البارت السادس والعشرون:
:
شلها بين ايديه وهي من كثر الويع حطت راسها على كتفه وحاوطت رقبته بيديها وارتبك راشد زود بسبب دقات قلبه اللي تزايدت سرعتها من اول ما شافها حطها في غرفة اليازيه وقفل الباب قعد عندها وهو يقول : فديت زول ويهج يا حبيبي من متى ماشفتج
مهره بتعب: عطني بندول
راشد بحب : مهره شي يعورج ! تعرفين منو انا !
مهره بربكه : عنبوه يا راشد ما فقدت ذاكره انا ، الا دوخت شوي فديتگ، شوي تعبانه .
بلعت ريقها مهره وهي تشوفه كيف يتاملها عطاها بندول وشربته رفعت راسها وهي تتمعن في عيونه ونطقت بضيق: راشد
راشد بحب: عيون راشد وقلبه لبيه يا عيوني امري
مهره تبلع ريقها وبضعف: خايفه !!
ابتسم بحب وهو يقول: من شو غناتي!
مهره تتنهد بتعب: من ابويه ! صار لنا فتره نلتقي بسر !
راشد بحب يمسك يدها ومرر اصبعه على كف ايدها وقال: عادي انا ريلج مب واحد غريب عنج ! وبعدين ماله داعي الخوف ابداً انا اللي غلطت في حقج مب انتي وانا اللي لازم اصلح غلطتي ومايرضيني اني اطلقج وانا اللي كنت اترياج بفارغ الصبر بس الموضوع يباله وقت شوي عمي لين الحين ميبس راسه الله يهديه.
ابتسمت بضيق وهي تشووف عيونه وبتنهيده اليمه تحكي وجعها: هيه فديته ابويه مكسور يا راشد من اللي صار لنا انا ولطيفه ،، اذا تبا الصدق يا عيوني كلنا انكسرنا والله انا تطلقت ولطيفه تطلقت ونايف هاجر حرمته وابويه تحسه مصدوم مب مستوعب اللي صار لنا هذا كله ومتضايق مب قادر يتخطى صدمته فيگ انته ومايد ،، وامايه حليلها متحمله كلام االعرب اللي تسمعه عنا ،رفعت عيونها وهي تطالعه بالم وضيق وابويه وايد منكسر من هالموضوع
قال بضيقه: ادري والله عشان جي انا بحاول قريب اني اقولهم اني رجعتج على ذمتيه واطلع لهم ورقة الرجعيه انج على ذمتيه لين اليوم ، مهره انا ما اقدر اشوفج ويا غيري اموت ولا غيري يلمسج باس خدها تحت شهقتها اللي اعتلت صوتها : والله اني تعبااانه من هالموضوع راشد انته كسرررتني وايد كسر ما ييبر( ينجبر)،، انا مب مرتاحه في بعدك …
شهقت بغصه مكبوته وحضنها بحب وبضيق من حالتها : فديت عمرج غناتي والله اني مستعد اجبر كسورج كلها واولها قلبج وقلب عمي فديته ، تراني أحاول اتقرب منه واعتذر له بس في الوقت الحالي ماباه يشوف اصراري .
حست بدفء حضنه حاوطته بيديها وهي تبكي من الغصه ما كان جدامه غير انه يهديها ويخليها تبكي بصمت
مهره تذكرت كيف من فرط المشاعر انجرفت لمبارك كرهت نفسها في هالحظه كييف ارخصت مشاعرها وارخصت نفسها له ، حست براشد اللي يبا يبعدها عنه بس تعلقت فيه زوددد وبحب وهو يحاوطها: فديت روحج يا نظر عيني
مهره تشاهق وهي متعلقه فيه : انا متتتضايقه راشد
حاول يبعدها عنه ماقدر ابتسم بحب: هالكثر متولهها عليه خنقتيني فجي شوي عني أبا اشوف ويهج ..
بعناد وهي تضربه على كتفه: سسسسخخيييف.
