ان ولد خالها خاطبها من زمان ويوم راحو لهم هالمرة اكدو الخطبة
فهد قام مصدوووم حس انها خانته وان كل اللي حوله خدعوه كلهم
قالو له انها تعتبره مثل اخوها .... ليش يوم تعلق فيها ويبيها تروح
لغيره ... اخذ مفاتيحه وطلع راكب سيارته... والهم اللي بقلبه اكبر
من انه يتحمله
*
*
*
*
الجزء الثاني عشر
*
*
*
*
*
صاحية من بدري .. اشغلها التفكير ... لاول مرة بحياتها تحس
شي غير الدراسة يشغلها ... يمكن عرفت بالصدفة ان حاتم
تغيرت نظرته لها .. بس ماتوقعت انه بهالسرعة يخطبها ..شعور
صعب لما تكون مابين أمرين احلاهما مر...هي ماتنكر انها ماودها
تنشغل بشي حاليا .. دراستها صعبة .. وراح يكون عندها سنة
تطبيقية ... بس من ناحية حاتم انسان رائع وأي بنت تتمناه
ومافي شي يخليها ترفضه ...اوقات تفكر ترفضه لان مشاعرها
له مشاعر اخت لاخوها لكن يبقى حاتم ولد خالها واكيد غير عن
اخوانها ..... واذا رفضته ممكن يزعل خالها وزوجته وعيال خالها
وبكذا تخسر ناس عاشت عمرها معاهم وغرقوها بحبهم وحنانهم
في وقت افتقدت هالحب والحنان في ظل غياب الأب والاخو
والاخت ... وسنين عاشتها معاهم ماتنكر انها كانت من اجمل سنين
حياتها ... ومابين كل هالأفكار تظهر لها صورة فهد اللي سرق
قلبها وسلبها مشاعرها البريئة ....هي تحبه ماتنكر .. ولا تقدر
تخفي مشاعرها المجنونة لاطرى ببالها او لمحت زوله وهو بعد
يقولون انه يحبها ... بس وش سوا عشان هالحب؟ ماتقدم لها
او قال انه يبيها .. حتى كلامه لاريج يوم تكلمت معاه مابين شي
هي اللي بدت معاه بالكلام وهي بعد اللي قالت له اذا يبيها
يجيها مع الباب .. بس للحين ماجاها ....والحب افعال مو اقوال
واللي يحب مايتردد يسوي اي شي يثبت هالحب للشخص اللي يحبه
وتدري ان حاتم يحبها والدليل انه متكلم عليها من زمان مثل ماقالت
امها ماتدري كم مر من الوقت عليها وهي تفكر ... وعت من افكارها
على صوت المؤذن معلن دخول وقت صلاة الظهر...قامت بعد
ان اتخذت قرارها النهائي اللي مستحيل تتراجع عنه ... توضت
وصلت فرضها واتبعتها بركعتين استخارت فيها ربها ودعته
انه يسهل امورها ويعينها .....
*******************************
سهران طول ليله واشقاه التفكير وانهكه ... معقولة الحب يسوي
فيه كذا ؟.... معقولة يبعثره؟.... يشتته ... ويرهقه كل المشاعر
بداخله ترفض عبير تكون لغيره... احساس صعب تحب شخص
وتتمناه ويجي غيرك بكل سهولة يخطفه منك...كثر ماحاول ينام
ويطرد صورتها من باله عجز ... كره نفسه وسبها مليون مرة
لو ضاعت منه هو سبب ضياعها ... من شافها من 3 سنين
عمره ماسوا شي صح يخليها تحبه ... واريج قالتها انه هو بالنسبة
لها ولا شي ...طول عمره مندفع وقرارته يتخذها بالوقت المناسب
ليش في اهم قرار بحياته تخاذل ...تكاسل واعلن الفشل؟....
لكن مستحيل يستسلم اللي يحب يحارب عشان حبه وهو راح
يسوي كل اللي يقدر عليه عشان تصير من نصيبه..
