك انا اردى منك .. مو راد علي ابد ..
فاتن : وانا بصراحة سعود عند غلا ومحذرنا لاصار عند وحدة فينا الثانية ماتتصل فيه ..
مشاعل : الحين قمتو تتهربون ؟ اجل مافي .. ماراح ادق عليه ..
اريج وهي تسبل بعيونها : تبون تسمعون الرومانسية على اصولها والاسلوب اللي يذوب .. والكلام
اللي يخقق ؟
شهد : لا تقولين بندر لاني ماقدر اصدقك ..
اريج : لا والله رحم الله امريء عرف قدر نفسه " وتغمز بعيونها " خلو لمو تتصل على مجود ..
لمى وجهها صار احمر : لاااااا .. مستحيل ..
الجوهرة وخواتها ماعلقو .. ويمكن اللي جا ببالهم هالوقت سوالف ملاك عن ماجد ورومانسيته ..
خصوصا انه كان متعلق فيها ويبيها من وهم صغار .. وبأيام الملكة كان كل شوي يفاجأها بشي ..
لدرجة حتى خواتها حسدوها وكل وحدة فيهم تمنت تعيش نفس اللي عاشته ملاك ..
الكل بدون استثناء لاحظ كآبة عبير اللي مارضت الا بالقوة تطلع معاهم وهي ظلت طول الفترة الأخيرة
مابين المستشفى والبيت .. واذا طلعت راحت عند امها يومين او 3 مرات في الأسبوع ..
وكل ما احد يسئلها تعذرت بحملها وضغط التدريب .. رغم ان الواقع يقول انها عانت في الفترة الاخيرة
من مشاكل مع فهد .. بعد ما اكتشفت بالصدفة مسجات واصلة له .. ورغم جهلها لمصدرها
الا ان الأكيد انها
من بنات ..
********************
بعد شهرين من ولادة الجوهرة .. رجعت للندن اللي راح تقضي فيها آخر 5 اشهر هناك .. بعدها راح
يرجعون لأرض الوطن .. بعد غربة سنين ..
اريج صار لها اسبوع ويومين من ولدت وجابت بعد ولد وسموه مشاري ..
عبير بآخر شهرها السادس وعانت طوال حملها من نكسات متكررة بسبب الانيميا وقلة الأكل ..
واللي حذروها الأطباء كثير بأنها ممكن تتعرض لولادة مبكرة اذا ما انتبهت لنفسها ..
حتى اهتمام بنفسها واناقتها ماعاد صارت تهتم .. بس اهم شي عندها تكون نظيفة .. اما تكشخ
وميك اب صارت آخر اهتماماتها .. واذا كلفت على نفسها واجد حطت قلوس لحمي ..
واذا جت تنام مع فهد اكتفت ببيجامات وتتعذر انها حامل ومالها خلق شي .. رغم انه تصرفات فهد
هي اللي كرهتها بكل شي حتى نفسها .. وماعاد تشوف بمرايتها غير امرأة بشعة ماتحمل اي
نوع من مقومات الجمال والأنوثة .. واحساسها المؤلم بخيانة فهد افقدها ثقتها في نفسها ..
بعد العشا وبجناحها باقي لها اقل من 3 اسابيع وتتخرج هي وشهد ..
كانت متوترة ونفسيتها مو ذاك
الزود خصوصا مع ظروفها الحالية
ناظرت ساعتها وشافتها تشير لـ 2 ونص وحضرته للحين ماشرف ..
كرهت عمرها ليش صارت بهالسلبية هي طول عمرها البنت المدللة اللي كل طلباتها مجابه ..
وماعمر احد فكر يكسر بخاطرها لانها دلوعتهم ..
كان الهدوء قاااتل .. يخلو من اي صوت الا صوت انفاسها الموجوعة .. سمعت صوت الباب الخارجي ..
قامت تشوفه .. طلت مع الشباك وشافته كان توه مبركن السيارة نزل والهيدفون بإذنه ..
شافته يسولف ويضحك .. يآآآآه يا وجعها هالضحكة اللي تتمناها بس للأسف صار يبخل عليها فيها ..
تمنت تسمع شي تدينه فيه بس كان بعيد ومستحيل تسمعه ..
