منتديات قصايد ليل - عرض مشاركة واحدة

09-20-2010

ذبحني هالسؤال أرجـوك قلـي بـس وش جابـه
دخيلك ليـه تتعمـد مـع ضحكـك تبكينـي..؟؟
من البـارح تعيـده هالسـؤال وتطـرق أبوابـه
وعلى نفس الطريق اللـي تجـي منـه تودينـي
ياأخـي وش تبـي منـي وحزنـي وش تلقابـه
يهمك إيش في هذا.!!؟ عذابي وإنخلـق فينـي.!!
تبي تعـرف حكايـة شاعـر ٍ جمهـوره أحبابـه
تبي تعرف يصفق ليـه جمهـوري ويحيينـي..؟
لأن الشعر عنـدي ماهـو بـس أوراق وكتابـه
ولاني من فراغ أكتب وأبي تكثـر دواوينـي..!!
تبي تعرف شاعر ليه؟؟ هـاك الشعـر وأسبابـه
تبي تعـرف مكانـي وين!؟؟رتبّهـا وتلاقينـي!!
فقر مال .. وفقر حال .. وفقـر حيلـه وطلابـه
فقر حـظ ٍ كريـم .. أمدلّـه كفـي ويعطينـي..
فقر دين .. وفقر دنيا .. وجوع ٍ تنهـش أنيابـه
فقر راحه .. وفقر صحه.. وفقر فرحـه تنسينـي
فقر أيه الفقـر يعنـي ضيـاع العمـر وركابـه
فقر يعني فقـر يعنـي عـذاب وضيـم مالينـي
وراس الفقر..وراس الجوع..وعمر طارت أسرابه
وحـق الدرهـم اللـي مانـوى مـره يخاوينـي
رضعت الويل من صغري ولبست الحزن وثيابـه
على شط الشقا مولـود وهمـي كـان يروينـي
تقطع وجهـي وجلـدي بنـاب الفقـر ومخلابـه
ولكنـي عزيـز النفـس ولـو أحتـاج تغنينـي
كساني ثوبي المشقـوق وبيـن النـاس أزهابـه
وكـل ٍ يلتفـت يمـي يظـن بتنكسـر عيـنـي
حشا ماتنكسر عيني وأنا اللي وقتـه يهابـه..!!
عزاي أني فقيـر وصـارت النظـرات ترمينـي
عيون النـاس تطعني..وكـل ٍ يغـرس أحرابـه
وبعض عيون أقدرها وبعض عيـون تدمينـي..!!
وشلي مابعـد قلتـه وتبغـى تعـرف أعرابـه.
مضـت ساعـات أتكلـم وأنتـه بـس توحينـي
تبي تعرف حكاية عشـق وبنـت ٍ حيـل لعابـه
تبي تعرف عن أسباب الجفا مابينهـا وبينـي..؟؟
تخيـل جتنـي وقـالـت فـمـان الله يابـابـه
تشرفـنـا بمعـرفـتـكـويالله لاتـأذيـنـي..!!
وأنا أعشقها "ثمان سنين" وهي (تلعب وكذابه)..!!
تسلـي نفسهـا فينـي ونيتـهـا تخليـنـي..!!
تبي تعرف حكاية قبر وطفلـه تسكـن ترابـه..
تبـي أقـولـك مظلـوم ودّم الطفلـه بيديـنـي
تبي تعرف وش الغربه ومن اللـي طـول غيابـه
تبي أحكي قبل أعـوام بالتفصيـل أنـا وينـي.؟؟
تبي أحكي لك عن الزاهد وعن ذنبه في محرابـه
دخيلك ماأقدر أتكلـم خـلاص أرجـوك أعفينـي
قسم بالله فـي صـدري مدينـه تلتحـف غابـه
مدينـه ساكنـه قلبـي وغابتـهـا شراييـنـي
دخيلك سكر الموضوع وشف لـك شـي تسلابـه
أنـا منـك ألاقيهـا أو ألقاهـا مــن سنيـنـي