اللي قاهره اريج ليش كذبت عليه وقالت انها تشوفه مثل اخوها
وتذكر بهاللحظة اريج... لازم يروح لها .. لازم يعرف منها كل
شي... قام بدل ملابسه .. وركب سيارته وتوجه لبيت اخته
وقف سيارته ونزل بسرعة وكأن احد يطارده... دخل للبيت
ومالقى احد بالصالة ... اكيد مقيلين عقب الغدا ....طلع فوق
لغرفة اريج.. ازعجه صوت الاغاني اللي يصدح في ارجاء
غرفتها.. طق الباب بس مامن مجيب .. رجع طقه اقوى
اريج: مييييييييين
فهد: انا اروج
اريج فتحت الباب وناظرته مستغربة: فهود
فهد شاف شكلها المعفوس وباين انها باذلة مجهود: وش قاعدة
تسوين انتي؟
اريج: ههههههههههههههه كنت ارقص
فهد: الحمدلله والشكر استخفيتي انتي؟ بعدين اذان العصر ماعاد
الا خير
اريج: خلاص سكرته بس ماقلت لي غريبة جاي هالحزة؟
فهد وبان عليه همه : اريج ليش كذبتي علي؟
اريج بققت عيونها: فهود وربي عمري ماكذبت على احد
احد قايل لك شي عني؟
فهد: عبير
اريج: وش فيها؟
فهد: مخطوبة لحاتم صح؟
اريج شهقت شهقة خوفت فهد: وشوووووو؟ وش قاعد تخربط انت
فهد: والله العظيم هذا كلام امك امس لي وربي من البارح مانمت
مقهور يا اريج
اريج: فهود وربي عبير تعتبره اخوها ودايم تسولف وكأنه خالد
عمرها مافكرت فيه شي ثاني ...
فهد: يعني نورة تكذب علي؟
اريج: فهود امي ماتكذب بس يمكن صاير لبس بالموضوع
فهد: شلون يعني فهميني؟
اريج: مادري انا بتصل فيها وبشوف وش السالفة
وبدون ماتنتظر منه رد سحبت جوالها واتصلت بعبير وانتظرت
لحد ماتسكر وماجاها رد
اريج: يمكن نايمة.. فهود لا تتضايق صدقني مو صاير شي
والله عبير بتعلمني لو انخطبت وتمت خطبتها .. هي قالت لي
من اول انها سمعت امها تكلم حاتم تمنعه يكلمها لانه تغير تفكيره
بالنسبة لها ... وشكت انه يحبها ..وماصارت تكلمه لانها ماتبي
تعلقه فيها ولان تركي قال لها مايجوز تكلمينه
فهد تنهد وهو يسمع كلام اريج بدون مايعلق منتظر رد عبير
اللي راح يحييه او ينهيه ....
وماهي الا دقايق وقطع هدوئهم صوت جوال اريج: هلا عبورة
عبير بصوت كله نوم: اهلين
اريج: قومي يالخايسة ياقليلة الخاتمة
عبير:هههههههههههه ليه
اريج: مخطوبة وماتعلميني؟
عبير:هههههههههههههههههه من قال لك؟
اريج: يعني صح السالفة ؟ ( هنا فهد كانت بتجيه سكتة قلبية )
عبير: خليني اصحصح وارجع اعلمك كل حاجة
اريج بصراخ: لا لا وربي ماتسكرين علميني كل شي بسرعة
في ناس ممكن توقف قلوبهم في وقتك اللي بتاخذينه
عبير: مين هم؟
اريج باستهبال : انا بس اخلصي علي وعلميني
عبير: عادي خطبني حاتم من اسبوع .. وفكرت واستخرت
واتخذت قراري واليوم راح ابلغ الكل فيه
اريج: عبورة موافقة عليه؟
عبير: مادري وش اقول لك والله ... انا اعزه بس ما اتخيل
انه ممكن يكون زوجي
اريج نطت من الوناسة : يسسسسسسسس يس يس
عبير استغربت: عمى اذني راحت ... الحين ليه فرحانة؟
اريج: بس عشان خاطر اللي كان بيموت علي لو رحتي لغيره
عبير اللي كان فيها شوي نوم من سمعت هالكلام تنبهت كل
حواسها وزادت سرعة نبضات قلبها وتنفسها تسارع واعتدلت
بجلستها: ايش؟
اريج: شوفي انا بخربها وماعلي فيكم .. ترى
فهود يموت عليييييييك
وجاني شايل هموم الدنيا يقول انك مخطوبة ..
عبير تشققت من الوناسة وماقدرت تعبر: اروج ماله داعي كلامك
اريج: الا له داعي ونص بعد ولا وش مخلي العاشق المتيم يتحمل
الحر ويجيني بهالقوايل الا عشان سواد عيونك
اريج سكتت يوم شافت فهد يأشر لها : وش تبي؟
فهد: قولي لها اني ابيها وكنت ابي اطلبها من ابوك بس امك ردتني
عبير سمعته وحست انها بقمة سعادتها واكيد مافي شي احلى من
انك تحب شخص وتتمناه وهالشخص يكن لك نفس المشاعر ويمكن
اقوى واعنف بعد...