طلعت من جناحها وراحت للصالة اللي عند الدرج .. ارهفت سمعها بس ماسمعت الا صوته يغني ..
مبسوط ؟ اكيد انه مبسوط مادامه مو معاها لازم يكون مستانس .. مو هي اللي دايم يقول لها عكرتي
مزاجي .. رجعت لغرفتها انسدحت على السرير وتغطت وحاولت تبين انها نايمة .. ماتبي تحسسه انها
تنتظره لانها تشوف انه مايستاهل انتظارها ..
دخل بكل هدوء شافها مجهزة له ملابسه خذاها .. وراح غسل وبدل .. رجع انسدح جنبها وتغطى ..
نزلت دموعها بألم .. مو هذا اللي تمنته لحياتها .. تلوم نفسها أو تلومه .. يمكن هي قصرت معاه
بس هذا ما يعطي له مبرر انه يخونها ..
كتمت شهقاتها اللي طلعت من صميم ألمها .. ماتبيه يحس بشي .. وماكانت محتاجة انها تتمنى
ما استغرق وقت كثير حتى هدت انفاسه وعرفت انه نام .. تاركها غارقة بجروح هو سببها ..
ماعرفت تنام والضيقة اللي تحسها بصدرها فاقت الوصف .. قامت تصلي الفجر .. قومته تبيه يلحق الصلاة
بالمسجد لكن لاحياة لمن تنادي ..
خذت كتاب ربها وطلعت للصالة .. قرأت ماتيسر منه .. سمعت صوت المنبه في الغرفة وعرفت انها اكيد
صارت الساعة 7 ماتدري شلون عدت هالساعات بدون ماتحس وحمدت ربها اللي وهبها الطمأنينة والخشوع
اللي نستها همها ..
راحت له شافته يتقلب بفراشه وماوده يقوم .. قربت منه بهدوء : حبيبي قوم لا تتأخر ..
مازال يتقلب والمنبه اشتغل مرة ثانية سكره بعصبية : اووووف
فتحت الأباجورة : فهودي يلا قوم
بصوت كله نوم : عبير لا تقلقيني مانيب قايم ..
عبير : طيب الدوام ؟
فهد : مابي اروح .. اطلعي وسكري الباب ابي انام ..
عبير : وانا من يوديني المستشفى ؟
فتح عيونه وناظرها بعيون يتطاير منها الشرر : روحي مع اي احد .. مابي اسمع كلمة ثانية لا تطيرين النوم
واحط حرتي كلها فيك ..
مازعلت منه .. هي تعودت مزاجيته وعصبيته .. بس اللي قاهرها انه حتى صلاته ودوامه صار يأخرها ..
استحت تتصل على خالد اليوم بعد يمرها وقررت تروح مع السواق .. مع انه مانعها تروح معاه للمستشفى
كلمت السواق يجهز السيارة .. لبست وخذت عباتها وشنطتها ونزلت ..
مرت على خالتها تصبح عليها : كيفك اليوم ؟
ام فهد اللي صار لها كم يوم تعبانة وماعاد هي مثل اول : ماعلي .. اقعدي افطري وانا امتس
عبير : لا مالي نفس انا اذا وصلت المستشفى باخذ لي عصير..
ام فهد : والعصير وش يسوي الله يهداتس .. وين طايرة الحين تو الناس على دوامتس وهذا هو
رجلتس مابعد قام ..
عبير : فهد مارضي يصحى .. وانا بروح الحين احسن على الأقل اجلس مع البنات اغير جو .. وكمان
زحمة الشوارع يادوب ساعة عشان اوصل المستشفى ..
ام فهد : من بيوديتس ؟
عبير : بروح مع السواق ..
ام فهد : ها روحي مانيب رادتس اعرفتس عنيدة واللي براستس تسوينه ..
قربت منها عبير وحبت راسها : والله مو عناد .. وأوعدك اذا وصلت هناك راح افطر على طول ..
ام فهد : الله يطمن قليبتس ويوفقتس .. وتركدي يمتس لاتخلين السواق يسرع بتس مع
ذا الزحام ..
عبير وهي تلف طرحتها : من عيوني يلا مع السلامة ..
ام فهد : الله يحفظتس ..