بعدها عنه وحضن ويهها بكفوفه مسح دموعها وهو يقول: اليوم فرحة سلامه وانتي خربتي مكياجج وخربتي يومج
بوزت من ياب طاري الميكب اللي اخترب وقالت بغصه: انته ييتني في الوقت اللي محتاجه افضفض فيه ومالقيت غيرك أقوله معاناتي خصوصاً انگ قاطع عني من فتره طويله ،، عقب اخر مره تلاقينا
ضحك بحب وقال: نسيتي ان مواعيدنا الغراميه كلها في ليل وبالسر تحت نور القمر اللي شهد على رجعتنا لبعض
أبتسمت بضيق وقالت:متى تقولهم انك رجعتني!
راشد حضنها ومرر ايده على ظهرها وقال: ان بغيتي اليوم بس لازم افلم عليهم وانتي تأيدين اللي بقوله .
بغيره طالعته وهمست وهي تقرب منه: طالع غير اليوم .
ابتسم بحب بعد مالمس نبرة الغيرة في صوتها وقال: اطمنج ترا قلبي لج مب لها ..
ارتاحت وزفرت براحه بقو وهي تقول: اغار منها!! ومن كل شي يجمعك فيها حتى ولدك!
انصدم من اعترافها وحضنها بحب وهو مستانس وقال: انا بعد اغار من بيتكم اللي يضمج بين يدرانه وانا بعيد عنج .
مهره طالعته وقرب منها وبهمس قال: تدرين ان عمي شگ ان بيني وبينج شي حتى كلم ابويه بخصوص هالموضوع وابويه طبعاً كالعاده في صفنا انا وانتي وقالي خفف طلعاتگ وياها ترا عمك شاك فيكم عشان جي بعدت عنج فتره طويله غناتي من اخر مره تلاقينا فيها.
بعدت عنه بصدمه وقالت : قول والله ان شگ فينا ..
راشد ضحك وقال: والله ؟ ليش ماتدرين!
مهره برعب: لا والله مادري ؟ متى سار عند عمي !
راشد يضحگ: كنا رادين انا وانتي من دبي وكان وقت صلاة الفير انا نزلتج من الباب اللي ورى وروحت هو شاف سيارتي بس ما شافج لانج نزلتي قبل ما يطلع وقال لبويه ان شاف موتريه عند بيتكم وابويه صرفه اهم شي انه بعد ّشگ عنج وعني …
انصدمت مهره وقالت بخوف: انته ينخاف منگ يا راشد بيجتلني ابويه ان شك فيني والله ..
راشد يسحبها لحضنه ويطوقها بيديه: وانا يعني بخليه يشك فينا تراني بعدت عنج كل هالفتره عشان اقطع شكوكه حتى ما اتصل بج محول تلفوناتي مغلقة عشان تفقدين الامل انج تكلميني ورفع حواجبه بترقيص لها.
مهره بضيق وهي تضربه ع صدره: خبرني المفروض يكون عندي علم عشان ما احاتيگ ،، اسميگ انته ما تهتم لمشاعري ..
قرب ويهه منها وهو يقول: اسمع من يتكلم منو كان يتجاهل مشاعري واحاسيسي همممم منو ؟
مهره بغصه تلف عنه: وانته لازم تذكرني بالذي مضى ..
راشد يبوس خدها وبهمس: ذكريات اليمه الله لا يعودها يوم كنتي تصديني .
مهره طالعته بطرف عينه وهي مازالت بين ايديه: كنت اصدگ لانگ كنت … ما كملت جملتها لانه عضها على شفتها بقو وهو من قهر منها قال: خلاااص لا تذكريني بالماضي اللي ما ينطرى.
بعدت عنه وهي تتألم من عضته على شفايفها وبقهر قالت: راشد ترا يعور..
ضحك بخفه وهو يشوف دموعها وقال : شو اسوي يعني أغرني ماقدرت اقاومهن ..
ماعرفت تستحي ولاتبكي ولاتعصب عليه قرب وقال: يلا انا بسير عند رياييل
مهره تغصصت عبالها مل منها والتزمت الصمت وهي ودها تقول كيف بتقنعهم انگ رجعتني لكنها سكتت
راشد يبتسم : شي في خاطرج قبل لا اسير عند رياييل
طالعت كندورته وقالت بهمس: خيستك لمعه وبودره
ابتسم وهو يقول: فدوى عن راسج حبيبي وقام وطلع من االغرفه والفرحه مب سايعتنه اتصل بثريا عشان ينزل قالت له الحريم كلهم في الحوش برى محد في صالة طلع من الباب الوراني ..