اريج: وياويلك لو سولت لك نفسك ترفضين خالي ترى هذا الغالي
عبير: عارفة انك فاضية ؟.... يلا باي.. وسكرت السماعة
اريج: هههههههههههههههههههه ياحليلها اختي تستحي
فهد: اروج احلفك بالله تحسين انها متقبلة الفكرة؟
اريج: مابي اعطيك امل واجد .. عبير بطبعها غامضة ومحد
يعرف اللي بخاطرها اذا ماتكلمت .. بس ماحسيتها معترضة
والله يوفقك وياها
فهد: اللهم آمين يارب .. ونذر علي لو وافقت يا اروج لك يوم
كامل تطلبين اللي تبين واوديك اي مكان تبين تروحين له
اريج: والله .. حتى لو ابي اجيكم للإستراحة << خبلة بقوة
فهد: ههههههههههههههه كان يذبحك بندر مكانك
اريج استحت من سمعت اسمه
فهد: يالله انا بروح اصلي وانام لي شوي اريح فيها عمري
اريج: الله معاك
************************
تحس ان مهمتها صعبة ومو عارفة شلون تبدا ... هي بطبعها
خجولة .. بس هذا قرار مهم بحياتها ولازم تستجمع كل شجاعتها
وقوتها وتظهرها بالوقت المناسب .. سمت بالله ونزلت لبيت خالها
والحمل اللي بقلبها كبر الجبال ... لقت خالها ومرته وامها ينتظرونها
سلمت وقعدت... والعيون كلها تناظرها ينتظرون اللحظة الفصل
ام عبير ماتدري ليه حست ان عبير رافضة كون انها طلبت تقعد مع
خالها ومرته دليل انها بتوضح لهم موقفها .. وهي بالآخير مستحيل
تضغط على بنتها وتاركة لها كامل الحرية باتخاذ هالقرار المصيري
عبير بعد تردد كبير: خالي انا فكرت واستخرت وبصراحة ماقدرت
اتصور حاتم غير اخويه.. احساسي كذا طول عمري وما ابغى اظلم
نفسي واظلمه معايه ... والله انه رجال واي بنت تتمناه ...بس صعبة
ما اقدر اتخيل الشخص اللي حتى واحنا كبار كنت اذا تكلمت عنه
عند احد قلت حاتم اخويه...انا بس خايفة نظرتكم لي تتغير او حتى
حبكم يتغير..
ابو حاتم: يابنتي هذي حياتك ومحد يفرض عليك حاجة ماتبغينها
وهذا زواج مو لعبة نسوي فيها انتقام وحركات ربي مايرضاها
عبير: يعني ياخالي ماراح يتغير حاجة ناحيتي؟
ابو حاتم: لا والله يابنتي ويشهد عليه ربي انك عندي مثل بناتي
والله يوفقك في حياتك وحاتم كمان ان شاء الله يلقى اللي تسعده...
عبير ماتدري شلون تعبر ... تجمعت الدموع بعيونها وقامت
لخالها وحبت راسه : الله يريحك ياخالي مثل ماريحتني والله اني
كنت شايلة هم كيف ابدا معاكم ...والتفتت على ام حاتم: وانتي
ياخالة ؟ بتزعلين مني؟
ام حاتم: عبورة ايش هذا الكلام انا اللي بزعل منك يعني مو عارفة
انك غالية عندي
عبير: الا والله بس خفت تاخذي في خاطرك
ام حاتم: انا بزعل بس عشان ولدي ربي ماكتب له نصيب مع
الانسانة اللي اتمناها له .. بس انتي راح تبقين مثل اول ماراح
يتغير حاجة والله
عبير لمحت امها اللي نزلت دموعها : ماما ليه تبكين؟
ام عبير: ولا حاجة ياقلبي انا بروح ارتاح شويه وبعدين بروح
بيت خالك محمد اذا بتروحين معايه قومي يالله
عبير : طيب .... وقامت هي وامها استأذنو من بيت خالهم
مر الوقت بطيء راحو بيت خالها ورجعو وامها مبين عليها
الزعل.. معقولة زعلت مني؟ سألت عبير نفسها هالسؤال مليون مرة
راحت لها غرفتها تبي ترتاح ... طقت الباب ودخلت .. لقت
امها ترتب ملابسها اللي في الدولاب:ماما انتي زعلانة مني؟
ام عبير: لا ياقلبي بس متضايقة شوية
عبير: من ايش؟
ام عبير: اوقات الانسان يتمنى حاجة ومايحصلها .. اكيد
بيتضايق
عبير: كنتي تبغيني اتزوج حاتم
ام عبير: كنت بتطمن عليكِ معاه.. احس محد راح يخاف
عليكِ قده.. بس الحمدلله على كل حال... لا تشيلي هم ياقلبي
روحي ارتاحي وتأكدي ماراح يزعل منك احد هذا قرارك
وانتي الوحيدة اللي لها الكلمة فيه
راحت عبير لامها وحضنتها : ادعي لي ربي يوفقني
حبتها امها على خدودها : الله يوفقك يارب ويرزقك بإبن
الحلال اللي يسعدك ومايكدر خاطرك يوم...