********************
{ ... من علمك تزرع السكين في صدري ؟
وأنا اتحاشى مرور الآه في ....../ صدرك ... !
على الساعة 10 الا ربع اتصل عليها ماقدرت ترد عليه كانت مع الطبيب في الجولة اليومية على المرضى ..
بعد ماخلصو راحت للغرفة تبي تكتب تقارير عن عدد من الأطفال اللي مرو عليهم بجولتهم تذكرت اتصال
فهد ودقت عليه ..
فهد : بدري .. ليش تو تتصلين ؟
" ياربي على اللي يبغى مشاكل على الصباح " قالتها في نفسها : حبيبي معليش بس كنا في الجولة الصباحية
فهد : ليش يعني لا رديتي علي بيخرب برستيجك ؟
عبير : لا مو كذا بس الدكتور كان يتكلم وماقدرت اقاطعه وارد عليك ..
فهد عصب وعلا صوته : لا الطعيني احسن وحضرته اسمعيه للآخر ..
حست باحراج وتوقعت البنات اللي معاها سمعو صوته .. لو كانو شهد ولا منى اهون لانهم صديقاتها
وبيكون موقفها اسهل بس هالبنات علاقتها فيهم سطحية وهذا اللي زود احراجها .. : دقيقة حبيبي
مازال معصب عليها : وين ؟
لبست نقابها وطلعت من الغرفة : انت الحين ليه تزعق ؟ كذا خليت موقفي بايخ قدام البنات ..
فهد : لانك تنرفزين ..
عبير : طيب ممكن نأجل نقاشنا اذا رجعنا البيت .. الوضع هنا ما يساعد ..
فهد : من وداك المستشفى ؟
تسارعت دقات قلبها هو بدون سبب كان معصب شلون لو عرف انها جاية مع السواق ..
بس مستحيل تكذب عليه تعترف وتتحمل عصبيته ولا انها تخبي عليه ويكتشف من غيرها : مع ايكو
فهد : حلو حلو
عبير : حبيبي والله انحرجت وانا كل يوم والثاني اتصل على خالد يمرني
فهد : لا ابد اكسري كلمتي " وبصراخ " وين رحتي ؟
عبير مافهمت عليه : معاك ..
فهد : انا اقول وين رحتي قبل تروحين للمستشفى ؟
عبير : مارحت ولا مكان والله من البيت على المستشفى على طول ..
فهد : نصيحة تكلمي .. لا اطلع الكلام منك بالقوة ..
وصلت حدها منه فوق خياناته المتكررة وتعامله القاسي معاها الحين يشك فيها بعد : حبيبي اذا احد مزعلك لا تقلبها على راسي ..
فهد : وطال لسانك بعد ؟
عبير : شوف انت ايش جالس تقول اذا مو مصدقني اسئل ايكو " وعشان ترتاح من تجريحه ومن
الاحراج لو احد عدى وسمعها " انا رايحة في حالة دوبها وصلت للطواريء .. وسكرت ماتبيه يقول
اكثر من اللي قاله .. حمدت ربها انها لابسة نقابها وهالشي رحمها وماخلا
احد يشوف وجهها .. ركضت للحمام ( وانتو بكرامة ) واطلقت العنان لدموعها ..
كل اللي ببالها الحين وش اللي تغير ؟ وين فهد الحنون الرومانسي اللي كان مغرقها حب ..
تحاملت على جروحها وغسلت وجهها وطلعت تشوف شغلها اللي تضيع فيه همومها وتعوض بنجاحها
فيه فشلها في حياتها مع زوجها ..
مر يومها بشكل روتيني .. وطلعت مع شهد عشان خالد يوصلها
لبيتها .. لأن فهد بيتأخر بحكم تأخيره الصباح ..
من وصلت طلعت لجناحها على طول حتى ماصار لها نفس تتغدى او تاكل ..
خذت لها دش بارد ينشطها بعد حر الرياض الشديد .. لبست بيجامتها ونامت ..
صحت على صوت المنبه اللي ازعجها .. سكرته وحاولت ترجع تنام بس تعوذت من الشيطان وقامت ..
بعد ماتوضت شافت ان وقت صلاة المغرب طاف عليها ساعة الا ربع استغفرت ربها وصلت ..