اما لطيفة نزلت الصالة وهي تشوفهم كلهم برى في الحوش يرتبون ويشرفون على الترتيب والاغاني قعدت في الصاله وهي تشوف ودوم وعهود يايات صوبها وحمد اللي نزل ووقف على الدري يشوفها تسولف وياهن ابتسم بالم وضيق وهو يقول احبج يا بنت العم لكن عمي وقراراته الله يهديه تحيل بيني وبينج طلع للميلس ..
:
عند رياييل فالميلس ..
بعد ما حضر الشيخ وبدا يجهز اوراقهم لعقد القرآن حط عوض ايده في ايد بو حمد وبدا يردد ما يقوله الشيخ وبعد ما انتهوا وقع عوض وشل راشد الكتاب وداه فوق بطل الباب وشاف سلامه وودوم دخل وهو يقول لسلامي وقعي
ضحكت سلامه بتوتر وهي تشوف توقيع عوض ووقعت عند توقيع الزوجة بارك لها راشد وطلع ..
وهو نازل قابل ثريا قالها: وين حمد
ثريا : راقد
تخطاها راشد وطلع من الباب الوراني ،، اما ثريا تنهدت بضيق وطلعت فوق …
:
عند الحريم برى ام عوض ما شلت عينها من لطيفه بتموت على لطيفه وين ما تسير لطيفه تم تتبعها بعيونها ،، حست لطيفه بنظراتها وابتسمت بخجل وتوتر شوي وأعلنوا ان عوض بيدخل سارن البنات الغرفة لبسن عبيهن وشيلهن وردن ،،قعدن عند الكوشة وشافن دخول عوض مع حمد وراشد ومبارك ، لفت لطيفه وهي تقول لعهود: ماشفتي مهره..
هزت راسها بلا تمعنت فيها لطوف وشافت الدموع في عيونها متحجره تضايقت هي مالها ذنب بعدت عنها وراحت بعيد شوي واتصلت بنايف اول مارد عليها قالت لطوف بضيق: نايييف حرااام عليك والله
نايف بنرفزه : نحن ما نخلص من موالها .
لطوف بقهر: ترا البنت فيها صيحه شوي وبتنهار
نايف بلا اهتمام: برايها خليها تولي اهم شي تحس باحساسج عشان ثاني مره تصطلب وتغدي حرمه …
لطوف بيأس: نايف شو ذنبها ممكن اعرف
نايف بقهر: ذنبها انها تعرف وساكته ، انانيه تفكر بنفسها وبس .
تنهدت بضيق لطيفه وقالت بهدوء: دام هذي نظرتگ لها الله يعينها عيل وانهوا المكالمه بسرعه ، تنهدت بضيج وهي تنزل تلفون من ايدها شافت مهره نازله من فوق وراحت صوبها ، دخلت مهره الغرفه اللي فيها اغراضهم وخذت عباتها وشيلتها وطلعت برى تشوف الجو وكيف مرتبشين راشد وحمد ومبارك وعوض يولون ، تلاقت ويا لطوف وقالت : وين كنتي
مهروه بضيق: فالغرفه فوق
هزت راسها لطيفه وبهمس: شي يعورج ؟ شي فييج؟
مهره تنهدت بضيق وهي تقول وعينها على ثريا وعلى راشد اللي يرزف: شفت راشد فوق وحنيت له يا لطوف وبكيت في حضنه ..
لطوف بضيق: فديت عيونج يا المهر الله يالف بين القلوب
مهره بضيقه: اول مره اضعف قدامه مب طايقه بعده يا لطوف الغيره تاكلني اكل ياختيه .
لطوف تمشي معاها لين قريب الكوشه قالت بهمس محد يسمعه الا مهره: عادي فديتج هذا الامر جدا طبيعي انج تغارين عليه وبعد لانكم رديتوا لبعض ولا تنسين انكم لين الحين ما اعلنتوا ردتكم لبعض قدام الكل فأنتي تحسين انه جنكم ماخذين بعض بالسر ومحد يدري عنكم لذلك طبيعي جدا اللي تحسين فيه
مهره وهي تتامله وتشوفه كيف يرزف ابتسمت بضيق وهي تقول للطيفه: ماعرفت قدره الا الحين ، كنت غبيه يوم كان قدامي صدق يوم قالوا ماتحس بنعمة شي الا يوم تفقده.