**************************
حاتم من سمع رد عبير وهو بدنيا غير الدنيا ... شعور اقل
مايقال عنه قمة الصدمة .... كان يراوده اوقات كثير ان مشاعرها
مازالت مثل ماهي من ايام طفولتهم ... بس اوقات كان يتأمل
انه تحبه وتغليه مثل ماهو يغليها...غريب هالزمن كيف بيوم تكون
بقمة السعادة وبعد لحظات تتهاوى وتصير بقمة الحزن ...شعور
الرفض من اقرب الناس لقلبك اصعب شعور....حاتم اللي من عرف
طلع من البيت ... ركب سيارته وتوجه للامكان جاب كل الشوارع
حزن .... ومر على كل الدروب اللي جمعتهم ... كل الأماكن تحكي
تفاصيل صغيرة ... وهالتفاصيل اللي كانت تصرخ فرح
اصبحت تنزف جراح ....
قال لي وينـــــــــك وين حرفك والقصيد..
جيت اجــــاوب عن سؤاله واسبقتنى دمعتي
جيت بمسحها ولكن سال دمعي من جديد..
وما قدرت اكـــتم دموعي يوم تاهت صرختي
وحار فكري في مصابي وضاع منطوقي السعيد..
والــــــحزن حل وتمكن في حنايا دنيتي
آه ويلى من عذابي لان به حتى الحديد ..
ضـــــــــاقت الدنيا بعيني واخنقتني عبرتي
من بشاكي في همومي غير خلاق العبيد..
الله العــــــــــــالم بحالي يوم قفت فرحتي
من نشدني من عربيه قلت مستانس سعيد..
واضحك بوجه المصاعب واخفي همي بضحكتي
والحزن نوخ ركابه وصار محبوبي الوحيد..
وين اهــــــــرب من همومي والمسافة وحدتي
جمرة داخل فوادي وبه لهايب تستقيد..
لو تناست الــــــــــــــمآسي ذكرتني حيرتي
والليالي سرمديه والفجر نوره بعيد..
وانعدم طفل الســــــــــــــــــعاده في مشاهد قصتي
*****************************
مابين كثرة الأوراق وزحمة الشغل ... كان قاعد بكل سعادة
اليوم راح يثبت حبه لعبير ... ويبين لها انه شاريها ويبيها
وراح يتوج حبه المجنون لها بخطبته .... خلص اللي بيده
وقام طالع من مكتبه متوجه لمكتب ابو تركي .. وكل خطوة
يخطوها يحسها خطوة سعادة ..... مشى بين ممرات الشركة
وهو حاس انه طاير...طق الباب بهدوء... ودخل
لقى ابو تركي يقلب بأوراق العمل رفع راسه وشاف فهد وابتسم
له: هلا فهد آمر
فهد: مايامر عليك ظالم انا جاي ابيك بموضوع
ابو تركي حط الاوراق اللي بيده : تفضل
فهد: الموضوع خاص بس بصراحة مابي أأجله اكثر
ابو تركي: وليش ماجيتني بالبيت ؟.. بيت اختك وتجي اي وقت
فهد: بصراحة انا قررت اليوم ومابي انتظر لليل
ابو تركي: زين وشو الموضوع؟
فهد: انا جاي لك وطامح في موافقتك... وابي اطلب منك يد
بنتك عبير
ابو تركي تهلل وجهه والسعادة ملت قلبه هو يحب فهد كثير
واكيد راح يتطمن لبنته معاها : هذي الساعة المباركة يافهد وين
بلقى لبنتي احسن منك
فهد تشقق من الوناسة : الله يطول بعمرك ...يعني ماعندك مانع
ابو تركي: افا عليك يافهد وش امانع عليه انت ولدي وتعرف غلاتك
بقلبي ...