كانت مو قادرة تقاوم النوم .. بس تحملت الين تصلي العشا وتنام مرة وحدة .. لانها مرهقة وامس كله
مانامته .. وفعلا ماصدقت انها تسمع اذان العشا حتى قامت وفرشت سجادتها وصلت ..
وعلى طول بعدها رجعت لسريرها وما احتاجت وقت كثير عشان تستغرق في نومها ..
جا متأخر كالعادة وقرب منها يصحيها .. فتحت عيونها شافته قريب منها ..
فهد : ماشبعتي نوم وانتي نايمة من العصر ؟
قلبت على جنبها الثاني : ايش عرفك ... !
فهد : جيت بدلت وقعدت مع امي وطلعت بعد صلاة المغرب ..
عبير حست انها شبعت نوم خلاص والحين هي مصحصحة : ليه ماصحيتني ؟
فهد : ابد حسيت انك مرهقة وماكنت ابي ازعجك ..
تعجبت بداخلها من هالإنسان اللي عجزت تفهمه .. من يسمعه اليوم الصباح مايقول انه هو نفسه
اللي يتكلم الحين بكل هدوء وحب ..
قامت تبي تغسل .. وناظرها بتعجب : وين ؟
عبير : بغسل واشوف لي حاجة آكلها ما اكلت من الصباح ..
ابتسم لها : تعالي شوي ..
عبير : اجي فين ؟
فهد : ابي اضمك .. مشتاق لك !
بعد تفكير قصير استسلمت لرغبته هي بعد مشتاقة له .. ورغم اللي يصير اوقات والمشاكل اللي
تتعبها هي في الآخر تحبه ليه تقضي عمرها بهموم واحزان .. الأفضل تستغل الفرص كل ماصادفتها ..
بعد ماغسلت رجعت له وهي مبتسمة : عارف انه صار لنا ثلاث ايام ماجلسنا مع بعض فيها ..
ضمها لصدره : شفتي شلون .. وحشتيني .. !
عبير : انت اكثر ..
فهد : لو جد تشتاقين لي ما أجي كل يوم احصلك نايمة ..
عبير ماودها تعاتب وتلوم تبي هالليلة تعدي على خير كفاية راح عمرها معاه شرهات
وعتاب : ايش اسوي كذا مع الحمل صاير نومي كثير " وباست خده " بس والله توحشني ..
قرب منها اكثر وانقلب هاليوم كله للنقيض .. من مشاكل وصراخ الصباح .. الى حب وحنان
بالليل وسبحان اللي يغير ولا يتغير ...
********************
مسوية لهم قلق وازعاج في البيت كأنه محد ولد بهالدنيا الا هي ..
مشغلتهم كلهم معاها امها وغادة
والشغالات .. حتى ابوها مو مقصرة معاه .. على وقت الغدى كلهم قاعدين عندها .. : يبه شوف
يشبه مين ؟
ابو تركي : والله مدري وانا ابوك هذا كل يوم له وجه ..
ام تركي : انا قايلة لك مثل ابوه يوم انه بزر ..
اريج : لا وععع تكفين يمه قولي غيرها ..
ابو تركي : استحي على وجهك هذا رجلك ..
اريج : ماقلت شي يبه بس بندر وهو بزر شين ودب وثقيل طينة ..
ابتسم ابوها : ايه بس يوم كبر ماتشوفين احد ازين منه .. وتحارشين اخوانك لا تكلمو عنه ..
اريج : والله منت بهين يبه لازقن خشتك بالتلفزيون ولابسن نظارتك واثاريك تقط اذنك معنا ..
ابو تركي : ههههههههه مانيب قاط اذني بس تجيني علومكم ..
ام تركي : الله يقطع سوالفها هالبنت ماتحشم احد ..
اريج : وش انا قايلة الله يهداك ؟
ابو تركي : خليها تقول اللي تبي والله مايوسع صدري غيرها ..
تركي توه جاي من الشركة : السلام عليكم ..
الكل : وعليكم السلام ..
ابو تركي تهلل وجهه بشوفة تركي اللي يحس له غلا غير عن باقي عياله : هلا والله هلا بزينة هالبيت ..
تركي ابتسم : جعل عمرك طويل يارب .. ما مزين هالبيت الا انت والوالدة عسى ربي يخليكم
لنا .. وام محمد بعد ماعليها قصور عسى ربي يوفقها ..
