حسافة
ما بالبشر ذرة وفا
اللي تعرفه
من ورى شاشة
او
تعرفه
عشان يطلب معاشه
ما به وفا
يا صاح لا تقول اصدقا
كنا نعم نضحك سوى
بس ارجوك التفت
كان حولك العالم كثير
يا ترى من اللي بقى
ارجوك يا صاح شوف
كيف ابتسم ؟
كيف اداري و انكتم ؟
كم انجرح خافق ما دروا
كم تكدرنا ما سألوا
كل بيآخذ بسمته
بذمتي راح الوفا
يا كثر تخاذلنا لبعض
شوف حتى حروفي ذي
بيقراها هبل
بيقول غشيم على نيته
ساقط من حساب الخجل
يا صاح لا تقول اصدقا
يكفي قلبي ما خذا
الا تصاوير الألم
يا صاح لا تقول اصدقا
يا ترى مين اللي بقى
حسافة تمشي اليوم بعفتك
بطهارتك مع البشر
تحسب غبي
الا قول يا صاحبي
وش نبي ؟؟
غير بسمة تخفف اللوعة
غير سؤال اغترب نوعه
يا صاح أخبارك ؟؟
كلن مع درب المشاكل
انجرف
هذا وقف هذا انحرف
وصلت لأقصى الروابط
و اقصاها قمم
مالقيت يا صاح دوا
لا حضارة
لا امارة
لا قيم
ربعه نظيف و اختفى
و ثلاثة ارباعه
هدم
يا صاح لا تقول اصدقا
معنى الصداقة و الوفا
صار بطلب
من متى الاسئلة
كانت طلب ؟؟
من متى كانت جواباتي
كذب ؟؟
من متى كانت اخطائي
طرب ؟؟
الا هنا
يا درب المصالح والعنا
كملت عام و نصف
ما لقيت الا السراب
كل من يخاف الحقايق هرب ..
يا صاح لا تقول اصدقا
كم زرعت آمال و ذهب
مالقيت الا التعب
يا صاح ارجوك التفت
ابشرك هانت علي
فرقا ثلاثة كوتني كوي
يا صاح لا تقول اصدقا
خلص مالي انا و مال الشقا
آه ..
ياليتي بدوي
بالفيافي يجلس خلي
ما يشرب سموم و غبن
ما يلبس الخافق كفن
يجر صوته
يجاوبه الصدى
فراشه تراب
و لحافه سما
يا صاح لا تقول اصدقا
انا ماني هبل
لا
و لاحقني جهل
جيت ادور رفقة عقل
يا صاح لا تقول اصدقا
و الله لو تطيح بينهم يوم
ما لقيت اللي يقوم
لا و لا يبكي عليك
أو حتى يغطيك بهدوم
ارتوى الخافق رماد
و اكتسى العالم سواد
يا رب يمكن انا آخطيت
من لي بعدك
يا ربي سند
راحت مشاويري سهد
يا رب عوضني بخير
يا رب عوضني بخير
يا رب عوضني بخير
حسافة .. حسافة
ما بقى بقلوب البشر ذرة وفا
و لا بعد حتى صدى
يا صاح لا تقول اصدقا
عزاه وش هو بقى
يارب عوضني بخير
بقلمي .. ناصر العبدالعزيز .. الرسام