ابتسمت لطوف وبضيق قالت: الله يحنن قلب ابويه عليكم وان شاء الله ما تفقدون بعض ..
طالعتها مهره وقالت: امين بس انتي شو شعورج مستانسه ان مايد بيعرس .
ضحكت وهي تقول: هيه والله عادي الله يوفقه مافيه نصيب بيني وبينه يا المهر ..
مهره ردت طالع راشد اللي كان واقف على طرف الكوشه يرمس امه وامها ويضحك قالت: شعورج بكل امانه ؟ ومن دون لف ودوران!
لطوف تتنهد: والله محد كاسر خاطري غير هالمسكينه وهي تاشر على عهود وكملت كلامها نايف هاجرانها بدون سبب محملنها الغلط كله..
قاطعتها مهره وهي تقول: تبين صدق ،، عهود غلطانة من يوم ماعرفت بطلاقج كان المفروض تخبر نايف وتقوله صدق لكنه فضلت تسكت عشان ماتخرب على عمرها وسوت نفسها ماتدري وهي اكثر وحده كانت تشوف الفرحة في عيون نايف يوم انخطبتي وكيف كان فرحان يوم ملجتوا كلهم كسروا فرحتكم وتراه نايف مكسور اكثر منج يا لطوف واللي قاعد يسويه تراه غصبا عنه كسروا فرحته باخته وكسروا قلبه قبل قلبج ..
لطوف تنهد: الحمدلله يا بوج محد يأخذ غير نصيبه انتي طالعي الحب كيف رابشنهم ..
ابتسمت مهره بضيق وبغيره قالت: افففف لطوووف مب مستوعبه ان في وحده في حياته..
لطوف بضيقه: ادري والله حاسه فيج يا مهره لكن ما قول غير الله يمسح على قلبج ..
مهره كانت طالع راشد بغيره وندمانه انها قالت لراشد اعلنها لهلك كان في حياتها مبارك وعبالها بتاخذه الحين حست بغباءها وتسرعها الغبي شافت ثريا تروح فوق تبارك لسلامه وعوض وراحت صوب راشد وعطته حمد ولده ومسكه راشد وقعد يرزف وياه ويبوسه ع خده انهارت مهره بهالحظه حست عمرها صدق ضعيفه وحقيره انها طلبت من راشد يطلقها ليتها حاربت غباها ومشاعرها الغبيه تنهدت بضيق ما ينفع الصوت الحين حست انها مخنوقه والهوى انكتم من حولها مب مصدقه ان من ساعات كان قربها والحين قدام الكل موجود ولكنه بعيد عنها مايحق لها تقترب منه عشان محد يشك فيهم حاولت تشغل نفسها بس ماقدرت وهي تشوف ثريا واقفه عداله وعدال أمها وعمتها ويشوفون راشد اللي ماسك ولده ويرزف وياه ، اما لطيفه كانت محتاره بين مهره وبين عهود كيف تمسح على قلوبهم وتشل ضيقتهم هي بروحها تبا اللي يشل ضيقتها لكنها حامده ربها وشاكرتنه..
بعد فتره نزل راشد وسار عند ثريا عطاها حمد ومسكته من كندورته وقالت بغيره: شو اللي على كتفك هذا
دفر ايدها بقهر ورفع حايبه وبغيظ قال: بكسر ايدج ان عدتي هالحركة وراح عنها صوب امه وعمته ويلس يكلمهم عن مهره وان يبا يردها ما يدري كيف بجذبه نطق وهو يقول: عمتي مهره حامل لازم ترد لي وهي كلمتني اليوم وتقول محد يدري بحمالها لازم اردها لبيتي ومهره محد خذا غلاها فقلبي .
امه وعمته منصدمات: في ذمتك حامل !! وليش ما قالت من قبل عشان نقنع عمك ..
راشد بجذبه: ما كانت متأكده من موضوع حمالها الا بعد ما فحصت ..
تنهدن بضيقه كيف يقنعون ابوها ، وشوي يت مهره صوبهن ودموع في عيونها وبغصه قالت : يلا امايه نرد الوقت تأخر ؟!