فهد: زين شاور اهلك اليوم وان شاء الله ربي يتمم لي
ابو تركي: ان شاء الله خير ... مكلم خالتي قبل؟
فهد: اي اكيد وهي اللي شارت علي ببنتك<< مسوي ماشي على شور
امه والواقع هو اللي كان بيموت عليها
ابو تركي: الله يجعله مبارك يارب
فهد: يالله يابو تركي انا استأذنك وانتظر ردكم
ابو تركي: الله يحفظك
طلع من مكتب ابو تركي وهو يحس بحمل كبير انزاح .. هو خطى
اول خطوة واهم خطوة .. والباقي عليها ...راح ينتظر موافقتها
ويدعي ربه يكتبها من نصيبه .. وعساها تتحقق الأحلام ....
***********************
ابو تركي استانس بهالخطبة هو يعز فهد حيييييل .... ويبي يتطمن على
عبير آخر بناته ... هو من ناحيته موافق واكيد زوجته سارة ماراح
تعترض ابد ويبقى الكلام الأخير والأهم لعبير ..
راح للبيت طاير من الفرحة ... دخل على اهل بيته لقاهم مجتمعين
ينتظرونه يبون يحطون العشا
ابو تركي: السلام عليكم
الكل: وعليكم السلام
راحو له ركض ريم ومحمد وجنى دنق عليهم يحبهم وقعد
ام تركي: اريج قولي للشغالة تحط العشا
اريج: زين يمه .... وقامت رايحة للمطبخ
ابو تركي تلفت حوله وماشاف ماجد : الا ماجد وينه فيه؟
ام تركي : والله ولدك هذا يابشغله ولا حابس عمره مانشوفه
الا بالمناسبات
ابو تركي: الله يهديه بس هو لو يسمع شوري ويتزوج كان ارتحت
وارتاح هو بعد .. ماكاسر خاطري الا بنيته...والتفت لخالد: خالد
دق على اخوك شوف وينه
خالد: ابشر طال عمرك .. واتصل بماجد...: طالع مع خويه فيصل
بيتعشا معاه يقول تعشو
ابو تركي : الله يهديه ويصلحه يارب
ام تركي : ماشاء الله اشوف الوجه منور عساه خير؟
ابو تركي : كل الخير ان شاء الله .... وقبل مايكمل كلامه جتهم
اريج: يلا العشا جاهز
قامو كلهم وقعدو ع العشا ( تركي يحب زوجته تاخذ راحتها بالاكل
ومايبي يسبب احراج لها او لاخوانه فاذا صارو اخوانه بالبيت
يتعشى مع زوجته بجناحهم )
ابو تركي : والله ودي تركي قاعد معانا عشان اقول لكم الخبر اللي مفرحني
ام تركي : فرحنا معك وتركي بيعرف اذا مو هالحين بكرة
ابو تركي :فهد خطب عبير...
ام تركي على طول اعتفس وجهها .. اما خالد مايحتاج اوصف لكم
حجم وناسته .. واريج صرخت من الوناسة : يااسلاااااااام هذي
الاخبار اللي تفتح النفس على الاكل
خالد: انتي نفسك مفتوحة دايم شوفي شلون صايرة دوبا
اريج: وجععععععععع يبي ينظلني اذكر الله
ابو تركي: واحنا عمرنا ماقعدنا مجتمعين الا تهاوشتو؟
خالد: شسوي عاد احب احارشها
اريج: وش قالت عبير يبه؟
ابو تركي: للحين مافتحت الموضوع معاها .. ابي أأجله شوي
وبروح لهم بعد بكرة ويصير خير
ام تركي: ماقلت لي انك بتروح ؟
ابو تركي: توني اليوم نويت وبالقوة لقيت حجز
اريج: تكفى يبه ابي اروح معاك ذبحني الحر
ابو تركي: باخذك معاي بشرط
اريج: عيوني لك انت تامر امر
ابو تركي: ايه العبي علي بكلامك الحلو
اريج ضحكت على ابوها اللي فاهم حركاتها : ههههههههههه
ابو تركي: الكلام اللي قلته اليوم مايوصل لعبير... ولو قلتي
كلمة وحدة بس بتقعدين ومانيب ماخذك
اريج: اي كلام انقال اليوم؟ تسولفون من وراي؟<<يقال لها
تعرف تخبي
ابو تركي: هههههههههههههههههه اي هذي البنت السنعة
اريج: وانت بعد لاتعلم عبير اني بروح لها بسوي لها مفاجأة
ابو تركي: لعنبو ابليسك انا ابوك وش انت بعد هذي؟؟
اريج: اموووون يبه
ابو تركي: الله يخليكم لي يارب
الكل: آآآآآآآآمين
ابو تركي: ويفرحني في ماجد وخالد يارب
خالد: انا من يدك هذي ليدك الثانية انت شاور ولك السمع والطاعة
ابو تركي : ابيك تتزوج وتريح قلبي
خالد: الله يكتب اللي فيه الخير .. خلنا نخلص من عرس اريج
ونشوف خطبة فهد وعبير وعقب ربي ييسرها
ابو تركي: ادري فيك مابتتعب قليبي بس ماجد الله يهديه
ام تركي: لاتضغط على الولد ويترك البيت باللي فيه ... خله
على راحته
ابو تركي: البلى لا صار مايعرف مصلحة نفسه بس الله يصلح
اموره ويعوضه خير....