اريج : مابقى الا انا .. وراك سافطني على جنب وماجبت لي طاري ..
تركي : على العين والراس يا ام مشاري .. عزيزة وغالية ..
تشققت من الوناسة : ياحلوه هالأسم .. تصدق انك اول واحد يقدرني ويناديني فيه ..
تركي وهو يشوف غادة تقوم : وين ؟
غادة : بقوم اجيب الغدا
ابو تركي : ارتاحي يابنتي .. الشغالات بيجيبونه ..
غادة : زين بكلمهم يجيبونه
طلعت من عندهم .. وتكلم ابو تركي بكل حب : الله يوفقها هالبنت 11 سنة معانا بهالبيت ماجانا منها
زلة .. حشيمة ماشاء الله عليها ..
ام تركي : اي والله انها عمرها ما زعلتني ولا غلطت بكلمة ..
اريج وهي تناظر بغادة اللي جايبة معاها صحون الغدى : بعد عمري غدو والله انها تنحط على الجرح يبرى ..
ابتسمت لها غادة وقعدت ترتب الصحون على السفرة ..
اما تركي كان طول هالكلام وهو حاس بالفخر بهالإنسانة اللي قدرت تزرع حبها في قلوب الجميع ..
تغدو .. واستأذنهم ابو تركي يبي ينام له شوي قبل صلاة العصر ومثله بعد تركي ..
اريج : انا بعد بنام شوي خواتي بيجون العصر ..
ام تركي : اجل كلمي حريم اخوانك بعد يجون ..
اريج : شهد بتجي بس لمى نسيتها .. غدو الله يخليك كلميها ..
غادة : اشوفك من يوم جيتي هنا وانتي تتدلعين علينا ..
اريج : تكفين ابي انام لي شوي وربي ماخلاني انام البارح ..
غادة : كلنا في الهوا سوا .. وربي هالبنت صياحة .. خلاص نامي انا بكلمها ..
على العصر تجمعو كل البنات عند اريج .. اللي جايبة معاها حلى مسويته في البيت .. واللي
شارية حلويات من برا .. واللي جايبة معاها معجنات وفطاير ..
ام تركي : ليش مكلفين على انفسكم البيت مليان والشغالات مو مقصرين ..
فاتن : الله اكبر يمه ترى كله بناكله .. ومادام مجتمعين ليش نقصر على عمرنا ..
اريج : فتون تعالي خوذيه زهقني ما اعرف له لا صاح ..
ام تركي : مادام ما انتو قد العيال ليش تعرسون وتجيبونهم ..
ندى : يمه الله يهداك كل وحدة كذا بالأول .. مع الوقت تتعود ..
ام تركي : انتم يابنات هالجيل ماتتحملون مسئولية .. قاطين عيالكم على الشغالات ..
شهد : لا تظلمينا يا خالتي هذاني اربي عزوز ومتحملة ..
ام تركي : ايه بس نص يومه عند امك ..
شهد : عاد انتي عارفة الدوام ..
فاتن : يمه جيلكم انتو غير .. الوحدة فيكم كانت تعرس مالها الا رجلها وعيالها .. الحين احنا تعودنا
على الدلع .. والدراسة والعمل غيرت كثير في مسئولياتنا ..
ام تركي وهي لابسة عباتها : الله يهديكم بس ..
لمى : خالتي اقعدي تقهوي معانا ..
ام تركي : لا والله خالد ينتظرني برا بروح لم امي بقعد عندها شوي ..
فاتن : ياويلي من الله تصدقون اني مارحت لها من اسبوعين ..
عبير : خلاص تعالو بكرة تغدو عندنا .. انا ما اصدق متى يجي الخميس عشان اشوفكم ..
اريج : لا مابي غش تجتمعون وتخلوني هنا بلحالي ..
ندى : اجل ننتظرك ؟ جد لنا فترة مارحنا لها .. لازم نروح
غادة : انا من امس متفقة مع أمي بنروح عندها ..
عبير : حلو .. خلاص كذا بننبسط ..
جابو القهوة والشاهي وقعدو عند اريج .. وعقب ماتعشو رجعت كل وحدة فيهم لبيتها ...
********************
|