راشد اللي شاف ويهها كيف جلب والدموع اللي في عيونها سمع امه تقول: مهره ليش ما قلتي لنا انج حامل!
انصدمت مهره لكن انقذها راشد وهو يقول بجذبه: مهره ما كانت تبا حد يعرف لين ما اردها على ذمتيه وبعدين نخبركم عن حمالها بس الحين انا مضطر اقولكم عشان ترمسون عمي .
مهره اللي بعدها تحت تاثير الصدمه وما استوعبت كلامه الا يوم قال وهو يحاوط كتوفها وبهمس: فديت المتنحين وين وصلتي !
استانست على كلامه وبلا وعي ضحكت وسط دموعها من سمعت كلمة أبا اردها ومن حسته يسحبها لحضنه المفاجئ لها قدام أمها وامه وقال بهمس: تتحسبيني بخليج وانا اللي ميت فييج والله ما اخليج بردج بحول الله قتلج لازم اسوي فلم عشان يقنعون عمي
بهمس نطقت وسط دموعها: عبالي انك تجاملني واخافها تكون سكنت في قلبك في الفتره اللي طافت وخصوصاً اني بعيده عنك مب قربگ .
راشد بحب يحاوطها همس لها: تخسسسي تأخذ مكانج بقلبي هي بس ام ولدي تربيه وتداريه ويكون في علمج انا في غرفة وهي في غرفة من يوم يينا هالبيت لا تفكرين اني جمعني وياها مكان واحد ولا سرير واحد ..
حضنته بحب وسط دموعها وشدت على حضنه اليازي اللي يتهم ومعاها وديمه بنتها ،وامها وعمتها مصدومات من اللي يشوفنه كيف هالاثنين طايحين في حضن بعض ولاجنه حد عدالهم ، قالت بضيقه اليازيه: ها قيس بن الملوح طايح أحضان انته وهي قدام خلق الله
راشد يضحك ويبتسم: حلالي ياويلي من زمان عن مهره واحضانها وطالعها بحب وعيونهم معانقه بعض ، استحت مهره وكمل كلامه رديتها على ذمتيه من هالساعه جان تبون بس المهم تقنعون عمي
انصدمت اليازيه هي تعرف انه رادنها من زمان بس انصدمت من الوقت ابداً مب مناسب في هالوقت يتكلم وقالت: وعمي ؟! درى!!
راشد بتنهيده: يعني اخلي ولدي ولا بنتي يربون بعيد عني ! شاله في بطنها طفل مني وين اوديه ..
ضحكت مهره على جذبته بس عرفت انه هذا الحل الوحيد عشان ابوها يقتنع ويردها له ، انصدمت يزوي وقالت بفرحه: زين والله ،، وصدق مهروه أخيرا حملتي الحمدلله ،،، وااااو احسن شي تردها صراحه واخيررررا الحمدلله جاد يفج الباب لحمد ،، ودور لطيفه بعيونها بس مالقتها بس تفاجأت بنظرة أمها بلعت ريقها يزوي بقهر وسكتت..
اما لطوف كانت برى عند الباب يرمسها نايف: انا برى فديتج طلعي ..
طلعت لطوف من الباب وتغشت قبل لا تطلع ونزلت من دري وانتبهت على حمد ونايف يسولفون عند السياره ركبت سياره من دون ما تطالع نايف اما حمد اللي كان يكلم نايف وعيونه ما نزلت من على لطيفه لف عليه وقال : مزعل لطوف شكلك
نايف يضحك وتنهد بضيقه: هي اللي زعلت ،، متدخله بيني وبين حرمتيه .
تنهد حمد وبضيقه قال: حرام عليك كله ولا لطيفه
ابتسم نايف وقال: واللي يزعل لطيفه يزعلني ومابا أتكلم فيه او حتى حد يناقشني بموضوعي مع زوجتي ..
حمد تنهد وهو يشوف الحريم اللي طلعن قال: زين برايك عيل بينا اتصال الغالي وهالله هالله في قلب اللي راكبين عندك .
ضحك نايف وهو يقول: مشكلتك ما لها حل ابدا ترا ابويه عاطنكم بلوك .