*****************************
*****************************
رايحة لصديقتها مها تزورها ... بعد ماصلت العشا استأذنتها تبي
ترجع بيتهم
مها: والله انك بايخة من زمان عنك وماطولتي
عبير: والله بابا جاي اليوم وابغى اجلس معاه ... بعدين لسى
الاجازة طويلة وراح تطفشين مني
مها: طيب هذي المرة بس عشان ابوكِ بس مرة ثانية ماراح ترجعي
الا على اذان الفجر
عبير: ههههههههههههههههه من جدك انتي
مها: والله واحشتني بس انتي تكبرتي علينا خلاص
عبير: ماعاش اللي يتكبر عليكم والله وانتي عارفة بس تتدلعين
عليه... وسلمت عليها وطلعت
دخلت بيتهم لقت ابوها وامها بالصالة سلمت على ابوها وقعدت
جنبه ...استغربت ابتسامتهم اثنينهم حست ان لها مغزى بس
مافهمت
ام عبير: حبيبتي روحي غيري ملابسك وتعالي بنحط العشا
عبير وهي قايمة تروح غرفتها: طيب ثواني
دخلت الغرفة ولعت الأنوار وصرخت بأعلى صوتها: اروووووج
وراحت لها ركض وحضنتها: يادوبا ايش المفاجأة الحلوة هذي؟
اريج: ماقدر استغني عنك شكلك ساحرتني قلت اجي
اقعد اسبوعين عندك
عبير: والله مررررة مبسوطة اقلها نفلها هنا مع بعض
اريج: اي هناك سافطتني على جنب
عبير: ياااربي ايش فيهم العالم عليه والله مااتغير على احد بس
الدراسة ولما اجي هنا الزيارات كثيرة
اريج تطقها من كتفها : وخري بس مسوية البنت المهمة قومي خل
نروح نتعشى
عبير: روحي انتي يادوبا كل همك بطنك
اريج تكش على وجه عبير: قل اعوذ برب الفلق ...... متسلطين
علي انتي وخلود
عبير: هههههههههههههههه خلودي كمان؟
اريج: مالت عليكم بس
قعدو تعشو وسمرو واستأذنوهم ابو تركي وام عبير رايحين غرفتهم
وهناك استغل الفرصة ابو تركي يفاتح زوجته بالموضوع
ابو تركي بدون مقدمات :فهد خطب مني عبير
ام عبير: فهد مين؟
ابو تركي : اخو نورة
ام عبير تفاجأت بالموضوع شوي : متى صار هذا الكلام
ابو تركي: قبل يومين جاني بالشركة وقال انه يبيها وشاريها وانا
ما اعترضت بالعكس رحبت بهالخطبة وقلت له بشاور الاهل
ام عبير: وانت وش رايك؟
ابو تركي: فهد والنعم فيه رجال وولد رجال ... يكفي اني اشوفه
مثل واحد من عيالي...
ام عبير: انا ماعندي كلام بعد كلامك انت ادرى بمصلحة بنتك
واكيد تعرفه اكثر مني.. بس اكيد لازم اكلم عبير واعرف رايها
ابو تركي: اكيد انتي تعرفين اني ما اجبر احد من عيالي على شي
مايبيه .. ولو رفضت عبير لها كل الحق ومحد يعترض
ام عبير: ان شاء الله.. الله يخليك لهم يارب
ابو تركي : ويخليك لي بعد
**************************
|