بضيق طلع زقاره من مخباه ولكن تفاجأ من حركة نايف اللي قال بقهر: بسسس عاد ذبحة عمرررك وانته دوخ خلاص يعنيي بتذبح نفسك عشان يوافق ابويه حمد فكر بعقلك ،، وشل الباكيت عنه والولاعه وبقهر قال: ترا لطيفه ما تحب اللي يدوخ وانته عابدنها عباده الدوخه..
حمد بضيجه : عطني إياها يا نايف ارتاح يوم ادوخها
طنشه نايف وركب سيارته وعق الباكيت عداله ولف على لطيفه وهو يشوف حمد اللي وقف مقهور وقال للطيفه ببتسامه: زعلانه يا القلب السموح .
لطوف بقهر جاوبته وهي تقول: حرام اللي تسويه فيها مالها ذنب نايف هي ماضربت مايد على ايده وقالت له تعال طلق لطيفه …
نايف غمض عيونه مايبا يصارخ ولا يبا ينفجر عليها حاول يحكم اعصابه حرك سياره وهو يقول بغضب مكتوم: سكتي لطوف لا تيبين طاريه هالزفت عشان ما اجرم فيه ترا واصلتني علومه كلها وانا من الأخير بطلق .
شهقة لطووف وتوها بتكلم مسكها نايف وهو يلف ويهها عليه وقال: تنكرين انه ما وسم قلبج تنكرين انه سبب في ذبلج تنكرين انه سبب في غياب ضحكتج وغيره وايد من العلوم اللي واصلتني وساكت عنه لاني لو مسكتج وقلتي لي ان فعلا صدق اللي وصلني ما برحمه والله يسجنه لذلك خليني ساكت عشان ما اسحبج بالكلام ..
توترت لطيفه وخافت عن يكون حمد قال لنايف شي مارفعت عينها عليه وعشان تغير الموضوع قالت: طيب ليش دوخ؟ ماتعرف انها مضره! وانها الموت البطيء .
نايف زفر بضيقه وقال: مب انا اللي ادوخ هذا حبيب الغفله كل شوي شافط منها عقولته ارتاح يوم ادوخ.
لطوف بتردد: حمد
نايف زفر بضيقه: هيه محد غيره !
غمضت عيونها وقالت لنايف: اسسسفه اني دخلت بينكم بس كسرت خاطريه.
نايف لف عليها وشاف الألم في ويهها والضيق باين في صوتها المخنوق لف عليها وهو يدخل البيت وقف سيارته عنند مدخل البيت ولف عليها وقال: لطوف
لفت عليه بضيقه وشافته فاتح ايديه ماترددت تحضنه على طول طاحت في حضنه وشدت عليه وبهمس محد يسمعه الا هو: تعرف دوايه محد فاهمني غيرك يا الغالي
شد بحضنه عليها وهو يقول: يخسسي الضيق وانا اخوج فديت روحج بعدها عنه وهو يقول: لطوف لا تدخلين بيني وبينها ترا عهود لو طيبه بس توقف ويا اخوانها على الغلط والدليل على كلامي ما عاتبة مايد يوم طلق ولا قالت لي عن طلاقج رغم انها تعرف من قبل،، سكوتها عن الحق قاهرني وهذا شي ماثر فيني وايد انكسر قلبي قبل قلبج انكسرت فرحتي فيج يا قلب اخوج.
ابتسمت بحنيه ورجعت حضنته: فديتتتك حبيبي لا خلا ولا عدم منك يا اغلى الناس ..
باس يبهتها وبحب قال: توكلي على الله ونزلي وانا متاكد بيي اللي يسعدج وينسيج الزفت .
ابتسمت بحب ونزلت وراحت فوق ..
:
بعد مرور يومين ..
،
في بيت بو حمد
:
ام حمد وابوه وحمد وثريا قاعدين في صاله دخل راشد سلم وقعد عدال امه اللي قالت: وين كنت ؟
راشد ببتسامه: بيت عمي
حمد تنهد بضيجة وسكت ،ام حمد طالعته ولفت لراشد: شو سويت بموضوع مهره كلمة عمك
هز راسه هيه وقال: كلمته بس متردد عمي يقول مايباها ترد لي اونه بيربيه بين عياله..
امه: لالا يا راشد دخيلك الا الموضوع هذا ضروري تردها وتقنع عمك وقوله حط شروطك ..
راشد: حط شروطه وانا موافق عليهن و… قطع عليه اتصال مهره رد عليها وهو يطلع برى ..
اما ام حمد رن تلفونها وشلته وهي تشوف رقم ام عوض :مرحبا السااع بام عوض
ام عوض: المرحب باجي ،، شحالج فديتج ربج بخير ..
ام حمد: بخير ونعمه فديتج يسرج الحال
ام عوض: فديتج ام حمد بغيت اتخبرج منوه البنت ام شعر طوييل ما شاء الله عليها واقفه هيا اليازيه بنتكم
ام حمد تحاول تذكر : أي وحده فديتج
وشوي نازلات سلامه واليازيه من فوق ..
اليازيه يلست عدال حمد وتسولف وياه
ام عوض طالع بنتها حمده وتاشر لها سكتي وقالت : والله ماعرفتها انا ياغير اظني من بنات ام سعيد ..
ام حمد قالت: قصدج مهره اللي شفتيها يوم الخطبه .
ام عوض: لالا مهره اعرفها ما اقصد مهره اقصد اختها اظني حلوه وجميله وشعرها لين ركبتها ولابسه فستان ذهبي ..
ام حمد باستغراب : صبري فديتج وزقرت اليازيه اللي لفت على أمها وهي تقول : اليازية ..
اليازيه حاطه ايدها على ايد حمد اخوها وتسولف لفت عليها وهي تبتسم:لبيه امايه
أمها: منيه البنت اللي وقفتي وياها امس لابسه فستان ذهبي وفاجه شعرها وشعرها طويل لين تحت ركبتها..
يزويً باندفاع: لطوف بنت عمي حمد .. ليششش !
حاست بوزها أمها وردت ع الحرمه وهي تقول: هيه فديتج اخت مهره اسمها لطيفة
ام عوض تبتسم : وربها محد رامس فيها .
ام حمد تضحك: لا ابشرج مطلقه
شهقة ام عوض وهي تقول : في ذمتج ليش !
ام حمد : ماعرف الأسباب والله ياغير انها بس ملجة وتطلقت يعني ما دخل عليها ريلها ولا شافها .
ام عوض تحمد ربها: يعني بنت
ام حمد: هي بنت اقولج مادخل عليها تبين تخطبينها
ام عوض: صراحه هيه البنت عايبتني وجميله وحلوه.
ام حمد في خاطرها افتكينا منها خازت عن درب حمد: الله يكتب اللي فيه خير .
ام عوض بتردد: ومهره ؟
ام حمد تبتسم: لا ابشرج ردها راشد طليقة ولديه تراها وردها فدييته اليوم !
ام عوض: بالبركة عيل .
ام حمد: الله يبارك لج فديتج
ام عوض تنهي المكالمه : زين عيل فداعه الله ..
ام حمد: في حفظ الرحمن
اول ما سكرت قال حمد بعصبيه: يايبه خطاب للطيفه
ام حمد بجذبه: لا تطمن ما تباها كانت تسال عن مهره ما تشوفني قتلها ردها على ذمته راشد
حمد زفر: اشوى
سلامه بزلة اللسان: هيه قالي عوض امه ما تبا مطلقات .
طالعها حمد بطرف عينه واليازيه قالت بقهر: والله مطلقه ولا غيره البارحه الحريم وين ماتسير يطالعنها بعيونهم بياكلنها والله غطت على كل الحضور هذي اللي قال فيها راشد الماجد من هيبتها غطت على كل الحضور …
ضحك حمد وهو يسمع مديح اخته وقال: طبعا مالها شبيه
نطقت ثريا بقهر وهي تقول: انتوا لكم ساعه ترمسون وماعرفت عن منو مهره عرفنا راشد ردها وهذا امر مستحيل الرجوع فيه انفرض عليه فرض لكن لطيفه منو ؟
اليازيه تضحك: والله تضحكين يا ثريا اونه انفرض عليه فرض
حاست بوزها وقالت بقهر: عساس بيسمعني صار لنا فتره منعزلين الله وكيلج
ضحكت يزوي وقالت: المهر ماخذه القلب
ثريا طالعتها وبقهر قالت: ماخذه القلب وبس ماخذه الريل بكبره حتى عقله.
|